1 Pyíta 3 - Bokyi Bible

Eringe nyí Banyi badakyú ne Batyép Ebe

¹ Ké dyizong-bukwóp bubónge, ben banyi ba-man ba-jwâa byiko enen kyísí ba-kye batyép enen, eringe nyí â batyép enen bakíri ba*fí ba-bángê e ké byiraa ḿbyí Osówo* édúú enen e/chi e-chi kámbé ba-kûbángê ké mbyí. Kyi*fí ńkyí badaraa ké ejá*

² ké ebóng, mbé ba/chi ba-ri eringe nyí édúú enen nyi kpárám ne ofê.

³ *Da n̂g echi ba-kûyip byěm-búsé echi ba/fu, byichwáp běn ba-chi byiko enen byi-kûnwa* wǎ ké dyizong-bukwóp ḿbú bamu ba-nap ng eji enen* nang ké byibwáng ḿbyí bamu ba-fâ ké byiko* nang ké byídí ḿbyí bamu ba-bwá ng*.

⁴ Nké bunong enen bukyú ké kafâ-atyém enen nyí ntûntû. Bunong ḿbú dyityém ńdyí dyinong ne ńdyí degere, ḿbú boo*kâa* ḿbú mbu kiǐtí bu-shwôm ké bushú ḿbú Osówo.

⁵ Ké ebóng, banyinyi ḿbé kpákpá ḿbé ba/mû ba-fâ Osówo, ḿbé ba/tî okabe ebe ne Osówo ba/mû ba-fwam m echi byiko ebe byi-kûnwa ké dyizong-bukwóp ḿbún, ké byiko ebe ejwâa kyísí ba-kye batyép ebe.

⁶ Sirá o/mû éné. Nyǐ o/kye Ébarahâm mú otyép emen ofê, ne o/mû o-kó ng ǎ, bonchí ejí. Ben kántîk ba-chi i bwǎn emen ḿbé banyinyi, â ben bamu ba-chi i kanong, nang chwǒm ba*fí ba-shî ng*.

⁷ Ben batyép to, ké dyibé ne banyi enen, ben ba-man ba-nyît ba/fu, mbé mbe kyeekyee. Ké bukwóp ámbu, ben ba-man ba-kûtî kámbé ne ofê, ké nǎ, mbé to ba/chi ba-koo cibicibi ne ben eyáré-Osówo nyí dyikpen. Chi n̂g ńkyín, eringe chwǒm kii*ba/chi kyi-kyú ńkyí kyi/chi kyi-ku banshwam enen ḿbé bamu ba-fâ ba-kyâ Osówo*.

Busông eri ké Dyishí ńdyí Kanong echi

⁸ Ké nkuli kyikû, ben ashí amúmú ba-man ba-kyú ne dyizong-okabe dyibónge ne bafip eri ne barî. Jê n̂g barî wǎ bwǎn-bané, ne kyú n̂g to degere ne dyityém ecángê ne barî.

⁹ Â onet o/chi ǒ kyibî, *dabwa ne kyibî a-só ǎ* nang o/shú ǒ kyishû, a-shú ǎ to*. Nké só ǎ ne ojware, ké ebóng, ojware nké Osówo o/ryí ocím o/fu, nyǐ o-kyâ běn ké nkéré nyǐ o/kó běn.

¹⁰ Wǎ eringe nyí ejá-Osówo nyí ba/sáng kyísí e/fu, nang yeě nké mu o-ryuu ng o/fu, dyikpen emen dyikyú ne bunyîn-dyityém, ne mu o-ryuu ng o/fu, nyǐ o-ri ng ací nyí anong, onet ámu o-man o-mîng byibî-byiraa eraa ne byisédéng esét.

¹¹ Onet ámu o-man o-mîng byibî, o-kûchi kanong. O-man o-kûkyé bunyîn-dyityém o-câ ne mbú ké kyikû.

¹² Ké nǎ, Otu Kyítá mu o-tî ng achi emen ké byiko-banet ḿbé mbe ba-chi i kanong, ne mu o-fwôo ng atông o-jwo ng banshwam ebe. Nké mu o-bírî ng banet ḿbé mbe ba-chi i byibî esim.

¹³ Yeě o/chi o-némê běn, â chwǒm ńkyí kyinong nkyi kyi-nyîn n běn echi.

¹⁴ Nké nang ba/bwa ba-ri busông ké dyishí-chwǒm ńkyí kyinong ńkyí bamu ba-chi i, bunyîn-dyityém mbu ne ben. *Da n̂g ekûshî banet* nang ofong o*da běn ekédê*.

¹⁵ Nké kye n̂g Karâs ofê ké atyém enen, ba-chi ǎ o-kyú Otu Kyítá enen. Kpá n̂g byiko enen kángkáng nkéré ḿbyí badafaa nang yeě mú mu o-bí ng běn o/fu, ben basét ǎ kyikû ńkyí achi etî nyí nyi běn ké atyém.

¹⁶ Nké chi n̂g kánkyí degere ne ofê. Tî n̂g okabe enen kpárám, eringe ké nkéré mú baa/dángê běn, éshwân e/chi e-wuri banet ḿbé mbe ba-raa ng byibî-byiraa kyi-kim ne édúú enen nyí enong wǎ bancen ne Karâs ké kyikû, ké ńkyí mbé mbe ba-raa ng.

¹⁷ Ké ebóng, kyi/nwa ńkyí badari busông ké dyishí-kanong echi, â nkyi ké okabe mú Osówo, kyi-shwôm ńkyí badari busông ké dyishí-byibî echi.

¹⁸ Ké nǎ, Karâs oyén o/kpú ké dyishí enen, ne o/kpú kabónge kyi-man éné ké dyishí-byibî. Onet mú onong o/kpú ké dyishí-byibî, eringe nyí oda běn etông bukwóp ba-kâm Osówo. Ba/ju enyam-byiko emen, nké Osówo o/chi busun emen bu-kpen.

¹⁹ Ne ké dyikpen ńdyí busun emen, nyǐ o/ce o-da-pem basun ḿbé mbe ké mgbokobá Bǎmpém ḿbé Banong.

²⁰ Basun ḿbén ba/mû banet ḿbé ba*da/kye Osówo ofê* ké nkéré nyǐ o/mû o-bám m degere ké ací nyí Núwa o/mû mu o-chi i ńsukyíkang*. Buce ḿbú bu/sú bu-cít ejíí emúmú bu/nyángê boǒnyín-banet ḿbé ba/mû ké kafâ-ńsukyíkang ámu, mbé kángkáng ba/mû ashí nyíryinyi.

²¹ Osoo mú Osówo mú mu o-nyii ng běn kántîk o/bwom ké dyishí-buce ámbu. O*fí wǎ babat esoo ké enyam-byiko* nké o-nyii ng běn ké bubwô-ocím mú ben ba/ryí ne atyém enen kpárám. Mǔ mu o-nyii ng běn ké bubwô-ojwóbe mú Jisos Karâs o/jwóbê ké bukyû.

²² Mú oo/jé kyíbóng ne mu ké kyicê-bubwô-etyebéng ḿbú Osówo, ne byibî-barím byimúmú ne kángkáng byibî-bací ne kángkáng byěm ḿbyí mbyi ne busa ḿbyí bii*man eri* byi/firi ké bubwô emen.