1 Kyîng 16 - Bokyi Bible

¹ Óburúkpâbí o/raa ne mkpábé mú odasét byiraa emen, mú odabángê Jéhu, mú wǎn-Hánanyi, o/fu, osét Otu Básha kyitwóm ńkyín o/fu, Otu Básha,

² wo a/mû a*fí onet* nké me n/chi ǒ a-firi onet-dyishí mú banet-Ézerel ḿbé banet ejí. Nké kántîk, wo aa/chi kyibî wǎ Otu Jérobâm, ne aa/chi banet ejí ba-nung ké kyibî. Byibî ebe bii/chi kafâ ka-sa mě,

³ ne ké bubwô ámbu, me n/chi m-man ne wo ne kyikû-banet eyên, wǎ eringe n/chi ne Otu Jérobâm.

⁴ Nang yeě nang yeě mú o/fím ké kyikû eyên nké â o/kpú ké oshê, bubyî bu/chi bu-ryí ǎ, ne nang yeě nké o/kpú ké dyikán, biinfuu akun byi/chi byi-ryí ǎ.

⁵ Nang ebóng chwǒm kyikíri ńkyí Otu Básha o/chi ne kángkáng bukân emen, ba/sáng kámbyí ké Nwet-Akpen mú Batu-Ézerel.

⁶ Otu Básha o/kpú ba-ryii ǎ ké Tyíza, ne wǎn emen Éla o-kúng kakyúng emen wǎ otu.

⁷ Kyitwóm ánkyi ńkyí kyi/fím ne Óburúkpâbí, ńkyí kyi/kim ne Otu Básha ne kyikû-banet emen, Jéhu mú mkpábé mú odasét byiraa-Osówo nké o/sét kánkyí, ké bubwô-byibî ḿbyí Otu Básha o/chi o-bât Óburúkpâbí. Nyǐ o/chi kafâ ka-ruu Óburúkpâbí, *chí ké bubwô ḿbú byibî ḿbyí nyǐ o/chi nké nke* wǎ eringe Otu Jérobâm o/mû o/chi ne nyǐ to o-kûchi* nké nkyi to ké bubwô ḿbú nyǐ o/ju kángkáng banet ḿbé ba/fím ké kyikû-banet ńkyí Otu Jérobâm.

Otu Éla mú Ézerel

⁸ Ké aje bujam esim nyâchât nyí Otu Ása o/mû otu mú Júda, Éla mú wǎn-Otu Básha o/ryí butu ḿbú Ézerel, ne nyǐ o/kyú otu ké Tyíza ké aje afee.

⁹ Zímiryi mú o/mû onet-dyishí-basúja emen, mú o/mû o-tún n kyicê-bamútu Otu Éla ḿbé bubyî-orá budatut, o/bírî byití ne Otu Éla. Dyicí dyibónge, Otu Éla bato ba/mû ba-kú ba-bâ ǎ ebabwóm ké kyise ńkyí Áraza, mú o/mû onet-dyishí mú kyibám-butu, ké Tyíza.

¹⁰ Zímiryi o-nung ké kyise ánkyi o-níbî Otu Éla o-ju, o-koo kakyúng emen wǎ otu. Ńkyín kyi/chi nkéré mú Otu Ása mú otu-Júda oo/rí ké butu aje bujam esim káchâtkányi.

¹¹ Nkéré mú Otu Zímiryi o-koo ng butu o-bâ, nyǐ o/ju kángkáng banet ḿbé ba/fím ké kyikû ńkyí Otu Básha. Wǎn-boné emen mú onyinchéng nang orá ne kángkáng bacín emen, ba/ju kámbé.

¹² Ne ké bubwô ḿbún, wǎ eringe nyí Óburúkpâbí o/mû o/sét kyi-kim ne Otu Básha, ké ocím mú mkpábé mú odasét byiraa-Osówo, mú odabángê Jéhu, Otu Zímiryi o/ju kángkáng banet ḿbé ba/fím ké kyikû ńkyí Otu Básha.

¹³ Ké bubwô ḿbú mbé ba/sháng bakye, ne ké bubwô ḿbú mbé ba/chi banet-Ézerel ba-nung ké byibî, Otu Básha ne wǎn emen Otu Éla ba/chi kafâ ka-ruu Óburúkpâbí mú Osówo-Ézerel.

¹⁴ Nang ebóng chwǒm kyikíri ńkyí Otu Éla o/chi, ba/sáng kánkyí ké Nwet-Akpen mú Batu-Ézerel.

Otu Zímiryi mú Ézerel

¹⁵ Ké aje bujam esim káchâtkányi, ńdyí Otu Ása o/mû otu mú Júda, Otu Zímiryi o/kyú otu mú Ézerel ké Tyíza, ké ací káchâtkányi. Basúja-Ézerel ba/mû mbe ba-wâng ng oshê mú badakó Gyíbeton, mú mu ké esí nyí Fyilíta,

¹⁶ ne ńdyí mbé ba/jwo ba/fu, Otu Zímiryi oo/bírî byití ne Otu Éla, o-ju ǎ, mbé kâng ba/kúng butu ba-kye Ómiryi mú nnyân byití ebe o-firi otu mú Ézerel.

¹⁷ Otu Ómiryi ne basúja emen ba-dim ké Gyíbeton ba-da-wâng Tyíza ba-fé ké kafâ.

¹⁸ Nkéré mú Otu Zímiryi o/ri o/fu, oshê-Tyíza oo/róng, o-dim o-da-nung ké nfût mú ké kyibám-butu mú ké kafâ ké kafâ, mú shwaneshwane, o-fé okwâ ké nkyí, o-kpú áku ké bumang-okwâ.

¹⁹ Ńkyín kyi/chi ké bubwô-byibî ḿbyí o/chi o-bât Óburúkpâbí. Wǎ eringe nyí Otu Jérobâm mú nyǐ o/kúng kakyúng-butu emen, nyǐ o/chi ka-sa Óburúkpâbí dyityém ké bubwô-byibî ḿbyí emen nyǐ oyén, ne ké ochi mú nyǐ o/chi banet-Ézerel ba-nung ké byibî.

²⁰ Nang ebóng chwǒm kyikíri ńkyí nyǐ o/chi, cibicibi ne eringe nyí nyǐ o/nam byití ne Otu Éla, ba/sáng kámbyí ké Nwet-Akpen mú Batu ḿbé Ézerel.

Otu Ómiryi mú Ézerel

²¹ Banet-Ézerel ba/mû ba/kyii barî. Bakíri ba/mû mbe ba-ryuu ng ba/fu, mbé ba-kúng ng Tyíbyinyi mú wǎn-Gyínat butu, ne ḿbé áku ba/mû ké kyicê ńkyí Ómiryi.

²² Ké nkuli kyikû, ḿbé ké kyicê ńkyí Ómiryi nké ba/kpógê. Tyíbyinyi o-kpú, Ómiryi o-firi otu.

²³ Ne ké bubwô ámbu, nkéré Otu Ása mú otu-Júda oo/kyú otu ké aje bujam esim diǐkpú ne din, Otu Ómiryi o-firi otu mú Ézerel, ne nyǐ o/kyú otu ké aje diǐkpú ne afee. Ké bambwôp kashú-aje nyâchât, nyǐ o/kyú otu ké Tyíza,

²⁴ ne o-ré kâng kaku ńké Samérya ké égot-byikim-syílyíba bujam esim diǐkpú ne onyinchéng obónge mú odabángê Shéme. Otu Ómiryi o-bi ekpe nyí shwaneshwane o-wáp kaku ánke o-fé ké kafâ, o-bi oshê áku, o-fé kámú dyizîn Samérya, dyizîn ándyi dyi/kim ne Shéme mú o/mû oyén-kaku ánke.

²⁵ Otu Ómiryi o/chi byibî o-bât Óburúkpâbí o-shwôm batu ḿbé kpákpá.

²⁶ Wǎ eringe nyí Otu Jérobâm mú o/mû otu, nyǐ o/chi kafâ ka-bírî Óburúkpâbí mú Osówo-Ézerel, ké byibî emen ne ké ochi mú nyǐ o/chi banet-Ézerel ba-nung ké byibî ne ké bakye esháng.

²⁷ Nang ebóng chwǒm kyikíri ńkyí nyǐ o/chi, ne kángkáng bǎmkpóngé emen, ba/sáng kámbyí ké Nwet-Akpen mú Batu ḿbé Ézerel.

²⁸ Otu Ómiryi o/kpú ba-ryii ǎ ké Samérya, ne wǎn emen Éhap o-kúng kakyúng emen wǎ otu.

Otu Éhap mú Ézerel

²⁹ Ké aje bujam esim onyiryiká ne achât, ńdyí Otu Ása mu otu mú Júda, Éhap mú wǎn-Otu Ómiryi o/ryí butu ḿbú Ézerel, ne nyǐ o/kyú otu ké Samérya ké aje bujam esim afee.

³⁰ Nyǐ o/chi byibî o-bât Óburúkpâbí o-shwôm otu nang orá mú kpákpá.

³¹ Nyǐ kyi*da ǎ ekwárê ńkyí o/chi byibî wǎ Otu Jérobâm*. Nyǐ o/chi kyi-shwôm éné, ńkyí o/bé Jézébel mú wǎn-Otu Étyibal, mú o/fím Sádon, o-kye bukye ḿbú badakó Bâl ofê.

³² O-bi kyise-kyifen echi ké Samérya o-fé Bâl, o-chi kyikit-kyifen echi o-tî ǎ, o-yip kánkyí o-tî ké kyise ánkyi.

³³ O-tî to orím-bukye-osówo-onyinyi mú badakó Ashéra. O-chi kyi-jê kyi-shwôm éné ńkyí kyi/sa Óburúkpâbí mú Osówo-Ézerel kafâ, kyi-shwôm ńkyí kángkáng batu-Ézerel ḿbé kpákpá.

³⁴ Ké nkéré mú nyǐ mu otu, Hyêl mú o/fím Bétel o/bwât Jéríku o-bi. Wǎ eringe nyí Óburúkpâbí o/mû oo/sét ké ocím mú Jóshwa, mú wǎn-Nûn, Ábyíram mú ókpá-wǎn-Hyêl o/kpú, ńdyí nyǐ o/bi kyikû-ekpe nyí Jéríku, ne wǎn emen to mú wǎsíng o-kpú, mú odabángê Ségup, ńdyí nyǐ o/bi afyi-oshê.