1 Kyîng 21 - Bokyi Bible

Kyifát ńkyí Nábot

¹ Nábot o/mû ne kyifát ké Jézerel fáráng ne kyibám-butu ńkyí Otu Éhap.

² Dyicí dyibónge, Otu Éhap o/raa ne Nábot o/fu, mîng kyifát eyên ńkyín kyi-firi ńkyí ejí, nkyí kyi/fárâng ne kyibám-butu ejí. Ne me mu n-ryuu ng n/fu, n-kwón n byidóng-kasu ké esí ányi. Me n/chi n-yángê ǒ kyifát kyikíri ńkyí kyinong kyinong, â nang kyi/nyîn ǒ, me n/chi n-kye ǒ akpuga nyí adakwárê.

³ Nábot o-faa ǎ o/fu, me n/ryí bukyû ké esí ńnyín ké abwô nyí banchí ejí ḿbé kpákpá. Óburúkpâbí oo*bángê o/fu, me nkye ǒ kánkyí*.

⁴ Otu Éhap o-dim dyijê cuu! ne busa-dyityém ké ńkyí Nábot o/raa ne nyǐ. O-da-rí sáre ké karíng emen, o-bírî kashú ké ekpe, o*fí o-bángê e byiryíng eryí*.

⁵ Onyi emen Jézébel o-dim o-kâm ǎ, o-bí ǎ o/fu, ebóng amu éné cuu! Ebóng a*fí a-ryí i byiryíng*.

⁶ Nyǐ o-faa ǎ o/fu, ké nǎ, Nábot o/raa ne me. Me m/bángê n/fu, n-ré ng kyifát emen. Â nang kyi/nyîn ǎ, n-yángê kyikíri n-kye ǎ. Nké nyǐ o/sét mě o/fu, nyǐ oo*bángê*.

⁷ Jézébel o-bí ǎ o/fu, ehê, wo otu aa, aa *chí otu*. Bûu nensang ké karíng a-bâ kyíjí, *dachîkyú cuu* ryí byiryíng. Me n/chi n-kye ǒ kyifát-Nábot.

⁸ O-sáng kâng baléta, o-sáng dyizîn-Otu Éhap ké mbé, o-tî ekap nyí Otu Éhap ké mbé, o-twóm kámbé ba-kye banet-ashí-bǎmkpóngé ne biǐtí-banet ḿbyí ké oshê-Jézerel.

⁹ O/sáng ké baléta ámbe o/fu, fé n̂g dyicí-esong ecíp, ba-kó banet ba-cibi kyikit kyibónge, ba-kye Nábot kyichí-ofê.

¹⁰ Ryuu n̂g bankyê byiraa ashí afee ba-bât Nábot kyiraa ké kashú emen ba/fu, mú mǔ mu o-shú u Osówo ne otu. Ba-kpî ǎ kâng o-byí ké oshê ba-tím ǎ aká ba-ju.

¹¹ Banet-ashí-bǎmkpóngé ne biǐtí-banet ḿbyí Jézerel ba-chi ńkyí Jézébel o/sét kámbé.

¹² Ba-fé dyicí-esong ecíp, ba-kó banet ba-cibi, ba-kye Nábot kyichí-ofê.

¹³ Bankyê byiraa ámbe ba-bât Nábot kyiraa ké ókâp-banet ba/fu, mú mǔ mu o-shú u Osówo ne otu, ne ba-kpî ǎ kâng ba-byí ne nyǐ ké oshê, ba-tím ǎ aká o-kpú.

¹⁴ Ba-twóm kyitwóm ba-sét Jézébel ba/fu, baa/ju Nábot.

¹⁵ Nkéré mú Jézébel o-jwo ng kyitwóm ánkyi o-bâ, o-sét Otu Éhap o/fu, Nábot oo/kpú. Ca kâng a-da-koo kyifát ánkyi ńkyí nyǐ o/mû o/fu, nyǐ oo*shee ǒ*.

¹⁶ Otu Éhap o-dim odǐm o-da-koo kyifát ánkyi.

¹⁷ Óburúkpâbí o-raa kâng ne Elája mú mkpábé emen, mú o/fím oshê mú badakó Tyíshíbe o/fu,

¹⁸ ca kyikit-Otu Éhap ké Samérya. A/chi a-ri ǎ ké kyifát ńkyí Nábot, o-kú o-bâ ebakoo kánkyí.

¹⁹ Sét ǎ a/fu, me Óburúkpâbí mu n-raa ng ne nyǐ n/fu, eringe nyí nyǐ o/ju onyinchéng ámu, nyǐ o-chî ng ǎ ekoo to byěm dí. Sét ǎ a/fu, něen nké me mu n-raa ng, n/fu, ké ochíchí-kyikit ánkyi ńkyí bubyî bu/rû baróng-Nábot, mbú bu/chi bu-rû to baróng ḿbé emen.

²⁰ Nkéré mú Otu Éhap o/ri Elája, nyǐ o/raa o/fu, wo aa/kwárê ne me dí, ǎ onet-bushwôn ejí. Elája o-faa o/fu, âa, nn/kwárê ne wo. Wo aa/yip byiko eyên kángkáng a-kye ké byěm echi ḿbyí bii*nwa ké bushú ḿbú Óburúkpâbí*.

²¹ Óburúkpâbí mu o-raa ng ne wo kâng o/fu, nyǐ o/chi o-chi kyi-bên ne wo. Nyǐ o/chi o-man ne wo, o-man to ne onyinchéng nang orá mú mu ké kyikû eyên, byisat cibicibi ne bakâa.

²² Kyikû-banet eyên kyi/chi kyi-firi wǎ ńkyí Otu Jérobâm mú wǎn-Nébat, ne wǎ kyikû-banet to ńkyí Otu Básha mú wǎn-Ahíja, ké nǎ, wo aa/chi kafâ ka-bírî ǎ ké ochi mú wo a/chi banet-Ézerel ba-nung ké byibî.

²³ Kyi-kim kâng ne Jézébel, Óburúkpâbí mu o-raa ng o/fu, bubyî bu/chi bu-ryí ǎ ké oshê-Jézerel.

²⁴ Nang wǎn-boné eyên orá nké o/kpú ké oshê-Jézerel, bubyî bu/chi bu-ryí ǎ, ne nang orá to nké o/kpú ké dyikán, biinfuu akun byi/chi byi-ryí ǎ.

²⁵ Onet o/mû o*fí nang obónge mú o/yip byiko emen kángkáng o-kye ké byibî-byěm echi ké bushú ḿbú Óburúkpâbí wǎ Otu Éhap* kángkáng byěm ḿbyín Jézébel mú onyi emen nké oda ǎ etírîng.

²⁶ Nyǐ o/chi biinchi éshwân-byibî ḿbyí byi/rêe byi-shwôm, ḿbyí nyǐ o/kye erím-bakye ofê wǎ eringe nyí banet-Ámórit ba/chi, ḿbé Óburúkpâbí oo/ró kámbé ké esí ńnyín, ńdyí banet-Ézerel mbe ba-tín n ba-bâ.

²⁷ Nkéré mú Elája oo/raa o-man, Otu Éhap o-ját byídí ké byiko, o-pii kámbyí, o-yip byídí-dyikán eta o-fé. O-né o/fu, nyǐ oo*ryí byiryíng* o-kûrí ké byídí-dyikán eta, o-kûcen cuu! bafip báfip.

²⁸ Óburúkpâbí o-raa ne Elája o/fu,

²⁹ wo aa/ri eringe Otu Éhap o/bwa ne byiko emen kyísí ké bushú ejí? Ké bubwô ḿbú nyǐ oo/chi ńkyín, me mm*ba/chi n-chi kyi-bên ne nyǐ ké nyǐ o/tôong ocím ojwóm*. Kyi/chi kyi-kyú ké nkéré mú wǎn emen o/tôong okpó nké me n/chi n-chi kyi-bên ne kyikû-banet ńkyí Otu Éhap.