1 Kyîng 8 - Bokyi Bible

Ba/bê ne mkpukpu-byěm-Osówo ké Kiǐtí-Kyise-Kyifen-Osówo echi

¹ Otu Sólómon o-twóm kâng o/fu, kángkáng banet-ashí ḿbé byikû-banet ḿbyí Ézerel babâ ba-kâm ǎ ké Jerúsélem, eringe nyí badadakúng mkpukpu-byěm-Óburúkpâbí ké Záyon, mú mu oshê mú Otu Dívit, ba-bâ ne mǔ ké kiǐtí-kyise-kyifen-Osówo echi.

² Mbé ashí amúmú ba-ba-cibi ké nkéré mú mbe ba-chi i dyijî-kyifen ńkyí boompyep ebi, ké otukáku mú Étanim.

³ Nkéré mú kángkáng banet-ashí baa/cibi, banchi kyifen-Osówo ba-yip mkpukpu-byěm-Osówo kyíbóng,

⁴ ba-bâ ne mǔ ké kiǐtí-kyise-kyifen-Osówo echi. Banchi kyifen-Osówo ne bǎmgbán ebe ba-yip to mpyep-kyifen-Óburúkpâbí echi ne kángkáng byěm to ba-bâ ne mbyí ké kiǐtí-kyise-kyifen-Osówo echi.

⁵ Otu Sólómon ne kángkáng banet-Ézerel ba-cibi ké bushú ḿbú mkpukpu-byěm-Osówo, ba-chi kyifen ńkyí bujê-etám-ebû ne bampong, ḿbyí bii*nwa epan*.

⁶ Banchi kyifen-Osówo ba-yip kâng mkpukpu-byěm-Osówo ba-nung ne mǔ ké kafâ-kiǐtí-kyise-kyifen-Osówo echi, ba-tî kámú ké ochíchí-nfût-ociring, ké dyifít-biǐnyám ḿbyí mbyi ne abyibabang.

⁷ Abyibabang ebe nyí nyi nabenabe a-cít mkpukpu ámu ne byichí ḿbyí ba/kúng kámú.

⁸ Ashí-byichí ámbyi, nang yeě nké o/bwom ké kashú-ochíchí-nfût-ociring dángdáng o-ri ng kányí, aa*bwom kyikit kyikíri a-ri kányí*. Byichí ámbyi byi/tôong áku tete kurún.

⁹ Chwǒm kyi/mû kyi*fí ké kafâ-mkpukpu ámu* kyi-cibi ne biǐbáá-aká byifee ḿbyí Músis o/fé ányi ké kaku ńké Sána* nkéré mú Óburúkpâbí o/ryí ocím ne banet ḿbé Ézerel ba-sem dyizîn emen* ńdyí mbe ba-byí i ké Éjip*.

^10-11 Nkéré mú banchi kyifen-Osówo ba-kú ba-byí i ké kiǐtí-kyise-kyifen-Osówo echi, ófíbí mú mu o-san n busan ḿbú Óburúkpâbí ḿbú ragerage o/waa o-sú ányi, ne mbé ba*da/chîman ebwa esim ba-da-chi bǎmkpóngé ebe*.

¹² Ne Otu Sólómon o-fé kâng nshwam o/fu, [wo, ǎ Óburúkpâbí, nké a/tî óbyísû kyíbóng,] nké wo aa/cá a/fu, a-kyú u ké ófíbí ne ké kyifip.

¹³ Me mm/bi kiǐtí-kyise-kyifen eyên echi ńkyí butu kántîk n-tî ǒ, kyikit ńkyí adakyú ké kafâ ne banyá.

Sólómon o/pem ne Banet-Ézerel

¹⁴ Ńdyí banet-Ézerel mbe ányi nensang cip, Otu Sólómon o/bírî kámbé kashú, o-bí Osówo o/fu, ojware kámbé.

¹⁵ O-raa ne mbé o/fu, kpee n̂g Óburúkpâbí mú Osówo-Ézerel. Nyǐ oo/tî ocím mú o/mû o/ryí Otu Dívit mú bonchí ejí, ńdyí o/fu,

¹⁶ kyi-fím ké nkéré mú n/fîm banet ejí ba-byí ké Éjip, me n*da/cá ne oshê nang obónge ké esí-Ézerel emúmú n/fu, babi kiǐtí-kyise-kyifen echi ejí ányi* kyikit ńkyí bada mě ekûkye ofê*. Nké me n/cá ǒ wo, ǎ Otu Dívit, n/fu, kyú otu mú banet ejí.

¹⁷ Ne Otu Sólómon o-raa o-ca kashú o/fu, bonchí ejí Otu Dívit o/mû o/tî okabe o/fu, nyǐ o-bi ng kiǐtí-kyise-kyifen-Osówo echi ńkyí badakûkye Óburúkpâbí mú Osówo-Ézerel ofê,

¹⁸ nké Óburúkpâbí o/raa ne nyǐ o/fu, nkyi kanong ńkyí a/mû a-ryuu ng a/fu, a-bi ng kiǐtí-kyise-kyifen echi ejí a-tî mě,

¹⁹ nké wo aa*ba/chi a-bi kánkyí*. Wǎn mú wo oyén a/chi a-fwon nké o/chi o-bi kiǐtí-kyise-kyifen echi ejí.

²⁰ Ne kántîk Óburúkpâbí oo/tî ocím emen mú o/mû o/ryí. Me nn/kúng kyikit ńkyí bonchí ejí wǎ otu, ne me mm/bi kiǐtí-kyise-kyifen-Osówo echi ńkyí badakûkye Óburúkpâbí mú Osówo-Ézerel ofê.

²¹ Me nn/tî to kyikit ké kiǐtí-kyise-kyifen-Osówo echi ńkyí badatî mkpukpu-byěm-Osówo, mú ba/fé biǐbáá-aká byifee ḿbyí ocím eryí mú Óburúkpâbí o/ryí ne banchí eten ḿbé kpákpá, ba-sem dyizîn emen, ńdyí o/fîm kámbé ba-byí ké Éjip.

Nshwam mú Otu Sólómon o/fé

²² Ne banet ámbe ányi, Otu Sólómon o/dim o-da-bwom ké bushú-kyikit ńkyí badachi kyifen-Osówo, o-bêem abwô emen kyíbóng,

²³ ne o-fé nshwam o/fu, Óburúkpâbí mú Osówo-Ézerel, osówo o*fí nang obónge mú mu wǎ wo* kyíbóng nang kyísí*. Wo amu a-tî ng ocím eyên mú a/ryí ne banet eyên a-sem byiko eyên, ne amu a-tông ng kámbé kyijé eyên â mbé mbe ba-chi i kángkáng byěm ḿbyí a/sét kámbé.

²⁴ Wo aa/tî ocím mú a/mû a/ryí Otu Dívit mú bonchí ejí, kurún, kángkáng byěm bii/chi.

²⁵ Nké kántîk, ǎ Óburúkpâbí mú Osówo-Ézerel, me mu n-fâ nshwam n/fu, wo a/chi a-tî to ocím mú obónge mú a/ryí bonchí ejí, ńdyí a/sét ǎ a/fu, kángkáng nkéré, onet o-man o-kyú ké kyikû emen wǎ otu mú Ézerel, â mbé mbe ba-chi i ńkyí wo a/sét kámbé ba-bám m byiko ebe kanong kanong wǎ eringe nyǐ o/chi.

²⁶ Kántîk kâng, ǎ Osówo-Ézerel, mîng kángkáng byěm byi-chi, ḿbyí wo a/ryí Otu Dívit mú bonchí ejí mú ḿgbán eyên ocím.

²⁷ Nké wo, ǎ Osówo, ké ntûntû, a-kyú u ké ejíí ńnyín dí. Nang bubóng bumúmú bu*da/rêe ḿbú adakwárê* kyise ńkyín kâng, ńkyí mm/bi něen, kyi-cen n nǎ ne kyi-rêe kyi-kwárê ǒ.

²⁸ Óburúkpâbí mú Osówo ejí, me n-chi i ḿgbán eyên. Fwôo atông a-jwo nshwam ejí mú mu n-fâ, a-chi byěm ḿbyí me m/bí ǒ kurún.

²⁹ Kûbám kyise ńkyín buchú ne esû, kyikit ńkyín ńkyí wo aa/cá a/fu, bakû ǒ ekye ofê nyín. Jwo mě nang nkéré orá nké m/bírî kashú ké kiǐtí-kyise-kyifen-Osówo echi ńkyín n-fé nshwam.

³⁰ Jwo banshwam ejí ne ḿbé banet eyên nang nkéré orá nké mbé ba/bírî kashú ké kyikit ńkyín ba-fé nshwam. Jwo bě kyíbóng ké oshê eyên a-pwoo bě.

³¹ Â ba/bât onet ba/fu, o/chi orî-onet emen kyibî, nké ba/bê ne nyǐ ké kyikit-kyifen eyên echi, ké kiǐtí-kyise-kyifen echi ńkyín, ba/fu, oba-wu ocím,

³² ô Óburúkpâbí, fwôo atông kyíbóng a-jwo, a-pan bǎmgbán eyên mpan. Kye onet mú o/chi kyibî busông eringe bu/kwárê ne nyǐ, a-két mpan o-nwa mú o*da/chi chwǒm*.

³³ Â banet-bushwôn ba/kpógê banet eyên, ké nǎ, mbé baa/chi kyibî ké bushú eyên, ne â mbé ba/bírî ba-kâm ǒ, ba-bâ ké kiǐtí-kyise-kyifen eyên echi ńkyín, ba-bwa ne byiko ebe kyísí ba-fé nshwam ba-kye ǒ ba/fu, pwoo kámbé,

³⁴ fwôo atông a-jwo kámbé áku kyíbóng. Pwoo banet eyên ké byibî ebe ḿbyí ba/chi, a-bwa esim ne mbé ké esí nyí wo a/kye banchí ebe ḿbé kpákpá.

³⁵ Â wo a/kám omu, ké nǎ, banet eyên baa/chi byibî ba-bât ǒ, ne â mbé kâng ba/saa byiko ba-mîng byibî ebe echi, ba-bírî kashú-kyicê-kiǐtí-kyise-kyifen eyên echi ńkyín, ba-fé nshwam ba-kye ǒ ne ofê,

³⁶ fwôo atông a-jwo kámbé áku kyíbóng. Pwoo otu ké byibî emen ne ḿbyí banet-Ézerel. Tángê kámbé eringe nyí badachi ńkyí nkyi kanong. Kyi-fím ányi kâng, ǎ Óburúkpâbí, chi omu o-na ké esí ńnyín, nyí e/já ǒ wo, nyí wo a/kye banet eyên a/fu, baryí bukyû ké nyǐ ne banyá.

³⁷ Â kyibî-esong kyi/róng ké esí ńnyín, nang kyirwóm kyi-káng ké kángkáng byikit, nang afú a-jwóm byíkwôn, nang abóng-agurubí a-bên byíkwôn, nang banet-bushwôn ba-kye banet eyên bunwa, nang kyirwóm nang kyirá kyi-kám kámbé,

³⁸ fwôo atông a-jwo banshwam ebe. Â banet-Ézerel eyên nang bará byiko byi/kpú kámbé ne atyém ebe, nké ba/nabe abwô ké nshwam efé kyicê-kiǐtí-kyise-kyifen eyên echi ńkyín,

³⁹ jwo nshwam ebe. Fwôo atông a-jwo kámbé áku kyíbóng ké oshê eyên, a-pwoo kámbé, a-chwáp kámbé. Wo kǎnchí nké amu a-nyît ng okabe mú dyityém-onet. Chi nang yeě nang yeě eringe kyi-kwárê ne nyǐ,

⁴⁰ eringe nyí banet eyên bada ǒ ekye ofê kángkáng nkéré ké esí nyí mbé mbe ba-kyú u, nyí wo a/kye banchí eten ḿbé kpákpá.

^41-42 Â ocinónet mú mu o-kyú u ké esí nyí tíbítíbí o/jwo dyizîn eyên ne biǐtí-byěm ḿbyí wo aa/chi a-kye banet eyên, nké o/bê ǒ ofê ekye, o-fé nshwam o-kye ǒ ké kiǐtí-kyise-kyifen eyên echi ńkyín,

⁴³ fwôo atông ké nshwam emen. A-chi ńkyí nyǐ o/bí ǒ, eringe nyí kángkáng banet ḿbé ké ejíí bada ǒ enyît ba-kye ǒ ofê wǎ eringe banet eyên ḿbé Ézerel mbe ba-chi i. Kyi-fím ányi kâng, mbé ba/chi ba-nyît ba/fu, kiǐtí-kyise-kyifen eyên echi ńkyín, ńkyí me m/bi, kyi-chi i kyikit ńkyí bada ǒ ekye ofê.

⁴⁴ Â a/kye banet eyên busa a/fu, baca byití ne banet-bushwôn ebe, nké mbé ba/fé nshwam ba-kye ǒ, nang mbé mbe nyá, ba-bírî kashú ké kyicê-oshê mún mú wo aa/cá, ne kiǐtí-kyise-kyifen eyên echi ńkyín, ńkyí me mm/bi ǒ,

⁴⁵ fwôo atông a-jwo banshwam ebe. Jwo kámbé áku kyíbóng, a-chi kámbé ba-kpógê.

⁴⁶ Â banet eyên ba/chi kyibî ba-bât ǒ, ne onet o*fí nang obónge mú oo*chi kyibî* ne ké kafâ esa eyên a-mîng banet-bushwôn ebe ba-kpógê kámbé, ba-kúng kámbé ba-dim ne mbé wǎ bamgbokobá ké esí ekíri, nké â nang esí ányi e/jang etíbî,

⁴⁷ fwôo atông a-jwo banshwam ebe. Â mbé ba/saa byiko ba-fé nshwam ba-kye ǒ áku ké esí ányi ba-sét ǒ eringe mbé ba/chi byibî ḿbyí byi/jang ejap, jwo banshwam ebe, ǎ Óburúkpâbí.

⁴⁸ Â mbé ba/saa byiko ké ntûntû ne dyityém ebe, áku ké esí ányi, ba-fé nshwam ba-kye ǒ ba-bírî kashú-kyicê-esí ńnyín, nyí wo a/kye banchí eten ḿbé kpákpá, oshê mún, mú wo aa/cá, ne kiǐtí-kyise-kyifen eyên echi ńkyín, ńkyí me mm/bi ǒ,

⁴⁹ wo fwôo atông kâng a-jwo banshwam ebe. Fwôo atông áku kyíbóng ké oshê eyên, a-jwo kámbé, a-ri kámbé bafip.

⁵⁰ Pwoo kámbé ké kángkáng byibî ebe ne bunwa to ḿbú mbe ba-bírî ng ne wo, a-chi banet-bushwôn ebe ba-kûcángê dyityém ne mbé.

⁵¹ Mbé ba-chi i banet ḿbé eyên wo oyén, ḿbé wo a/fîm kámbé ké Éjip, kyikit ánkyi ńkyí kyi/mû kámbé wǎ bumang-okwâ.

⁵² Óburúkpâbí mú mu Otu Kyítá, kyi/bát wo akûtún banet-Ézerel ḿbé banet eyên ne otu ebe kángkáng nkéré ne achi nyí anong, a-jwo to nshwam ebe nang nkéré orá mú ba/fé ba-bí ǒ ochwâp.

⁵³ Wo a/cá kámbé ké burwám ḿbú kángkáng banet a/fu, bakyú banet ḿbé eyên, wǎ eringe wo a/sét kámbé ké ocím mú Músis mú ḿgbán eyên, ńdyí wo a/fîm banchí eten ḿbé kpákpá ba-byí ké Éjip.

Nryî Esim-Nshwam

⁵⁴ Ńdyí Otu Sólómon oo/fé nshwam o-kye Óburúkpâbí gbât, o/bûu o-bwom cip ké bushú-kyikit-kyifen-Osówo echi, kyikit ńkyí o/mû o/tím arông kyísí, o-bêem abwô kyíbóng.

⁵⁵ O-bí Osówo ne ejá kyíbóng kyíbóng o/fu, ojware kángkáng banet ḿbé ba/mû ányi. O-raa o/fu,

⁵⁶ kpee n̂g Óburúkpâbí mú oo/kye banet emen bunyîn-dyityém, wǎ eringe nyí o/mû o/ryí ocím o/fu, nyǐ o-chi i. Nyǐ oo/tî kángkáng ecím nyí enong nyí nyǐ o/mû o/ryí ké ocím mú Músis mú ḿgbán emen.

⁵⁷ Kyi/bát Óburúkpâbí mú Osówo eten okyú ne be, wǎ eringe nyí nyǐ o/mû ne banchí eten ḿbé kpákpá. Kyi/bát nyǐ o*dachi o-dim o-mîng bě ne banyá*.

⁵⁸ Kyi/bát nyǐ ochi bě byi-kû ǎ ekye ofê, eringe nyí be byidakyú kángkáng nkéré wǎ eringe nyí nyǐ mu o-ryuu ng o/fu, be byikyú, byi-tî to kángkáng byije ḿbyí nyǐ o/mû o/sét banchí eten ḿbé kpákpá o/fu, batî.

⁵⁹ Kyi/bát kángkáng nkéré Óburúkpâbí mú Osówo eten ozîim kángkáng byěm ḿbyín ḿbyí me mm/bí ǎ. Kyi/bát kángkáng nkéré nyǐ ori banet-Ézerel ne otu ebe bafip, wǎ eringe mbé mbe ba-ryuu ng kángkáng dyicí.

⁶⁰ Ne kyi-fím ányi, kángkáng eshê nyí ké ejíí e/chi e-nyît e/fu, Óburúkpâbí kǎnchí nké mu Osówo, osówo okíri o*fí*.

⁶¹ Kyi/bát ben banet emen, fé n̂g dyityém kángkáng ne Óburúkpâbí mú Osówo eten, ba-fé kángkáng byije emen ké dyityém wǎ eringe nyí bamu ba-chi i kurún.

Otu Sólómon o/jware Kiǐtí-Kyise-Kyifen-Óburúkpâbí echi

⁶² Otu Sólómon ne kángkáng banet ḿbé ba/mû ányi ba-chi kâng byifen ba-kye Óburúkpâbí.

⁶³ Nyǐ o/chi kyifen ké égot-bampong etánge etánge ké byikit bujam esim byifee, ne ké égot-etám-ebû etánge etánge ké bajam-byikit nyâchât, ké byifen ḿbyí kyikwáré ne Óburúkpâbí. Ne ké bubwô ámbu, Otu Sólómon ne kángkáng banet ba/jware kiǐtí-kyise-kyifen-Óburúkpâbí echi.

⁶⁴ Ké dyicí ándyi to, nyǐ o/jware otyém-kyibám-Óburúkpâbí, kyikit ńkyí nkyi ké kashú-kiǐtí-kyise-kyifen-Osówo echi, o-shí kâng byifen ányi ḿbyí byirim-byitú ne ḿbyí esang-byichí ne ḿbyí bafwám-byitú, ké byifen ḿbyí kyikwáré ne Óburúkpâbí. Nyǐ o/chi ńkyín, ké nǎ, kyikit-kyifen-Osówo echi ńkyí ba/chi ké kiǐré kyi/mû kyi*da/rêe ńkyí badachi kángkáng byifen ḿbyín*.

⁶⁵ Otu Sólómon ne kángkáng banet-Ézerel ba-chi dyijî-kyifen ányi ńkyí boompyep ebi, ké ací [káchâtkányi.] Banet ba/mû ba/jé kanong kanong, ḿbé ba/fím tíbítíbí wǎ kyikit ńkyí badayú kaku, ńkyí badakó Hámat, ké kyicê ńkyí bushûyû, ne buti-Éjip ké kyicê ńkyí busyísen.

⁶⁶ Ké ací nyíryinyi, Otu Sólómon o-sét banet ámbe ba-dim ajê. Mbé ashí amúmú ba/kpee ǎ, ba-dim ajê ne bunyîn-dyityém, ké bubwô ḿbú kángkáng banjware ḿbé Óburúkpâbí oo/kye Otu Dívit mú ḿgbán emen ne banet-Ézerel ḿbé banet emen.