1 Sámwel 2 - Bokyi Bible

Nshwam mú Hána o/fé

¹ Hána o/fé nshwam o/fu, Óburúkpâbí oo/chi bunyîn-dyityém bu-sú mě dyityém. Me dyityém ndyi dyi-nyîn n mě kanong kanong ké ńkyí nyǐ oo/chi. Me mu n-jwó ng banet-bushwôn ejí, me mu n-jêe ng kanong kanong, ké nǎ, Osówo oo/chwáp mě.

² Onet nang obónge o*fí mú mu kanong wǎ Óburúkpâbí*. Onet o*fí mú mu wǎ nyǐ* onet-obâm o*fí mú mu wǎ Osówo eten*.

³ Mîng byiko eyên ḿbyí amu a-tông ng kakânkakân. Cíbî pyêp ké ejá-byiko eyên etông. Ké nǎ, Óburúkpâbí o-chi i Osówo mú mu o-nyît ng byěm, ne nyǐ mu o-pan n mpan ké kángkáng byěm ḿbyí banet mbe ba-chi i.

⁴ Báre ḿbé basúja ḿbé badashwane baa/búnê, nké banet ḿbé baa*shwane* ba-kú ba-shwane e.

⁵ Banet ḿbé ba/mû ba-kyâ kámbé byiryíng kanong kanong, kántîk, ba-kú ba-yámê e byiko ebe ba-da ng eryuu byiryíng, nké banet-esong ba*fí to banet-esong*. Onyi mú o/mû bukwom oo/fwon bwǎn bujam, nké boné-bwǎn chwóó oo/waa abwô dyikáá.

⁶ Óburúkpâbí mu o-ju ng banet o-chi kámbé ba-chîfiri ké dyikpen. Nyǐ mu o-twóm m banet ba-jâ ké oshê-bakúsí, o-chîchi kámbé ba-bwa ké dyikpen.

⁷ Nyǐ mu o-chi i banet bakíri ba-kyú banfang-banet, o-chi bakíri ba-kyú banet-kyikpu. Nyǐ mu o-bwa ng ne banet bakíri kyísí kyísí, o-chi bakíri ba-kyú biǐtí-banet.

⁸ Nyǐ mu o-bêem m banet-kyikpu ba-bûu ké édúkǎndú, o-chi banet ḿbé ba*fí ne chwǒm* ba-man ké bafip ebe. O-chi kámbé ba-firi bacín-bwǎn-batu, o-tî kámbé ké byikit-ofê. Byikwap ḿbyí byi/níbî esí byi/já Óburúkpâbí. Nyǐ o/bi ejíí ké mbyí.

⁹ Nyǐ mu o-bám m akpen nyí banet emen ḿbé ba/fé dyityém ne nyǐ, nké bambên atyém mbe ba-rím m ké kyifip. Onet oo*kpógê ké busa ḿbú emen nyǐ oyén*.

¹⁰ Óburúkpâbí o/chi o-ju banet-bushwôn emen. O/chi o-kyú áku kyíbóng o-raa ne mbé ne ejá nyí etare. Óburúkpâbí o/chi o-pan ejíí emúmú mpan. Nyǐ o/chi o-kúng busa o-kye otu emen, nyǐ o/chi o-chi otu emen mú o/cá o-kpógê byití.

¹¹ Ekána o-bwa kâng dyijê ké Ryíma, nké wǎn emen Sámwel o/waa ké Shílo, o-kûchi bǎmkpóngé o-kyâ Óburúkpâbí ne Élyi mú nchi kyifen-Osówo.

Bwǎn-Élyi ḿbé Banyinchéng

¹² Bwǎn-Élyi ḿbé banyinchéng ba/mû ba*fí ne dyishí*. Mbé ba/mû ba*fí ba-fwôo ng atông ké ńkyí Óburúkpâbí mu o-sét ng*

¹³ nang kyi-kim ne byije ḿbyí byi/kim ne ńkyí banchi kyifen-Osówo badaman ba-bí banet ba/fu, bakye kámbé*. Nké â onet mu o-chi i kyifen, ḿgbán-nchi kyifen-Osówo o-bâ ne egiryimgbáng nyí nyi ne efwa echât. Â enyam ányi e/tôong ké okwâ,

¹⁴ o-tím egiryimgbáng ányi ké katí ńké ba/tû ké okwâ, ne nang ebóng enyam nyí nyǐ o/fîm e/já nchi kyifen-Osówo. Kángkáng banet-Ézerel ḿbé ba/bê byifen ebachi ké Shílo ba/mû ba-chi i kámbé éné.

¹⁵ Ne ne ba-kûfîm to nang bafwám-enyam ba-shí, ḿgbán-nchi kyifen-Osówo o-bâ ng esét onet mú mu o-chi i kyifen ánkyi o/fu, kye mě kyicê-enyam n-kye nchi kyifen-Osówo o-fwá. Nyǐ oo*ba/chi o-koo nyí rámrám* kyi*da/shwôm nyí ekpó*.

¹⁶ Â onet ámu o/faa o/fu, mîng byi-chi ńkyí nkyi dángdáng, byi-shí kpá bafwám, ne a-kûkoo ńkyí kyi/nyîn ǒ, mú ḿgbán-nchi kyifen-Osówo ámu o-raa ne nyǐ o/fu, aa*wááng*. Kye mě abeabe. Â a*da mě ekye* n-fîm ké busa.

¹⁷ Kyibî-bwǎn-Élyi ánkyi kyi/mû kyi/rêe kanong kanong ké bushú ḿbú Óburúkpâbí, ké nǎ, mbé ba/mû ba*fí ba-kyâ byifen ḿbyí Óburúkpâbí ofê*.

Sámwel ké Shílo

¹⁸ Ké nkéré ámu, Sámwel-wǎsíng mu o-chi i bǎmkpóngé o-câ kashú o-kyâ Óburúkpâbí, o-fâ okpówo-kyídí-bǎmkpóngé ńkyí ociring.

¹⁹ Dyije nang dyirá, boné emen o-zim m ǎ nkyû o-kúng o-ba-kye ǎ, ńdyí oo/bê ne otyép emen ké kyikû kyifen ebachi ńkyí dyije.

²⁰ Élyi o-jware kâng Ekána ne onyi emen, o-raa ne Ekána o/fu, kyi/bát Óburúkpâbí okye ǒ bwǎn bakíri ne onyinyi mún ba-ba-kúng kyikit ńkyí wǎn mún, mú wo a/kye ǎ. Ké nkéré baa/man, ba-bwa esim dyijê.

²¹ Óburúkpâbí o/jware Hána kâng, o-chîfwon bwǎn-banyinchéng bakíri ashí achât ne banyinyi bafee. Sámwel o-ba-kán ké bǎmkpóngé ḿbé Óburúkpâbí.

Élyi ne Bwǎn Emen ḿbé Banyinchéng

²² Élyi o/mû oo/kâa kanong kanong. Mu o-jwo ng kángkáng nkéré kyi-kim ne kángkáng byěm ḿbyí bwǎn emen mbe ba-chi i banet-Ézerel, o-jwo to ba/fu, mbé mbe ba-rí i ne banyinyi ḿbé mbe ba-chi i bǎmkpóngé ké ocím-dyifyi mú mpyep mú Óburúkpâbí mu o-kyú u.

²³ O-raa kâng ne mbé o/fu, ebóng ben bamu ba-chi i azong-byěm ńnyín. Nang yeě nang yeě mu o-sét ng mě kyi-kim ne byibî ḿbyí ben bamu ba-chi i.

²⁴ Zú n̂g abwô ké mbyí, ǎ bwǎn ejí. Ńkyín kiimbâng-kyibî-chwǒm ńkyí banet-Óburúkpâbí mbe ba-raa ng kyi-kim ne nkyí.

²⁵ Â onet o/chi kyibî o-bât orî-onet, Osówo o-man n ebwom onet ámu ké esim. Nké yeě odaman ebwom onet ámu ké esim mú o/chi kyibî ké bushú-Óburúkpâbí. Nké mbé ba*da/jwo ńkyí bonchí ebe o/sét kámbé* ké nǎ, Óburúkpâbí o/mû oo/tî okabe o/fu, nyǐ o-ju ng kámbé.

²⁶ Sámwel-wǎsíng mu o-kán n o-câ, o-jê ng Óburúkpâbí, o-nyîn n to banet dyityém.

Mkpábé o/sét kyi-kim ne Ńkyí kyi/chi kyi-chi Kyikû-Banet-Élyi

²⁷ Mkpábé mú odasét byiraa-Osówo o/bê o-kâm Élyi ne kyitwóm ńkyín, ńkyí kyi/fím ké abwô nyí Óburúkpâbí. O/fu, nkéré mú bonchí eyên mú kpákpá, mú odabángê Éron ne kyikû-banet emen ba/mû básóng ḿbé otu-Éjip, me Óburúkpâbí n/tông Éron byiko ejí wááng.

²⁸ Ké kángkáng byikû-byikim-banet ḿbyí Ézerel, me n/cá kyikû emen n/fu, bakyú banchi kyifen ejí, ba-kûchi bǎmkpóngé ké kyikit-kyifen echi ejí, ba-shí i burwan, ba-fâ chwǒm ńkyí badatwóp dyímám ne ba-pem ne me. Ne me n/kye kámbé busa ḿbú badakoo kyicê-byěm-kyifen echi ḿbyí mbe ba-shí i ké kyikit-kyifen echi ejí.

²⁹ Ebóng kâng ne ben [bamu ne bashú ḿbé byěm eshwam] ké byifen ne eyáré ḿbyí me n/fu, banet ejí bakye mě. Élyi, ebóng kâng ne wo amu a-kyâ bwǎn eyên ofê o-shwôm mú wo amu a-kyâ mě, ké omîng mú amu a-mîng ng kámbé ba-sú ké byiko ké oryî mú mbe ba-ryí i byipang-byěm ḿbyí byinong byinong ḿbyí kángkáng byifen ḿbyí banet ejí mbe ba-chi i ba-kyâ mě.

³⁰ Me Óburúkpâbí mú Osówo-Ézerel n/ryí ocím ké nkéré mú o/shwôm ké esim n/fu, kyikû-banet eyên ne kyikim-banet ḿbé ba/fím ké kyikû eyên ba/chi ba-kûchi bǎmkpóngé kángkáng nkéré ba-kyâ mě wǎ banchi kyifen ḿbé ejí. Nké kántîk, me mu n-raa ng n/fu, mm*ba/chi n-chîbángê*. Nké n/chi n-kûkye banet ḿbé bada mě ekye ofê ofê, n-shú banet ḿbé ba/shú mě.

³¹ Fwôo atông a-jwo, nkéré mu o-bâ mú n/chi n-ju kángkáng byisat ḿbyí byi/fím ké kyikû eyên ne ḿbyí byi/fím ké kyikû-kyikim-banet eyên, eringe nyí nang onet obónge mú o/fím ké kyikû eyên oo*ba/chi o-ryí dyikyi*.

³² Bafip ba/chi ba-chi ǒ, ne [orêm] o/chi o-chi ǒ kyi-kim ne kángkáng banjware ḿbé me n/chi n-kye banet-Ézerel bakíri, nké onet nang obónge ké kyikû eyên oo*ba/chi o-chîryí dyikyi*.

³³ Nké n/chi n-tî onet obónge mú o/fím ké kyikû eyên okpó, ne nyǐ o/chi o-chi bǎmkpóngé o-kye mě wǎ nchi kyifen. Nké achi a/chi a-sêe [ǎ] o-zú dyityém ké kángkáng byěm, ne kángkáng banet ḿbé áku, ḿbé ba/fím ké kyikû eyên, ba/chi ba-kpú bukyû-byití.

³⁴ Â bwǎn eyên ḿbén ashí afee, Hófinyi ne Fyinéhas, ba/kpú dyicí dyibónge, kyi/chi kyi-tông ǒ kyi/fu, kángkáng byěm ḿbyí me n/raa, byi/chi byi-chi ké ntûntû.

³⁵ Me n/chi n-cá nchi kyifen mú o/chi o-fé dyityém ne me, mú o/chi o-chi to kángkáng byěm ḿbyí me mu n-ryuu ng n/fu ochi. Me n/chi n-kye ǎ bwǎn ḿbé ba/chi ba-kûchi bǎmkpóngé kángkáng nkéré ké bushú-otu mú me n/cá.

³⁶ Nang ebóng onet mú o/fím ké kyikû eyên nké o/waa okpó, o-man o-dim o-kâm nchi kyifen ámu o-bí ǎ o/fu, okye ǎ akpuga ne byiryíng, o-bí to o/fu, kamgbe, mîng mě n-kûchwáp banchi kyifen-Osówo eringe nyí ndajá ńkyí ndaryí.