1 Sámwel 13 - Bokyi Bible

Byití ḿbyí ba/nwa ne Banet-Fyilíta

¹ [ ]

² Otu Sôl o/cá égot-banet onyiryiká, égot ebe diǐkpú e-waa ne nyǐ ké Mékyímashi ne ké esí nyí eku éku nyí Bétel, o-twóm égot etánge e-dim ne wǎn emen mú odabángê Jónátan ké Gyíbya, ké esí nyí kyikû-kyikim-banet ńkyí Běnjámin. Ḿbé ba/waa o-twóm kámbé ba-bwa esim dyijê.

³ Jónátan [o/ju onet-dyishí-basúja ḿbé Fyilíta] ké Géba, ne kángkáng banet-Fyilíta ba/jwo kyikim ne nkyí. Otu Sôl o-twóm kâng banet-kyitwóm o/fu, bajwá ntán ba-kó banet-Hyíburus ké oshê omúmú ba-bâ byití.

⁴ Ba/sét kángkáng banet-Ézerel ba/fu, Otu Sôl oo/ju onet-dyishí-basúja-Fyilíta, ba-sét to kámbé ba/fu, mbé mbe ba-sa ng banet-Fyilíta kafâ. Banet-Ézerel ba-faa kâng ojá ké obê mú ba/bê ba-kâm Otu Sôl ké Gyígal.

⁵ Banet-Fyilíta ba-cibi kyikit kyibónge eringe badanwa ne banet-Ézerel. Mbé ba/mû ne égot-bamútu etánge etánge ké byikit bujam esim diǐkpú ḿbé byití enwa, ba/mû to ne égot-banyû bubyî-orá bujam esim diǐkpú ne bujê-basúja to wǎ eringe nyí éshíshě nyi ké bukô-baya. Ba-dim ba-wâa Mékyímashi, ké kyicê ńkyí esû edabyí, ké oshê mú badakó Betáben, ba-bi bampyep-byití ebe ányi.

⁶ Ba-kye kâng banet-Ézerel bunwa ḿbú boo*nwa eri* ba-chi kámbé ba-firi yógeyóge. Banet-Ézerel bakíri ba-rem ké bacim ne ké bǎmbwó ne ké aká ne ké abíng ne ké abíng-omu.

⁷ Bakíri ba-nyáng kace ńké Jódan ba-jâ ké esí nyí Gât ne Gyílet. Otu Sôl o/mû o/tôong ké Gyígal, ne banet ḿbé ba/mû ne nyǐ ba/kpet eziri banê ké byiko.

⁸ Nyǐ o/bám Sámwel ké ací káchâtkányi wǎ eringe Sámwel o/mû o/sét ǎ o/fu, obám. Nké Sámwel o/tôong o*da/bê ne ké Gyígal*. Banet-Ézerel ba-kpet edim ba-mîng Otu Sôl.

⁹ O-raa ne mbé kâng o/fu, bâ n̂g mě ne byifen echi ḿbyí byěm eshí ne ḿbyí kyikwáré enap. O-chi kyifen ńkyí kyirim-kyitú eshí,

¹⁰ ne ńdyí mu o-man n kánkyí, Sámwel o/waa o-nung. Otu Sôl o-dim o-wâa ǎ edakâm o-ta ǎ to kyiraa,

¹¹ nké Sámwel o/faa o/fu, ebóng ńkyí wo aa/chi něen. Otu Sôl o-faa ǎ o/fu, banet ba/mû ba-kú ba-dim m ba-mîng mě, ne wo a*da/bê ké nkéré mú a/mû a/fu, a-bâ*. Bwa kwán to, banet-Fyilíta ba-kú ba-cibi ng barî ké Mékyímashi.

¹² Ne ké bubwô ámbu, me n/kabe n/fu, mbé ba/chi ba-ba-kye mě bunwa nyín ké Gyígal, ne me n*da/kan ne echi n-firi kanong ké bushú ḿbú Óburúkpâbí*. Ne n-kabe kâng n/fu, kyi-nwa ng ńkyí ndachi kyifen n-kye Óburúkpâbí.

¹³ Sámwel o-faa ǎ o/fu, ńkyí ánkyi enyam-chwǒm nké wo a/chi éné. Wo a*da/chi ńkyí Óburúkpâbí mú Osówo eyên o/sét ǒ*. Â wo a/mû a/chi ńkyí nyǐ o/sét ǒ, nyǐ o/mû o/chi o-bángê banet ḿbé ba/fím ké kyikû eyên ba-ryí butu ké Ézerel ne banyá ne banyá.

¹⁴ Nké kántîk, bwǎn eyên baa*ba/chi ba-chîryí butu ba-ca kashú*. Ké nǎ, wo aa/né echi ńkyí Óburúkpâbí o/sét ǒ, nyǐ o/chi o-ryuu dyizong-onet mú nyǐ mu o-kyé ng, o-chi ǎ o-firi otu mú banet emen.

¹⁵ Sámwel o-dim ké Gyígal [o-wâa kiǐfáng ńkyí emen. Banet ḿbé áku ba-dim ne Otu Sôl ké kyikû ńdyí mu o-wâa ng basúja emen edakâm. Ba-dim ké Gyígal] ba-wâa Gyíbya, ké esí nyí Běnjámin. Otu Sôl o-kpúrî basúja emen, ba/mû égot-banet nang echât.

¹⁶ Otu Sôl ne wǎn emen Jónátan ne banet ebe ba-da-bi bampyep-byití ebe ké Géba, ké esí nyí Běnjámin. Bampyep ḿbé banet-Fyilíta ba/mû ké Mékyímashi.

¹⁷ Basúja ḿbé banet-Fyilíta ba-byí ké bampyep ebe ké byikim byichât ne byiko kpákpá ḿbyí bunwa edakpû. Kyikim kyibónge ba/bírî kashú ḿbú Ófara, ké esí nyí Shwâl,

¹⁸ kyikim ńkyí kyibónge ba-bírî kashú ḿbú Bét-Hóron, ne ńkyí kyibónge to ba-wâa ḿbú buti, kyíbóng-ndege-esí mú Zébom ne kyikim-dyikán.

¹⁹ Banree bure ba/mû ba*fí ké Ézerel* ké nǎ, banet-Fyilíta ba/mû baa/sét ba/fu, banet-Hyíburus ba*dachîchi bushwám ne byíbye*.

²⁰ Banet-Ézerel ba/mû ba-da ng ejee byěm ḿbyí badakpang byifát ne byijwap ne akye ne [bushwám] ne banet-Fyilíta. [

²¹ Ba/mû ba-kyâ kámbé okpuga obónge ké akye ejee ne ké buchí enap ḿbú badaró bampong ké mbú.] Ne ba/mû ba-kyâ kámbé to ekpuga efee ké byěm ejee ḿbyí badakpang byifát ne byijwap to ejee.

²² Ne ké bubwô ámbu, ké dyicí-byití, súja-Ézerel o/mû o*fí nang obónge mú mu ne kashwám nang kyíbye* kyi-cibi ne Otu Sôl ne wǎn emen Jónátan nké ba/mû ne mbyí*.

²³ Banet-Fyilíta ba-twóm bujê-basúja ba/fu, bada-ku banet ké kyikit ńkyí badayú kaku ké Mékyímashi.