1 Sámwel 19 - Bokyi Bible

Otu Sôl mu o-kyâ Dívit Busông

¹ Otu Sôl o/sét wǎn emen Jónátan ne kángkáng banet-ashí-bǎmkpóngé emen o/fu, nyǐ [o/tî okabe o/fu, nyǐ o-ju ng] Dívit. Nké Jónátan, Dívit o/mû ǎ ké dyityém kanong kanong.

² O-sét kâng Dívit o/fu, bonchí ejí mu o-ryuu ng o/fu, nyǐ o-ju ng ǒ. Kamgbe, bám kâng byiko eyên nencí ké dyicófóróng. Rem ké kyikit ńkyí baa*ri ǒ*.

³ Me n/chi n-dim n-da-bwom ne bonchí ejí ké kyikit ńkyí wo a/rem, ne me n/chi m-pem ne nyǐ kyi-kim ne wo. Â n/jwo chwǒm, n/chi n-chi ǒ a-nyît.

⁴ Jónátan o-kpee Dívit ké bushú-Otu Sôl, o-raa o/fu, bonchí, *dachi a-chi Dívit mú ḿgbán eyên kyibî*. Nyǐ o*da ǒ echi ne kyibî nang kabónge* bwa kwán, nang ebóng chwǒm ńkyí nyǐ oo/chi kii/kye ǒ wo kiǐtí-ochwâp.

⁵ Nyǐ o/bángê kyitông emen ekye nkéré mú nyǐ o/ju Golyât, ne Óburúkpâbí o/kpógê kiǐtí-dyikpóge o-kye Ézerel. Nkéré mú wo a/ri ńkyín, dyityém dyi/nyîn ǒ. Ebóng kâng ńkyí wo amu a-ryuu ng kántîk a/fu, wo a-chi i onet kyibî mú o*da/chi chwǒm* a-ju Dívit ké chwǒm ńkyí kyi*fí ne dyishí nang dyibónge*.

⁶ Otu Sôl o-yángê okabe emen ké kyiraa ńkyí Jónátan o/raa éné, ne o-ryí ocím o-sem Óburúkpâbí o/fu, nyǐ oo*ba/chi o-ju Dívit*.

⁷ Jónátan o-kó kâng Dívit o-sét ǎ kángkáng ńkyí ba/raa. O-kpî ǎ kâng o-ba-kye Otu Sôl. Dívit o-chîkpet echi bǎmkpóngé ne Otu Sôl wǎ eringe o/mû o-chi i.

⁸ Byití byi-chîbaróng ne banet-Fyilíta. Dívit o-kye kámbé bunwa, o-kpógê kámbé dyikpóge ńdyí dyi/chi kámbé ba-chêe.

⁹ Dyicí dyibónge, kyibî-bucí ńkyí kyi/fím ké abwô nyí Osówo kyi/banung Otu Sôl ké byiko. Nyǐ o/mû me ké kyise emen ne kyíbye ké bubwô, ne Dívit o/mû ányi to o-kim m dyícîng emen.

¹⁰ Otu Sôl o-kan o/fu, nyǐ o-tím m Dívit kyíbye ánkyi o-bât ké ekpe-kyise, nké Dívit o/ceem, kyíbye kyi-tím ké ekpe. Dívit o-zóngê o-chêe.

¹¹ Ké ochíchí-buchú ámbu, Otu Sôl o/twóm banet o/fu, baba-bám kyise-Dívit, ba-ju ǎ ké orî-dyicí. Mákel mú onyi emen o-kuri ǎ ekó o/fu, â a*da/chêe ké buchú ḿbún* nencí aa/kpú.

¹² O-chi ǎ o-shû kyísí ké wíndu, o-zóngê o-chêe.

¹³ O-yip orím-bukye mú o/mû ké kyise ebe o-ren kámú ké karíng, o-yip kyichí-dyishí ńkyí ba/chi ké eríp-ebû o-twôom kámú ké dyishí, o-yip kyídí o-cít kámú ké byiko.

¹⁴ Nkéré mú banet-Otu Sôl ba/bê ebakpî Dívit, Mákel o/sét kámbé o/fu, Dívit mu o-rwôm m.

¹⁵ Nké Otu Sôl o/twóm kámbé ba-chîbwa esim o/fu, baba-ri Dívit ké achi ebe. O-sét kámbé o/fu, yip n̂g ǎ ne karíng emen ba-bâ ne nyǐ kwán, me n/chi n-ju ǎ.

¹⁶ Ba-nung ké kafâ-kyise ba-ri orím-bukye ámu ké karíng, ne kyichí-dyishí ńkyí ba/chi ké eríp-ebû ké dyishí emen.

¹⁷ Otu Sôl o-bí Mákel o/fu, ebóng kyi/chi ne a-nîm mě něen, a-mîng onet-bushwôn ejí o-chêe. Mákel o-faa o/fu, Dívit o/fu, nyǐ o-ju ng mě, â me n*da ǎ echwáp o-chêe*.

¹⁸ Dívit o/chêe o-dim o-kâm Sámwel ké Ryíma, o-sét ǎ kángkáng byěm ḿbyí Otu Sôl oo/chi ǎ. Nyǐ ne Sámwel ba-dim kâng ba-wâa [Nǎyot,] ba-kûkyú áku.

¹⁹ Ba-sét Otu Sôl ba/fu, Dívit mu ké [Nǎyot,] ké esí nyí Ryíma.

²⁰ O-twóm kâng banet o/fu, bada-kám ǎ. [Banet ámbe ba-ri] bujê-bamkpábé ḿbé badasét byiraa-Osówo mbe ba-ne ng ane ba-wonge e, ne Sámwel wǎ onet-dyishí ebe. Busa ḿbú Busun-Osówo bu-nung kâng banet-Otu Sôl ámbe ké byiko, mbé to ba-kpet ene ane ba-wonge e.

²¹ Nkéré mú Otu Sôl o/jwo kyi-kim ne nkyí, o-chîtwóm banet bakíri, mbé to ba-kpet ene ane ba-wonge e. Otu Sôl o-chîtwóm banet ké kampén kachât, dyizong-chwǒm ándyi dyi-chîchi to kámbé.

²² O-dim kâng nyǐ oyén o-kpet ecen o-câ ḿbú Ryíma. Nkéré mú nyǐ o/ribi ké kiimbâng-dyibíng-omu, ńdyí ndyi ké Séku, o-bí kyikit ńkyí Sámwel ne Dívit mbe ba-kyú u. Ba-sét ǎ ba/fu, mbe ké Nǎyot.

²³ Ńdyí mu o-cen n o-câ áku, busa ḿbú Busun-Osówo bu/nung ǎ to ké byiko. O-kpet ane ene o-wonge e tete o-ribi Nǎyot.

²⁴ O-pii byídí ké byiko mu o-ne ng ane o-wonge e ké bushú-Sámwel. O-rí sáre busíndyíbang dyicí ándyi bu-jí dyi-cé. Éné nké kyi/cen ne ba-kpet ebí ba/fu, Otu Sôl to o/firi mkpábé mú odasét byiraa-Osówo dí.