1 Sámwel 10 - Bokyi Bible

¹ Sámwel o-yip kâng kaatyu-bakút-ólif o-pwó Sôl ké dyishí, o-rwâm ǎ. O-raa o/fu, Óburúkpâbí [oo/kúng ǒ butu ḿbú adakûtún banet emen ḿbé Ézerel. Wo a/chi a-kûtún banet emen a-bám m to kámbé ké kángkáng banet-bushwôn ebe. Ne ńkyín nké nkyi kyi-tông ng ǒ kyi/fu, Óburúkpâbí oo/cá ǒ] o/fu, wo akyú otu mú banet emen.

² Â a/dim a-mîng mě kurún, a/chi a-kwárê ne banyinchéng ashí afee, fáráng ne dyikun ńdyí Ríchel, ké Zéza, ké esí nyí Běnjámin. Mbé ba/chi ba-sét ǒ ba/fu, boonyam-atû ḿbú amu a-kyé ng, baa/já kámbú, ne ké bubwô ámbu, bonchí eyên o*fí to o-kérê ng kyi-kim ne mbú* nké o-kú o-kérê ng kyi-kim ne wo, ne mu o-bí ng kángkáng nkéré o/fu, me n-chi i nǎ kyi-kim ne wǎn ejí.

³ A/chi a-dim ányi a-kûcen a-câ tete a-da-ribi ké kyichí-ociring, ké oshê mú badakó Tábo, ányi nké a/chi a-kwárê ne banyinchéng ashí achât ḿbé ba-kú ba-dim m kyifen edachi ké Bétel ba-kye Osówo. Obónge o/chi o-níbî esu-ebû echât ké orí, mú obónge o/chi o-kúng byirim-berêt byichât, ne mú nryî esim o/chi o-kám kabu-bato.

⁴ Mbé ba/chi ba-ta ǒ kyiraa, ba-kye ǒ byirim-berêt byifee, ḿbyí wo a/chi a-koo.

⁵ Wo a/chi a-dim kâng a-wâa ké kaku ńké Osówo, ké Gyíbya, ké kyikit ńkyí banet-Fyilíta [ba/bi bampyep-byití ebe.] A/chi a-kwárê ne bujê-bamkpábé ḿbé badasét byiraa-Osówo ké dyishí-bukwóp, ké baa/fím kyíbóng-kaku ké kyikit-kyifen-Osówo echi mbe ba-shû ng ba-bâ, ba-kim m ácîng ne ekam, ba-jwá ng to boontán. Mbé ba/chi ba-kûne ane ba-wonge e.

⁶ Busa ḿbú Busun-Osówo bu/chi bu-waa ányi bu-nung ǒ ké byiko, ne a/chi a-nung a-kâm kámbé ké ane ebe ányi nyí ékwâbashi ne owonge to mú mbe ba-wonge e, ne a/chi a-firi dyizong-onet dyikíri.

⁷ Â nkéré mú byěm ḿbyín bii/chi, chi nang ebóng chwǒm ńkyí Osówo mu o-tírîng ng ǒ o/fu, achi.

⁸ Wo a/chi a-bwóp mě kashú a-dim Gyígal, kyikit ńkyí me n/chi n-kâm ǒ n-chi byifen ḿbyí byitú eshí ne ḿbyí kyikwáré. Kyú ányi ké ací káchâtkányi tete m-bâ m-ba-sét ǒ ńkyí adachi.

⁹ Nkéré mú Sôl oo/bírî kashú o-kú o-dim m o-mîng Sámwel, Osówo o/chi ǎ o-firi dyizong-onet dyikíri. Ne kángkáng byěm ḿbyí Sámwel o/sét ǎ to byi/chi dyicí ándyi.

¹⁰ Nkéré mú Sôl ne ḿgbán emen ba/nung ké Gyíbya, bujê-bamkpábé ḿbé badasét byiraa-Osówo ba/bê ba-kâm ǎ. Busa ḿbú Busun-Osówo bu-waa bu-nung ǎ ké byiko, o-nung o-kâm kámbé ké ane ene ne dyiwonge ewonge.

¹¹ Banet ḿbé ba/mû baa/nyît ǎ kpá ba/ri ǎ ké mu o-chi i éné, ba-kpet ebí barî ba/fu, ebóng kyi-kú kyi-chi i Sôl mú wǎn-Kyíshi. Nyǐ to o/firi mkpábé mú odasét byiraa-Osówo dí.

¹² Onyinchéng obónge mú mu o-kyú u ányi o-bí o/fu, aa bamkpábé ḿbén to kâng, ben ba/kabe ba/fu, banchí ebe be yeě. Éné nké kyi/cen ne ba-kûbí ba/fu, Sôl to o/firi mkpábé mú odasét byiraa-Osówo dí.

¹³ Nkéré mú Sôl oo/mîng ane ene ne dyiwonge ewonge, o/dim o-wâa kyíbóng-kaku, kyikit-kyifen-Osówo echi.

¹⁴ Wǎn-boné-bonchí-Sôl mú onyinchéng o-ri Sôl ne mú ḿgbán ámu, o-bí kámbé o/fu, ben ba/mû ba/ce nyá. Sôl o-faa ǎ o/fu, byi/mû byimu byi-kyé ng boonyam-atû. Nkéré mú byi*fí byi-ri ng kámbú* byi/dim byi-wâa edari Sámwel.

¹⁵ Nyǐ o-bí Sôl o/fu, Sámwel o/sét běn ebóng.

¹⁶ Sôl o-faa ǎ o/fu, o/sét bě o/fu, baa/já kámbú. Nké nyǐ o*da/sét wǎn-boné-bonchí emen ámu ńkyí Sámwel o/raa o/fu, nyǐ ofiri otu*.

Sámwel o/kúng Sôl Butu

¹⁷ Sámwel o/kó banet-Ézerel ba-ba-cibi kyikit kyibónge ké bushú-Óburúkpâbí, ké Myízipa.

¹⁸ O-raa ne mbé o/fu, Óburúkpâbí mú Osówo-Ézerel mu o-raa ng o/fu, me nké n/fîm běn ba-byí ké Éjip, n-nyii běn ba-fem ké abwô nyí banet-Éjip ne nyí kángkáng banet ḿbé áku, ḿbé ba/mû mbe ba-cít ng běn.

¹⁹ Me n-chi i Osówo enen mú mu o-nyii ng běn ké kángkáng afaníkong enen ne busông eri, nké kurún ben baa/né mě, ne baa/bí mě ba/fu, nkye běn otu. Kántîk kâng, bâ n̂g kyikit kyibónge ké bushú ḿbú Óburúkpâbí, ké byikû-abóng ne ké byikim-byikû-banet.

²⁰ Sámwel o-fu kâng kyikû-dyibóng nang kyirá ba-bâ kashú. Ne Óburúkpâbí o-cá kyikû-dyibóng ńkyí Běnjámin.

²¹ Sámwel o-chi kâng byikû-banet ḿbyí kyikû-dyibóng ńkyí Běnjámin ba-bâ kashú. Óburúkpâbí o-cá kâng kyikû-banet ńkyí Mátyi. [Banyinchéng ḿbé ba/fím ké kyikû-banet ánkyi ba-byí kâng ba-bâ kashú.] Óburúkpâbí o-cá kâng Sôl mú wǎn-Kyíshi. Ba-kyé ǎ, nké ńdyí ba*fí ba-ri ng ǎ*

²² mbé ba/bí Óburúkpâbí ba/fu, onet okíri mu kô dí. Óburúkpâbí o-faa kámbé o/fu, Sôl mu ányi, o/rem ké azu-byěm.

²³ Ba-zóngê kâng ba-kpî Sôl ba-ba-kye banet ámbe. Ne mbé ba/ri ba/fu, nyǐ o/mû o/kwóp butang o-shwôm nang yeě nang yeě.

²⁴ Sámwel o-raa ne banet ámbe o/fu, nyín něen onyinchéng mú Óburúkpâbí oo/cá ǎ. Onet nang obónge o*fí to ké burwám eten* mú mu wǎ nyǐ*. Kángkáng banet ba-wonge ba/fu, otu oryí dyikyi.

²⁵ Sámwel o-sét banet ámbe kyi-kim ne busa ne bǎmkpóngé ḿbé otu odachi. O-sáng kâng byěm ámbyi kyísí ké nwet, mú o/yip o-tî ké kyikit-ociring. O-sét kâng kángkáng banet ba-dim dyijê.

²⁶ Otu Sôl o-bwa to esim dyijê ké Gyíbya. [Banet bakíri ḿbé mbe ne busa,] ḿbé busa ḿbú Osówo boo/nung kámbé ké atyém, ba/dim ne Otu Sôl ké kyikû.

²⁷ Nké enyam-banet bakíri ba/raa ba/fu, onyinchéng mún o-chwáp ng bě ké ebóng bukwóp. Mbé ba/fu, aǎa, Sôl to yeě, ne mbé ba*da ǎ ebakye nang kaǎchwóm*.