1 Kyîng 3 - Bokyi Bible

Otu Sólómon o/fé Nshwam o/fu, Óburúkpâbí okye ǎ Byinyídíng

¹ Otu Sólómon o/chi kyikwáré ne otu-Éjip ké obé mú o/bé wǎn emen. O-kpî ǎ o-ba-kyú ké oshê-Otu Dívit tete o-bi kyibám-butu emen ne kiǐtí-kyise-kyifen-Osówo echi ne ekpe nyí e/wáp Jerúsélem e-fé ké kafâ byi-man.

² Ba/mû ba*da/bi ne kiǐtí-kyise-kyifen-Osówo echi ba-kye Óburúkpâbí* ne ké bubwô ámbu, banet ba/mû ba/tôong ba-chi i byifen ké byikit-kyifen-Osówo echi cátcát.

³ Otu Sólómon, Óburúkpâbí o/mû mu o-jê ng ǎ, ne o/mû mu o-kúng ng bacê ḿbé bonchí emen Otu Dívit, nké nyǐ to o/mû mu o-ju ng byitú o-chi i byifen ké byikit-kyifen-Osówo echi chwóó o-kyâ Osówo.

⁴ Nkéré obónge, o/dim o-ca Gyíbwon byifen edachi, ké nǎ, kiǐtí-kyikit-kyifen-Osówo echi kyi/mû ányi. Nyǐ o/mû oo/chi égot-byifen ányi ḿbyí byirim-byitú eshí ké nkéré mú o/shwôm ké esim.

⁵ Ké buchú ámbu, Óburúkpâbí o/byí o-kâm ǎ ké burê o-bí ǎ o/fu, wo amu a-ryuu ng a/fu, me nkye ǒ ebóng.

⁶ Otu Sólómon o-faa o/fu, wo a/mû amu a-tông ng Otu Dívit mú ḿgbán eyên, mú bonchí ejí kiǐtí-kyijé kángkáng nkéré, ne nyǐ o/mû kanong, o-kyâ ǒ ofê, o-sét ng ǒ to ntûntû ké kanong emen ne wo. Ne wo a/tôong a-tông ng ǎ kiǐtí-kyijé eyên ńkyí kii*man* a-câ kashú ké okye mú aa/kye ǎ wǎn-onyinchéng mú o/firi otu kurún ké dyishí emen.

⁷ Ô Osówo Óburúkpâbí, wo aa/bángê mě n-kúng kyikit ńkyí bonchí ejí wǎ otu, nang ké me n/tôong něen fyěet ne mm*man echi bǎmkpóngé ḿbé otu*.

⁸ Me mu nyín ne banet eyên ḿbé wo aa/cá kámbé, biǐtí-banet ḿbé baa*nwa epan*.

⁹ Kye mě kâng byinyídíng ḿbyí mu n-ryuu ng eringe ndakûtún banet eyên acît nn*ryí kámbé* n-kûnyît to n/fu, ńkyín kyibî, ńkyín kyinong. Kyi*fí éné* me n-cen n nǎ ne n-kûman etún bujê-banet eyên ḿbén.

¹⁰ Óburúkpâbí kyi/nyîn ǎ ne ńkyí Otu Sólómon o/bí něen,

¹¹ ne o-raa kâng ne nyǐ o/fu, ké nǎ, wo aa/bí a/fu, me nkye ǒ byinyídíng eringe nyí adakûtún banet kanong, mú a/mû a/chi a-bí a/fu, me nchi ǒ a-kpen a-wu, nang efang éfang nang banet-bushwôn eyên bakpú,

¹² me n/chi n-chi ńkyí wo aa/bí. Me n/chi n-kye ǒ byinyídíng ne bubong byi-jê byi-shwôm ḿbyí onet nang orá o/mû oo/já kpákpá nang ḿbyí onet o/chi o-chîjá ne banyá.

¹³ Me n/chi n-kye ǒ to ńkyí wo a*da/bí*. Wo a/chi a-kyú ne ofê ne efang ké kángkáng dyikpen eyên, byi-shwôm ḿbyí otu nang orá.

¹⁴ Ne â wo amu a-chi i ńkyí me n/sét ǒ, a-tî ng to byije ejí wǎ eringe nyí ńchân eyên Otu Dívit o/mû o-chi i, me n/chi n-chi ǒ a-kpen a-wu.

¹⁵ Otu Sólómon o-jwóbê, o-nyît o/fu, Osówo oo/pem ne nyǐ ké burê. O-dim kâng o-ca Jerúsélem o-da-bwom ké kashú-mkpukpu-byěm-Óburúkpâbí o-chi byifen ḿbyí byěm eshí ne ḿbyí kyikwáré o-kye Óburúkpâbí. O-chi kâng dyijî o-kye kángkáng banet-ashí-bǎmkpóngé emen.

Otu Sólómon o/két Mpan mú o/mû o-jang ng esóng

¹⁶ Dyicí dyibónge, banryî dyikpe ashí afee ba/ce kyikit-Otu Sólómon.

¹⁷ Obónge o-sét ǎ o/fu, otu ejí, onyinyi mún ne me byimu byi-kyú u kyise kyibónge, me n-fwon wǎn-onyinchéng ányi ké byise ńdyí nyǐ mu ányi.

¹⁸ Nkéré mú me nn/fwon ací a-rí afee, nyǐ to o-ba-fwon wǎn-onyinchéng. Be nké nke nké byi/mû ányi ké kyise, onet okíri o/mû o*fí ányi*.

¹⁹ Buchú bubónge kâng, nyǐ o/nye wǎn mú emen ké byiko o-ju o*da/nyît*.

²⁰ O-bûu nensang ké buchú ámbu, o-yip wǎn mú ejí ké karíng ńdyí mu n-rê ng, o-da-ren ké karíng ńké emen. O-ren kâng wǎn mú oo/kpú ké karíng ńké ejí.

²¹ Ké dyicófóróng, nkéré mú n/jwóbê n/fu, n-kyâ wǎn ejí abî, n-ri n/fu, oo/kpú. N-jebe ǎ dííng n-nyît n/fu, *chí wǎn mú ejí*.

²² Nké mú onyinyi mú áku o/fu, aa*wááng*. Wǎn mú mu okpó nké mu mú ejí, mú oo/kpú o-chi i mú eyên. Mú onyinyi mú o/mû o/kpet esét o-faa o/fu, aa*wááng*. Wǎn mú oo/kpú o-chi i mú eyên, ne mú mu okpó o-chi i mú ejí. Ne ba-kpet ekán ké dyishí ne barî ké bushú-Otu Sólómon.

²³ Otu Sólómon o-faa kâng o/fu, ben ashí amúmú bamu ba-sét ng ba/fu, wǎn mú okpó o-chi i mú mún ne mún, ne mú oo/kpú o-chi i mú mún ne mún to.

²⁴ O-twóm o/fu, babâ ne kashwám. Ne ńdyí ba/bê ne nké,

²⁵ nyǐ o/sét o/fu, két wǎn ámu byikim byifee ba-kye kámbé kyikim kyikim.

²⁶ Ochíchí-boné-wǎn ámu, ne kyijé ńkyí kii/sú ǎ ké dyityém ne wǎn emen, o/raa ne Otu Sólómon o/fu, kamgbe, ǎ otu ejí, *daju wǎn ámu* kye ǎ onyinyi ámu. Nké mú onyinyi ámu o/faa o/fu, *dachi a-kye ǎ onet nang obónge* két ǎ byikim byifee.

²⁷ Otu Sólómon o-faa kâng o/fu, *dachi a-ju wǎn ámu*. Kye ǎ mú onyinyi mú mbwôp kashú, nyǐ o-chi i ochíchí-boné emen.

²⁸ Nkéré mú banet-Ézerel ba/jwo mpan mú Otu Sólómon o/két éné, mbé ashí amúmú ba/kpet ǎ ofê ekye mú oo*nwa eri* ké nǎ, kyi-fím ányi mbé ba/nyît kâng ba/fu, Osówo oo/kye ǎ byinyídíng ḿbyí odaman ekûnap ashwôn dángdáng.