1 Pyíta 2 - Bokyi Bible

Buká ḿbú Bukpó ne Oshê mú o/já Osówo

¹ Mîng n̂g kâng kángkáng byibî. *Da n̂g echîsét byisédéng* nang banet enîm* nang orêm ké byěm-banet echi* nang barî-banet edángé ekye ké ejá*.

² Ochíchí-abî-mpong nyí busun nké akû běn ejê kángkáng nkéré wǎ bwǎn-bajújwô ḿbé ba/fwon abeabe, eringe nyí â ba/jwáp kányí, ben ba/chi ba-kán ba-ribi ké onyii mú Osówo.

³ Wǎ eringe nyí ejá-Osówo nyí ba/sáng kyísí e/fu, ben baa/fwôo dyityém ecángê ńdyí Otu Kyítá.

⁴ Bâ n̂g ba-kâm Otu Kyítá mú mu buká ḿbú bukpó, ḿbú banet ba/né ba/fu, bu*da/byí chwǒm* nké Osówo o/cá kámbú wǎ kiǐtí-chwǒm.

⁵ Bâ n̂g wǎ aká nyí akpó, ba-mîng Osówo o-yip běn o-bi kiǐtí-kyise-kyifen-Osówo echi ńkyí busun, kyikit ńkyí ben ba/chi ba-chi bǎmkpóngé wǎ banchi kyifen-Osówo ḿbé banong, ba-kûchi byifen ḿbyí busun ne ḿbyí Osówo odakoo ké bubwô-Jisos Karâs.

⁶ Ké ebóng, ejá-Osówo nyí ba/sáng kyísí e/sét e/fu, Osówo o/fu, me n/cá kiǐtí-buká ńkyí me nn/yip kántîk m-bi kyikû-ekpe ké oshê mú badakó Záyon. Ne nang yeě mú mu o-bángê e ne nyǐ éshwân ee*ba/chi e-wuri ǎ*.

⁷ Ben kâng mú ba/bángê ne atyém enen, buká ḿbún mbu běn kiǐtí. Nké kyi-kim ne banet ḿbé ba*da/bángê ké mbú* ba/raa ba/fu, ochíchí-kyirim-buká ńkyí bambi kyise ba/né kii/bírî kyi-firi kiǐtí kyi-shwôm aká nyí áku.

⁸ Ejá-Osówo ekíri to e/fu, nyín něen buká ḿbú bu/chi bu-chi banet ba-kpán n ácíring, buká ḿbú bu/chi bu-chi kámbé ba-myii. Mbé mbe ba-kpán n ké mbú, ké ebóng, mbé ba*da/bángê ne ejá-Osówo*. Busông ḿbú Osówo o/tî kámbé éné.

⁹ Nké ben ba-chi i kyikim-banet ńkyí Osówo o/cá, ba-chi i to banchi kyifen-Osówo ḿbé Kiǐtí-Otu, ne ba-chi i to oshê mú o/já Osówo, ne ba-chi i banet ḿbé Osówo. Osówo oo/cá běn o/fu, ben bakûsét wááng kyi-kim ne biǐtí-byěm emen. Nyǐ mú oo/fîm běn ké kyifip o-tî běn ké kiinwángé ńkyí emen ńkyí kii*nwa eri*.

¹⁰ Ké nkéré obónge, ben ba/mû ba*fí banet ḿbé Osówo*. Nké kántîk, ba/firi banet emen. Ké nkéré obónge, ben ba/mû ba*fí ba-nyît ng bafip ḿbé Osówo mu o-ri ng banet*. Nké kántîk, oo/ri běn bafip.

Kyú n̂g wǎ Básóng ḿbé Osówo

¹¹ Me mu n-tîm m běn arông, ǎ bacín ejí, wǎ bacinbánet ne wǎ banet ḿbé ba*fí ne oshê ké ejíí ńnyín*. *Da n̂g ekûchi byěm ḿbyí enyam-byiko nyi e-ryuu ng* ḿbyí mbyi kángkáng nkéré ké bunwa ne busun*.

¹² Édúú enen e-kim ne banet ḿbé ba/bángê ké bakye esháng e-man e-kyú nyí enong, eringe nyí nang mbé ba/bât běn ba/fu, ben ba-chi i banchi byibî, mbé ba/chi ba-ri byěm enen ḿbyí byinong ḿbyí bamu ba-chi i, ne ké bubwô ámbu, ba-kye Osówo akpee ké Dyicí ńdyí nyǐ o/chi o-bâ.

¹³ Jwâa n̂g byiko enen kyísí ké bubwô-Otu Kyítá ba-kye banet-ashí kángkáng, ba-kye otu mú Rûm mú mu otu-dyishí mú oryên.

¹⁴ Ba-kye batu-ashí-esí ḿbé otu mú Rûm o/twóm kámbé o/fu, baba-tángê banchi byibî dyishí, ba-kpee banet ḿbé mbe ba-chi i kanong.

¹⁵ Ké ebóng, okabe mú Osówo mu něen, nyǐ mu o-ryuu ng o/fu, ké byěm enen ḿbyí byinong ḿbyí bamu ba-chi i, ben bachi eringe nyí byiraa ḿbyí byi*da/byí chwǒm* ḿbyí enyam-byiko nyi e-raa ng byidawaa kyísí.

¹⁶ Kyú n̂g wǎ banet ḿbé mbe ké byiko ebe. Nké *da n̂g eyip kámbyí ba-kûcít kyibî-chwǒm nang kyibónge*. Nké kyú n̂g wǎ básóng ḿbé Osówo.

¹⁷ Kye n̂g kángkáng banet ofê. Barî-banet enen ḿbé ba/bángê ké Karâs bakû běn ejê. Kû n̂g eshî Osówo, ba-kûkye to otu mú Rûm ofê.

Kyiká-Édúú ńkyí Busông ḿbú Karâs bu/tông

¹⁸ Ben mú bamu bǎmgbán ba-man ba-jwâa byiko enen kyísí ba-kye banchí enen, ba-kye kámbé ofê kerededet. *Chí banchí enen ḿbé ba/cángê atyém ne mbe ba-ri ng běn bafip nké nke ben badakye kámbé ofê*. Nké kye n̂g to banchí enen ḿbé ba/bên atyém.

¹⁹ Osówo o/chi o-jware běn ké ńkyín, â ben ba/ryí ofit ké bubân ḿbú busông ḿbú bamu ba-koo ng dyikáá. Ké ebóng, ben bamu ba-nyît ng okabe emen.

²⁰ Ké ebóng, ebóng mpún mu ányi, â wo a/ryí ofit ké byimirî ḿbyí byi/kwárê ne wo ké kyibî ńkyí a/chi. Nké â wo amu a-ryí i ofit ké busông eri, nang ké nkéré mú aa/chi ńkyí nkyi kanong, Osówo o/chi o-jware ǒ ké nkyí.

²¹ Kyi/mû ké ńkyín nké Osówo o/kó běn, ké nǎ, Karâs oyén o/ri busông ké dyishí enen, ne o/mîng běn kánkyí wǎ kyiká-édúú, eringe nyí ben to badakúng kyiká ánkyi.

²² Nyǐ o*da/chi kyibî nang kyibónge*. Onet nang obónge o*fí mú o/jwo kyisédéng kyi-byí ǎ ké ocím nang kyibónge*.

²³ Ké nkéré mú ba/kye ǎ edángé, nyǐ o*da/bírî o-faa kámbé ne edángé*. Ké nkéré mú nyǐ o/ri busông, nyǐ o*da/fé banet bushî*. Nké nyǐ o/tî okabe emen ké Osówo mú mu mpan bampan mú oo*ryí acît*.

²⁴ Karâs oyén o/kúng byibî eten ké enyam-byiko emen o-dim ne mbyí ké kyikwap ńkyí badashwân onet, eringe nyí byiko byida bě ekpú byi-mîng byibî echi, byi-kpen ké kanong echi. Ké bubwô-byinêm emen, Osówo oo/chi běn ba-nyange.

²⁵ Ben ba/mû wǎ ebû nyí ee/tánê kiǐfáng ebe. Nké baa/bwa ne ben esim kántîk, eringe nyí badacen ne mbâm ebû ne ntûn basun enen ké kyikû.