1 Kyîng 2 - Bokyi BibleNkuli Kyikû-Bacê ḿbé Otu Dívit o/cê Otu Sólómon 1 Nkéré mú Otu Dívit o-kú o-bâ ekpú, nyǐ o/kó Otu Sólómon mú wǎn emen o-kye ǎ nkuli kyikû-bacê, 2 o/fu, nkéré ejí mú ndakpú oo/fyi. Kyú ne dyityém dyibónge, a-tigi to ne dyityém, 3 a-chi ńkyí Óburúkpâbí mú Osówo eyên o/sét ǒ o/fu, wo achi. Tî kángkáng byije emen ne ńkyí o/sét ǒ o/fu, achi, wǎ eringe nyí ba/sáng ké Byije ḿbyí Músis, eringe nyí nang nyá nké a/ce kyidanwa kyi-kye ǒ ké kángkáng ńkyí amu a-chi i. 4 Â wo amu a-kyâ ǎ ofê, Óburúkpâbí o/chi o-tî ocím mú nyǐ o/ryí ké nkéré mú nyǐ o/sét mě o/fu, banet ḿbé ba/fím ké kyikû ejí ba/chi ba-kyú batu ḿbé Ézerel â mbé mbe ba-bám m byiko ba-tî ng byije emen ne dyityém efé ne dyityém ebe kángkáng. 5 Chwǒm kyikíri kyi/tôong. Wo amu a-zîim m ńkyí Jówap o/chi mě, ké oju mú nyǐ o/ju banet-ashí-basúja ḿbé Ézerel ashí afee, Ábina mú wǎn-Nêe ne Amása mú wǎn-Jéte. Wo amu a-zîim m eringe nyǐ o/ju kámbé ké nkéré mú bunyîn-dyityém ké ewa esó nyí mbé ba/cen banet ne bukyû ké nkéré-byití. Nyǐ o/ju [banet ḿbé ba*da/chi kyibî*] ne kántîk [me nn/tû dyitû ké ńkyí nyǐ o/chi, ne me nn/ri] afaníkong ké nkyí. 6 Wo amu a-nyît ng ńkyí adachi. *Dachi a-bángê ǎ o-kpú bukyû ḿbú Osówo*. 7 Nké cángê dyityém ne bwǎn-Bazílya mú o/fím Gyílet, ne tún to kámbé, ké nǎ, mbé ba/mû ba/cángê dyityém ne me ńdyí mu n-chêe ng Abyísálam mú wǎn-boné eyên. 8 *Dachi a-ráp Shímye mú wǎn-Géra* mú o/fím Bahúrim* ké esí nyí Běnjámin*. Nyǐ o/shú mě kanong kanong dyicí ńdyí n/ce Mahánam. Nké ńdyí nyǐ o/kwárê ne me ké kace ńké Jódan, me n/ryí ǎ ocím n-sem Óburúkpâbí n/fu, mm*ba/chi m-bángê ba-ju ǎ*. 9 Nké *dachi a-mîng ǎ busông ekye*. Wo amu a-nyît ng ńkyí adachi, ne wo a-man a-ri a/fu, baa/ju ǎ. Otu Dívit o/kpú 10 Otu Dívit o/kpú ba-ryii ǎ ké oshê emen. 11 Nyǐ o/mû oo/kyú otu ké Ézerel ké bajam-aje bafee. O/kyú otu ké Héboron ké aje káchâtkányi, o-kyú otu ké Jerúsélem ké aje bujam esim diǐkpú ne achât. 12 Sólómon o/kúng kyikit-butu-bonchí emen Otu Dívit wǎ otu, ne busa emen ḿbú butu bu/kám eriri kyísí kanong kanong. Ba/ju Adónyija 13 Adónyija kâng, mú boné emen o/mû o-bángê e Hágit, o/dim o-kâm Bashéba mú boné-Otu Sólómon. Bashéba o-bí ǎ o/fu, onáng mún mú onong dí. Adónyija o-faa ǎ o/fu, nkyi éné. 14 Ne Adónyija o-chîfaa kâng o/fu, mu n-ryuu ng m-bí ǒ chwǒm. Bashéba o-bí ǎ o/fu, ebóng chwǒm éné. 15 Adónyija o-faa o/fu, wo amu a-nyît ng a/fu, me nké m/mû n/chi n-firi otu, ne nang yeě ké Ézerel o/mû o/tî éné. Nké kii/chi dyizong cát, ne wǎn-boné ejí o/firi otu, ké nǎ, Óburúkpâbí nké o/fu. 16 Nké kántîk, me mu ne chwǒm kyibónge ńkyí mu m-bí ng. Kamgbe, *dachi a-né mě*. 17 Bashéba o-bí ǎ o/fu, ebóng chwǒm éné. Nyǐ o-faa o/fu, kamgbe, bí Otu Sólómon. Me mu n-nyît ng n/fu, nyǐ oo*ba/chi o-né ǒ* o-mîng mě n-kûbé Abyíshak mú wǎn-onyinyi mú o/fím Shúnem. 18 Bashéba o-faa ǎ o/fu, nkyi kanong. N/chi m-pem ne Otu Sólómon ké bubwô eyên. 19 Bashéba o-dim kâng o-ca kyikit-Otu Sólómon eringe odadapem ne nyǐ ké bubwô-Adónyija. Otu Sólómon o-bûu nensang eringe odata boné emen kyiraa, o-tíngê kyísí o-kye ǎ. O-kyú kâng ké kakyúng-butu emen, o-fu ba-bâ ne kyichí kyikíri boné o-kyú ǎ ké kyicê-bubwô-etyebéng. 20 O-sét ǎ o/fu, me mu ne kaǎnyín-chwǒm ńké n/fu, m-bí ng ǒ. Kamgbe, *dachi a-né mě ekye*. Otu Sólómon o-bí ǎ o/fu, ebóng chwǒm éné, ǎ ńnâ. Me mm*ba/chi n-né ǒ ekye*. 21 Boné o-faa o/fu, mîng Adónyija mú wǎn-boné eyên o-kúng Abyíshak o-kû ǎ ebé. 22 Nyǐ o-bí boné o/fu, ebóng ńkyí a/bí mě a/fu, nkye ǎ Abyíshak. A-man n mě ebí to a/fu, nkye ǎ kakyúng-butu. Ké nǎ, nyǐ o-chi i okínkán ejí, ne Abyǎta to mú nchi kyifen-Osówo ne Jówap mbe ne nyǐ ké kyikû. 23 Otu Sólómon o-ryí kâng ocím o-sem Óburúkpâbí o/fu, kyi/bát Osówo oju mě â n*da/chi Adónyija o-kye kyitông emen ké ńkyí nyǐ o/bí něen*. 24 Óburúkpâbí oo/chi mě n-kám eriri kyísí kanong kanong ké kakyúng-butu ńké Otu Dívit mú bonchí ejí. Nyǐ oo/tî ocím emen mú nyǐ o/ryí ne oo/kye mě butu ne banet ḿbé ba/fím ké kyikû ejí. Me mu n-sem m Óburúkpâbí mú mu okpó n/fu, Adónyija o-man o-kpú kurún mún. 25 Otu Sólómon o-kye kâng Benáya busa, o-dim o-da-ju Adónyija. Dyirô ńdyí Abyǎta ne Bukyû ḿbú Jówap 26 Otu Sólómon o-raa kâng ne Abyǎta mú nchi kyifen-Osówo o/fu, ca dyijê ké oshê eyên Anátot. Wo a/kwárê mú adakpú, nké me mm*ba/chi n-fu ba-ju ǒ kántîk* ké nǎ, wo nké a/mû a-tún n mkpukpu-byěm-Óburúkpâbí ńdyí a/mû ne Otu Dívit mú bonchí ejí, ne wo a/ri to busông ké kángkáng busông emen ḿbú nyǐ o/ri. 27 Otu Sólómon o-fîm kâng Abyǎta ké bǎmkpóngé ḿbé o/mû mu o-chi i wǎ nchi kyifen-Óburúkpâbí, ne o-chi kâng ńkyí Óburúkpâbí o/mû oo/raa ké Shílo kyi-kim ne nchi kyifen-Osówo mú odabángê Élyi ne kyikû-banet emen kyi-firi ntûntû. 28 Jówap o-jwo ńkyí kii/chi. Nyǐ o/mû ké esim nyí Adónyija, nké *chí nyí Abyísálam*. O-chêe kâng o-jâ ké mpyep-kyifen-Óburúkpâbí echi, o-da-níbî abwô ké bakô-kyikit-kyifen-Osówo echi. 29 Nkéré mú Otu Sólómon o/jwo ba/fu, Jówap oo/chêe o-jâ ké mpyep ámu, ne mu ké bukô-kyikit-kyifen-Osówo echi, Otu Sólómon [o-twóm onet-kyitwóm o/fu, oda-bí Jówap ńkyí kyi/cen ne nyǐ o-chêe o-jâ ké kyikit-kyifen-Osówo echi. Jówap o-faa o/fu, nyǐ oo/chêe o-kâm Óburúkpâbí, ké nǎ, nyǐ mu o-shî ng Otu Sólómon. Otu Sólómon o-twóm kâng Benáya] o/fu, oda-ju Jówap. 30 O-dim o-ca ké mpyep-kyifen-Óburúkpâbí echi, o-raa ne Jówap o/fu, Otu Sólómon o/kye busa o/fu, wo byí a-bâ kyíjí. Jówap o-faa o/fu, aa*wááng*. Me m-kpú u nyín. Benáya o-bwa esim o-kâm Otu Sólómon o-sét ǎ ńkyí Jówap o/raa. 31 Otu Sólómon o-faa o/fu, chi ńkyí Jówap o/raa. Ju ǎ a-yip ǎ a-ryii. Kyi-fím ányi kâng, nang me nang onet okíri mú o/fím ké kyikû ńkyí Otu Dívit oo*ba/chi o-chîri busông ké bubwô ńkyí Jówap o/chi* ńdyí nyǐ o/ju banet ḿbé ba*da/chi chwǒm*. 32 Óburúkpâbí [o/chi o-kye Jówap busông ké banet ḿbé nyǐ o/ju éné,] Otu Dívit mú bonchí ejí o*da/jwo*. Jówap o/ju banyinchéng ashí afee ḿbé ba*da/chi chwǒm* ḿbé ba/mû kanong ba-shwôm ǎ, Ábina mú o/mû onet-dyishí-basúja mú Ézerel ne Amása mú o/mû onet-dyishí-basúja mú Júda. 33 Busông ḿbú bukyû ebe bu/chi bu-nung Jówap ké byiko ne banet ḿbé ba/fím ké kyikû emen ne banyá. Nké kángkáng nkéré, Óburúkpâbí o/chi o-chi banet ḿbé ba/fím ké kyikû-Otu Dívit, ḿbé ba/kyú ké kakyúng-butu emen, ba-ca kashú. 34 Benáya o-dim kâng o-ca ké mpyep-kyifen-Óburúkpâbí echi o-da-ju Jówap, ba-ryii ǎ kyíjí ké oshê emen. 35 Otu Sólómon o-chi Benáya o-firi onet-dyishí-basúja ké kyikit ńkyí Jówap o/mû, o-tî to Zádok mú nchi kyifen-Osówo ké kyikit ńkyí Abyǎta. Shímye o/kpú 36 Otu Sólómon o-twóm kâng ba-da-kpî Shímye, o-raa ne nyǐ o/fu, bi kyise nyín ké Jerúsélem a-tî byiko eyên. Kûkyú ké nkyí, ne *dachi a-dim nyín ké oshê*. 37 Â a/dim a-nyáng kaǎwán-kace ńké Kyídoron, a-man a-kpú ké ntûntû, ne wo oyén nké a/chi a-cen ne nkyí. 38 Shímye o-faa o/fu, nkyi kanong, ǎ otu ejí. Me n-chi i ńkyí wo a/sét. O-kyú kâng ké Jerúsélem ka-rí kanong kanong. 39 Ńdyí aje aa/shwôm achât kâng, básóng-Shímye ashí afee ba/chêe ba-kâm Ákishi mú wǎn-Máka, mú otu mú Gât. Nkéré mú Shímye o/jwo ba/fu, ḿbé ámbe mbe ké Gât, 40 o/yú ké kaanyam-atû emen o-dim o-kâm Otu Ákishi ké Gât, eringe odadakyé básóng emen. O/ri kámbé o-kpî kámbé ba-bwa esim dyijê. 41 Nkéré mú Otu Sólómon o/jwo ńkyí Shímye o/chi, 42 o/twóm ba-da-kpî ǎ, o-raa ne nyǐ o/fu, me n/chi ǒ a-ryí ocím a-sem Óburúkpâbí a/fu, aa*ba/chi a-dim ké Jerúsélem*. Ne me n-kuri ǒ ekó n/fu, â a/chi éné, a-man a-kpú ké ntûntû. Wo a*da/bángê ké nkyí dí* a-sét a/fu, wo a-chi i ńkyí me n/sét dí*. 43 Ebóng kâng ne wo aa/bên ocím eyên mú a/ryí, a-né ńkyí me n/sét ǒ. 44 Wo amu a-nyît ng kángkáng byibî-byěm ḿbyí a/chi bonchí ejí Otu Dívit kanong kanong. Óburúkpâbí o/chi o-kye ǒ busông ké mbyí. 45 Nké nyǐ o/chi o-jware mě ne o/chi o-chi butu ḿbú Otu Dívit bu-kyú kanong ne banyá. 46 Otu Sólómon o-kye kâng Benáya busa o-byí o-da-ju Shímye. Otu Sólómon o-firi kâng ne kángkáng busa. |
Published by the Bible Society of Nigeria @ 1985
Bible Society of Nigeria