1 Pyíta 4 - Bokyi Bible

Akpen nyí Banet ḿbé ba/bángê ké Karâs aa/yángê

¹ Ké bubwô ḿbú Karâs o/ri busông ké enyam-byiko, ben to ba-man ba-shwane byiko enen ne dyizong-okabe obónge, ké ebóng, nang yeě nké mu o-ri ng busông ké enyam-byiko, onet ámu o*fí to ké busa ḿbú byibî*.

² Kyi-fím kántîk kyi-ca kashú kâng, ben ba-man ba-kûkyú akpen enen nyí ké ejíí ńnyín ké busa ḿbú okabe mú Osówo, *chí ké busa ḿbú enyam-byiko enen nyi e-ryuu ng*.

³ Ké ebóng, ben baa/bên nkéré chwóó ké nkéré mú o/shwôm ké esim, ké byěm echi ḿbyí byidanyîn banet ḿbé ba/bángê ké bakye esháng. Ba/mû ba-kyú u akpen enen ké karíng erí ne banet byiryibyiryi ne ké babép ebép ne ké bato ebwóm ne ké byikit-ajî eryí ne ké ajî-bato ejwáp ne byibî-édúú nyí erím-bakye ofê ekye.

⁴ Kántîk, kyi/firi banet ḿbé ba/bángê ké bakye esháng chwǒm-akat, ne ba-kú ba-shú u běn ké ba*fí to ba-cibi ng ne mbé ké dyizong-obyiryibyiryi-dyikpen ńdyí mbé mbe ba-kyú u*.

⁵ Nké mbé ba/chi ba-pan mpan ké bushú-Osówo kyi-kim ne byiko ebe, Osówo mú oo/kpá byiko ḿbyí odapan banet bakpó ne bakúsí mpan.

⁶ Nkyí nké kyi/chi ne ba-pem to basun Bǎmpém ḿbé Banong ne banet to ḿbé Osówo o/mû o/pan kámbé mpan ké enyam-byiko wǎ eringe nyí badapan kángkáng banet mpan. Ba/pem kámbé Bǎmpém ḿbé Banong, eringe ké dyikpen ńdyí basun ebe, mbé badaman ekyú dyikpen wǎ ńdyí Osówo mu o-kyú u.

Bǎmpém ḿbé Banong ḿbé Eyáré nyí Osówo

⁷ Nkuli kyikû-nkéré mú kángkáng byěm oo/fárâng. Ben ba-man ba-níbî byiko enen kanong ba-kpá to byiko, eringe nyí badaman efé nshwam.

⁸ Kyú n̂g ké kyijé ne barî kanong kanong. Ńkyín kyi/shwôm kángkáng byěm. Ké ebóng, kyijé kyi-cít ng byibî chwóó.

⁹ Koo n̂g banet ké byise enen ne bunyîn-dyityém, *chí ne kafâ esa*.

¹⁰ Osówo o/kye běn eyáré emen ké azong ké azong. Nang yeě o-man o-kúng eyáré emen nyí o/koo ne Osówo o-chi kanong o-kye barî-banet wǎ ḿgbán mú onong.

¹¹ Nang yeě nké mu o-pem m Bǎmpém ḿbé Banong, o-man o-pem byiraa-Osówo. Nang yeě nké mu o-chi i bǎmkpóngé ḿbé Osówo, o-man o-chi kámbé ne busa ḿbú Osówo mu o-kyâ ǎ, eringe nyí badakye Osówo akpee ké kángkáng byěm, ké bubwô-Jisos Karâs mú busan ḿbú ragerage ne busa byi/já ǎ ne banyá ne banyá. Kyi/bát kyikyú éné.

Busông eri wǎ Banet ḿbé ba/bángê ké Karâs

¹² Bacín-dyityém ejí, kyi*da běn echi wǎ chwǒm-akat* ké kyibî-okan ńkyí bamu ba-ri ng busông éné* wǎ chwǒm ńkyí banet ba/mû ba*da/ri ne* nké kyi-kú kyi-chi i běn*.

¹³ Nké kyú n̂g ké bunyîn-dyityém eringe nyí bamu ba-ri ng busông burwám ne Karâs, eringe nyí ben ba/chi ba-sú ne bunyîn-dyityém ké nkéré Osówo o/chi o-tông busan ḿbú Karâs ḿbú ragerage.

¹⁴ Bunyîn-dyityém mbu ne ben, â banet ba/cábê běn, ké nǎ, ben ba-chi i banet ḿbé mbe ba-cen n ne Karâs ké kyikû. Ńkyín kyi-tông ng kyi/fu, Busun-Osówo ḿbú mbu ne busan ḿbú ragerage mbu běn ké byiko.

¹⁵ Kyi*da/kwárê* â onet nang obónge ké burwám enen mu o-ri ng busông ké bubwô ḿbú nyǐ mu nju banet* nang mu njii kajii* nang mu nchi byibî-byěm* nang mu o-kan n abwô efé ké byěm-banet*.

¹⁶ Nké â wo amu a-ri ng busông ké bubwô ḿbú wo a-chi i onet mú o/bángê ne Karâs, éshwân e*dachi e-chi ǒ ké nkyí*. Nké kó Osówo asǎma ké amu a-bángê e dyizîn ńdyí Karâs.

¹⁷ Nkéré oo/fyi mú mpan ámu odakpet. Kyikû-banet-Osówo nké Osówo o/chi o-bwóp kashú o-pan kámbé mpan. Â mpan mu o-kpet ng ne be, mǔ o-cen n nǎ ne o-man ne banet ḿbé ba*da/bángê ké Bǎmpém ḿbé Banong* ḿbé ba/fím ne Osówo.

¹⁸ Wǎ eringe nyí ejá-Osówo nyí ba/sáng kyísí e/fu, kyi-sóng ng ne Osówo o-nyii banet ḿbé banong. Ebóng kyi/chi kyi-chi kâng banet ḿbé ba*fí ba-fâ Osówo* ne banchi byibî.

¹⁹ Ké bubwô ámbu kâng, banet ḿbé mbe ba-ri ng busông, ńkyí nkyi ké okabe mú Osówo o/tî ne mbé, ba-man ba-ca kashú ké édúú ebe nyí enong, ne ba-man ba-kúng byiko ebe kángkáng ba-kye Osówo mú o/chi kámbé, mú kángkáng nkéré mu o-tî ng ocím emen mú o/ryí.