1 Kyîng 22 - Bokyi Bible

Mkpábé mú odabángê Makáya o/kuri Otu Éhap Ekó

¹ Banet-Ézerel ne ḿbé Syírya ba/kyú ké bunyîn-dyityém ké aje afee,

² nké ké aje achât, Otu Jehósháfat mú o/fím Júda o/dim o-wâa edari Otu Éhap mú Ézerel.

³ Otu Éhap o-bí banet-ashí-bǎmkpóngé emen o/fu, ebóng ńkyí be byi*da/chi ne chwǒm* eringe nyí byidachîkoo oshê-Rímot* ké esí nyí Gyílet* ké abwô nyí otu-Syírya*. Oshê ámu o/já bě be.

⁴ Ne Otu Éhap o-bí Otu Jehósháfat o/fu, wo a/chi a-ca ne me byi-da-kye Rímot bunwa dí. Otu Johósháfat o-faa ǎ o/fu, me mm/kpá byiko nang nkéré orá nké wo a/kpá byiko. Éné to nké basúja ejí ne bannwa byití ké esim-bubyî-orá baa/kpá to byiko.

⁵ Nké ké mbwôp kashú, mîng kpá byi-bí Óburúkpâbí.

⁶ Otu Éhap o-kó kâng bamkpábé ḿbé badasét byiraa-Osówo ba-ba-nung, mbé ba/mû égot-banet nang efee. Ne o-bí kámbé o/fu, me nca n-da-kye Rímot bunwa dí, aa n*dace*. Mbé ba-faa ǎ ba/fu, kye kámbé bunwa. Óburúkpâbí o/chi o-chi ǒ a-kpógê kámbé.

⁷ Nké Otu Jehósháfat o/bí o/fu, mkpábé otô o*fí to mú byida ǎ ebí o-sét bě ké ocím mú Óburúkpâbí dí*.

⁸ Otu Éhap o-faa o/fu, obónge o/tôong, nyǐ o-chi i Makáya mú wǎn-Émela. Nké nyǐ o-sa ng mě kafâ, ké nǎ, nyǐ o*da mě esét ne chwǒm ńkyí kyinong nang kyibónge*. Nang nkéré orá o-sét ng mě kyibî-chwǒm. Otu Jehósháfat o-faa ǎ o/fu, *daraa éné*.

⁹ Otu Éhap o-kó kâng onet mú mu o-chi i bǎmkpóngé ké kyibám-butu o-sét ǎ o/fu, oca o-da-kó Makáya o-bâ babap.

¹⁰ Batu ámbe ashí afee, ne ágbádá-butu ké byiko, ba/mû me ké bukyúng-butu ebe ké kyikit ńkyí mbe ba-cím m esang-byichí, kyíjí fáráng ne dyifyi ńdyí ké Samérya, ne kángkáng bamkpábé ba/mû mbe ba-sét ng byiraa ké bushú ebe.

¹¹ Obónge o/mû ányi ké burwám ebe, Zedekyâ mú wǎn-Kenána, o-chi etwóm ké kiǐré, o-raa ne Otu Éhap o/fu, nyín něen ńkyí Óburúkpâbí mu o-raa ng. O/fu, wo a/chi a-kúng etwóm ńnyín a-nwa ne banet-Syírya a-kpógê kámbé ba-nung ké ecing.

¹² Kángkáng bamkpábé ḿbé áku to ba/raa eringe ebónge. Ba-sét ǎ ba/fu, kye Rímot bunwa, ne a/chi a-kpógê kámbé. Óburúkpâbí o/chi o-chi ǒ a-kpógê kámbé.

¹³ Ké nkéré ámu, onet ámu mú o/wâa edakó Makáya o/raa ne nyǐ o/fu, kángkáng bamkpábé ḿbé áku baa/sét ba/fu, Otu Éhap o/chi o-kpógê. Nké kyi-nwa ng ńkyí wo to adasét éné.

¹⁴ Nké Makáya o/faa o/fu, me n/sem Óburúkpâbí mú mu okpó n/fu, me n-sét ng ńkyí nyǐ o/sét mě o/fu, nsét.

¹⁵ Nkéré mú Makáya o/ribi ké bushú ḿbú Otu Éhap, Otu Éhap o/bí ǎ o/fu, Makáya, Otu Jehósháfat ne me byica byi-da-kye Rímot bunwa dí, aa byi*dace*. Makáya o-faa ǎ o/fu, kye n̂g kámbé bunwa. Ké ntûntû, wo a/chi a-kpógê. Óburúkpâbí o/chi o-chi ǒ a-kpógê kámbé.

¹⁶ Nké Otu Éhap o/faa ǎ o/fu, â wo amu a-raa ng ne me ké dyizîn ńdyí Óburúkpâbí, sét ntûntû. Me nsét ǒ ńkyín kampén kafěng.

¹⁷ Makáya o-faa o/fu, me mu n-ri ng eringe basúja-Ézerel baa/pwôo byiryibyiryi ké eku wǎ etám-ebû nyí e*fí ne onet mú mu o-tún n kányí*. Ne Óburúkpâbí o/raa o/fu, banet ḿbén ba*fí ne onet-dyishí* mîng kámbé ba-jâ ne bunyîn-dyityém.

¹⁸ Otu Éhap o-raa ne Otu Jehósháfat o/fu, me m/mû n*da ǒ esét n/fu, nyǐ oo*sét chwǒm ńkyí kyinong ne banyá o-kye mě*? Nang nkéré orá kyi-kyú u kyibî-chwǒm.

¹⁹ Makáya o-chîraa o-ca kashú o/fu, kántîk, fwôo atông a-jwo ńkyí Óburúkpâbí mu o-raa ng. Me n/ri Óburúkpâbí me ké kakyúng-butu emen kyíbóng, ne kángkáng barím emen ḿbé banong ké ba/bwom ǎ ké bakô.

²⁰ Óburúkpâbí o-bí o/fu, yeě o/chi o-nîm Otu Éhap eringe nyí o/chi o-ca Rímot ba-ju ǎ áku. Barím ḿbé banong bakíri ba-faa ńkyín, bakíri ba-faa ejá ekíri,

²¹ tete busun bubónge bu-king bu-bâ kashú, bu-kâm Óburúkpâbí, bu-faa bu/fu, me n/chi n-nîm ǎ.

²² Óburúkpâbí o-bí kámbú o/fu, wo a-cen n nǎ ne a-nîm ǎ. Mbú bu-faa ǎ bu/fu, me n/chi n-ca n-da-chi kángkáng bamkpábé emen ba-kûsét kyisédéng. Óburúkpâbí o-faa o/fu, ca a-da-nîm ǎ. Wo a/chi a-man ǎ enîm.

²³ Ne Makáya o-raa ké nkuli kyikû o/fu, nyín něen ńkyí kii/chi. Óburúkpâbí oo/chi bamkpábé eyên ḿbén ba-sét ǒ kyisédéng. Nké nyǐ oyén oo/kye busa o/fu, wo kyi/chi kyi-bên ne wo.

²⁴ Mkpábé mú odabángê Zedekyâ o-kâm Makáya kâng, o-díp ǎ dyikwâ ké bushú, ne o-bí ǎ o/fu, nkéré orá mú Busun-Óburúkpâbí bu/mîng mě me bu-raa ne wo.

²⁵ Makáya o-faa ǎ o/fu, wo a/chi a-ri kánkyí ké nkéré mú aa/dim a-da-nung ké nfût mú nkuli kyikû eringe adarem.

²⁶ Otu Éhap o-kye kâng onet-dyishí-basúja emen obónge busa o/fu, okám Makáya o-kpî ǎ o-dim ne nyǐ kyikit-Ámon mú onet-dyishí-oshê, o-ca to ne nyǐ kyikit-Jówashi mú wǎn-otu.

²⁷ Sét kámbé a/fu, bafé ǎ ké mgbokobá ba-kû ǎ ekye berêt ne omu tete n-ca byití n-fyi degere.

²⁸ Makáya o-faa ǎ o/fu, â wo a/fyi beem! ányi kâng Óburúkpâbí o*da/raa ké ocím ejí*. Ne o-chîraa kâng o/fu, fwôo n̂g atông ashí amúmú ké ńkyí me nn/raa.

Otu Éhap o/kpú

²⁹ Otu Éhap mú otu-Ézerel ne Otu Jehósháfat mú otu-Júda ba-dim kâng ba-wâa edakye oshê-Rímot bunwa, ké esí nyí Gyílet.

³⁰ Otu Éhap o-raa ne Otu Jehósháfat o/fu, â byi/nung ké byití enwa, me n/chi n-yángê byiko ejí, nké wo fé ágbádá-butu eyên. Otu-Ézerel o-yángê kâng byiko o-nung ké byití enwa.

³¹ Otu-Syírya o/mû oo/kye bannyân byití-basúja emen ḿbé bamútu ḿbé bubyî-orá budatut busa o/fu, mbé ba*dachi ba-kye onet okíri bunwa* kyi-cibi ne otu-Ézerel*.

³² Ké bubwô ámbu, nkéré mú mbé ba/ri Otu Jehósháfat, mbé ashí kángkáng ba/mû ba/kabe ba/fu, nyǐ o-chi i otu-Ézerel, ne ba-bírî ba-bâ ǎ bunwa ebakye. Nké nkéré mú nyǐ o/wonge kakânkakân,

³³ mbé ba/cêe ba/fu, nyǐ, *chí otu-Ézerel* ne ba-mîng ǎ bunwa ekye.

³⁴ Nké ké ofene, onet-súja-Syírya obónge o/ché búre bu-tím Otu Éhap ké acibíng-byidóng-byití emen. O-wonge o-kó onet mú mu o-tut ng ǎ mútu emen o/fu, baa/némê mě. Bírî esim a-mîng byití enwa.

³⁵ Ńdyí kyibî-byití enwa nkyi kyi-câ kashú, Otu Éhap o/waa fífí ké abwô, ké mútu emen, o-bírî banet-Syírya kashú. Baróng ḿbé ba/fím ké kyinêm emen ba-sen ba-sú ké kyikû-mútu ámu, ne ké dyikurúku, o-kpú.

³⁶ Ne esû e-kûríbî, baa/sét kángkáng basúja ba/fu, nang yeě nang yeě obwa esim ké oshê emen ne ké byise emen.

³⁷ Éné nké Otu Éhap o/kpú. Ba-kúng kyikwóm emen ba-dim ne nkyí Samérya, ba-da-ryii ǎ.

³⁸ Ba-soo mútu emen ké kiǐdé-omu ńkyí Samérya, kyikit ńkyí bubyî bu/rû baróng emen, banyinyi-akpara ba-kôo omu ányi, wǎ eringe nyí Óburúkpâbí oo/sét o/fu, kyi/chi kyi-chi.

³⁹ Nang ebóng chwǒm kyikíri ńkyí Otu Éhap o/chi, cibicibi ne osâng mú ba/sáng kyi-kim ne kyibám-butu emen ńkyí o/nap kánkyí ne asháng-eshwa, ne kángkáng eshê nyí nyǐ o/bi, ba/sáng kámbyí ké Nwet-Akpen mú Batu-Ézerel.

⁴⁰ Nkéré mú nyǐ oo/kpú, wǎn emen Aháza nké o/kúng kyikit emen wǎ otu.

Otu Jehósháfat mú Júda

⁴¹ Ké aje anyii, nkéré mú Otu Éhap mu otu mú Ézerel, Otu Jehósháfat mú wǎn-Otu Ása o/mû otu mú Júda,

⁴² ányi nyǐ oo/rí aje bujam esim onyiryiká, ne nyǐ o/kyú otu ké Jerúsélem ké aje bujam esim atánge. Boné emen o/mû o-bángê e Azúba, mú wǎn-Shílyi.

⁴³ Wǎ eringe nyí Otu Ása mú bonchí emen, nyǐ o/chi ńkyí kyi/mû kanong ké bushú ḿbú Óburúkpâbí. Nké biinchéng-bakye-dyikpe eryí ba/mû ba*da/bên kámbyí* ne banet ba/ce kashú mbe ba-chi i byifen ba-shí i burwan ányi.

⁴⁴ Otu Jehósháfat o-chi kyikwáré ne otu-Ézerel.

⁴⁵ Nang ebóng chwǒm kyikíri ńkyí Otu Jehósháfat o/chi, kángkáng bukân emen ne byití emen ḿbyí o/nwa, ba/sáng kámbyí ké Nwet-Akpen mú Batu ḿbé Júda.

⁴⁶ Nyǐ o/ju kángkáng banryî akpara ḿbé banyinchéng ne ḿbé banyinyi, ḿbé ba/mû ba-ryí i akpara ké biinchéng-bakye, ḿbé ba/mû ba/waa kyi-fím ké ací nyí bonchí emen Otu Ása.

⁴⁷ Esí nyí Édom ba/mû ba*fí ne otu*. Onet mú o/nye ne otu, mú otu mú Júda o/cá ǎ nké o/mû mu o-tún n kámbé.

⁴⁸ Otu Jehósháfat o/chi bǎnsukyíkang ḿbé badacen ké baya ḿbé baryên ba-câ ké esí nyí Ófyi gûl edakúng, nké mbé ba/bên ké Ezón-Gébe, ne ba*da/chîcen nang kabónge*.

⁴⁹ Otu Aháza mú otu-Ézerel o-sét o/fu, nyǐ o-bángê e banet emen ba-ca ne banet-bǎmkpóngé-ńsukyíkang ḿbé Otu Jehósháfat, nké Otu Jehósháfat o*da/bángê*.

⁵⁰ Otu Jehósháfat o/kpú ba-ryii ǎ ké akun nyí batu, ké oshê-Otu Dívit, ne wǎn emen Jehóram o-kúng kyikit emen wǎ otu.

Otu Aháza mú Ézerel

⁵¹ Ké aje onyiryiká ne afee nyí Otu Jehósháfat o/mû otu mú Júda, Otu Aháza mú wǎn-Otu Éhap o/mû otu mú Ézerel, ne nyǐ o/kyú otu ké Samérya ké aje afee.

⁵² Nyǐ o/chi kyibî ké bushú ḿbú Óburúkpâbí, ké kyibî-kyiká-édúú ńkyí nyí o/kúng, ńkyí bonchí emen Otu Éhap, ne ńkyí Jézébel mú boné emen, ne ńkyí Otu Jérobâm mú o/chi banet-Ézerel ba-nung ké byibî.

⁵³ Nyǐ o/kye Bâl ofê, o-chi bǎmkpóngé o-kye ǎ, ne wǎ eringe bonchí emen, nyǐ o/chi kafâ ka-bírî Óburúkpâbí mú Osówo-Ézerel.