1 Sámwel 12 - Bokyi Bible

Nkuli Kyikû-Kyiraa ńkyí Sámwel o/raa

¹ Sámwel o-sét kâng banet-Ézerel o/fu, me nn/chi ńkyí ba/mû ba/bí mě. Me nn/kye běn otu mú oda běn ekûtún,

² ne kántîk, nyǐ nké o/firi běn ntông kiǐfáng. Kyi-kim ne me, me nn/kâa kanong kanong, ébyî e-byí mě ké dyishí, ne bwǎn ejí ḿbé banyinchéng mbe nyín ne ben. Me nn/kyú onet-dyishí enen kyi-fím ké dyikwá ejí tete kyi-ribi kántîk.

³ Dǐi me i. Â me n/chi kyibî nang kyibónge, sét n̂g mě kántîk ké bushú ḿbú Óburúkpâbí ne ḿbú otu emen mú nyǐ oo/cá. Me nn/koo mpong mú onet nang obónge? nang kaanyam-atû ńké onet nang obónge? Me nn/cít onet nang obónge? n-ryí onet to nang obónge mpún ké byiko? Me nn/koo ngu ne onet nang obónge? Â me nn/chi dyizong-chwǒm ńdyín nang dyibónge, m-man n esó ńkyí m/mû n/koo.

⁴ Banet-Ézerel ba-faa ǎ ba/fu, aa*wááng* wo a*da bě eryí ne mpún ké byiko* a-cít bě nang ocît*. Wo a*da bě ekoo ne chwǒm nang kyibónge*.

⁵ Sámwel o-faa o/fu, Óburúkpâbí ne otu emen mú nyǐ oo/cá baa/kúng achi ebe ba-ri dyicí ńdyí kurún ba/fu, ben baa/nyît byiká ne abwô ba/fu, me n*da/chi chwǒm ńkyín nang kyibónge*. Mbé ba-faa ǎ ba/fu, âa, Óburúkpâbí nké mu ntûesé eten.

⁶ Sámwel o-chîraa o-ca kashú o/fu, Óburúkpâbí nké o/mû o/cá Músis ne Éron, ne nyǐ to nké o/fîm banchí enen ḿbé kpákpá ba-byí ké Éjip.

⁷ Bwom m̂ kâng ké kyikit ńkyí ba/bwom, me n/chi n-sét ké bushú ḿbú Óburúkpâbí n/fu, ben ba/chi kyibî, [ké ozîim mú nda běn ezîim] kyi-kim ne kángkáng biǐtí-bǎmkpóngé ḿbé Óburúkpâbí o/chi eringe nyí oda běn enyii ne banchí enen to ḿbé kpákpá.

⁸ Nkéré mú Jekôp ne kyikû-banet emen ba/dim ba-jâ Éjip, [ne banet-Éjip ba-kpet ecít kámbé,] banchí enen ḿbé kpákpá ba/tii ba-kó Óburúkpâbí ba/fu, ochwáp kámbé. Ne nyǐ o/twóm Músis ne Éron ḿbé ba/chi kámbé ba-byí ké Éjip, ba-chi kámbé ba-kûkyú ké esí ńnyín.

⁹ Nké mbé ba/ráp Óburúkpâbí mú Osówo ebe, ne nyǐ o-mîng kâng banet-Fyilíta ne otu mú Mówep ne Sisárá mú onet-dyishí-basúja ḿbé oshê mú Házo ba-nwa ne banchí enen ḿbé kpákpá, ba-kpógê kámbé.

¹⁰ Mbé ba-tii kâng ba-kó Óburúkpâbí ba/fu, ochwáp kámbé. Ba-raa ba/fu, be bii/chi kyibî, ké nǎ, bii/bírî ǒ esim wo Óburúkpâbí, ne byi-kú byi-kyâ erím-bakye nyí Bâl ne nyí Asatáte ofê. Nyii bě ké abwô nyí banet-bushwôn eten, ne be byi/chi ba-kû ǒ ekye wo ofê.

¹¹ Ne Óburúkpâbí o-twóm kâng Gyídyon ne [Bérek] ne Jéfata, ne ké nryî esim o-ba-twóm mě me. Nang yeě ké burwám eten o/nyii běn ké abwô nyí banet-bushwôn enen, ne ben ba/kyú ké dyikpen ńdyí chwǒm kyi*da běn eta*.

¹² Nké nkéré mú ben ba/ri ba/fu, Otu Náhashi mú otu-Ámon o-kú o-bâ běn bunwa ebakye, ben ba/né Óburúkpâbí ba/fu, o*fí to otu enen* ba-raa ne me ba/fu, be byimu byi-ryuu ng otu mú oda bě ekûtún.

¹³ Kû n̂g eri kâng otu mú ben ba/cá. Ben nké ba/bí ba/fu, bakye běn nyǐ, ne kántîk, Óburúkpâbí oo/kye běn nyǐ.

¹⁴ Kángkáng byěm byi/chi byi-kû běn ece kashú kanong â ben bamu ba-kyâ Óburúkpâbí mú Osówo enen ofê, ba-chi i bǎmkpóngé ba-kyâ ǎ, ba-jwo ng ǎ kyiraa, ba-tî ng byije emen, ne â ben ne otu enen to bamu ba-chi i ńkyí nyǐ o/sét běn.

¹⁵ Nké â ben ba*fí ba-jwo ng Óburúkpâbí kyiraa* nké bamu ba-né ng ńkyí nyǐ o/sét běn, nyǐ o/chi o-bírî bunwa ne ben ne [otu enen.]

¹⁶ Ké bubwô ámbu, ben babwom m̂ kâng ké kyikit ńkyí bamu, ben ba/chi ba-ri kiǐtí-chwǒm ńkyí Óburúkpâbí o/chi o-chi.

¹⁷ Kántîk, burwom, *chí éné dí*. Nké me n/chi n-fé nshwam, ne Óburúkpâbí o/chi o-twóm etare ne omu. Â nkéré mú ńkyín kii/chi, ben ba/chi ba-nyît ba/fu, ben baa/chi kiimbâng-kyibî ké bushú ḿbú Óburúkpâbí, nkéré mú ben ba/bí ǎ ba/fu, okye běn otu.

¹⁸ Sámwel o-fé kâng nshwam, ne ké ochíchí-dyicí ándyi, Óburúkpâbí o/twóm etare ne omu. Kyi-fím ányi kâng kángkáng banet ba/kpet eshî Óburúkpâbí ne Sámwel.

¹⁹ Ne ba-raa ne Sámwel ba/fu, kamgbe, fé nshwam, ǎ bonchí, ké bubwô eten a-kye Óburúkpâbí mú Osówo eyên, eringe nyí bii*ba/chi byi-kpú*. Be kántîk, bii/nyît byi/fu, â a/fîm byibî eten ḿbyí áku byimúmú a-tî cát, be bii/chi kyibî ké obî mú byi/bí byi/fu, Óburúkpâbí okye bě otu.

²⁰ Sámwel o-faa kámbé o/fu, *da n̂g eshî*. Nang ké baa/chi něen kiimbâng-kyibî-chwǒm ńkyín, *da n̂g ebírî Óburúkpâbí esim* nké chi n̂g bǎmkpóngé ba-kye ǎ ne dyityém enen kángkáng.

²¹ *Da n̂g etún achi [ké] bakye ḿbé ba*fí ké kafâ*. Mbé baa*man běn chwáp* ba-nyii běn nang onyii* ké nǎ, mbé ba*fí wǎ chwǒm*.

²² Óburúkpâbí oo/ryí ocím kanong kanong, ne nyǐ oo*ba/chi o-mîng běn* ké nǎ, nyǐ oo/tî okabe o/fu, nyǐ o-chi i běn ba-firi banet ḿbé emen.

²³ Me ké kakim ńké ejí, Óburúkpâbí oo*bángê n-chi kyibî ké bushú ḿbú emen* ké ofê mú nn*fé to nshwam n-kye ǎ ké bubwô enen*. Nké me n-tángê e běn chwǒm ńkyí kyinong, ńkyí kyi/kwárê, ńkyí ben badachi.

²⁴ Kye n̂g Óburúkpâbí ofê, ba-chi bǎmkpóngé ba-kye ǎ ne dyityém dyibónge ne kángkáng dyityém enen. Zîim m̂ biǐtí-byěm ḿbyí nyǐ oo/chi o-kye běn.

²⁵ Nké â ben ba/wâa bamu ba-chi i byibî ba-câ kashú, ben ne otu enen ba/chi ba-kpú.