1 Sámwel 14 - Bokyi Bible

Dyityém ecíp ńdyí Jónátan

¹ Dyicí dyibónge, Jónátan o/sét mú wǎn-kyisat, mú mu o-kúng ng ǎ byiyám-byití o/fu, byinyáng byi-dim ké bampyep ḿbé banet-Fyilíta. Nké nyǐ o*da/sét Otu Sôl mú bonchí emen*

² mú o/mû o/bi mpyep mú emen ké busi-kyichí ńkyí badakó pamagáránit* ké Myígoron*. Kyikit ánkyi kyi*da/tíbî ne Gyíbya*. Égot-banet nang echât e/mû ne nyǐ ké kyikû.

³ Nchi kyifen-Osówo, mú o/mû mu o-kúng ng chwǒm ńkyí badasô epé, o/mû o-bángê e Ahíja, mú o/mû wǎn mú wǎn-boné-Ékabat, mú o/mû o-bángê e Ahítup, mú bonchí emen o/mû o-bángê e Fyinéhas, ne bonchí emen mú kánkán o/mû o-bángê e Élyi, mú o/mû nchi kyifen-Óburúkpâbí ké Shílo. Banet ámbe ba*da/nyît ba/fu, Jónátan oo/dim*.

⁴ Ké kyikit ńkyí badayú kaku ńké Mékyímashi ńkyí Jónátan odashwôm ké nkyí ne o-nyáng o-dim ké bampyep ḿbé banet-Fyilíta, biimbâng-aká byi/mû ányi byifee, bubónge kyicê ńkyín, ḿbú bubónge kyicê ńkyí áku. Bubónge ba/mû ba-kó ng kámbú Búzez, ne ḿbú bubónge to ba/mû ba-kó ng kámbú Séne.

⁵ Bubónge bu/mû ké kyicê ńkyí bushûyû, bu-bírî kashú ne Mékyímashi, ne ḿbú bubónge bu/mû ké kyicê ńkyí busyísen, bu-bírî kashú ne Géba.

⁶ Jónátan o/raa ne wǎn-kyisat ámu o/fu, byinyáng byi-wâa ké bampyep-banshâng bakye-banet-Fyilíta ámbe. Katô Óburúkpâbí o/chi o-chwáp bě. Â o/chwáp bě, chwǒm kyi*fí ńkyí kyida ǎ echi ne oo*chi bě byi-kpógê kámbé* nang be byi-kyú boǒníng nǎ*.

⁷ Wǎn ámu o-faa ǎ o/fu, [nang ebóng chwǒm ńkyí a/fu, a-chi i,] me mu ne wo ké kyikû.

⁸ Jónátan o-faa o/fu, nkyi kanong. Be byi/chi byi-nyáng byi-dim áku akîm banet-Fyilíta ba-ri bě.

⁹ Â mbé ba/sét bě ba/fu, be byibwom mbé ba-bâ ba-kâm bě, be byi/chi byi-bwom kâng kyikit ńkyí byimu.

¹⁰ Nké â ba/sét bě ba/fu, be byica byi-kâm kámbé, byi/chi byi-ca kâng, ké nǎ, ńkyí ánkyi kyi/chi kyi-kyú ekap nyí edatông e/fu, Óburúkpâbí oo/chi bě byi-kpógê kámbé.

¹¹ Mbé ba-chi kâng banet-Fyilíta ba-ri kámbé. Ne banet-Fyilíta ba-raa ba/fu, kan n̂ achi ba-ri, banet-Hyíburus bakíri mbe ba-byí i ba-bâ ké bǎmbwó ḿbé mbé ba/mû ba/rem ké kafâ.

¹² Ba-kó kâng Jónátan ne mú wǎn-kyisat ámu ba/fu, yú n̂g ba-bâ kwán kyíbóng. Byimu ne chwǒm ńkyí byida běn [esét.] Jónátan o-raa ne wǎn ámu o/fu, bâ ne me ké kyikû. Óburúkpâbí oo/chi banet-Ézerel ba-kpógê kámbé.

¹³ Jónátan o-yú abwô kyísí arông kyísí o-shwôm ké kyikit ánkyi, mú wǎn ámu o-câ ne nyǐ ké kyikû. Jónátan o-kye kâng banet-Fyilíta bunwa o-nwam kámbé o-díp kyísí, mú wǎn ámu o-ju kámbé.

¹⁴ Ké mbwôp kashú-dyiju ándyi, Jónátan ne wǎn-kyisat ámu ba/ju banyinchéng nang bujam [ké kaǎkím-kyikit.]

¹⁵ Kángkáng banet-Fyilíta ḿbé ké eshê nyí nyi ányi fáráng bushî bu/róng kámbé. Basúja ḿbé ba/mû mbe ba-bâ ne bunwa ebakpû ké oshê ne ḿbé ba/mû ké bampyep ba/kpet etím banê. Esí e-náng, banet ba-shî kanong kanong.

Banet-Ézerel ba/kpógê Banet-Fyilíta

¹⁶ Basúja-Otu Sôl ḿbé ba/mû mbe ba-bám m Gyíbya ké esí nyí Běnjámin ba/ri banet-Fyilíta mbe ba-zóngê e ba-câ ochi baa*nyît to ńkyí badachi*.

¹⁷ Otu Sôl o-raa kâng ne banet emen o/fu, pan n̂ basúja ba-nyît onet mú o*fí*. Ba-chi éné, ba-nyît ba/fu, Jónátan ne mú wǎn-kyisat mú mu o-kúng ng ǎ byiyám-byití ba*fí*.

¹⁸ Otu Sôl o-sét Ahíja mú nchi kyifen-Osówo o/fu, bâ kwán ne [kiǐchwóm-epé esô. Dyicí ándyi, Ahíja o/mû o/kúng kánkyí o-bwóp banet-Ézerel kashú.]

¹⁹ Nkéré mú Otu Sôl mu o-raa ng éné ne mú nchi kyifen-Osówo, kyicoge ńkyí kyi/nung ké bampyep-banet-Fyilíta nkyi kyi-kán n okán kyi-câ kashú. Otu Sôl o-raa ne nyǐ kâng o/fu, nkéré o*fí to mú byidachîpem ne Óburúkpâbí*.

²⁰ Nyǐ ne banet emen ba-dim kâng ba-nung ké byití ne banet-Fyilíta, ḿbé ba/mû ba-kú ba-nwa ng ne barî ké bubyiryibyiryi ḿbú boo*nwa eri*.

²¹ Banet-Hyíburus bakíri ḿbé ba/mû ba/firi ne banet-Fyilíta, ḿbé ba/mû baa/jé ne ojê ké bampyep-banet-Fyilíta, [ba/chîbírî] ba-kâm Otu Sôl ne Jónátan.

²² Bakíri ḿbé ba/mû mbe ba-rem m ké eku nyí Éferem ba/jwo ba/fu, banet-Fyilíta ba-kú ba-chêe ng. Ba-fé to kâng abwô ba-kpet enwa ne banet-Fyilíta,

²³ ba-nwa tete ba-shwôm Betáben. Óburúkpâbí o/chwáp banet-Ézerel dyicí ándyi.

Byěm ḿbyí byi/chi ké Nkéré Byití bii/man

²⁴ Esong e/jwâa Banet-Ézerel asa ké dyicí ándyi, ké nǎ, Otu Sôl o/mû o/ryí ocím kanong kanong ne o-kye busa o/fu, Osówo oshú nang yeě nang yeě mú odaryí byiryíng ké dyicí ńdyí kurún tete n-só banet-bushwôn ejí ewa. Ké bubwô ámbu, onet nang obónge o/mû o*da/ryí ne nang kaǎchwóm* ké kyirim-dyicí kyimúmú. [

²⁵ Mbé ashí amúmú] ba-da-byí ké kyikit kyibónge ńkyí byichí byi/jê, ba-rángê e bakút-bukwan ba-câ byiryibyiryi.

²⁶ Bakút-bukwan ba/mû baa/sú ké byichí ámbyi, nké onet nang obónge o*da/ryí nang kaǎnyín* ké nǎ, mbé ashí amúmú ba/mû mbe ba-shî ng kyibî-nshwam ńkyí Otu Sôl o/fé éné.

²⁷ Nké Jónátan o/mû o*da/jwo bushî ḿbú bonchí emen o/fé banet* ké kyibî-nshwam ánkyi*. O-tan kâng ochí mú o/mû o/kám, o-lip ké bakút-bukwan ámbe, o-ryí. Busa bu-waa ányi bu-nung ǎ.

²⁸ Nké onyinchéng obónge o/faa o/fu, be ashí amúmú bii/jwâa esong, nké bonchí eyên o/fé bě bushî o/fu, Osówo oshú nang yeě mú odaryí nang kaǎnyín-byiryíng kurún.

²⁹ Jónátan o-faa o/fu, ebóng kyibî-chwǒm něen ńkyí bonchí ejí oo/chi banet ejí. Kûri eringe nyí busa boo/nung mě, ké nǎ, n/ryí kaǎnyín-bakút-bukwan.

³⁰ Kyi/mû kyi/chi kyi-kyú kanong kanong kurún, â banet eten ba/mû ba/ryí byiryíng ámbyi ḿbyí ba/koo, nkéré mú ba/kpógê banet-bushwôn ámbe. Kabe kyi-kim ne bujê-banet-Fyilíta ḿbé ba/mû ba/chi ba-ju.

³¹ Dyicí ándyi, banet-Ézerel ba/kpógê banet-Fyilíta ba-nwa tete kyi-fím ké Mékyímashi tete ba-ribi Ájalon. Nkéré ámu, banet-Ézerel baa/kyee kanong kanong ké bubwô-esong,

³² ne ba-zóngê kâng ba-kâm byěm ḿbyí mbé baa/koo ne banet-bushwôn ebe, ba-níbî etám-ebû ne bampong ba-ju ké abe ányi ba-ryí ne baróng.

³³ Ba-sét Otu Sôl ba/fu, kûri, banet-Ézerel ba-kú ba-chi i kyibî ké bushú ḿbú Óburúkpâbí, ké oryî mú mbé mbe ba-ryí i enyam ne baróng. Otu Sôl o-wonge o/fu, ben bannîm banet. Bírî n̂g kiimbâng-buká ba-bâ mě ne nkyí [kwán.]

³⁴ O-kye kâng busa bukíri o/fu, ca n̂g ba-kâm banet ámbe ba-sét kámbé ashí amúmú ba/fu, babâ ne ebû ebe ne bampong ebe kwán. Baba-ju kámbé kwán ba-ryí. Mbé baa*man ba-chi kyibî ké bushú ḿbú Óburúkpâbí* ké oryî mú ba-kú ba-ryí i enyam ne baróng*. Ké buchú ámbu kâng, mbé ashí amúmú ba/bê ne bampong ebe ba-ju kámbé ányi.

³⁵ Otu Sôl o-bi kyikit-kyifen-Óburúkpâbí echi, ńkyí ányi kyi-chi i mbwôp kashú-kyikit ńkyí nyǐ o/bi.

³⁶ Otu Sôl o-sét banet emen o/fu, byishû n̂g kyísí byi-da-kye banet-Fyilíta bunwa ne buchú, byi-bam kámbé byěm byi-koo tete dyi-cé, byi-ju kámbé ashí amúmú. Mbé ba-faa ǎ ba/fu, chi ńkyí kyi/nyîn ǒ. Nké nchi kyifen-Osówo o/faa o/fu, mîng kpá byi-pem ne Osówo.

³⁷ Otu Sôl o-bí kâng Osówo o/fu, nkye banet-Fyilíta bunwa dí. A/chi a-chi bě byi-kpógê kámbé dí. Nké Osówo o*da ǎ efaa ojá dyicí ándyi*.

³⁸ Otu Sôl o-sét kâng banet-ashí-banet-Ézerel o/fu, bâ n̂g kwán ba-ké kyikû kyi-kim ne kyibî ńkyí bii/chi kurún.

³⁹ Me n/ryí ocím ké bushú ḿbú Osówo mú mu okpó, mú mu o-chi i banet-Ézerel ba-kpógê n/fu, onet ámu mú o/chi kyibî ba-man ba-ju ǎ, nang oyén o-chi i Jónátan mú wǎn ejí. Nké onet nang obónge o*da/faa ojá*.

⁴⁰ Otu Sôl o-sét kámbé kâng o/fu, bwom m̂ ányi ashí amúmú, ne me ne Jónátan byi/chi byi-bwom kwán. Mbé ba-faa ǎ ba/fu, chi ńkyí kyi/nyîn ǒ.

⁴¹ Otu Sôl o-raa ne Óburúkpâbí mú Osówo-Ézerel o/fu, Óburúkpâbí, ebóng wo a*da mě efaa ojá kurún*. Óburúkpâbí mú Osówo-Ézerel, [faa mě ojá ké aká-ociring eyên. Kyibî ánkyi, â me nang Jónátan nké byi/chi, faa mě ké dyímám ńdyín, ńdyí badakó búrim. Nké â banet eyên ḿbé Ézerel] nké ba/chi, faa mě ké dyímám ńdyí áku, ńdyí badakó túmim. Ńkyí Osówo o/faa kyi/tông kyi/fu, Jónátan ne Otu Sôl. Banet ḿbé áku kâng ba-byí ba-bwom kú.

⁴² Otu Sôl o-raa kâng o/fu, sét kyi-kim ne me ne Jónátan mú wǎn ejí. Ne dyímám dyi-tông kâng Jónátan.

⁴³ Otu Sôl o-bí kâng Jónátan o/fu, wo a/chi ebóng. Jónátan o-faa o/fu, n/ryí kaǎnyín-bakút-bukwan. Dǐi me i, me mm/kpá byiko ḿbyí ndakpú.

⁴⁴ Otu Sôl o-sét ǎ o/fu, kyi/bát Osówo oju mě, â ba*da ǒ eju*.

⁴⁵ Nké banet-Ézerel ba/raa ne Otu Sôl ba/fu, Jónátan mú o/kpógê byití ḿbyín, ḿbyí bii*nwa eri* o-kye Ézerel, okpú dí. Aa*wááng*. Be byimu byi-ryí i ocím ké bushú ḿbú Óburúkpâbí mú mu okpó byi/fu, nang kyiká-oju kyibónge kii*kédê ǎ ké dyishí*. Ochwâp mú Osówo nké nyǐ o/kúng ne o-chi ńkyí o/chi něen kurún. Ba-nyii kâng Jónátan ké bukyû ḿbú o/mû o/chi o-kpú.

⁴⁶ Nkéré mú ńkyí ánkyi kii/shwôm, Otu Sôl o/mîng ezóngê ne banet-Fyilíta ké kyikû, ba-bwa esim dyijê ké esí nyí ebe.

Butu ḿbú Otu Sôl ne Kyikû-Banet Emen

⁴⁷ Nkéré mú Otu Sôl oo/ryí butu ké Ézerel, nyǐ o/nwa byití ne kángkáng banet-bushwôn emen ké kángkáng byikit, banet ḿbé Mówep ne ḿbé Ámon ne ḿbé Édom ne batu ḿbé Zóba ne banet-Fyilíta. Nang kyikit kyirá nké nyǐ o/nwa ne mbé, [ba-kpógê e kámbé.]

⁴⁸ Nyǐ o/nwa okân-byití o-kpógê nang banet-Amálek. Nyǐ o/nyii banet-Ézerel ké bunwa nang burá ḿbú ba/kye kámbé.

⁴⁹ Bwǎn emen ḿbé banyinchéng ba/mû Jónátan ne Eshíbyi ne Makyíshwa. Ókpá emen mú onyinyi o/mû o-bángê e Mérap, mú wǎsíng o-bángê e Mákel.

⁵⁰ Onyi emen o/mû o-bángê e Ahínom, mú wǎn-Ahímaz. Onet-dyishí-basúja emen o/mû o-bángê e Ábina, mú wǎn-boné emen, mú wǎn-wǎn-boné-bonchí emen mú odabángê Nêe.

⁵¹ Kyíshi mú bonchí-Otu Sôl ne Nêe mú bonchí-Ábina ba/mû bwǎn-Ábyel.

⁵² Nkéré mú Otu Sôl o/mû o/tôong okpó, o/nwa byití ḿbyí bii*nwa eri* ne banet Fyilíta. Ne ké bubwô ámbu, nang nkéré orá nké nyǐ o/ri onet mú mu o-shwane e, nang mú odashwane achi, o-koo ǎ o-fé ké súja.