1 Kyîng 4 - Bokyi Bible

Banet-Ashí-Bǎmkpóngé-Otu Sólómon

¹ Otu Sólómon o/mû otu mú Ézerel emúmú,

² ne nyín něen banet-ashí-bǎmkpóngé emen ḿbé nyáám. Azaryâ mú wǎn-Zádok nké o/mû nchi kyifen-Osówo.

³ Bansâng byěm ké kyibám-butu emen ba/mû Elyíhorep ne Ahíja ḿbé bwǎn-Shísha. Jehósháfat mú wǎn-Ahílut nké o/mû onet-dyishí mú odatî banwet.

⁴ Benáya mú wǎn-Jehóyáda nké o/mû onet-dyishí-basúja kángkáng. Zádok ne Abyǎta nké ba/mû banchi kyifen-Osówo.

⁵ Azaryâ mú wǎn-Nátan nké o/mû onet-dyishí mú batu-ashí ḿbé ba/mû ba-tún n esí nyí ba/kyii ké byikim ké byikim. Zábut mú nchi kyifen-Osówo, mú wǎn-Nátan, nké o/mû nkye bacê mú kyibám-butu.

⁶ Ahísha nké o/mû onet-dyishí mú bǎmgbán ḿbé badachi bǎmkpóngé ké kafâ-kyibám-butu. Adonyíram mú wǎn-Abída nké o/mû onet-dyishí mú básóng ḿbé badachi bǎmkpóngé ḿbé sóngsóng.

⁷ Otu Sólómon o/cá banet ashí diǐkpú ne afee o-tî wǎ banet-ashí ḿbé badatún esí-Ézerel nyí ba/kyii ké byikim ké byikim. Mbé ba/mû mbe ba-chi i byiryíng ké esí nyí ba/kyii ba-kye kámbé ba-bâ ng ekye Otu Sólómon ne banet emen, onet nang orá ké burwám ebe o/mû mu o-kyâ Otu Sólómon byiryíng ké otukáku obónge, ké dyije.

⁸ Nyín něen azîn-banet ámbe ashí diǐkpú ne afee ne esí nyí ba/kyii ba-kye kámbé, Benhû o/mû onet-dyishí mú esí nyí eku éku, nyí Éferem.

⁹ Eshê nyí Mákaz ne Shábim ne Bét-Shémes ne Élon ne Bét-Hánan e/mû e/já Béndeke.

¹⁰ Eshê-Árubot ne Sóko ne kángkáng esí nyí Héfe e/mû e/já Béneset.

¹¹ Esí emúmú nyí Dôo e/mû e/já Benabyínadap mú one-Otu Sólómon, mú o/mû o-bé ng wǎn-Otu Sólómon mú odabángê Táfat.

¹² Eshê-Tának ne Megído ne kángkáng esí nyí e/fárâng ne Bét-Shǎan, fáráng ne oshê-Zárétan, ké kyicê-busyísen-oshê mú badakó Jézerel, tete a-byí oshê mú badakó Ébel Mehóla ne oshê-Jókamyam e/mû e/já Bána mú wǎn-Ahílut.

¹³ Oshê-Rímot, ké esí nyí Gyílet ne boǒshê ḿbú ké Gyílet ḿbú bu/já kyikû-banet ńkyí Jáyi, mú o/fím ké kyikû ńkyí Manáse ne esí nyí Ágop, ké esí nyí Báshan, biimbâng-eshê ámbyi byimúmú byi/mû bajam bachât, ba/bi ekpe nyí shwaneshwane ba-wáp kányí ba-fé ké kafâ ne ekunge nyí biǐré ké afyi, e/mû e/já Béngebe.

¹⁴ Esí nyí Mahánam e/mû e/já Ahínadap mú wǎn-Édo.

¹⁵ Esí nyí Nafatályi e/mû e/já Ahímaz mú one-Otu Sólómon to, mú o/mû o-bé ng wǎn-Otu Sólómon okíri mú odabángê Básémat.

¹⁶ Esí nyí Ásha ne oshê mú badakó Byǎlot e/mû e/já Bána mú wǎn-Húsha.

¹⁷ Esí nyí Ézaka e/mû e/já Jehósháfat mú wǎn-Párwa.

¹⁸ Esí nyí Běnjámin e/mû e/já Shímye mú wǎn-Éla.

¹⁹ Esí nyí Gyílet, nyí e/mû ké abwô nyí Otu Síhon mú o/fím Ámórit ne Otu Ôok mú o/fím Báshan, e/mû e/já Gébe mú wǎn-Orí. Â a/fîm banet-ashí ḿbén ashí diǐkpú ne afee a-tî cát, onet-dyishí obónge o/mû kô mú o/mû o-tún n esí-Ézerel emúmú.

Butu-Sólómon bu/ce Kashú

²⁰ Banet-Júda ne ḿbé Ézerel ba/mû ba/jê wǎ éshíshě nyí ké bukô-baya. Mbé ba/mû mbe ba-ryí i byiryíng ba-jwáp ng bato ké bunyîn-dyityém.

²¹ Butu-Sólómon bu/cít kángkáng eshê nyí fím ké kace ńké Yuférétyis tete a-ribi Fyilíta ne buti ḿbú Éjip. Mbé ba/mû mbe ba-kyâ ǎ akpuga-dyishí, ne ba/mû ké bubwô emen ké kángkáng dyikpen emen.

²² Byiryíng ḿbyí Otu Sólómon o/mû mu o-ryuu ng ké dyicí byi/mû égot-balyíta-filáwa bujam ne etánge ne égot-balyíta-nkurung mú kwakwa bajam bafee esim diǐkpú

²³ ne bampong ḿbé banong banong diǐkpú ḿbé mbe ba-nen n kámbé ké byise ne bampong bujam ḿbé mbe ba-ryí i baryî ba-câ ké dyikán ne bajam-etám-ebû batánge, cibicibi ne enyam-dyikán ne byitú byikíri.

²⁴ Otu Sólómon o/mû otu ké esí emúmú nyí kyicê-kace ńké Yuférétyis, ńkyí esû edaríbî e-jâ, kyi-fím ké oshê mú Tyífyisa, ké bukô-kace ńké Yuférétyis, tete kyi-ribi ké kyicê ńkyí esû edaríbî e-jâ ké oshê mú badakó Gáza. Kángkáng batu ḿbé ké kyicê-kace ńké Yuférétyis, ńkyí esû edaríbî e-jâ, ba/mû ké bubwô emen, ne nyǐ o/mû ké kyikwáré ne kángkáng eshê nyí e/fárâng ǎ.

²⁵ Ńdyí nyǐ o/mû o/tôong okpó, kángkáng banet ḿbé ké Júda ne Ézerel ba/mû ké bunyîn-dyityém, kyikû-banet nang kyirá kyi/mû ne byíkwôn ne byirim-byichí ḿbyí badaryí.

²⁶ Otu Sólómon o/mû ne égot-boose etánge etánge ké bajam-byikit bafee ḿbú ba/fé bubyî-orá emen ḿbú budatut bamútu ne égot-bubyî-orá bajam bachât ḿbú basúja badayú ké mbú ba-kûnwa byití.

²⁷ Banet-ashí emen diǐkpú ne afee, nang orá ba/kyii bǎmkpóngé ḿbé emen ba-kye ǎ ké otukáku, oyén mu o-kyâ Otu Sólómon byiryíng ḿbyí mu o-ryuu ng ne kángkáng banet to ḿbé mbe ba-ryí i byiryíng ké kyibám-butu. Kángkáng nkéré, mbé mbe ba-kyâ kángkáng byěm ḿbyí mu o-ryuu ng.

²⁸ Onet-dyishí nang orá mu o-kyâ to esang-byichí ne biǐbyâa, [ké kyikit nang kyirá ńkyí mbe ba-ryuu ng,] ba-yip ng ba-kyâ bubyî-orá.

²⁹ Osówo o/kye Otu Sólómon byinyídíng ḿbyí bii*nwa eri* ne atyém-banet enyît ne bubong ḿbú baa*kan*.

³⁰ Otu Sólómon o/mû ne byinyídíng o-shwôm banet-byinyídíng ḿbé ba/fím ké kyicê ńkyí esû nyi e-byí i nang ne banet-byinyídíng ḿbé Éjip.

³¹ Nyǐ o/mû ne byinyídíng o-shwôm kángkáng banet, o-shwôm Étan mú o/fím Ézarahit ne Héman ne Kákol ne Dáda ḿbé bwǎn-Máhol, ne dyizîn emen dyi/káng ké kángkáng eshê nyí e/fárâng ne nyǐ.

³² Nyǐ o/fwot égot-atím-ekan onyiryiká ne égot-ekwan to e-shwôm m etánge.

³³ Nyǐ o/raa kyi-kim ne byichí ne boǒchí ḿbú boǒníng, kyi-fím ké byichí-séda ḿbyí mbyi ké Lebánon tete kyi-ribi ké kaǎchí ńké badakó kajang. Nyǐ o/raa kyi-kim ne enyam ne bunurung ne efyi ne ekworê.

³⁴ Batu kángkáng ké ejíí ba/jwo kyi-kim ne byinyídíng emen, ne ba-twóm banet ba/fu, bada-jwo ǎ.