1 Kyîng 18 - Bokyi Bible

Elája ne Bamkpábé ḿbé Bukye ḿbú badakó Bâl

¹ Ké nkéré mú kaa/rí, ké aje achât nyí omu o/mîng ena, Óburúkpâbí o/raa ne Elája o/fu, ca a-da-tông Otu Éhap byiko, ne me n/chi n-twóm omu o-na.

² Elája o-dim kâng. Esong e/mû e-kú e-nwa ng ké Samérya nyí ee*nwa eri*.

³ Otu Éhap o-kó kâng Obadyâ o-ba-nung, mú o/mû onet-dyishí mú kyibám-butu emen. Obadyâ o/mû onet mú o/fé dyityém emen ké Óburúkpâbí efé,

⁴ ne nkéré mú Jézébel o/mû mu o-ju ng bamkpábé ḿbé Óburúkpâbí, Obadyâ o/yip bajam-bamkpábé ámbe batánge o-rôo ké bacim, bajam bafee esim diǐkpú ké bucim bubónge, o-kûkye kámbé byiryíng ne omu.

⁵ Otu Éhap o-raa ne Obadyâ o/fu, [byica byi-da-tún] kace nang kará ńké nke ka-byí i ké mbwo, ne kace nang kará ké esí ńnyín akîm byi-ri, â byi/chi byi-ri biǐbyâa ḿbyí byidakwárê bubyî-orá eten budawaa bukpó. Katô bii*ba/chi byi-ju kyitú eten nang kyibónge*.

⁶ Ba-bángê ne barî ké kyicê-esí nang kyirá ńkyí mbé odadatún, ne ba-dim onet ne onet ké kyicê ńkyí emen.

⁷ Nkéré mú Obadyâ mu o-cen n o-câ kiǐfáng ńkyí emen, o/dakwárê ne Elája kiǐmút. O-cêe ǎ, o-tíngê kyísí ké bushú emen, o-bí ǎ o/fu, wo něen ké ntûntû, ǎ bonchí?

⁸ Elája o-faa ǎ o/fu, âa, me Elája. Ca a-da-sét otu mú bonchí eyên a/fu, me mu nyín.

⁹ Obadyâ o-faa ǎ o/fu, me n/chi ebóng mú wo amu a-ryuu ng a/fu, a-fâ mě ké busông ḿbú Otu Éhap oda mě eju.

¹⁰ Me n/sem Óburúkpâbí mú mu okpó n/fu, otu oo/ryuu ǒ ké oshê nang orá ké ejíí. Nang nkéré orá nké otu mú oshê ámu o/sét o/fu, wo a*fí ké oshê emen* Otu Éhap o-man o-kye busa o/fu, otu ámu oryí ocím o/fu, wo baa*ba/chi ba-ri ǒ ányi*.

¹¹ Ne kántîk, wo amu a-ryuu ng a/fu, me nca n-da-sét ǎ n/fu, wo amu nyín.

¹² Â Busun-Óburúkpâbí bu/kúng ǒ kâng bu-dim ne wo ké kyikit ńkyí baa*nyît* â me n-dim m n-ca. Kyi-fím ányi kâng, â me n/sét Otu Éhap n/fu, wo amu nyín, ne nyǐ o*da ǒ eri* nyǐ o/chi o-ju mě. Zîim a/fu, me nn/fé dyityém ejí n/fu, n-kyâ Óburúkpâbí ofê, kyi-fím ké nkéré mú me n/tôong wǎsíng.

¹³ Wo a*da/jwo ne ba/fu, nkéré mú Jézébel o/mû mu o-ju ng bamkpábé ḿbé Óburúkpâbí, me n/rôo kámbé bajam batánge ké bacim*? bajam bafee esim diǐkpú ké bucim bubónge*? n-kye kámbé byiryíng ne omu*?

¹⁴ Wo a-cen n nǎ kâng ne a-sét mě a/fu, me nda-sét Otu Éhap n/fu, wo amu nyín. Nyǐ o/chi o-ju mě.

¹⁵ Elája o-faa ǎ o/fu, me n/sem Óburúkpâbí mú o/rêe o-shwôm n/fu, me n-tông ng Otu Éhap byiko ejí kurún.

¹⁶ Obadyâ o-dim kâng o-ca kyikit-Otu Éhap, o-sét ǎ. Otu Éhap o-dim o-wâa edakwárê ne Elája.

¹⁷ Nkéré mú Otu Éhap o/ri ǎ, o-raa o/fu, ányi wo, ǎ otu-byiraa echi mú Ézerel?

¹⁸ Elája o-faa ǎ o/fu, me, *chí nchi byiraa*. Wo nké amu nchi byiraa, wo ne bonchí eyên. Wo amu a-né ng ńkyí Óburúkpâbí o/sét ǒ, ne amu a-kyâ erím-bakye-Bâl ofê.

¹⁹ Sét kâng kángkáng banet-Ézerel ba-da-cibi barî ké kaku ńké Kámel. Bâ to ne égot-bamkpábé-Bâl ámbe efee ne bajam-bamkpábé bafee esim diǐkpú, ne égot-bamkpábé-osówo-onyinyi ámu efee, mú bada ǎ ekó Ashéra, ḿbé Jézébel mú onyi-Otu Éhap mu o-chwáp ng kámbé.

²⁰ Otu Éhap o-sét kâng kángkáng banet-Ézerel ne bamkpábé-Bâl o/fu, bakâm barî ké kaku ńké Kámel.

²¹ Elája o-kâm kámbé, o-raa ne mbé o/fu, ka-rí i nǎ ne ben ba-nyît ńkyí badachi. Â Óburúkpâbí nké mu Osówo, ben kû n̂g ǎ ekye ofê nyǐ kǎnchí, nké â Bâl nké mu Osówo, ben kû n̂g ǎ efé. Nké banet ámbe ba*da ǎ efaa ojá*.

²² Elája o-faa kâng o/fu, me kǎnchí nké mu mkpábé mú Óburúkpâbí mú o/waa, nké bamkpábé ḿbé Bâl mbe égot-banet efee esim-bajam-banet bafee esim diǐkpú.

²³ Bâ n̂g ne batyép-mpong bafee. Mîng n̂g bamkpábé ḿbé Bâl ba-kúng obónge, ba-ju kámú, ba-két boǒnyín boǒnyín, ba-wuri ba-zû ké ekwón, nké ba*dachi ba-fé okwâ ké ekwón ányi*. Me to n/chi n-chi eringe ányi ebónge ne mpong mú áku.

²⁴ Mîng n̂g bamkpábé ḿbé Bâl ba-fé nshwam ba-kye osówo ebe, ne me to n/chi n-fé nshwam n-kye Óburúkpâbí, ne nang Osówo orá nké o/faa ojá ké okwâ etwóm, ányi nyǐ o-chi i Osówo. Banet ámbe ba-bángê.

²⁵ Elája o-raa kâng ne bamkpábé ḿbé Bâl o/fu, ké bubwô ḿbú ben ba/jang ejê, ben bwóp n̂g kashú ba-yip mpong obónge ba-chi éné. Fé n̂g nshwam ba-kye osówo enen, nké *da n̂g efé okwâ ké ekwón*.

²⁶ Ba-yip mpong mú ba/kye kámbé, ba-chi éné, ba-fé nshwam ba-kye Bâl tete esû e-kán. Ba-wonge ba/fu, faa bě ojá, ǎ Bâl. Ba-chîne ane ba-ca kashú, ba-wáp ng kyikit-kyifen echi ńkyí ba/bi. Nké Bâl o*da/faa kámbé ojá*.

²⁷ Ké nkéré mú esû ee/kán, Elája o-kpet kámbé efát kiikuku o/fu, fé n̂g nshwam kakânkakân. Nyǐ o-chi i osówo. Katô nyǐ mu o-ri ng burê-esû, katô o/sát ké mbáre, katô nyǐ oo/dim bucen. Aa katô nyǐ mu o-rê ng, ne ben ba-man ba-jwóbê ǎ.

²⁸ Bamkpábé ámbe ba-fé nshwam kâng kakânkakân, ba-yip bushwám ba-kûkpet byiko ebe, ba-tím m byiko ebe bampyi, ké édúú ebe, tete baróng ba-kpet esen.

²⁹ Ba-wonge e ba-fu ng byěm ba-wáp ng tete ncên-esû, nké Bâl o*da/faa kámbé ojá* nang chwǒm ba*da/jwo*.

³⁰ Elája o-raa kâng ne banet ḿbé ba/mû ányi o/fu, tín n̂ ba-fárâng mě. Mbé ashí amúmú ba-ba-cibi ba-wáp ǎ ba-fé ké kafâ. O-kpet enap kyikit-kyifen-Óburúkpâbí echi ńkyí ba/mû baa/bú ba-pwó kyísí.

³¹ O-yip aká diǐkpú ne afee, nang burá bu/bwom ké byikû-banet-Ézerel diǐkpú ne byifee, ḿbyí ba/fé kámbyí azîn kyi-kim ne bwǎn-Jekôp, onyinchéng ámu mú Óburúkpâbí o/fé dyizîn, Ézerel.

³² Aká ányi nké nyǐ o/yip ne o-chîbi kyikit-kyifen echi o-tî Óburúkpâbí ńkyí bada ǎ ekûkye ofê. O-sím dyibíng o-wáp kánkyí o-fé ké kafâ, ńdyí dyidanung nang balyíta-omu diǐkpú ne banyii.

³³ O-yip kâng ekwón o-twôom ké kyikit-kyifen echi ánkyi, o-két mpong ámu boǒkím boǒkím, o-zû ké ekwón ányi. O-raa o/fu, fé n̂g omu pwat ké butí-omu bunyii ba-pwó ké kyitú ánkyi ne ké ekwón. Ba-chi éné,

³⁴ o-raa o/fu, chî n̂g echi éné, ba-chîpwó omu. O/fu, bwa n̂g ba-chîchi, ba-chi éné.

³⁵ Omu o-kpet esen ké kyikit-kyifen echi, o-sú ké dyibíng ándyi.

³⁶ Ké nkéré mú badafwam echi kyifen ńkyí ncên-esû, Elája mú mkpábé mú odasét byiraa-Osówo o/dim o-ca ké kyikit-kyifen echi, o-fé nshwam o/fu, ô Óburúkpâbí, Osówo-Ébarahâm ne Ázik ne Jekôp, tông wááng kántîk a/fu, wo a-chi i Osówo mú Ézerel, a-tông to a/fu, me n-chi i ḿgbán eyên, ne me nn/chi to ńkyín kángkáng wǎ eringe nyí wo a/sét mě.

³⁷ Faa mě ojá, ǎ Óburúkpâbí, faa mě ojá, eringe nyí banet ḿbén ba/chi ba-nyît ba/fu, wo a-chi i Osówo, ba-nyît to ba/fu, [wo amu a-bwa ng ne mbé esim ba-kâm ǒ.]

³⁸ Óburúkpâbí o-twóm okwâ, o-shí kyifen ánkyi ne ekwón ne aká, esí e-jwóm, omu o-núng ké dyibíng ándyi.

³⁹ Nkéré mú banet ámbe ba/ri ńkyín, ba-myii kyísí ba-wonge ba/fu, Óburúkpâbí o-chi i Osówo, nyǐ kǎnchí nké mu Osówo.

⁴⁰ Elája o-kye busa o/fu, kám m̂ bamkpábé-Bâl ámbe. *Da n̂g ebángê nang obónge o-chêe*. Banet ámbe ba-kám kámbé ashí amúmú, Elája o-kpî kámbé o-shû ne mbé kyísí ké kace ńké badakó Kyíshon, o-ju kámbé.

Kyibî-Burwom kyi/man

⁴¹ Elája o-raa kâng ne Otu Éhap o/fu, ca kâng a-da-ryí byiryíng. N/jwo kyirim-omu nkyi kyi-bâ.

⁴² Nkéré mú Otu Éhap o/dim byiryíng edaryí, Elája o-yú o-dim kyíbóng-ashí-kaku ńké Kámel, o-siring bushú kyísí áku o-fé dyishí ké arông emen.

⁴³ O-raa ne ḿgbán emen o/fu, ca a-da-tún achi ké kyicê-baya ḿbé Medeterényan. Ḿgbán emen ámu o-dim o-ca, o-bwa esim, o-sét ǎ o/fu, n*da/ri nang chwǒm*. Kampén káchâtkányi ńké Elája o/sét ǎ o/fu, oda-tún.

⁴⁴ Ké kampén káchâtkányi, o/bwa esim o-ba-sét ǎ o/fu, n/ri kaǎnyín-ófíbí wǎ bubwô-onet nke ka-byí i ka-bâ ké baya ḿbé Medeterényan. Elája o-sét ḿgbán emen o/fu, ca kyikit-Otu Éhap a-da-sét ǎ a/fu, onung ké mútu emen mú bubyî-orá budatut o-bwa esim dyijê, omu o*dachi o-ciring ǎ*.

⁴⁵ Ké kaǎnyín-nkéré, bubóng bu-jîi, afú a-kpet etugi, omu o-kpet ena oyén mú oryên. Otu Éhap o-nung ké mútu emen mú bubyî-orá budatut o-bwa esim dyijê ké Jézerel.

⁴⁶ Busa ḿbú Óburúkpâbí bu-nung Elája ké byiko, o-bwá byídí emen kíngkíng ké busín, o-zóngê o-bwóp Otu Éhap kashú tete o-nung Jézerel.