1 Sámwel 22 - Bokyi Bible

Ba/ju Banchi Kyifen-Osówo

¹ Dívit o/chêe ké oshê-Gât o-dim o-jâ ké bucim fáráng ne oshê mú badakó Adúlam. Nkéré mú bwǎn-bané emen ḿbé banyinchéng ne kyikû-banet emen kángkáng ba/jwo ba/fu, nyǐ mu áku, ba/dim ba-da-kâm ǎ.

² Banet to ḿbé ba/mû mbe ba-cít ng kámbé nang ḿbé ba/mû ba/ryí afwá ne nang ḿbé kyi/mû kyi*da/nyîn kámbé* ba/dim to ba-kâm ǎ. Mbé ashí amúmú ba/mû égot-banet nang efee, nyǐ o-firi onet-dyishí ebe.

³ Dívit o-dim ányi o-jâ Myízipa, ké esí nyí Mówep. O-sét otu-Mówep o/fu, kamgbe, mîng bonchí ejí ne boné ejí ba-bâ ba-ba-kyú ne wo tete n-kyé kyikû n-nyît ńkyí Osówo mu o-bâ ebachi o-kye mě.

⁴ Dívit o-mîng kâng bonchí ne boné emen ne otu ámu. Mbé ba-kûkyú ányi ne nyǐ ńdyí Dívit mu o-rem m ké bucim ámbu.

⁵ Mkpábé mú odasét byiraa-Osówo, mú odabángê Gât, o-dim kâng o-ba-kâm Dívit. O-sét ǎ o/fu, *dachi a-kyú nyín* dim odǐm a-jâ ké esí nyí Júda. Dívit o-dim káng o-jâ ké kyizinge ńkyí Héret.

⁶ Dyicí dyibónge, Otu Sôl o/mû me ké oshê mú badakó Gyíbya, ké busi-kyichí ńkyí badakó tamárik, kyíbóng-kaku, ne kyíbye emen ké bubwô, kángkáng banet-ashí-basúja emen ba-bwom ba-wáp ǎ ba-fé ké kafâ. Banet ba-sét ǎ ba/fu, baa/ri Dívit ne banet emen.

⁷ Nyǐ o-raa kâng ne banet-ashí-basúja emen o/fu, fwôo n̂g atông ba-jwo, ǎ bwǎn-Běnjámin. Ben ba/kabe ba/fu, Dívit o/chi o-kye běn byifát ashí amúmú dí. O-chi běn to ba-firi banet-ashí-basúja emen dí.

⁸ Nkyí nké ben bamu ba-pám m mě kyibî echi? Nang onet obónge ké burwám enen o*fí* mú o/sét mě o/fu, wǎn mú ejí me oyén oo/cibi kyikû ne Dívit*. Nang onet obónge o*fí* mú mu o-kérê ng kyi-kim ne me* o-sét mě nang osêt o/fu, Dívit mú mu onet mú ejí* kántîk mu o-kyé ng bukwóp ḿbú oda mě eju* ne wǎn mú ejí to oo/rêe ǎ dyityém o/fu, ochi éné*.

⁹ Dôk o/mû ányi cip ne banet-ashí-basúja-Sôl. O-faa o/fu, me n/ri Dívit nkéré mú o/ce kyikit-Ahímélek mú wǎn-Ahítup, ké oshê mú Nôp.

¹⁰ Ahyímélek o-bí Óburúkpâbí ńkyí Dívit odachi. O-kye kâng Dívit byiryíng ne kashwám ńké Golyât mú o/fím Fyilíta.

¹¹ Otu Sôl o-twóm kâng ba-da-kpî Ahyímélek mú nchi kyifen-Osówo ne bwǎn-bané emen ashí amúmú ḿbé ba/mû to banchi kyifen-Osówo ké Nôp, ba-bâ.

¹² Otu Sôl o-sét Ahyímélek o/fu, fwôo atông a-jwo, ǎ Ahyímélek. Ahyímélek o-faa o/fu, mu n-jwo ng, ǎ bonchí.

¹³ Otu Sôl o-bí ǎ o/fu, ebóng kyi/chi ne wo ne Dívit bamu ba-pám m mě kyibî echi. Ebóng kyi/chi ne a-kye ǎ byiryíng ne kashwám, a-pem to ne Osówo ké bubwô emen. Kántîk, nyǐ oo/bírî mě esim, ne mu o-bám m bukwóp ḿbú oda mě eju.

¹⁴ Ahyímélek o-faa o/fu, Dívit o-chi i onet-dyishí-basúja eyên mú mu o-fâ dyityém ne wo o-shwôm. Nyǐ o-chi i onet eyên ne [onet-dyishí]-basúja eyên ḿbé mbe ba-bám m ǒ, ne kángkáng banet to mbe ba-kyâ ǎ ofê kanong kanong ké kyibám-butu eyên. [

¹⁵ Âa, me m/pem ne Osówo ké bubwô emen, ne ńkyín *chí mbwôp kashú-nkéré*.] Kyi-kim ne opâm mú byida ǒ echi kyibî, ǎ otu ejí, *dachi a-bât mě ne nang onet obónge ké kyikû ejí*. Me n*fí n-nyît ng chwǒm nang kyibónge kyi-kim ne kyiraa ánkyi*.

¹⁶ Otu Sôl o-faa o/fu, Ahyímélek, wo ne bwǎn-bané eyên ashí amúmú ba-man ba-kpú.

¹⁷ O-raa kâng ne banet ḿbé mbe ba-bám m ǎ, ḿbé ba/bwom ányi fáráng ne nyǐ o/fu, ju n̂g banchi kyifen-Óburúkpâbí ḿbén. Mbé ba/cibi kyikû ne Dívit, ne mbé ba*da mě esét ba/fu, mú mǔ oo/chêe* nang ké mbé ba/mû mbe ba-nyît ng kángkáng ńkyín. Nké banet ámbe ḿbé ba/mû mbe ba-bám m ǎ ba*da/bángê bubwô ebe ebêem kyíbóng ba-ju banchi kyifen-Osówo ámbe*.

¹⁸ Otu Sôl o-sét kâng Dôk o/fu, wo ju kámbé. Dôk o-ju kâng kámbé ashí kángkáng. Dyicí ándyi, nyǐ o/ju, bajam-banchi kyifen-Osówo banyii esim batánge, ḿbé ba/mû baa/kwárê ké bǎmkpóngé echi ḿbé chwǒm-epé esô ekúng.

¹⁹ Otu Sôl o-kye busa to o/fu, baju kángkáng banet-Nôp ḿbé áku, ḿbé oshê-banchi kyifen-Osówo. Banyinchéng ne banyinyi ne bwǎsíng ne bwǎn ḿbé ba/tôong ké abwô ne bampong ne boonyam-atû ne etám-ebû, ba/ju kámbyí byimúmú.

²⁰ Nké Abyǎta mú wǎn-Ahyímélek o/chêe o-dim o-kâm Dívit.

²¹ O-sét ǎ eringe Otu Sôl oo/ju banchi kyifen-Óburúkpâbí.

²² Dívit o-sét ǎ o/fu, nkéré mú me n/ri Dôk ányi dyicí ándyi, me n/nyît n/fu, nyǐ o/chi o-sét Otu Sôl ké ntûntû. Ne ké bubwô ámbu, [ké dyishí ejí nké kyi/cen ne] ba-ju kángkáng bwǎn-bané eyên.

²³ *Dashî* kûkyú ne me. Otu Sôl mu o-ryuu ng o/fu, nyǐ o-ju ng mě ne wo, nké wo a/chi a-kpen ké bubwô ejí.