1 Kyîng 17 - Bokyi Bible

Elája ne Kyibî-Burwom

¹ Mkpábé mú odasét byiraa-Osówo, mú odabángê Elája, mú o/fím Tyíshíbe, ké esí nyí Gyílet, o/raa ne Otu Éhap o/fu, ké dyizîn ńdyí Óburúkpâbí, Osówo-Ézerel mú mu okpó, mú me mu n-chi i bǎmkpóngé n-kyâ ǎ, me mu n-sét ng ǒ n/fu, kyibû nang omu bii*ba/chi byi-na ké aje nang afee nang achât* tete me n-fu byina.

² Óburúkpâbí o-raa kâng ne Elája o/fu,

³ dim ké kyikit ńkyín a-jâ ké kyicê ńkyí esû nyi e-byí i, a-da-rem áku fáráng ne kaǎwán-kace ńké badakó Kérit, ké kyicê-kace-Jódan ńkyí esû edabyí.

⁴ Kaǎwán-kace ánke ka/chi ka-kû ǒ ekye omu mú adajwáp. Me nn/sét bunurung ḿbú badakó rében n/fu, bu/chi bu-kû ǒ ekye byiryíng áku.

⁵ Elája o-bángê ńkyí Óburúkpâbí o/sét ǎ, o-dim o-kûkyú fáráng ne kaǎwán-kace ánke,

⁶ o-kûjwáp omu ké nké, bunurung ḿbú badakó rében bu-kû ǎ ekye berêt ne enyam kángkáng dyicófóróng ne dyikurúku.

⁷ Ké nkéré mú kaa/rí, kaǎwán-kace ánke ka-núng, ké nǎ, omu o/mû o*fí o-na ng*.

Elája ne Onyǐnkú mú o/fím Záréfat

⁸ Óburúkpâbí o-raa kâng ne Elája o/fu,

⁹ kántîk, dim a-ca ké oshê mú badakó Záréfat, fáráng ne Sádon, a-kûkyú ányi. Me nn/sét onyǐnkú mú mu o-kyú u ányi n/fu, okû ǒ enen.

¹⁰ Elája o-dim kâng o-wâa Záréfat, ne nkéré mú nyǐ o-ribi ng o-câ ké dyifyi ńdyí ké dyishí-bukwóp-oshê ámu, o/ri onyǐnkú ámu mu o-sá ng ekwón. O-raa ne nyǐ o/fu, kamgbe, kye mě omu n-jwáp.

¹¹ Ne nkéré mú mú onyǐnkú ámu o/dim omu edató, nyǐ o/kó ǎ o/fu, kamgbe, bâ mě to ne berêt.

¹² Mú onyǐnkú ámu o-faa o/fu, me n/sem Óburúkpâbí mú mu okpó n/fu, me n*fí ne berêt*. Kyi*da/shwôm dyikwâ-filáwa ké dyicáng* ne onyin-bakút-ólif ké kaatyu*. Me m/bê ekwón ebasá nyín n-yip n-jâ ne nyǐ ké byise n-da-rám kaǎnyín-byiryíng ńké me ne wǎn ejí byidaryí. Byiryíng ámbyi byi-chi i nryî esim-byiryíng eten, kyi-fím ányi byi/chi byi-kûrí esong ésong tete byi-kpú.

¹³ Elája o-sét ǎ o/fu, *dakérê*. Ca kashú ne byiryíng eyên erám. Nké bwóp kashú kpá a-bîi kaarim-berêt kaǎníngéníngê ké byěm ámbyi a-ba-kye mě, a-rám kâng ḿbyí áku ḿbyí wo ne wǎn eyên badaryí.

¹⁴ Ké nǎ, nyín něen ejá nyí Óburúkpâbí mú Osówo-Ézerel mu o-raa ng, o/fu, dyicáng ándyi dii*ba/chi dyi-man ne filáwa* nang kaatyu ánke to kaa*ba/chi ka-man ne bakút* ne dyicí ńdyí me Óburúkpâbí ndatwóm omu dyi-fyi*.

¹⁵ Onyǐnkú ámu o-dim o-da-chi wǎ eringe Elája o/sét ǎ, ne mbé ashí amúmú ba/kyú ne byiryíng ḿbyí byi/kwárê kámbé ké ací chwóó.

¹⁶ Wǎ eringe nyí Óburúkpâbí oo/ryí ocím ké ocím mú Elája, dyicáng ándyi filáwa o*da/tigi o-man ké kafâ* nang kaatyu ánke to bakút ba*da/man ké nké*.

¹⁷ Ké nkéré mú kaa/rí, wǎn-onyǐnkú ámu o-ba-róng orwôm. Orwôm o-yángê e o-câ, ne ké nkuli kyikû, wǎn ámu o-ba-kpú.

¹⁸ Onyǐnkú ámu o-bí Elája o/fu, onet-Osówo, ebóng ne wo a-chi mě ńkyín. Wo a/bê nyín eringe adazîim Osówo kyi-kim ne byibî ejí dí, kyi-fím ányi a-chi wǎn ejí o-kpú dí.

¹⁹ Elája o-raa ne nyǐ o/fu, kye mě wǎn ámu. O-koo ǎ wǎn ké abwô, o-yú o-jâ ne nyǐ kyíbóng-enyóng ké nfût mú mu o-kyú u, o-ren ǎ ké karíng.

²⁰ O-fé nshwam ne ejá kyíbóng kyíbóng kâng o/fu, ô Óburúkpâbí mú Osówo ejí, ebóng ńkyí wo aa/chi onyǐnkú mún dyizong-kyibî-chwǒm ńkyín. Nyǐ mu o-cángê e dyityém ne me kanong kanong, o-nen n mě, ne kántîk wo aa/ju ǎ wǎn-onyinchéng.

²¹ Elája o-nabe kâng o-cít wǎn ámu ké byiko kampén kachât, o-fé nshwam o/fu, ô Óburúkpâbí mú Osówo ejí, chi wǎn mún o-jwóbê.

²² Óburúkpâbí o-faa nshwam mú Elája o/fé éné. Wǎn ámu o-chîkpet eshû kiǐnjáng, ne o-jwóbê.

²³ Elája o-yip ǎ o-shû kyísí o-ba-kye boné, o-raa ne nyǐ o/fu, dǐi, wǎn eyên oo/jwóbê.

²⁴ Mú onyǐnkú ámu o-faa o/fu, kántîk, n-kú n-nyît ng n/fu, wo onet-Osówo, ne n-kú n-nyît ng to n/fu, ké ntûntû, Óburúkpâbí mu o-raa ng ké ocím eyên.