1 Sámwel 4 - Bokyi Bible

Ba/koo Mkpukpu-Byěm-Osówo

¹ Ké nkéré ámu, [banet-Fyilíta ba/cibi ba-dim edanwa byití ne banet-Ézerel. Banet-Ézerel ba-dim kâng] edanwa ne mbé. Banet-Ézerel ba/bi bampyep-byití ebe ké Ebenéze, ḿbé Fyilíta ba-bi ḿbé ebe ké Áfek.

² Banet-Fyilíta ba-kye bunwa. Ne ké nkéré baa/nwa bunwa ḿbú boo*nwa eri* mbé ba/kpógê banet-Ézerel, ba-ju égot-banet nang bujam ké kyikit ánkyi.

³ Nkéré mú banet ḿbé ba/waa bakpó ba/bwa esim ké bampyep, banet-ashí-banet-Ézerel ba-bí ba/fu, kyi/cen nǎ ne Óburúkpâbí o-mîng banet-Fyilíta ba-kpógê bě kurún. Byica n̂g byi-da-kúng mkpukpu-byěm-Óburúkpâbí ké Shílo, eringe [nyǐ] o/chi o-ca ne be o-nyii bě ké abwô nyí banet-bushwôn eten.

⁴ Ba-twóm kâng banet-kyitwóm ba-ca Shílo ba-da-yip mkpukpu-byěm-Óburúkpâbí, mú mu kakyúng-butu ńké Óburúkpâbí mú o/rêe o-shwôm. Ne bwǎn-Élyi, Hófinyi ne Fyinéhas, ba-dim ne mkpukpu-byěm-Óburúkpâbí ké kyikû.

⁵ Nkéré mú mkpukpu-byěm-Óburúkpâbí o/ribi, banet-Ézerel ba/wonge ejá kyíbóng kyíbóng ké ojêe mú ba/jêe, mú o/chi esí e-náng.

⁶ Banet-Fyilíta ba/jwo dyiwonge ándyi, ba-raa ba/fu, kû n̂g ejwo eringe mbe ba-wonge e kyíbóng kyíbóng ké bampyep-banet-Hyíburus. Ányi kyi/byí nǎ. Nkéré mú mbé ba/jwo ba/fu, baa/ribi ne mkpukpu-byěm-Óburúkpâbí ké bampyep-banet-Hyíburus,

⁷ bushî bu-róng kámbé, ba-raa ba/fu, bukye boo/ribi ké bampyep ebe. Be byi/kpú. Dyizong-chwǒm wǎ ńdyín dyi/mû dyi*da bě echi ne*.

⁸ Yeě oda bě eman enyii ké abwô nyí erím-bakye ányi, nyí nyi ne busa kanong kanong. Erím-bakye ányi nké e/ju banet-Éjip ké kyikim-dyikán.

⁹ Cíp n̂g dyityém, ǎ banet-Fyilíta. Nwa n̂g bunwa wǎ banyinchéng, â kyi*fí éné* be byi/chi byi-firi básóng ḿbé banet-Hyíburus wǎ eringe mbé ba/mû básóng eten. Ké bubwô ámbu kâng, nwa n̂g bunwa wǎ banyinchéng-banet.

¹⁰ Banet-Fyilíta ba/nwa bunwa ne kángkáng busa ebe, ba-kpógê banet-Ézerel, ba-dim ba-zóngê e ba-câ ḿbú dyijê. Banet ḿbé ba/ju baa*nwa eri*. Ba/ju égot-basúja-banet-Ézerel etánge etánge ké byikit bujam esim diǐkpú.

¹¹ Ba-koo mkpukpu-byěm-Óburúkpâbí, ba-ju to bwǎn-Élyi, Hófinyi ne Fyinéhas.

Bukyû ḿbú Élyi

¹² Onet obónge mú o/fím ké kyikû ńkyí Běnjámin o/zóngê ochéé kyi-fím ké kyikit ńkyí mbe ba-nwa ng byití tete o-ribi Shílo, ké ochíchí-dyicí ándyi. O-ját byídí ké byiko, o-wuri ecing o-pwó ké dyishí, eringe odatông bafip.

¹³ Élyi mú ofong o/mû mu o-kédê ng ǎ kanong kanong kyi-kim ne mkpukpu-byěm-Óburúkpâbí o/mû me ké bukô-bukwóp mu o-tún n achi. Onyinchéng ámu o-sét kyiraa ánkyi ké oshê omúmú. Ba-wonge, ba-kpet eshî.

¹⁴ Élyi o-jwo ké mbe ba-wonge e éné, o-bí o/fu, dyiwonge ńdyín dyi/byí nǎ. Onyinchéng ámu o-zóngê o-wâa edasét Élyi kyi-kim ne nkyí.

¹⁵ Ké nkéré ámu, Élyi o/mû oo/rí bajam-aje banyii esim-aje onyiryiká ne achât, ne achi a/mû aa/sêe ǎ.

¹⁶ Onyinchéng ámu o-sét ǎ o/fu, me nn/chêe byití, ne nn/zóngê ochéé kyi-fím áku tete n-ribi nyín kurún. Élyi o-bí ǎ o/fu, ebóng kyi/chi, ǎ wǎn ejí.

¹⁷ Onyinchéng ámu o-faa ǎ o/fu, banet-Ézerel baa/chêe banet-Fyilíta. Banet ámbe baa/kpógê bě kanong kanong. Bwa kwán to, bwǎn eyên, Hófinyi ne Fyinéhas, baa/ju kámbé, ba-koo to ne mkpukpu-byěm-Óburúkpâbí.

¹⁸ Ńdyí onyinchéng ámu o/sét kyi-kim ne mkpukpu-byěm-Óburúkpâbí, Élyi o-bâa ké kyichí ńkyí o/mû o/kyú o-myii esim kyísí ké bukô-dyifyi. Nyǐ o/mû oo/kâa kanong kanong, ne o/mû o/rêe to mú kyitông emen kyi/búnê ké dyimyii ńdyí o/myii éné, o-waa ányi o-kpú. Nyǐ o/mû oo/kyú onet-dyishí mú banet-Ézerel ké bajam-aje bafee.

Bukyû ḿbú Onyǐnkú-Fyinéhas

¹⁹ Onyi-wǎn-Élyi, mú onyi-Fyinéhas, o/mû oo/koo dyifít, ne dyifít dyi/mû dii/kán ǎ kanong kanong ńdyí o/mû o-kú o-bâ ebafwon. Nkéré mú nyǐ o/jwo ba/fu, baa/koo mkpukpu-byěm-Osówo, o-jwo to ba/fu, bonchí-otyép emen ne otyép emen to oyén baa/kpú, bufwon bu-waa ányi ké abe bu-kpet ǎ enwa, o-waa to ányi o-fwon.

²⁰ Ńdyí mu o-kpú u, ḿbé banyinyi ḿbé ba/mû mbe ba-chwáp ng ǎ, ba-raa ne nyǐ ba/fu, cíp dyityém, aa/fwon wǎn-onyinchéng. Nké nyǐ o*da/fwôo atông ké ńkyí ánkyi* nang ojá to o*da/faa*.

²¹ Nyǐ o/fé wǎn ámu dyizîn, Ékabat, ányi kyi/byí, busa ḿbú Osówo boo/man ké Ézerel. Ányi nyǐ mu o-raa ng kyi-kim ne mkpukpu-byěm-Osówo mú baa/koo ne kyi-kim to ne bukyû ḿbú Élyi ne Fyinéhas.

²² O/raa o/fu, busa ḿbú Osówo boo/man Ézerel, ké nǎ, baa/koo mkpukpu-byěm-Osówo.