1 Sámwel 16 - Bokyi Bible

Óburúkpâbí o/kúng Dívit Butu

¹ Óburúkpâbí o/raa ne Sámwel o/fu, wo a/chi a-tii Otu Sôl ka-rí nǎ. Ne nn/né n/fu, nyǐ o*dachîkyú otu-Ézerel*. Kántîk, kúng kâng bakút-ólif a-ca ne mbé Bételehêm, a-kâm onyinchéng mú odabángê Jésyi, ké nǎ, me nn/cá wǎn emen obónge mú onyinchéng n/fu, ofiri otu.

² Sámwel o-bí Óburúkpâbí o/fu, me n-cen n nǎ ne n-chi éné. Â Otu Sôl o/jwo kyi-kim ne nkyí, o/chi o-ju mě. Óburúkpâbí o-faa ǎ o/fu, kúng kyisu-mpong a-ca ne nkyí, a-sét a/fu, wo a/ce áku kyifen edachi a-kye mě.

³ Kó Jésyi o-bâ ké kyifen ánkyi, ne me n/chi n-sét ǒ ńkyí adachi. Wo a/chi a-kúng onyinchéng ámu butu, mú me nda ǒ esét n/fu, kúng ǎ butu.

⁴ Sámwel o-chi ńkyí Óburúkpâbí o/sét ǎ o/fu, ochi. O-dim o-wâa Bételehêm, kyikit ńkyí banet-ashí-oshê ámu ba/dim ba-bâ ǎ ebakâm, ba-tím m banê ba-bâ. Ba-bí ǎ ba/fu, bucen ḿbú a/bê něen, ḿbú bunyîn-dyityém? ǎ nsô epé.

⁵ Nyǐ o-faa kámbé o/fu, âa, ḿbú bunyîn-dyityém. Me m/bê kyifen ebachi n-kye Óburúkpâbí. Soo n̂g byiko enen ba-bâ ne me ké kyikû. O-sét to Jésyi ne bwǎn emen ḿbé banyinchéng o/fu, basoo byiko ebe kpárám. O-sét to kámbé o/fu, babâ to ké kyifen ánkyi.

⁶ Nkéré mú mbé ba/ribi, Sámwel o/ri wǎn-Jésyi mú odabángê Élyap, o-raa ne dyityém emen o/fu, onyinchéng mú něen, mú o/bwom ké bushú ḿbú Óburúkpâbí, o-chi i onet ámu ké ntûntû mú nyǐ o/cá.

⁷ Nké Óburúkpâbí o/raa ne nyǐ o/fu, *dachi a-kan achi ké eringe nyí nyǐ o/nwa kyisat ne butang ḿbú o/kwóp*. Me nn/né ǎ, ké nǎ, okabe mú ejí o*fí eringe ebónge ne mú onet*. Onet o-tún n ké kiintaa-enyam-byiko, nké me n-tún n ké dyityém-onet.

⁸ Jésyi o-kó kâng wǎn emen mú odabángê Abyínadap, o-kpî ǎ o-ba-kye Sámwel. Nké Sámwel o/fu, aa*wááng* nang nyǐ Óburúkpâbí o*da ǎ ecá*.

⁹ Jésyi o-bâ kâng ne Sháma. Sámwel o-faa o/fu, aa*wááng* nang nyǐ to Óburúkpâbí o*da ǎ ecá*.

¹⁰ Ké éné, ké éné, tete Jésyi o-bâ ne bwǎn emen ashí káchâtkányi o-ba-kye Sámwel. Ne Sámwel o-raa ne nyǐ o/fu, aa*wááng* nang onet obónge ké burwám ebe Óburúkpâbí o*da/cá*.

¹¹ O-bí ǎ kâng o/fu, bwǎn ba/tôong ǒ dí. Jésyi o-faa o/fu, mú wǎsíng nké o/waa, nké nyǐ mu o-tún n etám-ebû kyíjí. Sámwel o-sét ǎ o/fu, fu ǎ o-bâ kwán. Bii*ba/chi byi-chi kyifen ńkyín* tete nyǐ o-bâ.

¹² Jésyi o-twóm kâng o/fu, bada-kpî ǎ. Nyǐ o/mû o/nwa kyisat, o-rángê to kpúruk ké enyam-byiko, ne achi a-san n ǎ to ragerage. Óburúkpâbí o-raa ne Sámwel o/fu, dǐi nyǐ éné. Kúng ǎ butu.

¹³ Sámwel o-yip bakút ámbe o-pwó Dívit ké dyishí, o-kúng ǎ butu ké bushú-bwǎn-bané emen. Busa ḿbú Busun-Óburúkpâbí bu-waa bu-nung Dívit ké byiko, bu-waa ǎ to ké byiko kyi-fím ké dyicí ándyi. Sámwel o-bwa kâng dyijê ké Ryíma.

Dívit ké Kyibám-Butu ńkyí Otu Sôl

¹⁴ Busa ḿbú Busun-Óburúkpâbí bu/byí Otu Sôl ké byiko, ne kyibî-bucí ńkyí Óburúkpâbí o/twóm kyi-kpet ǎ ekye busông.

¹⁵ Bǎmgbán emen ba-raa ne nyǐ ba/fu, be byimu byi-nyît ng byi/fu, kyibî-bucí ńkyí Osówo o/twóm nké nkyi kyi-kyâ ǒ busông.

¹⁶ Kye bě busa kâng, ǎ bonchí, ne be byi/chi byi-kyé onet mú odaman ekim dyícîng. Ne ké nkéré mú kyibî-bucí ánkyi kyi-kú kyi-kyâ ǒ afaníkong, onet ámu o-man n ekim dyícîng emen ándyi, ne wo a/chi a-bwa esim a-firi kanong.

¹⁷ Otu Sôl o-kye kámbé busa o/fu, kyé n̂g onet mú odaman ekim kándyí kanong kanong ba-bâ mě ne nyǐ.

¹⁸ Onet emen obónge o-sét ǎ o/fu, Jésyi mú o/fím Bételehêm mu ne wǎn-onyinchéng obónge mú odaman ekim dyícîng kanong kanong. Wǎn ámu to o-shwane e achi! ne o/nwa to kyisat! ne nyǐ o-chi i to súja mú onong, ne mu to ne ejá ké ocím. Óburúkpâbí mu ne nyǐ ké kyikû.

¹⁹ Otu Sôl o-twóm kâng banet-kyitwóm o/fu, bada-sét Jésyi ba/fu, twóm mě wǎn eyên, Dívit, mú mu o-tún n etám-ebû eyên.

²⁰ Jésyi o-twóm Dívit kyikit-Otu Sôl ne kyisu-ebû ne dyitû-berêt ńdyí kaanyam-atû ka/kúng ne kabu-bato.

²¹ Dívit o-dim o-kâm Otu Sôl o-kûchi bǎmkpóngé ne nyǐ. Nyǐ o/mû o-nyîn n Otu Sôl dyityém kanong kanong, ne o-cá ǎ o-kû ǎ ekúng byiyám-byití.

²² Otu Sôl o-twóm kâng kyitwóm o/fu, basét Jésyi ba/fu, Dívit mu o-nyîn n mě! Mîng ǎ o-kyú kwán o-kûchi bǎmkpóngé ne me.

²³ Kyi-fím ányi kâng kyi-ca kashú, nang nkéré orá nké kyibî-bucí ńkyí Osówo o/twóm kyi-kú kyi-kyâ Otu Sôl afaníkong, Dívit o-kúng dyícîng emen o-kpet ekim. Kyibî-bucí kyi-dim, Otu Sôl o-bwa esim o-firi kanong.