1 Kyîng 6 - Bokyi Bible

Otu Sólómon o/bi Kiǐtí-Kyise-Kyifen-Osówo echi

¹ Ńdyí kii/shwôm égot-aje efee ne bajam-aje banyii, ńdyí banet-Ézerel ba/byí ké esí-Éjip, ányi Otu Sólómon oo/kyú otu ké Ézerel ké aje anyii, ké nnyinyěng-otukáku, ké otukáku mú Zîp, Otu Sólómon o/kpet bǎmkpóngé ḿbé kiǐtí-kyise-kyifen-Osówo echi.

² Butang-dyibe-esí bu/mû bamyíta bujam esim káchâtkányi, baryên-dyibe-esí ba/mû bamyíta kátángekányi, bunyâam emen bu/mû bamyíta diǐkpú ne bachât ne kyicê.

³ Nfût mú obyî óbyi o/mû bamyíta banyii ne kyicê ké buríbi, ne bamyíta kátángekányi ké baryên, mǔ o/rêe eringe ebónge ne kyise kyiyén.

⁴ Ekpe emen e/mû ne bawíndu. Bawíndu ámbe ba/mû ba/sîi kyíjí ba-shwôm ké kafâ.

⁵ Ké ekpe emen nyí kyíjí, ké bakô emen ne ké esim emen, ba/bi enyóng ké byikit byichât, kyikit nang kyirá bamyíta bafee ne kaǎnyín ké bunyâam.

⁶ Nfût mú kyikit-enyóng ńkyí kyísí kyísí o/mû bamyíta bafee ne kaǎnyín ké baryên, nfût mú kyikit-enyóng ńkyí otyém ne otyém nang orá o/mû bamyíta bafee ne kaǎnyín ké baryên, ne nfût mú kyikit-enyóng ńkyí kyíbóng nang orá o/mû bamyíta bafee ne kyicê ké baryên. Ekpe-kiǐtí-kyise-kyifen-Osówo echi ké kyikit-enyóng nang kyirá e/mû e/sîi e-shwôm ekpe nyí kyikit-enyóng ńkyí kyísí, eringe nyí banfût emen badatyeem ké ashí-ekpe, ne ba*da/chîfé byikim-byichí ké ekpe ḿbyí byidakúng byikit-enyóng ḿbyí kyíbóng*.

⁷ Aká nyí ba/yip ne ba-bi kiǐtí-kyise-kyifen-Osówo echi ba/mû baa/bwât kányí ba-chi ké kyikit-aká esé, ké bubwô ámbu, áma ne akye ne byěm-bǎmkpóngé echi byikíri ḿbyí ba/chi ké biǐré byi*fí to byi-kyâ kyicoge ńdyí mbe ba-bi ng kiǐtí-kyise-kyifen-Osówo echi*.

⁸ Dyifyi ńdyí dyidajé ké kyikit-enyóng [ńkyí kyísí kyísí,] ké enyóng nyí echât nyí ba/bi dyi/mû ké kyicê-busyísen-kiǐtí-kyise-kyifen-Osówo echi, ba-chi kyikit ńkyí adayú ne a-ribi ké byikit-enyóng ḿbyí kyíbóng.

⁹ Otu Sólómon o-bi kâng kiǐtí-kyise-kyifen-Osówo echi kyi-man. O-yip ekunge ne byicê-séda o-cít bubóng-kafâ-kyise. [

¹⁰ Enyóng nyí ba/bi éné ké byikit byichât, enyóng nang erá] bunyâam emen mbu bamyíta bafee ne kaǎnyín, ba/bi kányí ké bakô-ekpe-kiǐtí-kyise-kyifen-Osówo echi ḿbé kyíjí, ne ba/yip byikim-kyichí ńkyí badakó séda ne ba-cibi kányí ne barî.

¹¹ Óburúkpâbí o-raa ne Otu Sólómon o/fu,

¹² â wo amu a-tî ng byije ejí byimúmú ne kángkáng byěm ḿbyí mu n-sét ng ǒ, me n/chi n-chi ǒ ńkyí m/mû n/ryí Otu Dívit mú ńchân ocím.

¹³ Me n/chi n-kûkyú ne banet-Ézerel ḿbé banet ejí ké kiǐtí-kyise-kyifen ejí echi ńkyín, ńkyí amu a-bi ng, ne me mm*ba/chi m-mîng kámbé ne banyá*.

¹⁴ Otu Sólómon o-man kâng kiǐtí-kyise-kyifen-Osówo echi ebi.

Kafâ-Kiǐtí-Kyise-Kyifen-Osówo echi ebwât

¹⁵ Ekpe nyí ké kafâ ba/cít kányí ne byicê-séda kyi-fím ké dyibe-esí tete kyi-ribi kyíbóng, ne dyibe-esí emen ba/nap kándyí ne byicê-pyîn.

¹⁶ Nfût mú ké kafâ ké kafâ, mú badakó ochíchí-nfût-ociring, ba/bi kámú ké kafâ-kiǐtí-kyise-kyifen-Osówo echi. Butang emen bu/mû bamyíta kátángekányi, ne ba/kyii kámú ne byicê-séda kyi-fím [kyíbóng] tete kyi-ribi kyísí.

¹⁷ Nfût mú adashwôm ne a-ribi ké ochíchí-nfût-ociring o/mû bamyíta onyiryiká ne bachât ké butang.

¹⁸ Byicê-séda ḿbyí ba/yip ne ba-bwât kámú ba/mû ba/sáng biimkpú ne ekong-byichí ké mbyí. Kafâ-kiǐtí-kyise-kyifen-Osówo echi kamúmú ba/mû ba/nap kánké ne séda eringe nyí baa*ri aká nyí ba/kúng ne ba-bi*.

¹⁹ Ké kyikû-kiǐtí-kyise-kyifen-Osówo echi, ba/bi nfût mú ké kafâ ké kafâ, kyikit ńkyí ba/chi ba-tî mkpukpu-byěm-Óburúkpâbí. [

²⁰ Nfût ámu o/mû bamyíta kátángekányi ké butang ne ké baryên ne ké bunyâam. Ba/nap kámú omúmú ne gûl mú onong onong. Kyikit-kyifen-Osówo echi ba/nap kánkyí ne byicê-séda.]

²¹ Kafâ-kiǐtí-kyise-kyifen-Osówo echi ba/nap kánké ne gûl, ne ba/kpong bamgbokobá ḿbé ba/chi ké gûl ké dyifyi ńdyí dyidajé ké nfût mú ké kafâ ké kafâ, mú ba/nap kámú to ne gûl.

²² Kafâ-kiǐtí-kyise-kyifen-Osówo echi kamúmú ba/nap kánké ne gûl, cibicibi ne kyikit-kyifen-Osówo echi ńkyí ochíchí-nfût-ociring.

²³ Ba/tî biǐnyám byifee ḿbyí mbyi ne abyibabang ké ochíchí-nfût-ociring, ḿbyí ba/sím kámbyí ké byichí-ólif. Kiǐnyám nang kyirá kyi/kwóp bamyíta banyii ne kyicê.

^24-26 Biǐnyám ámbyi byi/rêe eringe ebónge ne mbyi to eringe ebónge. Nang kyirá nkyi ne abyibabang afee, bubyibabang nang burá bu/mû bamyíta bafee ne kaǎnyín ké butang, eringe nyí kyi-fím ké dyishí-bubyibabang bubónge kyi-ribi ńdyí áku kyi/mû bamyíta banyii ne kyicê.

²⁷ Ba/tî kámbyí ogba mún ne mún ké ochíchí-nfût-ociring, eringe nyí abyibabang ebe afee nyí ba/nabe éné a/ta barî ké otyém ne otyém mú nfût, nyí áku afee a-ta ekpe.

²⁸ Ba/mwane kámbyí gûl ké byiko byimúmú.

²⁹ Ekpe nyí ké nfût mú oryên ne nyí nfût mú ké kafâ ké kafâ, nyǐ emúmú ba/sáng biǐnyám ḿbyí mbyi ne abyibabang ne bayêp ne ekong-byichí ké nyǐ.

³⁰ Nang dyibe-esí to ba/nap kándyí ne gûl.

³¹ Afyi afee nyí ba/chi kányí ké byichí-ólif ba/fé kányí ké ocím-dyifyi mú odajé ké ochíchí-nfût-ociring. Ba/chi ashí-afyi ányi atangatang.

³² Ba/sáng biǐnyám ḿbyí mbyi ne abyibabang ne bayêp ne ekong-byichí ké afyi ányi. Afyi ne byěm ámbyi ḿbyí ba/sáng éné ba/mwane kámbyí gûl ké byiko.

³³ Ké ocím-dyifyi mú mu o-jâ ké nfût mú oryên, ba/fé kyichí-dyifyi ányi ńkyí bubóng ne esí ne bakô emen mbyi jangjang, ńkyí ba/chi ké kyichí-ólif.

³⁴ Afyi nyí badafút ofúdúng a/mû kô afee, nyí ba/chi ké byicê-pyîn,

³⁵ ba-sáng to biǐnyám ḿbyí mbyi ne abyibabang ne bayêp ne ekong-byichí ké nyǐ nyí ba/mwane to gûl jangjang ké nyǐ.

³⁶ Kyibám-butu ńkyí ké kafâ ba/bi kánkyí ké bushú-kiǐtí-kyise-kyifen-Osówo echi, ba-wâng kánkyí ne ekpe nyí nyi ne otáng-byichí-séda obónge, ké etáng-aká echât echât.

³⁷ Kyikû-ekpe-kiǐtí-kyise-kyifen-Osówo echi ba/kpet esím kánkyí ké nnyinyěng-otukáku ké otukáku mú Zîp, ké aje anyii ńdyí Otu Sólómon o/ryí butu.

³⁸ Ké etukáku nyíryinyi, ké otukáku mú badakó Bûl, ké aje diǐkpú ne din ńdyí Otu Sólómon o/ryí butu, baa/bi kiǐtí-kyise-kyifen-Osówo echi kyi-man kángkáng wǎ eringe nyí ba/mû ba/kabe ba-tî. Kyi/kúng Otu Sólómon aje káchâtkányi ne o-bi kánkyí.