1 Kyîng 19 - Bokyi Bible

Elája o/bwom Kyíbóng-Kaku ńké Sána

¹ Otu Éhap o-sét Jézébel mú onyi emen kángkáng byěm ḿbyí Elája o/chi, ne eringe nyí o/ju kángkáng bamkpábé-Bâl.

² Jézébel o-twóm kyitwóm o/fu, basét Elája ba/fu, kyi/bát bakye baju mě ne kyi-kûribi bankéré ḿbén nencí, â me n*da ǒ echi dyizong-chwǒm ńdyí wo a/chi bamkpábé ámbe*.

³ Bushî bu-róng Elája, o-chêe eringe odanyii dyikpen emen. O-kpî ḿgbán emen ba-jâ Byíshíba, ké esí nyí Júda. Elája o-mîng ḿgbán emen ányi,

⁴ o-cen bucen ké kyirim-dyicí o-jâ ké kyikim-dyikán. O-bwom ké busi-kyichí o-kyú me ányi, o/fu, kyi/kwárê nyǐ okpú. O-fé nshwam o/fu, kii/jang ejap kyi-shwôm, ǎ Óburúkpâbí. Koo dyikpen ejí, kyi/kwárê mkpú to.

⁵ O-rí ányi ké busi-kyichí, o-kpet erê. Orím mú onong o-ba-ta ǎ, o-raa ne nyǐ o/fu, bûu nensang a-ryí byiryíng.

⁶ O-kan achi kú o-kan kú, o-rángê kyikim-berêt ne kaatyu-omu fáráng ne dyishí emen. O-ryí berêt ámu o-jwáp omu. O-chîrí sáre.

⁷ Orím-Óburúkpâbí ámu o-chîbwa esim o-jwóbê ǎ, o-raa ne nyǐ o/fu, bûu nensang a-chîryí byiryíng, kyi*fí éné* bucen bu/chi bu-sóng ǒ.

⁸ Elája o-bûu, o-ryí byiryíng o-jwáp omu, byiryíng ámbyi byi-kye ǎ busa ḿbú o/cen bucen ké bajam-ací bafee o-ca kaku ńké badakó Sána, ńké ka/já Óburúkpâbí.

⁹ Ányi nké o/nung ké bucim o-rí ne buchú. Óburúkpâbí o-waa ányi o-raa ne nyǐ o/fu, Elája, amu a-chi i ebóng nyín.

¹⁰ Elája o-faa o/fu, Osówo Óburúkpâbí mú o/rêe o-shwôm, me mu n-chi i bǎmkpóngé kángkáng nkéré n-kyâ ǒ, wo kǎnchí. Nké banet-Ézerel baa/bên ocím ebe mú ba/ryí ne wo, ba-bú byikit-kyifen eyên echi, ba-ju to kángkáng bamkpábé ḿbé badasét byiraa eyên. Me kǎnchí nké n/waa, ne mbé mbe ba-nwa ng to ba/fu, mbé ba-ju ng mě.

¹¹ Óburúkpâbí o-raa ne nyǐ o/fu, byí a-ba-bwom ké bushú ejí kyíbóng-kaku ńkén. Óburúkpâbí o-shwôm kâng ányi fáráng, o-twóm kyibî-afú ńkyí kyi/ját eku byicê byicê, kyi-chi aká a-pwôo byiryibyiryi, nké Óburúkpâbí o/mû o*fí ké afú ányi*. Afú a-mîng etugi, ne esí e-náng kâng kakânkakân, nké Óburúkpâbí o/mû o*fí ké esí nyí e/náng éné*.

¹² Ńdyí esí ee/náng e-mîng, okwâ o-kpet emang, nké Óburúkpâbí o/mû o*fí nang ké okwâ ámu*. Ńdyí okwâ oo/mang o-mîng, ejá e/raa degere! kyísí kyísí.

¹³ Nkéré mú Elája o/jwo ejá ányi, o-yip ágbádá o-cít ké bushú, o-byí kyíjí o-da-bwom ké ocím-bucim. Ejá e-raa ne nyǐ e/fu, Elája, amu a-chi i ebóng nyín.

¹⁴ Nyǐ o-faa o/fu, Osówo Óburúkpâbí mú o/rêe o-shwôm, me mu n-chi i bǎmkpóngé kángkáng nkéré n-kyâ ǒ, wo kǎnchí. Nké banet-Ézerel baa/bên ocím ebe mú ba/mû ba/ryí ne wo, ba-bú byikit-kyifen eyên echi, ba-ju to kángkáng bamkpábé ḿbé badasét byiraa eyên. Me kǎnchí nké nke nké n/waa, ne mbé mbe ba-kan n ba/fu, mbé ba-ju ng mě.

¹⁵ Óburúkpâbí o-faa ǎ o/fu, bwa esim a-jâ ké kyikim-dyikán fáráng ne Damásákus, a-nung kâng ké oshê a-pwó Házil bakút ké dyishí o-firi otu mú Syírya,

¹⁶ a-pwó to Jéhu mú wǎn-Hyímishi bakút ké dyishí o-firi otu mú Ézerel, a-pwó to Elásha mú wǎn-Sháfat bakút ké dyishí, mú o/fím Ébel Mehóla, o-koo kyikit eyên wǎ mkpábé mú odasét byiraa ejí.

¹⁷ Nang yeě nké Házil o*da ǎ eju* Jéhu o/chi o-ju ǎ, ne nang yeě to nké Jéhu o*da ǎ eju* Elásha o/chi o-ju ǎ.

¹⁸ Nké me n/chi m-mîng égot-banet bujam esim onyiryiká bakpó ké Ézerel, kángkáng banet ḿbé mbe ba-kyâ mě ofê, ḿbé ba*da/tíngê kyísí ké bushú ḿbú Bâl* ba-fé orím-bukye emen nang ocím*.

Óburúkpâbí o/koo Elásha

¹⁹ Elája o-dim o-da-ri Elásha ké mu o-kpang ng kyifát ne bampong emen. Etáng-bampong e/mû diǐkpú ne din ké kashú emen, ne nyǐ o/mû ké kyikim ńkyí kyi/ryí esim. Elája o-pii ágbádá emen o-fé Elásha.

²⁰ Elásha o-dim kâng o-mîng bampong emen, o-zóngê o-ca ne Elája ké kyikû, o-raa ne nyǐ o/fu, mîng mě n-ta bonchí ejí ne boné ejí kyiraa, ne n/chi n-dim kâng ne wo ké kyikû. Elája o-faa ǎ o/fu, [nkyi kanong, bwa esim. Me n*fí n-sét ng ǒ n/fu, *dace*.]

²¹ Elásha o-bwa kâng o-kâm bampong emen, o-ju kámbé, o-rám, o-pii kyifóngé ńkyí ba/mû ba/fé kámbé o-wóngê okwâ ké nkyí. O-yip enyam emen o-kye banet ba-ryí. O-dim kâng o-kâm Elája o-kû ǎ echwáp ké bǎmkpóngé.