1 Sámwel 26 - Bokyi Bible

Dívit o/chîzú Otu Sôl Abwô

¹ Banet bakíri ba/fím Zîp ba-ba-kâm Otu Sôl ké Gyíbya, ba-sét ǎ ba/fu, Dívit mu o-rem m ké kaku-Hakyíla, ké bukô-kyikim-dyikán ńdyí Júda.

² Otu Sôl o-dim odǐm ne égot-basúja onyiryiká ḿbé badajang enwa byití ba-shwôm ké kyikim-dyikán ánkyi ńkyí Zîp, ba-wâa edakyé Dívit.

³ Ba-bi bampyep-byití ebe fáráng ne bukwóp, ké kaku ńké Hakyíla. Dívit o/mû o/tôong ké kyikim-dyikán, ne nkéré mú nyǐ o/jwo ba/fu, Otu Sôl oo/bê ǎ ekyé,

⁴ o-twóm banet-boǒfêp-esí ḿbé ba/bakyé kyikû ba/fu, nyǐ mu ányi ké ntûntû.

⁵ O-waa o-dim odǐm o-da-ri ochíchí-kyikit mú Otu Sôl ne Ábina, mú onet-dyishí-basúja-Otu Sôl, ba/rí. Otu Sôl o/rí ké otyém ne otyém ké kafâ-bampyep, banet emen ba-wáp ǎ ba-fé ké kafâ.

⁶ Dívit o-bí kâng Ahyímélek mú o/fím Hyítat ne Abyísha mú wǎn-boné-Jówap, mú boné ebe o/mû o-bángê e Zerúya o/fu, ben ashí afee yeě o/chi o-ca ne me ké kyikû ké bampyep-Otu Sôl. Abyísha o-faa o/fu, me n-câ.

⁷ Ké buchú ámbu kâng, Dívit ne Abyísha ba/nung ké bampyep-Otu Sôl, ba-ri Otu Sôl sáre ké otyém ne otyém mú bampyep, ne kyíbye ńkyí o/bi kyísí fáráng ne dyishí emen. Ábina ne basúja ḿbé áku ba/mû ba/wáp ǎ ba-fé ké kafâ mbe ba-rê ng.

⁸ Abyísha o-raa ne Dívit o/fu, Osówo oo/fé ǒ onet-bushwôn eyên ké abwô ké buchú ḿbún. Mîng mě kâng n-yip kyíbye ńkyí emen nyǐ oyén n-tím ǎ kyi-sát kyi-tím kyísí ké otîm mú nda ǎ etím kabónge nké nke. Mm*ba/chi n-tím ǎ kampén kafee*.

⁹ Nké Dívit o/faa o/fu, wo aa*man a-ju ǎ*. Óburúkpâbí o/chi o-kye nang yeě nang yeě busông ké ntûntû, mú odaju otu emen mú nyǐ o/cá.

¹⁰ Dívit o-chîraa o/fu, ké bushú ḿbú Óburúkpâbí mú mu okpó, me mu n-nyît ng n/fu, Óburúkpâbí oyén nké o/chi o-ju Otu Sôl, kakíri ké nkéré mú nkéré emen oo/fyi mú odakpú bukyû ḿbú Osówo, aa kakíri ké nkéré nyǐ odakpú ké byití.

¹¹ Óburúkpâbí oo*bángê mě n-kan n/fu, m-man n ne nyǐ* nyǐ mú Óburúkpâbí oo/kúng ǎ butu*. Mîng byi-yip kyíbye emen ne kaǎtí-omu byi-dim ne mbyí.

¹² Dívit o-yip kâng kyíbye ne kaǎtí-omu ányi fáráng ne dyishí-Otu Sôl, nyǐ ne Abyísha ba-dim. Nang onet o*da/ri* o-nyît nang onyît ńkyí kyi/chi* o-jwóbê nang ojwóbe*. Mbé ashí amúmú ba/mû mbe ba-rê ng kanong kanong, ké nǎ, Óburúkpâbí o/mû oo/twóp kámbé ashí amúmú burê ḿbú boo*nwa eri*.

¹³ Dívit o-nyáng kâng o-jâ bukô-ndege-esí ḿbú áku, o-yú kyíbóng-kaku, ányi oo/tíbî kanong kanong.

¹⁴ O-wonge o-kó basúja-Otu Sôl ne Ábina, o/fu, Ábina, wo amu a-jwo ng mě dí. Ábina o-faa o/fu, yeě éné mu o-wonge e o-jwóbê otu ké burê.

¹⁵ Dívit o-faa ǎ o/fu, Ábina, *chí wo nké a/rêe a-shwôm kángkáng banet ké esí-Ézerel dí*. Ebóng kâng ne wo a*fí a-man n ebám bonchí eyên* mú mu otu*. Onet obónge o/nung ányi abeabe ké bampyep enen o/fu, nyǐ o-bâ ng eju bonchí eyên.

¹⁶ Wo a*da/chi bǎmkpóngé eyên* ǎ Ábina. Me mu n-ryí i ǒ ocím n-sem m Óburúkpâbí mú mu okpó n/fu, ben ashí amúmú ba/kwárê mú bada běn eju, ké nǎ, ben ba*da/bám bonchí enen mú Óburúkpâbí o/kúng ǎ butu*. Kan achi a-ri, kyíbye-otu nkyi nyá. Kaǎtí-omu to ńké ka/mû ǎ fáráng ké dyishí nke nyá.

¹⁷ Otu Sôl o-cêe ejá-Dívit, o-bí o/fu, Dívit mú wǎn ejí, wo éné dí. Dívit o-faa ǎ o/fu, âa, me, ǎ otu ejí.

¹⁸ Ne o-chînye o-bí ǎ o/fu, ebóng ne wo a/tôong a-ró ng mě a-bâ ké kyikû, ǎ bonchí, me ḿgbán eyên. Me n/chi ebóng. Ebóng kyibî ńkyí me n/chi.

¹⁹ Otu ejí, fwôo atông a-jwo ńkyí mu m-bâ ebaraa. Â Óburúkpâbí nké oo/chi ǒ a-bírî bunwa ne me, nyǐ o-koo ng kyifen ńkyí adachi a-kye ǎ, kyi/chi kyi-chi ǎ o-yángê okabe emen. Nké â banet nké ba/chi ǒ, kyi/bát Óburúkpâbí oshú kámbé. Ké nǎ, mbé baa/ró mě ké esí nyí Óburúkpâbí n-jâ ké oshê mú me ndakye bakye ḿbé esí ekíri ofê.

²⁰ *Dachi a-mîng ba-ju mě ké esí nyí me n*da/fím ké nyǐ* tíbítíbí ké bushú ḿbú Óburúkpâbí*. Ebóng ńkyí otu-Ézerel o/bê ebaju kaajujware wǎ me. Ebóng nyǐ mu o-ryuu ng mě o-bâ wǎ kanurung ńké nke ka-kyú u ké dyikán.

²¹ Otu Sôl o-faa ǎ o/fu, me nn/chi kyibî. Bwa esim, ǎ Dívit mú wǎn ejí. Me mm*ba/chi n-chî ǒ echi kyibî ne banyá* ké nǎ, wo aa/mîng mě okpó ké buchú ḿbún. Me nn/róng enyam. Me nn/chi kyibî ńkyí kii*nwa eri*.

²² Dívit o-faa ǎ o/fu, kûri kyíbye eyên, ǎ otu ejí. Onet enen obónge obâ kwán o-ba-koo.

²³ Óburúkpâbí mu o-yárê ng banet ḿbé ba/fé dyityém ne nyǐ ne ḿbé mbe ba-chi i kanong. Kurún, nyǐ o/yip ǒ o-fé mě ké abwô, nké me n*da ǒ echi kyibî* wo mú nyǐ oo/kúng ǒ butu.

²⁴ Eringe nyí me mm/mîng ǒ okpó kurún, kyi/bát nyǐ ochi mě to éné o-nyii mě ké kángkáng afaníkong.

²⁵ Otu Sôl o-faa Dívit o/fu, Osówo ojware ǒ, ǎ wǎn ejí. Nang ebóng chwǒm ńkyí amu a-chi i, kyi-man kyi-ca ǒ kashú. Dívit o-dim kâng kiǐfáng ńkyí emen. Otu Sôl o-bwa esim dyijê.