1 Pyíta 5 - Bokyi Bible

Dyibóng-Ebû ńdyí Osówo

¹ Me to mú mu onet-dyishí mú ékwâbashi nyí Karâs mu n-tîm m barî-banet ejí ḿbé banet-ashí ké ékwâbashi enen arông. Me mu ntûesé mú busông ḿbú Karâs o/ri, ne me n/chi n-kyú ké busan ḿbú ragerage ḿbú Osówo o/chi o-tông. Me mu n-tîm m běn arông n/fu,

² kyú n̂g bambâm dyibóng-ebû ńdyí Osówo o/kye běn, ba-tún kándyí ne dyityém enen wǎ eringe nyí Osówo mu o-ryuu ng o/fu, ben bachi, *chí ne kafâ esa*. Chi n̂g bǎmkpóngé enen, *chí ké bubwô ḿbú badakoo akpuga* nké ké ochíchí-okabe enen mú ba/fu, ben ba-chi i kámbé.

³ *Da n̂g echi ba-kûkan ba/fu, ben ba-kyú u banet-ashí ḿbé banet ḿbé Osówo oo/kye běn o/fu, ben bakûtún*. Nké kyú n̂g wǎ kyiká-édúú ńkyí dyibóng-ebû dyidakûcen.

⁴ Ne ké nkéré Otu-Mbâm Ebû oo/bê, ben ba/chi ba-koo eyáré nyí ragerage nyí busan emen ḿbú boo*ba/chi bu-rím ne banyá*.

⁵ Ké dyizong-bukwóp ámbu bubónge, ben ḿbé bwǎn-byisat ba-man ba-jwâa byiko enen kyísí ba-kye banyinchéng ḿbé baa/kán. Ben to kángkáng ba-man ba-fé budegere ké byiko wǎ kyídí-bǎmkpóngé, ḿbú badabángê barî byitwóm. Ké nǎ, ejá-Osówo nyí ba/sáng kyísí e/fu, Osówo o-nwa ng ne ntông byiko. Nké mu o-kyâ onet mú mu degere ochwâp.

⁶ Jwâa n̂g byiko enen kyísí kâng ké dyifít-bubwô-Osówo ḿbú bu/rêe bu-shwôm, eringe nyí o/chi o-bêem běn kyíbóng ké nkéré mú o/kwárê ǎ.

⁷ Sét n̂g ǎ kángkáng byěm ḿbyí mbyi byi-kédê ng běn ofong, ké nǎ, nyǐ mu o-kérê ng kyi-kim ne ben.

⁸ Kpá n̂g byiko ba-kûbám Otu-Byibî-Barím mú mu onet-bushwôn enen mu o-cen n o-wáp ng wǎ ekpang nyí nyi e-fém m, e-kyé ng enyam nyí edakám e-ryí.

⁹ Bwom m̂ cip ké dyityém enen ńdyí ba/fé ne Osówo, ba-bwom bunwa ne Otu-Byibî-Barím. Ké nǎ, ben bamu ba-nyît ng ba/fu, barî-banet enen ḿbé ba/bángê ne Karâs ké ejíí emúmú mbe ba-ri ng to dyizong-busông ándyi dyibónge.

¹⁰ Nké â ké nkéré mú baa/ri busông ké kaǎnyín-nkéré, Osówo mú mu o-tông ng dyityém emen ecángê ké kángkáng byěm ḿbyí nyǐ mu o-chi i, mú mu o-kó ng běn o/fu, ben bada-kyú ké busan emen ḿbú ragerage ḿbú ne banyá ké ocibi ne Karâs, nyǐ oyén o/chi o-chi běn ba-kwárê ké bushú ḿbú emen, ne o-kye běn bushwane ké dyityém ne busa, ne o/chi o-kpet běn kyikû ńkyí shwaneshwane.

¹¹ Busa bukyú ne nyǐ ne banyá ne banyá. Kyi/bát kyikyú éné.

Nkuli Kyikû-Kyiraa eta

¹² Sálas mú mu n-kúng ng ǎ wǎ wǎn-boné ejí, mú o/fé dyityém ne me nké mu o-chwáp ng mě n-sáng běn kaǎkím-léta ńkén. Me mu n-ryuu ng n/fu, n-fâ běn busa, n-sét běn to wááng n/fu, nyín ochwâp mú ntûntû mú Osówo. Bwom m̂ kíngkíng ké mǔ.

¹³ Banet-ékwâbashi nyí Karâs ḿbé ké Bábyílon ḿbé Osówo o/cá kámbé to ba/ta běn kyiraa. Mâk mú mu wǎn ejí ké bubwô ḿbú Karâs o/ta běn to kyiraa.

¹⁴ Ta n̂g barî kyiraa ne dyirwâm ńdyí kyijé wǎ banet ḿbé ba/bángê ne Karâs. Kyi/bát bunyîn-dyityém bukyú ne ben kángkáng mú ba/já Karâs.