1 Sámwel 30 - Bokyi Bible

Byití ḿbyí ba/nwa ne Banet-Amálek

¹ Ńdyí ací aa/man afee, Dívit ne banet emen ba/bwa esim ké Zíkalak. Banet-Amálek ba/mû baa/bakpû ne bunwa ké kyicê-Júda ńkyí busyísen, ba-kye oshê emen Zíkalak bunwa. Ba-shí oshê,

² ba-kám kángkáng banyinyi. Ba*da/ju onet nang obónge* nké ba/kúng kámbé ashí amúmú ba-dim ne mbé.

³ Nkéré mú Dívit ne banet emen ba/ribi, ba/ri ba/fu, baa/shí oshê, ne banyi ebe ne bwǎn ebe ḿbé banyinchéng ne ḿbé banyinyi baa/kúng kámbé ba-dim ne mbé.

⁴ Dívit ne banet emen ba-kpet etii, ba-tii tete ba-kyee.

⁵ Nang banyi-Dívit to, Ahínom ne Abyígal, ba/kpî kámbé ba-dim ne mbé.

⁶ Dívit o/mû o/firi ké kiǐtí-afaníkong, ké nǎ, kafâ ka/mû ka-kú ka-sa ng banet emen kanong kanong ké bwǎn ebe ḿbé baa/tánê, ne ba/mû ba-kú ba-bâ ebatím Dívit aká. Nké Óburúkpâbí mú Osówo emen o/chi dyityém dyi-rêe ǎ.

⁷ Dívit o-raa ne Abyǎta mú nchi kyifen-Osówo, mú wǎn-Ahímélek, o/fu, bâ mě ne chwǒm-epé esô. Abyǎta o-yip kánkyí o-ba-kye ǎ.

⁸ Dívit o-bí Óburúkpâbí o/fu, nró banet ámbe ḿbé ba/bakpû ne bunwa ké oshê ejí dí. Ne n/chi n-kám kámbé dí. Óburúkpâbí o-faa ǎ o/fu, ca ne mbé ké kyikû. A/chi a-kám kámbé, a-nyii banet ḿbé mbé ba/bakám kámbé ba-dim ne mbé.

⁹ Dívit ne égot-banet emen echât ba-zûu kâng. Ne ńdyí mbé ba/daribi ké kaace ńké badakó Béso, banet emen bakíri ba/waa ányi.

¹⁰ Dívit o-shwôm kashú ne égot-banet emen efee ḿbé ba/waa. Égot nyí áku, nyí ebónge ba/mû baa/kyee ba-shwôm mú ba*da/man enyáng kaace ánke* ba-waa kâng ké esim.

¹¹ Banet ḿbé ba/mû ba/waa ne Dívit ba-da-ri wǎn obónge mú o/fím Éjip, ké dyikán. Ba-kpî ǎ ba-ba-kye Dívit. Ba-kye ǎ byiryíng ne omu

¹² ne byirim-fyîk ḿbyí bii/jwóm ne biincicôk-byirim-byichí byifee ḿbyí badakó rézin. Nkéré mú oo/ryí, busa bu-nung ǎ. Ké byirim-ací kpínkpín byichât, nyǐ o/mû o*da/ryí ne nang kaǎchwóm* o-jwáp nang omu ómu*.

¹³ Dívit o-bí ǎ o/fu, bonchí eyên o-bángê e nǎ, wo to a/fím nyá. Nyǐ o-faa ǎ o/fu, me n-chi i wǎn-Éjip, ósóng-onet-Amálek. Bonchí ejí o/dim o-sí mě ací a/kwárê achât, ké nǎ, me m/mû mu n-rwôm m.

¹⁴ Be byi/mû byi/ce byití ké esí nyí banet-Kérétat, ké kyicê-busyísen-Júda ne ké esí nyí banet ḿbé Kálep, ne byi/shí oshê mú badakó Zíkalak.

¹⁵ Dívit o-bí ǎ o/fu, a/chi a-tông mě bukwóp ḿbú banet ámbe ba/wâa? O-faa Dívit o/fu, n-chi i éné, â a/ryí mě ocím a-sem Osówo a/fu, wo aa*ba/chi a-ju mě* a-bwa nang ne me esim a-kye bonchí ejí*.

¹⁶ O-tông kâng Dívit bukwóp ba-kâm banet ámbe. Mbé ba/mû baa/pwôo byiryibyiryi ké kyikit ánkyi, ba-ryí i, ba-jwáp ng, ba-chi i dyijî, ké bubwô-bujê-byěm ḿbyí mbé ba/wuri ké Fyilíta ne Júda.

¹⁷ Ké dyicófóróng, ké orî-dyicí, Dívit o-kye kámbé bunwa, ba-nwa tete dyikurúku dyi-fyi. Kyi*da/shwôm égot-byisat-banet efee ḿbé ba/yú ké boonyam-atû ḿbú mbu ne kyirún nké ba/chêe* ḿbé áku ba/kpú nang onet o*da/waa*.

¹⁸ Dívit o-nyii banet emen bamúmú ne kángkáng byěm to ḿbyí banet-Amálek ba/mû ba/kúng, cibicibi ne banyi emen ashí afee.

¹⁹ Nang kaǎchwóm ka*da/tánê*. Dívit o/koo kángkáng bwǎn-banet emen ḿbé banyinchéng ne ḿbé banyinyi ne kángkáng byěm ḿbyí banet-Amálek ba/mû ba/wuri.

²⁰ Ba-koo to kángkáng abóng-etám-ebû ne abóng-bampong. [Banet emen ba-kûró byitú ámbyi byimúmú byi-câ kámbé kashú,] ba-raa ng ba/fu, byěm ḿbyín byi/já Dívit.

²¹ Dívit o-bwa kâng esim o-kâm égot-banet ányi ebónge, ḿbé ba/mû baa/kyee ba-shwôm mú badace ne nyǐ ké kyikû, ne ba/mû ba/waa ké esim ké kaace ńké Béso. Ba-dim ba-wâa edakâm Dívit ne banet emen, Dívit o-dim o-kâm kámbé, o-ta kámbé kyiraa ne bunyîn-dyityém.

²² Nké banet bakíri ḿbé ba/bên dyityém, ḿbé ba*da/byí chwǒm* ḿbé ba/mû ba/ce ne Dívit ké kyikû, ba/kpet eraa ba/fu, mbé ba*da/ce ne be* ne ké bubwô ámbu, be bii*ba/chi byi-kye kámbé chwǒm nang kyibónge ńkyí byi/wuri*. Mbé ba-man n ekúng banyi ebe ne bwǎn ebe ba-dim.

²³ Nké Dívit o/faa kámbé o/fu, bwǎn-bané ejí, ben baa*man echi dyizong-chwǒm ándyi ne ńkyí Óburúkpâbí oo/kye bě*. Nyǐ o/bám bě, o-chi bě byi-kpógê banet ḿbé ba/ba bě ebyí byití.

²⁴ Onet o*fí nang obónge mú odabángê ne ńkyí ben ba/raa*. Nang yeě o-man o-koo eringe ebónge. Nang onet mú o/waa ké esim ne atû o-koo ng eringe ebónge ne onet mú o/ce byití.

²⁵ Dívit o-fé kyije éné, ne kyije ánkyi kyi/waa ké Ézerel tete kurún.

²⁶ Nkéré mú Dívit o/bwa esim ké Zíkalak, o/twóm kyicê-byěm ḿbyí ba/koo, ba-kye bacín emen ḿbé banet-ashí-Júda, o/fu, basét kámbé ba/fu, nyín něen eyáré nyí byi/kye běn, ké byěm ḿbyí byi/koo ne banet-bushwôn-Óburúkpâbí.

²⁷ O-twóm to kámbyí ba-kye banet-Bétel ne ḿbé Ryíma, ké kyicê-busyísen ńkyí Júda, ba-kye to banet ḿbé eshê nyí Játyi

²⁸ ne Áro ne Sifyímot ne Eshítémwa

²⁹ ne Rákal ne eshê nyí Jerámyil ne nyí Kên

³⁰ ne banet ḿbé ké eshê nyí Hóma ne Buráshan ne Átak

³¹ ne Héboron. O-twóm ba-kye ké kángkáng byikit ḿbyí nyǐ ne banet emen ba/mû baa/yâa ké mbyí.