1 Sámwel 11 - Bokyi Bible

Otu Sôl o/kpógê Banet-Ámon

¹ Nkéré mú kii/shwôm nang otukáku obónge, Otu Náhashi mú o/fím Ámon o/kpî basúja emen ba-bâ byití ké oshê-Jábeshi, ké esí nyí Gyílet, ba-wáp kámú ba-fé ké kafâ. Banet-Jábeshi ba-raa ne Otu Náhashi ba/fu, chi kyikwáré ne be, ne be byi/chi byi-koo ǒ wǎ otu eten.

² Otu Náhashi o-faa kámbé o/fu, me n/chi n-chi kyikwáré ne ben ne okabe něen, obónge. Me n/chi m-fuu nang yeě nang yeě dyichi ńdyí bubwô-etyebéng, ne ké bubwô ḿbún, n-fâ kángkáng banet-Ézerel éshwân.

³ Banet-ashí-banet-Jábeshi ba-faa ba/fu, kye bě ací káchâtkányi eringe nyí byidatwóm kyitwóm ba-sét ké kángkáng esí-Ézerel. Â onet o*fí nang obónge mú oda bě echwáp* be byi/chi byi-zú abwô kâng ké bunwa.

⁴ Banet-kyitwóm ba-nung kâng ké Gyíbya, kyikit ńkyí Otu Sôl mu o-kyú u. Ne ké nkéré mú mbé ba/sét kyitwóm ńkyí ba/twóm kámbé, banet-Gyíbya ba-sêe ne bukyû ké dyityém ńdyí baa/zú ké dyikpen.

⁵ Otu Sôl o/mû oo/fím ké dyikán o-kú o-fyi ng o-bâ ne bampong emen. O-bí o/fu, ebóng kyi/byí. Ebóng ńkyí kángkáng banet mbe ba-tii ng. Ba-sét ǎ ńkyí banet-kyitwóm ámbe, ḿbé ba/fím Jábeshi ba/sét.

⁶ Nkéré mú Otu Sôl o/jwo ńkyín, busa ḿbú Busun-Osówo bu-waa bu-nung ǎ ké byiko, dyityém dyi-bên ǎ ké kafâ.

⁷ O-yip bampong bafee, o-cere byikim byikim, o-twóm banet o/fu, bakúng kámbé ba-ca ne mbé ké esí-Ézerel emúmú. Ba-tut kámbé butông ba/fu, nang yeě nké o*da/dim ne Otu Sôl ne Sámwel ké kyikû ba-ca byití* ba/chi ba-cere bampong emen to něen. Banet-Ézerel ba/shî Óburúkpâbí, ne mbé ashí amúmú nang onet o*da/waa* ba/dim ba-ca ashí amúmú.

⁸ Otu Sôl o-cibi kámbé kyikit kyibónge, ké Bézek. Banet-Ézerel ba/mû bajam-égot bujam esim diǐkpú, ne ḿbé ba/fím Júda ba/mû égot etánge etánge ké byikit bujam esim diǐkpú.

⁹ Ba-sét banet-kyitwóm ámbe ḿbé ba/fím Jábeshi ba/fu, sét n̂g banet enen ba/fu, ne kyi-kûribi nencí ké ńcên-esû, Óburúkpâbí o/chi o-nyii kámbé. Nkéré mú banet-Jábeshi ba/jwo ejá ányi, bunyîn-dyityém bu-sú kámbé byiko.

¹⁰ Ba-sét Otu Náhashi ba/fu, nencí byi/chi byi-zú abwô ké bunwa, ne wo a/chi a-chi bě nang ebóng chwǒm ńkyí kyi/nyîn ǒ.

¹¹ Ké dyicófóróng ké orî-dyicí, Otu Sôl o/kyii banet emen ké byikim byichât, ne nkéré mú dyicí dyi-wángê e dyi-bâ, mbé ba/kpû ké bampyep-banet-bushwôn ebe ba-kye banet-Ámon bunwa. Nkéré mú dyicí dyi-kú dyi-chî ng ekán ba-ju kámbé, banet-Ámon ḿbé ba/waa bakpó ba-pwôo byiryibyiryi, onet ne onet o-zóngê e kiǐfáng ńkyí emen o-câ.

¹² Banet-Ézerel ba-bí kâng Sámwel ba/fu, banet ámbe mbe nyá, ḿbé ba/fu, Otu Sôl o*dachi o-kyú otu eten*. Níbî kámbé a-kye bě byi-ju.

¹³ Nké Otu Sôl o/faa kámbé o/fu, kurún, baa*ju onet nang obónge* ké nǎ, kurún, ányi dyicí ńdyí Óburúkpâbí oo/nyii banet-Ézerel.

¹⁴ Sámwel o-sét kámbé o/fu, bâ n̂g byi-dim ashí amúmú byi-ca Gyígal byi-chîdakúng Otu Sôl butu.

¹⁵ Ba-dim kâng ashí amúmú ba-ca Gyígal, ne ba-waa ányi ké kyikit-ociring ba-kúng Otu Sôl butu. Ba-chi byifen-kyikwáré ba-kye Óburúkpâbí, ne Otu Sôl ne kángkáng banet-Ézerel ba-jêe kanong kanong.