1 Kyîng 15 - Bokyi Bible

Otu Abyíja mú Júda

¹ Ké aje onyiryiká ne achât, ńdyí Otu Jérobâm o/mû otu mú Ézerel, Otu Abyíja o/ryí butu ḿbú Júda,

² ne nyǐ o/kyú otu ké Jerúsélem ké aje achât. Boné emen o/mû o-bángê e Máka, mú wǎn-Abyísálam.

³ Nyǐ o/chi byibî to wǎ eringe bonchí emen Otu Ryíhobâm o/mû o/chi, ne nyǐ o/mû o*fí o-kyâ Óburúkpâbí mú Osówo emen ofê ne dyityém emen kángkáng* wǎ eringe Otu Dívit mú bonchí-bonchí emen o/mû o-kyâ*.

⁴ Nké ké bubwô ḿbú Otu Dívit, Óburúkpâbí mú Osówo emen o/kye ǎ wǎn-onyinchéng mú o/kyú to otu ké Jerúsélem ńdyí nyǐ oo/kpú, o-bám to Jerúsélem.

⁵ Óburúkpâbí o/chi ńkyín, ké nǎ, Otu Dívit o/chi ńkyí kyi/nyîn ǎ, ne o*da/né echi ńkyí nyǐ o/sét ǎ nang kabónge* kyi*da/shwôm kyi-kim ne Oráya mú o/fím Hyítat*.

⁶ Otu [Abyíja] ne Otu Jérobâm ba/mû mbe ba-nwa ng byití ne barî kángkáng nkéré, ké nkéré omúmú mú Otu Abyíja o/mû otu.

⁷ Ne nang ebóng chwǒm kyikíri ńkyí Otu Abyíja o/chi, ba/sáng kámbyí ké Nwet-Akpen mú Batu-Júda.

⁸ Otu Abyíja o/kpú ba-ryii ǎ ké oshê-Otu Dívit, ne Ása mú wǎn emen o-kúng kakyúng emen wǎ otu.

Otu Ása mú Júda

⁹ Ké aje bujam ńdyí Otu Jérobâm o/mû otu mú Ézerel, Ása o/ryí butu ké Júda,

¹⁰ ne nyǐ o/kyú otu mú Jerúsélem ké bajam-aje bafee esim-dyije dyibónge. Boné emen mú kánkán o/mû o-bángê e Máka, mú wǎn-Abyísálam.

¹¹ Otu Ása o/chi ńkyí kyi/nyîn Óburúkpâbí dyityém, wǎ eringe nyí Otu Dívit mú bonchí emen mú kpákpá o/mû o/chi.

¹² Nyǐ o/ró kángkáng banyinchéng ne banyinyi ké oshê, ḿbé ba/mû ba-chi i bǎmkpóngé ḿbé dyikpe eryí ké biinchéng-bakye ne o/fîm to kángkáng erím-bakye nyí bonchí emen o/mû o/mee.

¹³ O-fîm to Máka mú boné-boné emen ké kakyúng-butu emen, ké nǎ, mú mǔ o/chi kiinunut-orím-bukye-bufwon mú osówo-onyinyi, mú badakó Ashéra. Otu Ása o-bên orím-bukye ámu o-shí kámú ké ndege-esí mú Kyídoron.

¹⁴ Nang ké Otu Ása o*da/bên kángkáng biinchéng-bakye* nyǐ o/fé dyityém ne Óburúkpâbí kángkáng nkéré ké kángkáng dyikpen emen.

¹⁵ O-yip kángkáng byěm ḿbyí bonchí emen o/mû oo/kye Óburúkpâbí o-tî ké kiǐtí-kyise-kyifen-Osówo echi, cibicibi ne gûl ne syílyíba, ḿbyí nyǐ oyén o/kye Óburúkpâbí.

¹⁶ Otu Ása mú otu-Júda ne Otu Básha mú otu-Ézerel ba/mû mbe ba-nwa ng byití ne barî kángkáng nkéré ńdyí ba/mû batu.

¹⁷ Otu Básha o-byí Júda byití, o-kpet ekpe ebi nyí odawâng oshê-Ríma o-fé ké kafâ eringe nyí oo*bángê to banet ba-kûnung ké Júda ba-byí i*.

¹⁸ Otu Ása o-yip kâng kángkáng syílyíba ne gûl ḿbyí byi/mû byi/waa ké kiǐtí-kyise-kyifen-Osówo echi ne ké kyibám-butu o-kye banet-ashí-bǎmkpóngé emen ba-jâ ne mbyí Damásákus, ba-da-kye Otu Benhádat mú o/fím Syírya, mú wǎn-Tâp-Ryímon, mú wǎn-wǎn-Hézon, o-sét ǎ ejá ńnyín o/fu,

¹⁹ mîng byi-cibi ne barî wǎ eringe banchí eten ba/mû ba/cibi. Syílyíba mún ne gûl ányi eyáré eyên. Bên kyikwáré eyên ne Otu Básha mú otu-Ézerel, eringe nyí nyǐ odafîm basúja emen ké esí ejí.

²⁰ Otu Benhádat o-bángê ne ńkyí Otu Ása o/fu, o-twóm kâng bannyân byití emen ne basúja ebe ba-da-kye eshê-Ézerel bunwa. Ba-koo Éjon ne Dǎn ne Ébel-Bét-Máka, esí nyí nyi fáráng ne baya ḿbé Gályílyi, ba-koo to esí nyí Nafatályi emúmú.

²¹ Nkéré mú Otu Básha o/jwo ńkyí kyi/chi, o-mîng ekpe ányi ebi ké Ríma, o-dim o-wâa Tyíza.

²² Otu Ása kâng o-twóm ejá ké eshê-Júda emúmú o/fu, nang yeě nang yeě ochwáp ba-da-kúng aká ne byichí ḿbyí Otu Básha o/mû o-kúng ng ne o-bi ng ekpe nyí ké Ríma. Otu Ása o-yip byěm ámbyi o-bi ekpe nyí e/wâng Myízipa ne Géba e-fé ké kafâ. Oshê mú Géba mu ké esí nyí Běnjámin.

²³ Nang ebóng chwǒm kyikíri ńkyí Otu Ása o/chi, byěm-bukân emen ne eshê nyí nyǐ o/bi ekpe o-wâng kányí o-fé ké kafâ, ba/sáng kámbyí kángkáng ké Nwet-Akpen mú Batu-Júda. Nké nkéré mú nyǐ oo/kâa, kyiká emen kyi/nyîim, ké orwôm-kyiká mú o/kám ǎ.

²⁴ Otu Ása o/kpú ba-ryii ǎ ké dyikun ńdyí kyikû-batu, ké oshê-Otu Dívit, ne wǎn emen Jehósháfat o-kúng kakyúng emen wǎ otu.

Otu Nádap mú Ézerel

²⁵ Ké nnyinyěng-dyije mú Otu Ása o/mû otu mú Júda, wǎn-Otu Jérobâm mú odabángê Nádap o/ryí butu ḿbú Ézerel, ne nyǐ o/kyú wǎ otu ké aje afee.

²⁶ Wǎ eringe nyí bonchí emen o/mû, nyǐ o/chi kyibî ké bushú ḿbú Óburúkpâbí, o-chi banet-Ézerel ba-chi kyibî.

²⁷ Básha mú wǎn-Ahíja, mú o/fím ké kyikû-banet ńkyí Ézaka o/nam Otu Nádap dyiju. Ne o/ju ǎ ńdyí Otu Nádap ne basúja emen ba/mû mbe ba-koo ng oshê mú Gyíbeton, ké esí nyí banet ḿbé Fyilíta.

²⁸ Ńkyín kyi/chi ńdyí Otu Ása mú Júda oo/rí ké butu ké aje achât. Ne Básha o-koo kâng kakyúng-butu ńké Otu Nádap wǎ otu mú Ézerel.

²⁹ O-waa owǎng ányi o-kpet eju kángkáng banet ḿbé ba/fím ké kyikû ńkyí Otu Jérobâm. Wǎ eringe nyí ńkyí Óburúkpâbí o/raa ké ocím mú ḿgbán emen mú mkpábé mú odasét byiraa emen, mú odabángê Ahíja, mú o/fím Shílo, kyidakyú ntûntû, kángkáng banet ḿbé ba/fím ké kyikû ńkyí Otu Jérobâm ba/ju kámbé, nang onet o*da/waa*.

³⁰ Ńkyín kyi/chi, ké nǎ, Otu Jérobâm o/chi kafâ ka-ruu Óburúkpâbí mú Osówo mú Ézerel, ké byibî ḿbyí nyǐ o/chi, ké bubwô ḿbú nyǐ o/chi Ézerel e-chi kyibî.

³¹ Nang ebóng chwǒm kyikíri ńkyí Otu Nádap o/chi, ba/sáng kámbyí ké Nwet-Akpen mú Batu ḿbé Ézerel.

³² Otu Ása mú otu-Júda ne Otu Básha mú otu-Ézerel ba/mû mbe ba-nwa ng byití ne barî kángkáng nkéré ńdyí mbé ba/mû batu.

Otu Básha mú Ézerel

³³ Ké aje achât, ńdyí Otu Ása o/mû otu mú Júda, Básha mú wǎn-Ahíja o/ryí butu ḿbú Ézerel emúmú, ne nyǐ o/kyú wǎ otu ké Tyíza ké aje bujam ne anyii.

³⁴ Wǎ eringe nyí Otu Jérobâm mú o/ryí butu ne nyǐ o-kûryí, nyǐ o/chi to kyibî o-bât Óburúkpâbí, o-chi banet-Ézerel ba-nung ké kyibî.