Biblia Todo Logo
Bìoball air-loidhne

- Sanasan -

1 Kyîng 5 - Bokyi Bible


Otu Sólómon o/kpá Byiko ḿbyí odabi Kiǐtí-Kyise-Kyifen-Osówo echi
( 2 Korónyíkil 2:1-18 )

1 Otu Hyíram mú o/fím Táya o/mû ocín-Otu Dívit kángkáng nkéré. Ne nkéré mú o/jwo ba/fu, Sólómon oo/ryí butu ḿbú bonchí emen Otu Dívit, nyǐ o/twóm banet emen ba-ca kyikit-Otu Sólómon.

2 Otu Sólómon o-twóm kyitwóm ńkyín o/fu, basét Otu Hyíram ba/fu,

3 wo amu a-nyît ng a/fu, ké bubwô ḿbú byití ḿbyí bonchí ejí Otu Dívit o/mû mu o-nwa ng kángkáng nkéré ne eshê-bushwôn emen nyí e/wáp ǎ e-fé ké kafâ, nyǐ o*da/man ebi kiǐtí-kyise-kyifen-Osówo echi ńkyí odakûfé Óburúkpâbí mú Osówo emen* tete Óburúkpâbí oo/chi ǎ o-kpógê banet-bushwôn emen ámbe bamúmú.

4 Nké kántîk, Óburúkpâbí mú Osówo ejí oo/kye mě bunyîn-dyityém ké bati ejí bamúmú. Me n*fí ne onet-bushwôn nang obónge* ne me n*fí ne bushî ḿbú bada mě ekye bunwa*.

5 Óburúkpâbí o/mû o/ryí bonchí ejí Otu Dívit ocím o/fu, wǎn eyên, mú me n/chi n-kúng ǎ butu â wo aa/kpú, o/chi o-bi mě kiǐtí-kyise-kyifen echi ejí. Ne kántîk, me nn/chi okabe n/fu, m-bi ng kyise ánkyi ńkyí badakûfé Óburúkpâbí mú Osówo ejí.

6 Twóm kâng banet eyên ba-ca Lebánon ba-da-twom byichí ḿbyí badakó séda ba-tî mě. Banet ejí ba/chi ba-chi bǎmkpóngé ámbe ne banet eyên, ne me n/chi m-kpêe banet eyên akpuga eringe nyí wo adasét. Wo amu a-nyît ng kanong kanong a/fu, banet ejí baa*man etwom byichí wǎ ḿbé eyên*.

7 Dyityém dyi/nyîn Otu Hyíram kanong kanong ńdyí o/jwo kyitwóm ńkyí Otu Sólómon o/twóm, ne o-raa o/fu, kpee n̂g Óburúkpâbí kurún ké okye mú nyǐ o/kye Otu Dívit dyizong-wǎn ándyi ńdyí ndyi ne byinyídíng o/fu, okúng kyikit emen wǎ otu mú kiǐtí-oshê ánkyi.

8 Otu Hyíram o-twóm kâng Otu Sólómon kyitwóm ńkyín o/fu, me nn/koo kyitwóm eyên, ne me m/kpá byiko ḿbyí ndachi ńkyí wo a/bí. Me n/chi n-kye ǒ byichí-séda ne pyîn.

9 Banet ejí ba/chi ba-kúng byikim emen ké eku nyí Lebánon ba-shû ne mbyí kyísí ké baya ḿbé badakó Medeterényan. Ne mbé ba/chi ba-bwá kámbyí akan akan eringe byidasen ké bukô-baya byi-ribi kyikit ńkyí wo a/fu. Mbé ba/chi ba-firi kámbyí ányi, banet ḿbé eyên ba-koo. Nké me kyi/chi kyi-nyîn mě ńkyí adakye banet ejí byiryíng.

10 Otu Hyíram o-kye kâng Otu Sólómon kángkáng byikim-séda ne ḿbyí pyîn, ḿbyí mu o-ryuu ng.

11 Ne Otu Sólómon o-kûkye Otu Hyíram égot-batôn-esang-byichí-wît ḿbé métirik diǐkpú ne [égot-balyíta-bakút-ólif etánge etánge ké bajam-égot-byikit bafee, ḿbé banong banong] kángkáng dyije o/fu, okúng o-nen banet emen.

12 Óburúkpâbí o/kye Otu Sólómon byinyídíng wǎ eringe nyǐ o/ryí ocím. Otu Hyíram ne Otu Sólómon ba/mû ké bunyîn-dyityém ne barî, ba-chi kyikwáré ne barî.

13 Otu Sólómon o/fîm égot-banet etánge etánge ké byikit bujam esim diǐkpú, ké Ézerel emúmú, ḿbé badakûchi bǎmkpóngé wǎ básóng,

14 o-tî Adonyíram onet-dyishí ebe. O-kyii kámbé byikim byichât, bajam-égot bafee esim diǐkpú ké kyikim. Ne kyikim nang kyirá mbe ba-rí i otukáku obónge ké Lebánon, ba-ba-rí etukáku efee ké byise.

15 Nyǐ o/mû to ne égot-banet etánge etánge ké bajam-byikit banyii, ké esí nyí eku éku, ké kyikit-aká esé, cibicibi ne égot-banet etánge etánge ké bajam-byikit bachât esim diǐkpú, ḿbé mbe ba-kúng ng aká ányi.

16 Ne nyǐ o/tî to égot-banet-ashí onyiryiká ne din ne kyicê o/fu, bakûtún bǎmkpóngé ḿbé banet ámbe mbe ba-chi i.

17 Otu Sólómon o/kye busa ba-chi biimbâng-aká nyí anong anong, nyí ba/kúng ba-kpet ebi byikû-ekpe-kiǐtí-kyise-kyifen-Osówo echi.

18 Banet-bǎmkpóngé-Otu Sólómon ne ḿbé Otu Hyíram ne ḿbé ba/fím oshê mú badakó Byíbyílos ba/bwât byichí ne aká ḿbyí badabi kiǐtí-kyise-kyifen-Osówo echi.

Published by the Bible Society of Nigeria @ 1985

Bible Society of Nigeria
Lean sinn:



Sanasan