1 Sámwel 18 - Bokyi Bible

¹ Otu Sôl ne Dívit ba-man bǎmpém ebe. Nkéré mú ńkyí ánkyi kii/shwôm, wǎn-Otu Sôl mú onyinchéng, mú odabángê Jónátan, Dívit o-nung ǎ ké dyityém kanong kanong, o-kû ǎ ejê wǎ eringe enyam-byiko nyí emen nyǐ oyén nyi e-jê ng ǎ.

² Otu Sôl o-fu Dívit o-kûkyú ne nyǐ kyi-fím ké dyicí ándyi kyi-ca kashú. O*da ǎ echîbángê o-bwa esim dyijê ké oshê emen*.

³ Jónátan o-ryí ocím o/fu, nyǐ o-ryí i bucín ḿbú ne banyá ne Dívit, ké nǎ, Dívit o/mû o-jang ng ǎ ejê.

⁴ O-pii kyídí ńkyí o/mû o/fé ké byiko, o-kye Dívit, cibicibi ne byidóng-byití emen ne kashwám emen ne búre emen ne emâp emen.

⁵ Kyitwóm nang kyirá ńkyí Otu Sôl o/twóm Dívit kyi/mû nkyi kyi-câ ǎ kashú kanong. Ne ké bubwô ámbu, Otu Sôl o/chi ǎ o-firi onet-dyishí-basúja emen. Ńkyín kyi/nyîn kángkáng banet-ashí-basúja-Otu Sôl, cibicibi ne kángkáng banet to.

Orêm o/chi Otu Sôl ne Dívit

⁶ Nkéré mú Dívit me o-fyi ng o-bâ, ńdyí oo/ju Golyât, ne ńdyí basúja to mbe ba-bwa ng esim dyijê, banyinyi ḿbé ba/fím ké kángkáng eshê-Ézerel ba/dim ba-ba-ri Otu Sôl. Mbé ba/mû mbe ba-kwán n ekwan-bunyîn-dyityém, ba-ne ng ane, ba-kim m byícícágé ne ácîng.

⁷ Ké nkéré mbe ba-ne ng ane éné, ḿbé banyinyi ba/kwán okwan ba/fu, Otu Sôl oo/ju égot-banet etánge, nké Dívit oo/ju égot etánge etánge ké byikit bujam.

⁸ Ńkyí ba/kwán éné kyi*da/nyîn Otu Sôl*. Ne kafâ ka-kpet ǎ esa kâng kanong kanong. O-raa o/fu, kyi-kim ne Dívit, mbé ba/kwán ba/fu, o/ju égot-banet etánge etánge ké byikit bujam. Nké me kyi*da/shwôm égot etánge nké nke*. Nnyinyěng-chwǒm, mbé ba/chi ba-kúng ǎ butu.

⁹ Ne ké bubwô ámbu, orêm o/kpet echi Otu Sôl ne Dívit kâng, o-firi to ne atyém afee kyi-kim ne nyǐ, kyi-fím ké dyicí ándyi kyi-ca kashú.

¹⁰ Ké orî-dyicí, kyibî-bucí ńkyí kyi/fím ké abwô nyí Osówo kyi-waa kyi-nung Otu Sôl ké byiko, o-kpet egbó kyiraa ké kafâ-kyise emen wǎ onet-kyifún. Dívit o/mû mu o-kim m dyícîng wǎ eringe mu o-kim m kángkáng dyicí, ne Otu Sôl o/mû o/kám kyíbye ké bubwô.

¹¹ Otu Sôl o-raa ne dyityém emen o/fu, n-tím m ǎ kánkyí m-bât ké ekpe-kyise. O-tím Dívit kánkyí kampén kafee, nké Dívit o/ceem kampén kamúmú.

¹² Otu Sôl o/mû mu o-shî ng Dívit, ké nǎ, Óburúkpâbí o/mû ne Dívit, nké nyǐ o/mû oo/né Otu Sôl.

¹³ Otu Sôl o-twóm kâng Dívit o-dim, o-chi ǎ o-firi onet-dyishí mú égot-basúja etánge. Dívit o-kpî basúja emen ba-ca byití.

¹⁴ Ne kángkáng byěm ḿbyí nyǐ o/mû mu o-chi i byi/mû mbyi byi-câ ǎ kashú, ké nǎ, Óburúkpâbí o/mû ne nyǐ.

¹⁵ Otu Sôl o-ri eringe nyí byěm mbyi byi-câ Dívit kashú, o-bwa o-kû ǎ eshî o-shwôm oshwǒm.

¹⁶ Ne nang yeě nang yeě ké Ézerel ne Júda, Dívit o/mû mu o-jê ng ǎ ké dyityém, ké nǎ, nyǐ o/mû onet-dyishí mú byěm mbyi byi-câ ǎ kanong.

Dívit o/bé Wǎn-Otu Sôl

¹⁷ Otu Sôl o-sét kâng Dívit o/fu, dǐi Mérap mú ókpá ejí mú onyinyi i. Me n/chi n-yip ǎ n-kye ǒ a-bé, â wo amu a-chi i bǎmkpóngé a-kyâ mě wǎ okân-onet, ne wǎ súja mú mu o-kyâ mě ofê, ne a-kûnwa to byití ḿbyí Óburúkpâbí. Otu Sôl o/mû mu o-kabe ng o/fu, ké bukwóp ḿbún, banet-Fyilíta ba/chi ba-ju Dívit, ne nyǐ oo*ba/chi o-chi kánkyí nyǐ oyén*.

¹⁸ Dívit o-faa ǎ o/fu, me to yeě, ne kyikû-banet ejí to ba/byí ebóng, mú me ndafiri one-otu.

¹⁹ Nké ńdyí nkéré o/bafyi mú Otu Sôl odayip Mérap o-kye Dívit o-bé, o/bwa o-yip ǎ o-kye onyinchéng mú odabángê Ádirel, mú o/fím Mehóla.

²⁰ Nké wǎn-Otu Sôl mú odabángê Mákel o/baróng kyijé ne Dívit. Ne nkéré Otu Sôl o/jwo ńkyín, dyityém dyi/nyîn ǎ.

²¹ O-raa ne dyityém emen o/fu, n/chi n-yip Mákel n-kye Dívit o-bé. N/chi n-chi Dívit o-róng ké kaǎtám, ké bubwô emen, ne banet-Fyilíta ba/chi ba-ju ǎ. Otu Sôl o-chîraa kâng ne Dívit o/fu, wo a/chi a-firi one ejí.

²² O-sét banet-ashí-bǎmkpóngé emen o/fu, bapem ne Dívit ké kadip ba-sét ǎ ba/fu, Otu Sôl, dyityém ndyi dyi-nyîn n ǎ ne wo, ne kángkáng banet-ashí-bǎmkpóngé emen to wo amu a-nyîn n kámbé dyityém. Kántîk nké nkyi nkéré mú onong, mú wo adabé wǎn emen.

²³ Mbé ba-sét kâng Dívit ejá ányi. Dívit o-faa o/fu, nkyi kiǐtí-chwǒm-ofê ńkyí onet odakyú one-otu, nkyi kiǐtí-chwǒm kyi-shwôm ńkyí onet-kyikpu aciringaciring wǎ me.

²⁴ Banet-ashí-bǎmkpóngé ámbe ba-sét Otu Sôl ńkyí Dívit o/raa.

²⁵ Otu Sôl o-sét kámbé o/fu, basét Dívit ba/fu, ńkyí Otu Sôl mu o-ryuu ng o/fu, wo akye ǎ wǎ ocím-akpuga mú dyibé, nkyi něen, bajam-batî-banet-Fyilíta batánge ḿbé baa/kpú, wǎ ewa esó nyí banet-bushwôn emen. Éné nké Otu Sôl o/mû o/tî okabe o/fu, banet-Fyilíta baju Dívit.

²⁶ Banet-ashí-bǎmkpóngé-Otu Sôl ba-sét Dívit ńkyí Otu Sôl o/raa. Dyityém dyi/nyîn Dívit kanong kanong ké okabe ámu, mú nyǐ o/chi o-firi one-Otu Sôl. Ne ba-kûfé dyicí ńdyí badachi dyijî-dyibé,

²⁷ Dívit ne banet emen ba/dim ba-da-ju égot-banet-Fyilíta ebónge. O-yip batî ebe o-da-kye Otu Sôl. O-pan kángkáng o-tông ǎ, eringe nyǐ odabé wǎn-otu. Otu Sôl o-yip kâng wǎn emen Mákel o-kye Dívit o-bé.

²⁸ Otu Sôl o-nyît wááng o/fu, Óburúkpâbí mu ne Dívit, o-nyît to o/fu, Dívit mu o-jê ng wǎn emen Mákel.

²⁹ O-bwa o-kpet eshî kâng Dívit o-shwôm oshwǒm. O-firi to onet-bushwôn-Dívit kángkáng nkéré ké dyikpen emen.

³⁰ Basúja-banet-Fyilíta mbe ba-bâ ng enwa byití, nké ké byití nang byirá, Dívit kyi-câ ǎ kanong kyi-shwôm onet-dyishí-basúja-Otu Sôl nang orá. Ké bubwô ámbu, dyizîn-Dívit dyi/yú dyi-cít.