1 Kyîng 20 - Bokyi Bible

Byití ḿbyí Banet-Ézerel ba/nwa ne Banet-Syírya

¹ Otu Benhádat mú o/fím Syírya o-cibi kángkáng basúja emen, batu bakíri bujam esim diǐkpú ne bafee ba-bwom ǎ ké esim ne bubyî-orá ebe ne bamútu ebe to ḿbé bubyî-orá budatut, ba-cen ba-yú kyíbóng-kaku, ba-ját eringe badakoo Samérya, ba-kye kámú bunwa.

² O-twóm banet-kyitwóm ba-ca ké oshê o/fu, basét Otu Éhap mú otu-Ézerel ba/fu, Otu Benhádat mu o-bí ng o/fu,

³ wo abwa ne syílyíba ne gûl ne banyinyi ḿbé ké oshê eyên ne bwǎn eyên ḿbé shwaneshwane a-kye ǎ.

⁴ Otu Éhap o-faa o/fu, sét n̂g Otu Benhádat mú kyítá ejí ba/fu, me m/bángê. Nyǐ okúng mě ne kángkáng byěm ḿbyí me mu ne mbyí.

⁵ Banet-kyitwóm ba-chîbwa esim ba-ba-sét Otu Éhap ejá ekíri nyí Otu Benhádat o/twóm. O/fu, me m/mû n/twóm ǒ ejá n/fu, wo abwa ne syílyíba ne gûl ne banyinyi ḿbé ké oshê eyên ne bwǎn eyên a-kye mě.

⁶ Nké kántîk, me n/chi n-twóm banet-ashí-basúja ejí ba-ba-kyé byěm-kyibám-butu eyên ne byise ḿbyí banet-ashí-bǎmkpóngé eyên, ne mbé ba/chi ba-kúng nang ebóng chwǒm ńkyí [mbé] ba/kabe ba/fu, nkyi kiǐtí-chwǒm. Mbé ba/chi ba-ribi áku bankéré ḿbén nencí.

⁷ Otu Éhap o-kó kángkáng banet-ashí-oshê ba-ba-nung, o-raa ne mbé o/fu, ben bamu ba-ri ng ba/fu, onyinchéng mún mu o-ryuu ng o-tánê oshê eten. Nyǐ o/twóm mě kyitwóm o/fu, me mbwa ne banyi ejí ne bwǎn ejí ne syílyíba ejí ne gûl ejí n-kye ǎ, ne me m/bángê.

⁸ Banet-ashí ámbe ne banet ḿbé kwán ba-faa ba/fu, *dachi a-fwôo atông ké ńkyí nyǐ o/sét* *dachi a-bángê*.

⁹ Otu Éhap o-faa kâng banet-kyitwóm-Otu Benhádat o/fu, sét n̂g kyítá mú otu ejí ba/fu, me m/bángê ké ejá emen nyí mbwôp kashú, nké me mm*man ebángê ké nyí nnyinyěng*. Banet-kyitwóm ámbe ba-dim, ba-chîbwa esim kâng ne kyitwóm kyikíri

¹⁰ ńkyí Otu Benhádat o/twóm kámbé. O/fu, me n/chi m-bâ ne bujê-banet ba-ba-bên oshê eyên mún, ba-wuri byěm ḿbyí ba/bên. Kyi/bát bakye baju mě, â n*da/chi éné*.

¹¹ Otu Éhap o-faa o/fu, sét n̂g Otu Benhádat ba/fu, ochíchí-onet-súja o-paam m byiko â byití bii/man, *chí ne o-kûnwa byití*.

¹² Otu Benhádat o/jwo ejá nyí Otu Éhap o/faa ńdyí nyǐ ne batu ḿbé ba/cibi ne nyǐ ba/mû mbe ba-jwáp ng bato ké bampyep ebe ḿbé badabi ké kyídí. O-sét banet emen o/fu, bakpá byiko ḿbyí badakye oshê bunwa, ba-dim kâng ba-da-bwom ké byikit ebe.

¹³ Ké nkéré ámu, mkpábé mú odasét byiraa-Osówo o/dim o-kâm Otu Éhap, o-raa ne nyǐ o/fu, Óburúkpâbí mu o-raa ng o/fu, wo a*dachi a-shî bujê-basúja ámbe*. Nyǐ o/chi o-chi ǒ a-kpógê kámbé kurún, ne wo a/chi a-nyît a/fu, nyǐ o-chi i Óburúkpâbí.

¹⁴ Otu Éhap o-bí mkpábé ámu o/fu, yeě o/chi o-bwom ké kashú-byití. Mkpábé ámu o-faa ǎ o/fu, Óburúkpâbí mu o-raa ng o/fu, esu-basúja nyí nyi ké abwô nyí banet-ashí ḿbé ké esí ké esí nké badace kashú. Otu Éhap o-bí ǎ o/fu, aa yeě o/chi o-kûnyán bachíchí-basúja ḿbé kwán. Mkpábé ámu o-faa ǎ o/fu, wo oyén.

¹⁵ Otu Éhap o-kó kâng esu-basúja nyí e/mû ké abwô nyí bannyân byití ḿbé ké esí ké esí, mbé ashí amúmú ba/mû égot ebónge ne banet bujam esim diǐkpú. O-kó kâng basúja ḿbé banet-Ézerel, mbé ba/mû égot-banet bujam esim onyiryiká ne bafee.

¹⁶ Bunwa bu/kpet ké ncên-esû, nkéré mú Otu Benhádat ne batu emen bujam esim diǐkpú ne bafee ḿbé ba/cibi ne barî ba/mû ba-kú ba-bwóm m bato ké bampyep-byití ebe.

¹⁷ Esu-basúja nyí kyísí nké e/bwóp kashú. Banet-mbâm ḿbé badace kashú, ḿbé Otu Benhádat o/twóm kámbé ba-ba-sét ǎ ba/fu, bujê-basúja mbe ba-byí i ba-bâ ké Samérya.

¹⁸ Nyǐ o-faa kámbé o/fu, kám m̂ kámbé bakpó ba-bâ ne mbé, *da n̂g ekérê â nang mbé mbe ba-bâ bunwa ebanwa* nang mbe ba-bâ ebabí kyikwáré*.

¹⁹ Byisu-basúja ba-bwóp kashú ké bunwa enwa, basúja-Ézerel ba-nye ne mbé ké kyikû,

²⁰ ne nang yeě ké burwám ebe o/ju onet mú o/nwa ne nyǐ. Banet-Syírya ba-chêe, banet-Ézerel ba-ró ng kámbé ba-câ, nké Otu Benhádat o/chêe ké esim-kabyî-orá, ne basúja to ḿbé badanwa byití ké esim-bubyî-orá.

²¹ Otu Éhap o-rim ne mbé ké kyikû, [o-kám] bubyî-orá ne bamútu ḿbé bubyî-orá budatut, o-kpógê banet-Syírya dyikpóge ńdyí dii*nwa eri*.

²² Mkpábé mú odasét byiraa-Osówo o-dim kâng o-kâm Otu Éhap o-raa ne nyǐ o/fu, bwa dyijê a-da-bwât basúja eyên, a-tî okabe kanong kanong, ké nǎ, otu mú Syírya o/chi o-chî ǒ ekye bunwa ké nnyinyěng-ashí-kyifang.

Banet-Syírya ba/chîkye Bunwa

²³ Banet-ashí-bǎmkpóngé-Otu Benhádat ba-raa ne nyǐ ba/fu, bakye ḿbé banet-Ézerel ba-chi i bakye ḿbé eku, ne nkyí nké mbé ba/mû ba/kpógê bě. Nké be ba/chi byi-kpógê kámbé ké ntûntû â byi/nwa ne mbé ké ndege-esí.

²⁴ Fîm kâng batu ámbe ashí bujam esim diǐkpú ne bafee ké byikit ebe ḿbyí mbe ba-nyán n byití, a-tî bannyân byití bayén ké byikit ámbyi.

²⁵ A-kó kâng bujê-banet-súja ba-jê wǎ ḿbé ba/mû ba/chêe ǒ, a-tî to bujê-bubyî-orá ne bujê-bamútu ḿbé bubyî-orá budatut. Be byi/chi byi-nwa ne banet-Ézerel ké ndege-esí, ne ntáng mún byi/chi byi-kpógê kámbé. Otu Benhádat o-bángê, o-chi wǎ eringe mbé ba/cêe ǎ.

²⁶ Ké nnyinyěng-ashí-kyifang, nyǐ o/kó basúja emen o-dim ne mbé ké oshê mú badakó Áfek, eringe odakye banet-Ézerel bunwa.

²⁷ Ba-kó banet-Ézerel ba-kpá byiko. Ba-byí ba-bâ, ba-ba-bi bampyep-byití ebe ké byikim-byikit byifee, ba-bírî banet-Syírya kashú. A-ri ng banet-Ézerel boǒnyín éné wǎ boǒbóng-ebû bufee, â a/kan kámbé ne banet-Syírya ḿbé ba/pwôo byiryibyiryi ányi.

²⁸ Mkpábé mú odasét byiraa-Osówo o-dim o-kâm Otu Éhap o-raa ne nyǐ o/fu, nyín něen ńkyí Óburúkpâbí mu o-raa ng. O/fu, ké nǎ, banet-Syírya ba/raa ba/fu, me n-chi i Osówo mú eku, *chí mú ndege esí* me n/chi n-chi ǒ a-kpógê bujê-dyizu-basúja ebe ámbe, ne wo ne banet eyên ba/chi ba-nyît ba/fu, me n-chi i Óburúkpâbí.

²⁹ Ké ací káchâtkányi, banet-Syírya ne ḿbé Ézerel ba/waa ányi ké kafâ-bampyep ebe, ne kashú ńké ba/bírî ne barî. Ké dyicí ńdyí ací káchâtkányi ándyi, ba/kpet enwa ne barî, ne banet-Ézerel ba/ju banet-Syírya égot ebónge ebónge ké égot-byikit efee ne kyicê.

³⁰ Ḿbé ba/waa bakpó ba-chêe ba-jâ ké Áfek, kyikit ńkyí ekpe nyí ba/bi ba-wáp oshê ba-fé ké kafâ e/myii e-ju égot-banet etánge etánge ké byikit bujam esim káchâtkányi. Otu Benhádat o-chêe to o-jâ ké oshê ámu, o-da-rem ké nfût mú ké esim-kyise.

³¹ Banet-ashí-bǎmkpóngé emen ba-dim ba-kâm ǎ, ba-raa ne nyǐ ba/fu, be bii/jwo ba/fu, batu-Ézerel ba-ri ng banet bafip. Kye bě busa byi-dim byi-ca kyikit-otu-Ézerel ne byídí-dyikán eta ké basín ne erí ké kyitông nímním, ne katô nyǐ oo*ba/chi o-ju ǒ*.

³² Ba-kúng kâng byídí-dyikán eta ba-ním ké basín ne erí nímním ké byitông, ba-dim ba-kâm Otu Éhap, ba-raa ne nyǐ ba/fu, Otu Benhádat mú ḿgbán eyên mu o-tîm m ǒ arông o/fu, wo a*dachi a-ju ǎ*. Otu Éhap o-faa o/fu, nyǐ o/tôong okpó? Kyi/nwa, nyǐ mu wǎ wǎn-boné ejí.

³³ Banet-ashí-bǎmkpóngé-Otu Benhádat ba/mû mbe ba-bám m ba-ri ekap nyí enong. Ne ńdyí Otu Éhap o/fu, wǎn-boné ejí, mbé ba/waa ba-koo okǒng, ba-faa ba/fu, wo a/fu, Otu Benhádat mu wǎ wǎn-boné eyên. Otu Éhap o-kye busa o/fu, bâ n̂g ne nyǐ kwán. Nkéré mú Otu Benhádat o/nung, Otu Éhap o/sét ǎ o/fu, onung ne nyǐ ké mútu mú bubyî-orá budatut.

³⁴ Otu Benhádat o-raa ne nyǐ o/fu, me n/chi m-bwa esim ne eshê ányi n-kye ǒ, nyí bonchí ejí o/mû o/koo ne bonchí eyên. Ne wo a-man n ekúng Damásákus a-tî kámú o-firi kiǐtí-oshê-kasî ecen ńkyí eyên, wǎ eringe nyí bonchí ejí o/chi ké Samérya. Otu Éhap o-faa o/fu, ké bubwô ḿbú ḿbyí wo a/raa něen, me n/chi n-zú ǒ abwô. O-fé kabyî ne nyǐ, o-mîng ǎ o-dim.

Mkpábé mú odasét Byiraa-Osówo o/bîn Otu Éhap

³⁵ Óburúkpâbí o/sét onet mú o/fím ké burwám ḿbú bamkpábé ḿbé badasét byiraa-Osówo o/fu, mú mǔ ofu óbe-mkpábé o-díp ǎ. Nké mú áku o/né o/fu, nyǐ oo*díp ǎ*.

³⁶ Nyǐ o-raa kâng ne mú áku o/fu, ké nǎ, wo aa/né ńkyí Óburúkpâbí o/sét ǒ, ekpang e/chi e-ju ǒ abeabe â a/dim a-mîng mě. Ne ńdyí mú ámu o-dim m o-bâ, ekpang e/byí e-ba-ju ǎ.

³⁷ Ochíchí-mkpábé ámu o-dim kâng o-kâm onyinchéng okíri, o-raa ne nyǐ o/fu, díp mě. Onyinchéng ámu o-díp ǎ. O/díp ǎ kakânkakân o-némê ǎ.

³⁸ Mkpábé ámu o-yip kyídí o-bwá ké bushú eringe baa*cêe ǎ to* o-dim o-da-bwom ké bukwóp, mu o-bám m o/fu, otu-Ézerel oba-shwôm.

³⁹ Nkéré mú otu-Ézerel o-kú o-shwôm m, mkpábé ámu o-kó ǎ o/fu, otu ejí, me m/mû mu n-nwa ng byití ńdyí onet-súja o/bê ne onet-bushwôn mú baa/kám ǎ o-ba-kye mě, o-raa ne me o/fu, kûbám onyinchéng mún. Â o/chêe, wo nké adakye kyitông eyên, kyi*fí éné* a-kye égot-byikim-syílyíba onyiryiká.

⁴⁰ Nké me m/mû mu n-chi i byěm byikíri, ne onyinchéng ámu o-chêe. Otu-Ézerel o-faa ǎ o/fu, wo aa/két mpan eyên wo oyén, ne wo nké adakye ńkyí ba/két ǒ.

⁴¹ Mkpábé ámu o-ját kyídí ńkyí o/mû o/bwá ké bushú, otu o-waa o-cêe ǎ wǎ mkpábé mú odasét byiraa-Osówo.

⁴² Mkpábé ámu o-raa kâng ne otu o/fu, nyín něen ejá nyí Óburúkpâbí. O/fu, ké nǎ, wo aa/mîng onyinchéng mú nyǐ o/mû o/kye busa o/fu, baju ǎ o-chêe, wo a/chi a-ré dyifwá ándyi ne kyitông eyên, ne ba/chi ba-ju to basúja eyên ké omîng mú mbé ba/mîng basúja emen ba-chêe.

⁴³ Otu-Ézerel o-bwa esim dyijê ké Samérya, ne ofong ekédê ne asa jwâajwâa.