1 Sámwel 5 - Bokyi Bible

Mkpukpu-Byěm-Osówo mu ne Banet-Fyilíta

¹ Nkéré mú banet-Fyilíta ba/koo mkpukpu-byěm-Osówo, ba/kúng kámú ké Ebenéze ba-jâ ne mǔ ké oshê ebe mú badakó Áshídot.

² Ba-yip kámú ba-da-tî ké kyise-orím-bukye ebe mú badakó Dágon, ba-bi kámú ányi cip fáráng ne orím-bukye ebe ámu.

³ Ké dyicófóróng, ké orî-dyicí, banet-Áshídot ba-rángê e ké orím-bukye ebe oo/myii bushú kyísí ké ecing ké bushú ḿbú mkpukpu-byěm-Osówo. Ba-da-bêem kámú kâng ba-bwât ba-tî kyikit ńkyí o/mû.

⁴ Ké dyicófóróng, ké orî-dyicí, ba-chîri ba/fu, orím-bukye ámu oo/chîmyii bushú kyísí ké bushú ḿbú mkpukpu-byěm-Osówo. Ńdyí o/chîmyii éné, dyishí ne abwô emen byi/búnê, ne mbyí byi/mû ányi kyísí ké ocím-dyifyi, kyi*da/shwôm omím emen nké o/waa*.

⁵ Nkyí nké tete kurún, banshâng Dágon ne kángkáng banet to ḿbé mbe ba-kyâ kámú ofê, ḿbé mbe ké Áshídot, ba*fí to ba-cím m byiká ké kyikit ánkyi*.

⁶ Óburúkpâbí o/kye banet-Áshídot busông kanong kanong, o-chi to kámbé ba-kpet eshî. Nyǐ o/kye kámbé busông, o-kye to banet ḿbé ba/mû ányi fáráng ne mbé, ké kyibî-orwôm mú o/chi o-kám kámbé ké enyam-byiko.

⁷ Nkéré mú mbé ba/ri ńkyí nkyi kyi-chi i, ba-raa ba/fu, Osówo mú Ézerel o-kú o-kyâ bě busông ne Dágon mú orím-bukye eten. Bii*bángê to mkpukpu-byěm-Osówo o-chîwaa nyín*.

⁸ Ba-twóm banet-kyitwóm kâng ba-da-kpî batu-Fyilíta ashí atánge ba-ba-cibi kyikit kyibónge, ba-bí kámbé ba/fu, byi-chi i nǎ ne mkpukpu-byěm mú Osówo mú Ézerel. Ba-faa kámbé ba/fu, yip n̂g kámú ba-jâ ne mǔ Gât. Ba-yip kâng kámú ba-jâ ne mǔ Gât, oshê-Fyilíta okíri.

⁹ Nké nkéré mú mǔ o/ribi áku, Óburúkpâbí o/kye oshê ámu to busông, o-chi kiǐtí-bushî kyi-róng kámbé. Nyǐ o/kye kámbé busông ne kyibî-orwôm ánkyi, ńkyí kyi/kám kángkáng banet ḿbé ké oshê ámu, bakínkán ne bwǎsíng.

¹⁰ Ba-twóm kâng mkpukpu-byěm-Osówo o-jâ Ékoron, oshê-banet-Fyilíta okíri. Nké nkéré mú mǔ o/ribi áku, banet-oshê ámu ba/wonge ba/fu, baa/bê ne mkpukpu-byěm mú Osówo-Ézerel nyín, eringe nyí oda bě eju ashí kángkáng.

¹¹ Ba-chîtwóm kâng ba-da-kpî batu-Fyilíta ashí amúmú, ba-raa ne mbé ba/fu, twóm m̂ mkpukpu-byěm-Osówo-Ézerel o-bwa esim dyijê ké oshê emen, eringe mǔ oo*ju bě ne byikû-banet eten*. Banet-oshê ámu bushî bu-róng kámbé kanong kanong ashí amúmú, ké nǎ, Osówo o/mû mu o-kyâ kámbé busông ḿbú boo*nwa eri*.

¹² Nang banet ḿbé ba/waa bakpó ba/rwôm kyibî-orwôm ánkyi, ne ba-tii ba-kó erím-bakye ebe ba/fu, echwáp kámbé.