1 Kyîng 9 - Bokyi Bible

Osówo o/chîbyí o-kâm Otu Sólómon

¹ Nkéré mú Otu Sólómon oo/bi kiǐtí-kyise-kyifen-Osówo echi ne kyibám-butu ne kángkáng byěm ḿbyí nyǐ mu o-ryuu ng o/fu, nyǐ o-bi ng,

² Óburúkpâbí o/chîbyí o-kâm ǎ, wǎ eringe nyí o/mû o/chi ké Gyíbwon.

³ Óburúkpâbí o-raa ne nyǐ o/fu, me nn/jwo nshwam eyên. Me n/koo kiǐtí-kyise-kyifen-Osówo echi ńkyín, ńkyí a/bi wǎ kyikit ńkyí ba/chi ba-kû mě ekye ofê ne banyá. Me n/chi n-kûbám kánkyí n-ku kánkyí kángkáng nkéré.

⁴ Â wo amu a-kyâ mě ofê ne dyityém wááng ké bukwóp ḿbú bunong, wǎ eringe Otu Dívit mú ńchân o/mû o-chi i, ne â wo amu a-tî ng byije ejí a-chi i to kángkáng byěm ḿbyí me n/sét ǒ,

⁵ me n/chi n-tî ocím ejí mú me n/ryí Otu Dívit mú ńchân, ńdyí n/sét ǎ n/fu, kángkáng nkéré, banet ḿbé ba/fím ké kyikû emen ba-man ba-kyú batu ḿbé banet-Ézerel.

⁶ Nké â wo nang banet ḿbé ba/fím ké kyikû eyên ba/mîng kyiká-édúú ejí ekúng, â a/né byije ejí a-kûkye esówo ekíri ofê,

⁷ me n/chi n-fîm banet-Ézerel ḿbé banet ejí ké esí nyí nn/kye kámbé. Me n/chi m-mîng to kiǐtí-kyise-kyifen-Osówo echi ńkyín, ńkyí me n/koo wǎ kyikit ńkyí bada mě ekûkye ofê. Kángkáng banet ba/chi ba-kûjwó Ézerel ba-kúng kámbé fúú.

⁸ Kiǐtí-kyise-kyifen-Osówo echi ńkyín kyi/chi kyi-firi [kiǐbwô-kyise,] ńkyí nang yeě nang yeě mú o/shwôm ányi o/chi o-ninge dyishí o-waa ocím ké dyishí fúú. Ne mbé ba/chi ba-bí ba/fu, ebóng kyi/chi ne Óburúkpâbí o-chi esí ńnyín ne kiǐtí-kyise-kyifen-Osówo echi ńkyín byi-firi éné.

⁹ Banet ba/chi ba-faa ba/fu, ké nǎ, mbé ba/mîng Óburúkpâbí mú Osówo ebe, mú o/fîm banchí ebe ḿbé kpákpá ba-byí ké Éjip, ba-kûfé dyityém ne esówo ekíri. Nkyí nké Óburúkpâbí oo/chi kámbé ba-rím.

Eshê nyí Otu Sólómon o/kye Otu Hyíram

¹⁰ Kyi/kúng Otu Sólómon aje bujam ne o-bi kiǐtí-kyise-kyifen-Osówo echi ne kyibám-butu emen.

¹¹ Otu Hyíram mú o/fím Táya nké o/kye ǎ kángkáng byichí ḿbyí badakó séda ne pyîn ne kángkáng gûl mú nyǐ o/mû mu o-ryuu ng ké bǎmkpóngé ámbe. Nkéré mú bǎmkpóngé ámbe baa/man, Otu Sólómon o/kye ǎ eshê bujam ké esí nyí Gályílyi.

¹² Otu Hyíram o-dim o-wâa eshê ányi edari, ne eshê ányi e*da ǎ enyîn*.

¹³ Ne o-raa kâng ne Otu Sólómon o/fu, nyín ányi eshê nyí wo aa/kye mě dí, ǎ wǎn-boné ejí. Ké bubwô ámbu, ba/tôong ba-kó ng kyikit ánkyi Kábul, ányi kyi/byí, kyi*da/byí chwǒm*.

¹⁴ Otu Hyíram o/mû oo/twóm Otu Sólómon égot-bakyílogaram-gûl e-shwôm nang bujam.

Byěm Byikíri ḿbyí Otu Sólómon o/chi

¹⁵ Otu Sólómon o/chi básóng ké busa ba-bi kiǐtí-kyise-kyifen-Osówo echi ne kyibám-butu, ba-sû to ecing ké kyicê-oshê ńkyí esû edabyí, ba-bi to ekpe nyí e/wáp oshê e-fé ké kafâ. Nyǐ o/chi kámbé ké busa to ba-chîbi eshê nyí Házo ne Megído ne Géze.

¹⁶ Otu mú Éjip o/mû oo/kye oshê-Géze bunwa o-koo kámú, o-ju banet ḿbé ba/mû ké mǔ, o-cók okwâ o-fé. Ne o/yip kâng kámú o-yárê wǎn emen mú onyinyi, ńdyí o/bé Otu Sólómon,

¹⁷ ne Otu Sólómon o-bwât kámú o-bi. O/chi kámbé to ké busa ba-bi oshê-Bét-Hóron mú busyísen

¹⁸ ne Bálat ne Táma nyí e/mû ké kyikim-dyikán ńkyí Júda,

¹⁹ ne eshê nyí nyǐ o/mû mu o-tî ng byěm emen. Ne eshê nyí o/mû mu o-tî ng bubyî-orá emen ne bamútu ḿbé bubyî-orá emen, ne ba/bi kángkáng byěm ḿbyí nyǐ o/mû mu o-ryuu ng o-bi ké Jerúsélem ne Lebánon, ne nang nyá nang nyá ké butu emen.

^20-21 Ké busa nké Otu Sólómon o/tírîng banet ḿbé ba/fím ké kyikû-banet ńkyí Kínan, ḿbé banet-Ézerel ba/mû ba*da/ju kámbé* ńdyí ba/koo kámbé esí* ba-chi bǎmkpóngé ámbe. Banet ḿbén ba-chi i banet-Ámórit ne ḿbé Hyítat ne ḿbé Périzit ne ḿbé Hyíbit ne ḿbé Jébus, ḿbé banet ḿbé ba/fím ké kyikû ebe ba/waa básóng tete kurún.

²² Otu Sólómon o*da/tírîng banet-Ézerel ké busa wǎ básóng*. Mbé ba/mû mbe ba-chi i ǎ bǎmkpóngé wǎ basúja emen ne banet-ashí-bǎmkpóngé ne bannyân byití ne banet-ashí-bamútu ḿbé bubyî-orá budatut ne banyû bubyî-orá emen.

²³ Banet-ashí ḿbé ba/mû ba-tún n azu-básóng ba/mû égot-banet efee ne kyicê, ne bajam-banet bafee esim diǐkpú, ḿbé ba/mû ba-tún n byikit-bǎmkpóngé emen ḿbé byise ebi.

²⁴ Otu Sólómon o/sû ecing ké esí nyí ké kyicê-oshê ńkyí esû edabyí, ńdyí onyi emen mú wǎn-otu-Éjip o/dim ké oshê-Otu Dívit o-jâ ké kyibám-butu ńkyí Otu Sólómon o/bi o-fé ǎ.

²⁵ Otu Sólómon o/mû mu o-chi i byifen kampén kachât ké dyije, ḿbyí byěm eshí ne ḿbyí kyikwáré ne Óburúkpâbí, ké kyikit-kyifen-Osówo echi ńkyí nyǐ oo/bi, o-kyâ Óburúkpâbí. O/mû mu o-shí i to burwan o-kyâ Óburúkpâbí. Ne nyǐ o-man kâng kiǐtí-kyise-kyifen-Osówo echi.

²⁶ Otu Sólómon o/bi to bujê-bǎnsukyíkang ké Ezón-Gébe, fáráng ne Élat, ké dyiga ńdyí Ákwaba, ké esí nyí Édom.

²⁷ Otu Hyíram o-twóm kyicê-banet ḿbé baa/nyît bǎmkpóngé-kace kanong kanong, ḿbé mbe ba-chi i bǎmkpóngé ké bǎnsukyíkang emen o/fu, baca ba-kûchi bǎmkpóngé ne banet-Otu Sólómon.

²⁸ Ba-nung ké bǎnsukyíkang ba-ribi ké esí nyí Ófyi, ba-yip bajam-égot-bakyílogaram-gûl ba-shwôm nang bachât esim diǐkpú ba-ba-kye Otu Sólómon.