1 Kyîng 7 - Bokyi Bible

Kyibám-Butu ńkyí Otu Sólómon

¹ Otu Sólómon o/bi to kyibám-butu ńkyí emen, ne kyi/kúng ǎ aje diǐkpú ne achât ne o-man kánkyí.

^2-3 Ba/bi nfût obónge mú badakó Ócâm mú Kyizinge ńkyí Lebánon, mú o/mû bamyíta banyii ne kyicê ké butang, ne bamyíta bujam esim bafee ké baryên, ne bamyíta bachât ne kyicê ké bunyâam. O/mû ne etáng-byikwap [echât] nyí ba/bi ké kyichí ńkyí badakó séda. Otáng nang orá o/mû ne byikwap onyiryiká, ne byikim-kyichí-séda ké ashí ebe twóóm. Ba/mán to kyichí-séda ánkyi ké bubóng-nfût, byi-shwôm tete byi-ribi ké banfût ḿbé badatî byěm, ḿbé byikwap ámbyi to byi/níbî kámbé.

⁴ Ké ekpe-ócâm nyí kyicê-bubwô-etyebéng ne kyicê-bubwô-eku, etáng-bawíndu e/mû echât echât.

⁵ Afyi ne [bawíndu] emen ba/chi byichí ebe jangjang kyíbóng ne kyísí ne bakô, ne etáng-bawíndu echât ké ekpe nang erá e-bírî kashú ne barî.

⁶ Ba/bi to nfût okíri mú badakó Ócâm mú Byikwap, mú o/mû bamyíta bujam esim bafee ké butang, ne bamyíta diǐkpú ne bachât ne kyicê ké baryên. O/mû ne agbá nyí ba/cít kányí ne byikwap ḿbyí byi/níbî kányí.

⁷ Ba/bi to nfût obónge mú badakó Nfût mú Kakyúng-Butu, ba-kó ng kámú to Ócâm-Bampan epan, kyikit ńkyí Otu Sólómon o/mû o-két ng bampan. Nfût mún o/mû ne byicê-kyichí ńkyí badakó séda, kyi-fím ké dyibe-esí tete kyi-ribi [kyíbóng.]

⁸ Byise ḿbyí Otu Sólómon oyén o/mû mu o-kyú u byi/mû ké kyibám-butu kyikíri ńkyí kyi/mû ké esim-Ócâm-Bampan epan, ba/mû ba/bi kámbyí wǎ byise byiyén ḿbyí kwán. Nyǐ o/bi dyizong-kyise ándyi to o-fé mú wǎn-otu-Éjip mú onyi emen.

⁹ Byise ḿbyín byimúmú, cibicibi ne kyibám-butu ńkyí kiǐtí kiǐtí, ba/bi kámbyí ne aká nyí anong anong kyi-fím ké byikû-ekpe tete kyi-ribi kyíbóng. Aká ányi ba/bwât kányí ké kyikit-aká esé, ba/kan kányí ne ba-két, ba-yip bushwám ba-goge kányí esim emúmú.

¹⁰ Ba/yip aká nyí biimbâng, nyí baa/bwât kányí ké kyikit-aká esé ne ba-kpet ebi byikû-ekpe-byise ámbyi. Aká akíri a/mû bamyíta bachât ne kyicê ké butang, akíri bamyíta banyii.

¹¹ Ba-chîtwôom aká akíri ké nyí ányi, nyí baa/kan kányí ne ba-két, ne byikim-kyichí ńkyí badakó séda.

¹² Kyibám-butu ne kafâ-kabám ńké kiǐtí-kyise-kyifen-Osówo echi ńké ké kafâ ne nfût mú kiǐtí-kyise-kyifen-Osówo echi mú obyî óbyi byi/mû ne ekpe nyí ba/chi ne otáng-byikim-byichí-séda obónge obónge, ké etáng-aká echât nang erá nyí baa/bwât kányí.

Bǎmkpóngé ḿbé Húram o/chi

¹³ Otu Sólómon o-twóm o/fu, bada-kpî onyinchéng mú odabángê Húram, nchi mpwô mú mu o-kyú u ké oshê mú badakó Táya, mú oo/kwâa bǎmkpóngé echi ké biǐré ḿbyí badakó borôn.

¹⁴ Bonchí emen o/mû o/fím Táya, ne nyǐ o/mû oo/kpú, ne nyǐ to o/mû o/kwâa bǎmkpóngé ámbe. Boné emen o/mû o/fím ké kyikû-banet ńkyí Nafatályi. Húram o/mû onet mú mu ne bubong, mú oo/kpí bǎmkpóngé ámbe kanong kanong. Nyǐ o/bángê dyikô ńdyí Otu Sólómon o/kó ǎ éné o/fu, nyǐ okyú onet-dyishí-bǎmkpóngé ámbe bamúmú.

Byikwap-Biǐré Byifee

¹⁵ Húram o/mee byikwap-biǐré byifee, [nang kyirá bamyíta nyíryinyi ké butang, ne bamyíta batánge ne kaǎnyín kerékeré,] o-bi kámbyí ké ocím-dyifyi mú kiǐtí-kyise-kyifen-Osówo echi.

¹⁶ O-mee to ashí-byikwap ámbyi afee, dyishí nang dyirá dyi/mû bamyíta bafee ne kaǎnyín ké butang, nyí ba/chi ba-twôom ké ashí-byikwap ámbyi. [

¹⁷ Dyishí-byikwap ámbyi nang dyirá ba/nap kándyí ne bamgbokobá ḿbé ba/tím otím.]

¹⁸ Ba/sáng to etáng-byirim-byichí ḿbyí badakó pamagáránat efee ké ndyí.

¹⁹ Ashí-byikwap ányi ba/mee kányí wǎ ekong-byichí nyí badakó lyílyi, myíta obónge ne kyikim ké butang,

²⁰ ne ba/fút kányí afúdúng ba-tî ké dyishí-bamgbokobá ámbe. Byirim-byichí-pamagáránat ḿbyí ba/sáng [ké ashí-byikwap] ké etáng efee byi/mû égot ebónge.

²¹ Húram o/bi byikwap-kiǐré ámbyi byifee ké ocím-dyifyi mú kiǐtí-kyise-kyifen-Osówo echi. Ńkyí ké kyicê-busyísen ba/mû ba-kó ng kánkyí Jákin. Ne ńkyí ké kyicê-bushûyû ba/mû ba-kó ng kánkyí Bówaz.

²² Ashí-byikwap-kiǐré nyí ba/mee kányí wǎ ekong-byichí nyí badakó lyílyi ba/twôom kányí ké byikwap-biǐré. Ne bǎmkpóngé ámbe ba-ba-man kâng.

Kiimbâng-Dyicáng

²³ Húram o/mee kiimbâng-dyicáng ké borôn kerékeré, buríbi emen bu/mû bamyíta bafee ne kaǎnyín, ne baryên emen ba/mû bamyíta banyii ne kyicê, ne bamyíta diǐkpú ne bachât kerékeré. [

²⁴ Ké ocím-dyicáng mú kyíjí omúmú,] etáng-biimkpú ḿbyí ba/mee ké kiǐré e/mû ányi efee, nyí baa/mee kyikit kyibónge ne dyicáng dyiyén.

²⁵ Ba/twôom dyicáng ándyi ké esim-batyép-mpong diǐkpú ne bafee ḿbé ba/mee ké kiǐré, ḿbé ba/bírî kashú kyíjí, nang bará bachât ba/bírî kashú kyicê kyibónge.

²⁶ Bakô-dyicáng ándyi ba/mû kyikim-myíta kyibónge ké bucîp. Ocím-dyicáng ámu o/mû wǎ ocím-nkôp, o-fé dyifût kyíjí wǎ kiǐbyâa ńkyí kyidakyii. Dyicáng ándyi dyi-nung ng égot-balyíta-omu batánge batánge ké bajam-byikit bafee.

Bamútu-Biǐré ḿbé badabírî Atû

²⁷ Húram o/mee to bamútu-biǐré diǐkpú ḿbé badabírî atû. Mútu ámu nang orá o/mû myíta ne kyicê ké butang, ne myíta ne kyicê ké baryên, ne myíta ne kaǎnyín ké bunyâam.

²⁸ Ba/chi bamútu ámbe ké boǒcê-kiǐré ḿbú ba/chi kámbú jangjang ké bakô bamúmú banyii, ḿbú ba/yip kámbú ba-fé ké byikwap,

²⁹ ḿbú baa/sáng ekpang ne batyép-mpong ne biǐnyám ḿbyí mbyi ne abyibabang ké boǒcê-kiǐré ámbu. Ne ké byikwap ámbyi, ké ogba mú kyíbóng ne kyísí, mú ekpang ne batyép-mpong, byěm byi/mû ányi ḿbyí ba/chi mpwô ké etáng ké etáng.

³⁰ Mútu ámu nang orá o/mû ne biǐkât byinyii ḿbyí ba/chi ké kiǐré, ne ekunge-kiǐré to nyí ba/fé ké otyém emen. Ké bakô emen bamúmú banyii, ba/fé byikwap-kiǐré ḿbyí byidaníbî dyicáng. Byikwap ámbyi ba/chi mpwô ké mbyí ne byěm ḿbyí ba/sáng ké etáng ké etáng.

³¹ Ba/chi kyikit kerékeré kyíbóng ńkyí badatwôom dyicáng. Kyikit ánkyi kyi/tông dyishí kyíjí, kyi/nángê kyi-byí basentyímyíta bajam bafee esim batánge ké dyishí-mútu-kiǐré, kyi-shû kyi-jâ kyísí, kyi/nángê kyi-byí basentyímyíta onyiryiká ne bachât. Kyi/mû ne byěm ḿbyí ba/sáng ké nkyí ké egba emúmú.

³² Biǐkât emen byi/mû basentyímyíta bajam bachât esim nyâchât ké bunyâam. Nyǐ a/mû ké dyifít-byěm ḿbyí ba/chi ké boǒcê ké boǒcê, ekunge-kiǐré ányi ba/chi kányí cibicibi ne bamútu-kiǐré ámbe.

³³ Biǐkât ámbyi byi/mû wǎ akât-mútu mú bubyî-orá budatut. Ekunge-kiǐré ányi ne ashí ne boǒré ḿbú ba/fé ké akât ne byikit ḿbyí ké otyém ne otyém ebe ba/chi kámbyí kángkáng ké kiǐré.

³⁴ Byikwap byi/mû byinyii byinyii ké bakô-kyikû-mútu ámu nang orá, ḿbyí ba/chi kámbyí cibicibi ne bamútu ámbe.

³⁵ Kiǐré kyi/mû kô kerékeré ké ocím-mútu nang orá ńkyí kyidabyí basentyímyíta bujam esim bafee ké baryên. Byikwap emen ne boǒcê-byěm ámbu byi/mû cibicibi ne bamútu ámbe.

³⁶ Byikwap ámbyi ne boǒcê-byěm ámbyi ba/sáng biǐnyám ḿbyí mbyi ne abyibabang ne ekpang ne bayêp ké mbyí, ké kyikit nang kyirá ńkyí mpât o/mû mú badasáng kámbyí, ne byěm ké etáng ké etáng ké egba emúmú.

³⁷ Nyín něen kâng nké nkyi eringe ba/chi bamútu-kiǐré ámbe. Mbé ba/mû eringe ebónge bamúmú, ké baryên ne eringe ba/chi kámbé.

³⁸ Húram o/chi to acáng diǐkpú, mútu nang orá ne dyicáng dyibónge. Dyicáng nang dyirá dyi/mû myíta ne kyicê ké baryên, ne dyi-nung ng égot-balyíta-omu banyii.

³⁹ Nyǐ o/tî bamútu ámbe batánge ké kyicê-busyísen-kiǐtí-kyise-kyifen-Osówo echi, ne ḿbé áku to ké kyicê ńkyí bushûyû emen. Kiimbâng-dyicáng ánkyi o/tî ké kyicê-busyísen-bukô ḿbú esû edabyí.

Ba/bún Byěm ḿbyí ba/chi ké Kiǐtí-Kyise-Kyifen-Osówo echi

^40-45 Húram o/chi to butí ne basóburu ne acáng. Nyǐ o/man bǎmkpóngé emen bamúmú ḿbé Otu Sólómon o/kye ǎ, ḿbé kiǐtí-kyise-kyifen-Óburúkpâbí echi. Nyín něen byěm ḿbyí nyǐ o/chi, byikwap-biǐré byifee ne ashí-byikwap afee nyí ké byikwap-biǐré ne bamgbokobá ḿbé ba/tím otím, ḿbé ké dyishí-kyikwap nang dyirá ne égot-biǐré efee nyí o/mee wǎ byirim-byichí ḿbyí badakó pamagáránat, bajam batánge ké otáng nang orá, kerékeré ké dyishí-byikwap ḿbyí ba/démê ne byěm-kiǐré diǐkpú ne acáng diǐkpú ne kiimbâng-dyicáng ne batyép-mpong diǐkpú ne bafee ḿbé ba/níbî kiimbâng-dyicáng ne butí ne basóburu ne acáng. Kángkáng byěm-kiǐtí-kyise-kyifen-Osówo echi ḿbyín, ḿbyí Húram o/chi o-kye Otu Sólómon, ba/chi kámbyí ké kiǐré ńkyí badakó borôn.

⁴⁶ Otu Sólómon o/fu, bachi kámbyí kángkáng ké kyikit ńkyí badachi biǐré, ké otyém ne otyém mú Súkot ne Zárétan, ké ndege-esí mú Jódan.

⁴⁷ Otu Sólómon o*da/kan biǐré ámbyi ké órúmá* ké nǎ, mbyí byi/mû byi/jang ejê byi-shwôm, ne ké bubwô ámbu, a*da/nyît burô ebe*.

⁴⁸ Otu Sólómon o/nap kiǐtí-kyise-kyifen-Osówo echi to ne byěm ḿbyí ba/chi ké gûl. Kyikit-kyifen-Osówo echi ne ókpákpúrúk mú badatwôom berêt mú baa/kye Osówo

⁴⁹ ne byikwap diǐkpú ḿbyí badatwôom etyuryíkáng, ḿbyí byi/bwom ké kashú ńké ochíchí-nfût-ociring, byitánge ké kyicê-busyísen ne byitánge to ké kyicê-bushûyû ne byěm ḿbyí ba/chi wǎ ekong-kyichí ne etyuryíkáng ne efámgbá

⁵⁰ ne bammîk ne kaǎchwóm ńké badarîp otyuryíkáng ne acáng ne byiféng ḿbyí badashí burwan ne acáng nyí badakúng amánge-okwâ ne byěm ḿbyí ba/mán afyi nyí ochíchí-nfût-ociring ne ḿbyí afyi nyí kwán kyíjí, ké kiǐtí-kyise-kyifen-Osówo echi. Kángkáng byěm ḿbyín ba/chi kámbyí ké gûl.

⁵¹ Nkéré mú Otu Sólómon o/man kángkáng bǎmkpóngé ké kiǐtí-kyise-kyifen-Osówo echi, nyǐ o/tî kángkáng byěm ḿbyí bonchí emen Otu Dívit o/kye Óburúkpâbí ké banfût ḿbé byěm erôo, ḿbé kiǐtí-kyise-kyifen-Osówo echi, syílyíba ne gûl ne byěm byikíri.