1 Sámwel 21 - Bokyi Bible

Dívit o/chêe Otu Sôl

¹ Dívit o/dim o-kâm nchi kyifen-Osówo mú odabángê Ahyímélek, ké Nôp. Ahyímélek o-byí o-tím m banê o-bâ, o-bâ ǎ ebakâm. O-bí ǎ o/fu, nkyi nǎ ńkyí wo a/bê nyín onet ké kyikû o*fí*.

² Dívit o-faa ǎ o/fu, Otu Sôl nké o/twóm mě nyín. Nyǐ o/sét mě o/fu, me n*dachi n-chi onet nang obónge o-nyît kyi-kim ne ńkyí nyǐ o/twóm mě ebachi*. Kyi-kim ne banet ejí, me nn/sét kámbé n/fu, bakâm mě ké kyikit kyibónge.

³ Kántîk kâng, wo amu ne ebóng ńkyí ada mě ekye. Kye mě byirim-berêt byitánge, aa nang ebóng chwǒm ńkyí amu ne nkyí.

⁴ Nchi kyifen-Osówo ámu o-faa ǎ o/fu, me n*fí ne berêt mú kwán* kyi-cibi ne mú o/já Osówo*. A-man n eyip kámú, â banet eyên ba*da/rí ne ne banyinyi abeabe*

⁵ Dívit o-faa ǎ o/fu, ké ntûntû, mbé ba*da/rí ne*. Banet ejí mbe ba-tî ng byiko ebe kanong kángkáng nkéré nang nkéré orá mú byidace bucen ḿbú kwán, kántîk kâng, mú bii/bê bucen ḿbú byití kyi-kyú u nǎ.

⁶ Nchi kyifen-Osówo o-kye kâng Dívit berêt ámu mú o/já Osówo, ké nǎ, berêt mú nyǐ o/mû ne mǔ o/mû mú ámu nké nke mú baa/kye Osówo, mú ba/fîm kámú ké ókpákpúrúk-ociring ba-tî okíri mú ofyîfî.

⁷ Ntûn byitú-Otu Sôl mú onet-dyishí, mú odabángê Dôk, mú o/mû o/fím Édom, o/mû ányi dyicí ándyi, ké nǎ, nyǐ o/mû o-man o-chi ńkyí Óburúkpâbí o/sét.

⁸ Dívit o-bí Ahyímélek o/fu, wo amu ne kyíbye nang ne kashwám ńké ada mě ekye dí. Ńkyí Otu Sôl o/sét mě kyi/chi mě n-dim ochéé óchee mú n*da/já nkéré mú n/kúng kashwám* nang kyiyám-byití kyikíri*.

⁹ Ahyímélek o-faa ǎ o/fu, me mu ne kashwám ńké Golyât mú onet-Fyilíta mú wo a/ju ǎ ké ndege-esí mú Éla. Nke ányi ké esim-chwǒm-epé esô. Ba/ním kánké ké kyídí. Â amu a-ryuu ng a/fu, a-kúng ng kánké, a-kúng. Nké kǎnchí nké nke kyiyám-bunwa nyín. Dívit o-faa ǎ o/fu, kye mě kánké. Kashwám katô ka*fí to ńké ka/shwôm ńké ánke*.

¹⁰ Dívit o-dim kâng, o-chêe ng Otu Sôl o-câ, o-kâm Otu Ákis, mú o/fím oshê mú badakó Gât.

¹¹ Banet-ashí-bǎmkpóngé-otu ámu ba-bí ǎ ba/fu, *chí Dívit něen mú otu-oshê mú emen*? Nyín něen onyinchéng ámu mú ḿbé banyinyi ba/kwán kyi-kim ne nyǐ, ńdyí mbe ba-ne ng ane, ba/fu, Otu Sôl oo/ju égot-banet etánge etánge, nké Dívit oo/ju égot etánge etánge ké byikit bujam.

¹² Ńkyí ba/raa éné kyi/ta Dívit ké dyityém kanong kanong, o-kpet eshî Otu Ákis bushî buyén.

¹³ Ne ké bubwô ámbu, nang nkéré orá nké banet ámbe mbe ányi, Dívit o-kpet echi wǎ bubong emen bu*fí ǎ to kanong* o-kûchi byěm wǎ onet-kyifún â ba/kan ǎ eku. O-kpet esáng byěm éné o-câ ké afyi nyí ekpe nyí e/wáp [oshê] e-fé ké kafâ, o-mîng ng akorong a-sen n ǎ ké kyiti.

¹⁴ Otu Ákis o-sét kâng banet-ashí-bǎmkpóngé emen o/fu, kû n̂g eri, onyinchéng mún mu o-fún n. Kyi/cen nǎ ne ba-kpî ǎ ba-bâ ne nyǐ kyikit ejí.

¹⁵ Banet-kyifún ḿbé me mu ne mbé ba*da/jê ne dí*. Kyi/cen nǎ ne ben ba-chîbê ne okíri eringe oda mě echi n-kûsa kafâ ne boonyam-édúú emen nyín ké kyise ńkyí ejí me oyén.