1 Pyíta 1 - Bokyi Bible

¹ Me Pyíta mú mu onet-kyitwóm-Jisos Karâs nké mu n-sáng ng běn ben banet ḿbé Osówo o/cá běn, ḿbé bamu ba-kyú u byiryibyiryi ké esí nyí Póntus ne Galísha ne Kapadósha ne Ésha ne Byítyínya wǎ banet ḿbé ba*fí to ne oshê*.

² Kyi/bát Osówo otông běn dyityém emen ecángê ne bunyîn-dyityém kanong kanong. Ben ba/cá běn ké okabe mú Osówo Bonchí, eringe nyí Busun emen buda běn echi ba-firi banet ḿbé banong, ne eringe nyí badakûchi ńkyí Jisos Karâs o/fu, bachi, ne eringe nyí baróng emen bada běn echi ba-cé.

Achi etî nyí Akpó

³ Bâ n̂g byi-kó Osówo asǎma mú mu Bonchí mú Jisos Karâs, Otu Kyítá eten. Ké bubwô-kiǐtí-bafip emen ḿbé mu o-ri ng bě, nyǐ o/kye bě dyikpen ńdyí dyifyîfî ké ojwóbe mú nyǐ o/jwóbê Jisos Karâs ké bukyû. Ńkyín nkyi kyi-chi i atyém eten a-sú ne achi etî nyí akpó.

⁴ Ké bubwô ámbu, be byimu byi-tî ng achi nyí byidakoo biǐtí-banjware ḿbé Osówo mu o-tî ng banet emen. Nyǐ mu o-tî ng běn kámbé kyíbóng ké kyikit ńkyí baa*ba/chi ba-fwoo* ba-bên nang obên* ba-kpú nang omu*.

⁵ Banjware ámbe ba/já běn ben mú ké bubwô ḿbú dyityém efé ne Osówo, nyǐ ké busa emen o*fí o-bángê e kyibî-chwǒm kyi-ta běn* ké nkéré bamu ba-bám m onyii mú o-kú o-bâ ebyí kyíjí wááng* ké nkuli kyikû-nkéré*.

⁶ Jêe n̂g kyi-kim ne nkyí, nang kyi/bwa nkyi běn kántîk chwǒm ńkyí badakyú ké bafip ké kaǎnyín-nkéré, ké bubwô-azong-ekan chwóó nyí mbe ba-kan n běn.

⁷ Ekan ányi nyi e-tông ng e/fu, dyityém enen ńdyí ba/fé ne Osówo ndyi ntûntû. Nang gûl mú odabên, okwâ mú nree bure mu o-kan n kámú. Ké eringe ányi ebónge kâng, dyityém enen ńdyí ba/fé ne Osówo ńdyí ndyi kiǐtí dyi-shwôm gûl, ba-man ba-kan kándyí to, eringe dyidaryí ofit. Ne ben kâng ba/chi ba-koo akpee ne busan ḿbú ragerage ne ofê ké Dyicí ńdyí Osówo o/chi o-tông Jisos Karâs wááng.

⁸ Nyǐ mu o-jê ng běn, nang ké ben ba*da ǎ eri ne*. Ben bamu ba-bángê e ké nyǐ ne atyém enen, nang ké ben ba*fí ba-ri ng ǎ kántîk*. Ne ké bubwô ámbu, ben bamu ba-jêe ng ne kiǐtí-ojêe ne akpee nyí ejá ee*man esét*.

⁹ Ké nǎ, ben bamu ba-koo ng onyii mú basun enen wǎ mpún mú dyityém enen efé ne Osówo.

¹⁰ Kyi/mû kyi/kim ne onyii mún nké bamkpábé ḿbé badasét byiraa-Osówo ba/kyé kyikû kanong kanong ba-bí kyi-kim ne mǔ. Ne bamkpábé ámbe ba/sét kyi-kim ne eyáré ńnyín nyí Osówo o/chi o-kye běn.

¹¹ Ba/kan ekyé kyikû kyi-kim ne nkéré mú o/chi o-bâ, ne eringe nyí o/chi o-bâ. Ké ebóng, Busun ḿbú Karâs ḿbú bu/mû kámbé ké byiko bu/sét kyi-kim ne busông ḿbú Karâs o/chi o-ri nkéré mún, ne busan ḿbú ragerage ḿbú bu/chi bu-bâ busông ámbu ké kyikû.

¹² Osówo o/sét bamkpábé ḿbén ḿbé badasét byiraa emen o/fu, bǎmkpóngé ebe ḿbé ba/mû mbe ba-chi i ba*fí ké kanong ńké ebe* nké mbe ké kanong ńké enen wǎ eringe nyí mbé ba/sét kyi-kim ne byěm ámbyi ḿbyí ben baa/jwo kántîk ne banet-kyitwóm-Bǎmpém ḿbé Banong. Mbé ḿbé ba/sét běn kámbé ké busa ḿbú Busun-Osówo ḿbú bu/fím kyíbóng ne kyitwóm. Byěm ḿbyín byi-chi i ḿbyí byidanyîn nang barím ḿbé banong ba/fu, mbé banyît kyikû.

Okô ké Dyikpen ńdyí Dyinong ekyú

¹³ Ké bubwô ámbu kâng, nap n̂g atyém enen ba-tî ké byěm echi. Kû n̂g ebám, ba-tî to achi enen amúmú ké ojware mú Osówo o/chi o-kye běn ké nkéré mú Osówo o/chi o-tông Jisos Karâs wááng.

¹⁴ Kû n̂g echi ńkyí Osówo o/fu, ben bachi. *Da n̂g ebángê ekabe enen nyí ba/mû ne nyǐ ké nkéré mú ba/mû ba*fí ba-nyît ng chwǒm* e-yángê akpen enen*.

¹⁵ Nké kyú n̂g ké akpen nyí anong, ké kángkáng byěm ḿbyí bamu ba-chi i wǎ eringe nyí Osówo mú o/kó běn mu kanong.

¹⁶ Ejá-Osówo nyí ba/sáng kyísí e/sét e/fu, Osówo o/fu, ben ba-man ba-kyú kanong, ké nǎ, me mu kanong.

¹⁷ Ké nkéré mú ba-kú ba-fâ nshwam ba-kye Osówo mú mu o-pan n kángkáng banet mpan ké dyizong-bukwóp dyibónge eringe nyí nang yeě nang yeě oo/chi, ben bamu ba-kó ng ǎ Kyítá. Ké bubwô ámbu kâng, kúng n̂g akpen enen amúmú ké ejíí ńnyín ba-kye ké ofê mú Osówo.

¹⁸ Ké nǎ, ben bamu ba-nyît ng dyifwá ńdyí nyǐ o/ré, eringe nyí oda běn echi ba-fem ké bukwóp-dyikpen enen ḿbú bu*da/byí chwǒm* ḿbú ba/koo ne banchí enen ḿbé kpákpá. Ńkyí nyǐ o/kúng ne o-ré dyifwá kyi/mû kyi*fí wǎ chwǒm ńkyí kyidabên* éné wǎ akpuga*.

¹⁹ Kyitông ńkyí Karâs mú o/mû wǎ wǎn-etám-ebû mú o*fí ne kyinêm* nang dyikpât* o/kye ké kyifen echi nké kyi/chi běn ba-fem.

²⁰ Osówo o/cá ǎ kpá, ne o-kûchi ejíí, ne ké dyishí enen, Osówo oo/tông ǎ kyíjí gbúúl ké banryî esim-ací ḿbén.

²¹ Ké bubwô emen nké ben bamu ba-bángê e ké Osówo ne atyém enen, mú o/jwóbê ǎ ké bukyû ne o-kye ǎ busan ḿbú ragerage. Ké bubwô ámbu, dyityém enen efé ne Osówo ne achi enen etî aa/tíngê busi a-kâm Osówo.

²² Kántîk mú ben baa/bwât akpen enen, ne baa/firi ne étingétingé-kyijé ne barî-banet enen ḿbé ba/bángê ké Karâs ké bubwô ḿbú ba/chi ńkyí ntûntû o/sét, barî-banet bajê běn kanong kanong ne atyém enen kángkáng.

²³ Ké nǎ, ké bubwô-ejá-Osówo nyí nyi ekpó ne ne banyá, ben baa/chî běn efwon wǎ bwǎn ḿbé Bonchí mú oo*kpú*.

²⁴ Wǎ eringe nyí ejá-Osówo nyí ba/sáng kyísí e/sét e/fu, kángkáng banet mbe wǎ biǐbyâa, ne kángkáng busan ebe ḿbú ragerage mbu wǎ ekong-biǐbyâa ámbyi. Ké nkéré biǐbyâa bii/kpú, ekong emen e-roo.

²⁵ Nké ejá nyí Otu Kyítá e-waa ng ne banyá. Ejá ńnyín, ányi Bǎmpém ḿbé Banong ḿbé ba/sét běn.