1 Sámwel 23 - Bokyi Bible

Dívit o/nyii Oshê mú Kyíla

¹ Dívit o/jwo ba/fu, banet-Fyilíta mbe ba-kyâ banet ḿbé Kyíla bunwa, ne mbe ba-jii ng kámbé byiryíng to ḿbyí ba/fuu abeabe.

² O-bí kâng Óburúkpâbí o/fu, nca n-da-kye banet-Fyilíta bunwa dí. Óburúkpâbí o-faa ǎ o/fu, âa, kye kámbé bunwa eringe adanyii banet-Kyíla.

³ Nké banet-Dívit ba/sét ǎ ba/fu, byěm mbyi nyín chwóó ké Júda ḿbyí byida bě echi bushî. Kyi/chi kyi-bên kyi-shwôm â byi/ce Kyíla byi-da-kye basúja-Fyilíta bunwa.

⁴ Dívit o-chîpem kâng ne Óburúkpâbí. Óburúkpâbí o-sét kâng Dívit o/fu, ca a-da-kye banet-Kyíla bunwa, ké nǎ, me n/chi n-chi ǒ a-kpógê banet-Fyilíta.

⁵ Dívit ne banet emen ba-dim kâng ba-ca Kyíla, ba-kye banet-Fyilíta bunwa. Ba-ju kámbé bujê-banet ba-koo kámbé byitú. Ne éné nké Dívit o/nyii oshê ámu.

⁶ Nkéré mú Abyǎta mú wǎn-Ahyímélek o/chêe o-kâm Dívit ké Kyíla, o/yip chwǒm-epé esô o-dim ne nkyí.

⁷ Ba-sét Otu Sôl ba/fu, Dívit oo/dim o-jâ Kyíla. Nyǐ o-faa o/fu, Osówo oo/yip Dívit o-fé mě ké abwô. Dívit oo/róng ké kaǎtám ké onung mú o/danung ké oshê mú ba/bi ekpe ba-wáp kámú ba-fé ké kafâ, ne afyi nyí shwaneshwane.

⁸ Otu Sôl o-kó kâng basúja emen o/fu, badim byití, ba-kye banet-Kyíla bunwa ba-kám Dívit ne banet emen.

⁹ Nkéré mú Dívit o/jwo ba/fu, Otu Sôl mu o-pám m o/fu, nyǐ o-da ng ǎ ekye bunwa, o-sét Abyǎta mú nchi kyifen-Osówo o/fu, bâ kwán ne chwǒm-epé esô.

¹⁰ Dívit o-sét kâng Óburúkpâbí mú Osówo-Ézerel o/fu, me nn/jwo ba/fu, Otu Sôl mu o-pám m o/fu, nyǐ o-bâ Kyíla o-ba-bên kámú, ké bubwô ejí, me ḿgbán eyên.

¹¹ Banet-Kyíla ba/chi ba-níbî mě ba-kye ǎ dí. Nyǐ o/chi o-bâ ké ntûntû dí, wǎ eringe nyí n/jwo dí. Óburúkpâbí mú Osówo-Ézerel, n/tîm ǒ arông n/fu, faa mě ojá. Óburúkpâbí o-faa ǎ o/fu, Otu Sôl o/chi o-bâ.

¹² Dívit o-chî ǎ ebí o/fu, banet-Kyíla ba/chi ba-níbî mě ne banet ejí ba-kye ǎ dí. Óburúkpâbí o-faa ǎ o/fu, mbé ba/chi ba-chi éné.

¹³ Dívit ne banet emen, égot-banet nang echât o, ba-dim kâng ké Kyíla odǐm mbe ba-cen n ba-câ kashú. Nkéré mú Otu Sôl o/jwo ba/fu, Dívit oo/chêe ké Kyíla, o-zú dyityém ké ńkyí o/mû mu o-pám m.

Dívit ké Esí nyí Eku Éku

¹⁴ Dívit o/rem ké esí nyí eku éku, ké kyikim-dyikán ńkyí kyi/fárâng ne Zîp. Kángkáng nkéré, Otu Sôl o/mû mu o-kan n ǎ ekyé, nké Osówo o*da ǎ eyip o-kye Otu Sôl*.

¹⁵ Dívit o-ri o/fu, Otu Sôl o/dim ǎ edaju. Dívit o/mû ké Hóres, ké kyikim-dyikán ńkyí kyi/fárâng ne Zîp.

¹⁶ Jónátan o-dim o-kâm ǎ áku, o-fé ǎ busa, o-sét ǎ o/fu, Osówo o-man o-ku ǎ nang ké ebóng bukwóp.

¹⁷ O-raa ne nyǐ o/fu, *dachi a-shî*. Bonchí ejí Otu Sôl oo*ba/chi o-man ǒ eju*. Nyǐ mu o-nyît ng kanong kanong o/fu, wo nké a/chi a-kyú otu mú Ézerel, ne mu o-nyît ng to o/fu, me n/chi n-kyú ǒ nnyinyěng-onet-dyishí.

¹⁸ Mbé ashí afee ba-sem Osówo ba/fu, mbé ba-ryí i bucín-dyityém ne barî. Dívit o-waa ányi ké Hóres, Jónáta o-bwa esim dyijê.

¹⁹ Banet-Zîp bakíri ba-dim ba-kâm Otu Sôl ké Gyíbya. Ba-sét ǎ ba/fu, Dívit mu o-rem m ké esí eten, ké Hóres, ké kaku ńké Hakyíla, ké kyicê-busyísen-kyikim-dyikán ńdyí Júda.

²⁰ Be byimu byi-nyît ng, ǎ otu eten, eringe nyí wo amu a-ryuu ng kanong kanong a/fu, a-kám m ǎ. Bâ kâng ké esí eten, be byi-man byi-chi eringe nyí ada ǎ ekám.

²¹ Otu Sôl o-faa kámbé o/fu, kyi/bát Óburúkpâbí ojware běn, eringe nyí ben ba/cángê dyityém éné ne me.

²² Ca n̂g ba-chîdakyé kyikû kanong kanong. Kyé n̂g kyikû kanong kanong ba-nyît kyikit ńkyí mu o-kyú u, ba-ri to onet mú o/ri ǎ ké kyikit ánkyi. Me n/jwo ba/fu, nyǐ o-nyît ng byinyídíng kanong kanong.

²³ Ryuu n̂g kyikû ba-nyît bachíchí-byikit ḿbyí mu o-rem m, ne bwa n̂g esim babap ké ntûntû ba-ba-sét mě. Me n/chi n-dim kâng ne ben, ne â nyǐ o/tôong ké esí ányi, me n/chi n-kyé ǎ tete nang nkyi ńkyí nda ǎ eryuu ké esí-Júda emúmú.

²⁴ Ba-dim kâng ba-bwóp Otu Sôl kashú ba-bwa dyijê ké Zîp. Dívit ne banet emen ba/mû ké kyikim-dyikán ńkyí Máwon, ké ndege-esí mú banet ba*fí ba-kyú u* ké kyicê-busyísen-kyikim-dyikán ńkyí Júda.

²⁵ Otu Sôl ne banet emen ba-zûu ba-wâa Dívit edakyé, nké Dívit o/jwo kyi-kim ne nkyí, ne o-dim kâng o-jâ ké kaku ńké aká áka, ké kyikim-dyikán ńkyí Máwon, o-kûkyú áku. Nkéré mú Otu Sôl o/jwo kyi-kim ne nkyí, o-dim o-ró ng ǎ o-câ.

²⁶ Otu Sôl ne banet emen ba/mû ké bukô-kaku bubónge, ńké ka/kyii kámbé ne banet ḿbé Dívit, ḿbé ba/mû ké bukô-kaku ḿbú áku. Mbé ba/mû mbe ba-zóngê e babap eringe badachêe Otu Sôl ne banet emen, ḿbé ba/mû ba-kú ba-fárâng ng kámbé ba-câ kanong kanong, mú ba/mû ba/firi kámbé ké okâm.

²⁷ Onet-kyitwóm o-waa ányi o-ribi. O-sét Otu Sôl o/fu, bwa esim babap, banet-Fyilíta baa/kpû ne byití ké esí eten.

²⁸ Otu Sôl o-mîng kâng Dívit eró, o-bwa edanwa ne banet-Fyilíta. Éné nké kyi/cen ne ba-kûkó kaku ánke Kaku-Okyii.

²⁹ Dívit o-dim o-wâa ké esí nyí Ngédyi, ké kyikit ńkyí o/darem.