1 Kyîng 14 - Bokyi Bible

Wǎn-Otu Jérobâm o/kpú

¹ Ké nkéré ámu, wǎn-Otu Jérobâm mú onyinchéng, mú odabángê Abyíja o/róng orwôm.

² Otu Jérobâm o-raa ne onyi emen o/fu, yángê byiko eyên eringe onet nang obónge oo*cêe ǒ* a-ca Shílo, kyikit ńkyí Ahíja mú mkpábé mú odasét byiraa-Osówo mu o-kyú u, mú o/fu, me n/chi n-kyú otu mú Ézerel.

³ Yip byirim-berêt diǐkpú ne bakye ne otyu-bakút-bukwan a-ca ǎ ne mbyí. Bí ǎ kyi-kim ne chwǒm ńkyí nkyi kyi-bâ ebachi wǎn ejí, ne nyǐ o/chi o-sét ǒ.

⁴ Nyǐ o-dim kâng o-ca kyikit-Ahíja, ké Shílo. Bukâa boo/sé Ahíja achi.

⁵ Óburúkpâbí o/mû oo/sét Ahíja o/fu, onyi-Otu Jérobâm mu o-bâ ǒ ebabí kyi-kim ne wǎn emen mú mu o-rwôm m. Ne Óburúkpâbí o-sét Ahíja ńkyí o/chi o-raa. Nkéré mú onyi-Otu Jérobâm o/ribi, nyǐ o/nîm Ahíja o/fu, nyǐ o-chi i onet okíri.

⁶ Nké nkéré mú Ahíja o/jwo ǎ mu o-bâ ké dyifyi, nyǐ o/faa o/fu, bâ ké kafâ. Me mu n-nyît ng n/fu, wo a-chi i onyi-Otu Jérobâm. Ebóng amu a-nîm m mě a/fu, wo a-chi i onet okíri. Me mu ne kyibî-kyiraa ńkyí nda ǒ esét.

⁷ Ca a-da-sét Otu Jérobâm a/fu, nyín něen ńkyí Óburúkpâbí mú Osówo-Ézerel mu o-raa ng ne nyǐ, o/fu, me n/cá ǒ wo ké burwám-banet n-chi ǒ a-firi otu mú banet-Ézerel ḿbé banet ejí.

⁸ Me n/koo butu ne banet ḿbé ba/fím ké kyikû-Otu Dívit n-kye ǒ wo. Nké wo a*da/kyú ne wǎ Otu Dívit mú ḿgbán ejí* mú o/mû o-kyâ mě ofê ne dyityém dyibónge* mú o/jwo ńkyí n/sét ǎ* o-chi to ńkyí kyida mě enyîn nké nke*.

⁹ Wo aa/chi byibî byi-jê byi-shwôm ḿbyí banet ḿbé ba/mû batu kpáá ne wo a-firi. Wo aa/né mě, ne wo aa/chi kafâ ka-sa mě ké erím-bakye nyí wo a/chi ba-kûkye kányí ofê.

¹⁰ Ké bubwô ḿbún, me n/chi m-bâ ne busông ké kyikû-banet eyên, ne n/chi n-ju kángkáng bwǎn-banyinchéng ḿbé ba/fím ké kyikû-banet eyên, [byisat ne bakâa] cibicibi. Me n/chi m-man ne kyikû-banet eyên, ba/chi ba-jwoo kámbé wǎ abîng.

¹¹ Nang yeě mú o/fím ké kyikû eyên nké o/kpú ké oshê, bubyî bu/chi bu-ryí ǎ, ne nang yeě to nké o/kpú kyíjí, biinfuu akun byi/chi byi-ryí ǎ. Me Óburúkpâbí nké n/raa.

¹² Ne Ahíja o-ca kashú o-raa ne onyi-Otu Jérobâm o/fu, bwa dyijê kâng, Â a-ribi ng a-câ ké byise, wǎn eyên ámu o/chi o-kpú.

¹³ Kángkáng banet-Ézerel ba/chi ba-tii ǎ ba-ryii ǎ. Nyǐ kǎnchí nké o/chi o-kyú onet mú o/fím ké kyikû-Otu Jérobâm, mú ba/chi ba-ryii ǎ kanong, ké nǎ, nyǐ nké nke nké dyityém ndyi dyi-nyîn n Óburúkpâbí mú Osówo-Ézerel ne nyǐ.

¹⁴ Óburúkpâbí o/chi o-tî otu ké Ézerel mú o/chi o-chi kyikû-banet-Otu Jérobâm kyi-man.

¹⁵ Óburúkpâbí o/chi o-kye Ézerel busông, ne e/chi e-ninge dyishí wǎ kiǐbyâa ńkyí nkyi ké kace. Nyǐ o/chi o-zú Ézerel ké esí ńnyín nyí enong enong, nyí nyǐ o/kye banchí ebe ḿbé kpákpá, ne nyǐ o/chi o-pwó kámbé byiryibyiryi ké esim-kace-Yuférétyis nyí áku, ké nǎ, mbé baa/chi kafâ ka-sa ǎ ké ochi mú ba/chi erím-bakye-onyinyi nyí badakó Ashéra.

¹⁶ Óburúkpâbí o/chi o-mîng Ézerel, ké nǎ, Otu Jérobâm o/chi kyibî o-tông banet-Ézerel kiǐfáng ba-nung ké kyibî.

¹⁷ Onyi-Otu Jérobâm o-bwa dyijê ké Tyíza. O-nung ng ké byise o-câ, wǎn ámu o-kpú.

¹⁸ Banet-Ézerel ba-tii ǎ, ba-ryii ǎ, wǎ eringe nyí Óburúkpâbí o/raa ké ocím mú Ahíja mú mkpábé, mú ḿgbán emen.

Otu Jérobâm o/kpú

¹⁹ Nang ebóng chwǒm kyikíri ńkyí Otu Jérobâm o/chi, byití ḿbyí nyǐ o/nwa ne eringe o/mû o-tún n banet emen, ba/sáng kámbyí kyísí kángkáng ké Nwet-Akpen mú Batu ḿbé Ézerel.

²⁰ Otu Jérobâm o/kyú wǎ otu ké aje bujam esim afee. O-kpú ba-ryii ǎ, ne wǎn emen Nádap o-kúng kakyúng emen wǎ otu.

Otu Ryíhobâm mú o/fím Júda

²¹ Otu Ryíhobâm mú wǎn-Otu Sólómon o/rí bajam-aje bafee ne ba-kúng ǎ otu mú Júda, ne nyǐ o/kyú wǎ otu ké Jerúsélem ké aje onyiryiká ne afee, oshê mú Óburúkpâbí oo/cá ké kángkáng esí-Ézerel wǎ kyikit ńkyí bada ǎ ekûkye ofê. Boné-Otu Ryíhobâm o/mû o-bángê e Náma, nyǐ o/mû o/fím Ámon.

²² Banet-Júda ba/chi kyibî ké bushú ḿbú Óburúkpâbí, ne ba/chi kyi-jê ńkyí kafâ ka/bírî Óburúkpâbí ne mbé, kyi-shwôm ńkyí kángkáng banchí ebe ḿbé kpákpá ba/mû ba/chi.

²³ Mbé ba/bi byikit-ofê ekye ba-tî erím-bakye, ba-bi aká-ociring ne ekap-orím-bukye-onyinyi mú badakó Ashéra, ké eku ne ké asi-byichí, eringe bada ǎ ekûkye ofê.

²⁴ Ńkyí kyi/bên kyi-shwôm nkyi něen, banyinchéng ne banyinyi ba/mû kô ḿbé mbe ba-chi i bǎmkpóngé-dyikpe eryí ké byikit-bakye ámbyi ḿbyí mbe ba-kyâ kámbé ofê. Banet-Júda ba/chi kángkáng azong-byěm-éshwân nyí banet ḿbé Óburúkpâbí oo/ró kámbé ba-byí ké esí, ńdyí banet-Ézerel mbe ba-tín n ba-bâ ké esí nyí Ézerel.

²⁵ Nkéré mú Otu Ryíhobâm oo/kyú otu ké aje atánge, Otu Shíshak mú Éjip o/kye Jerúsélem bunwa.

²⁶ O-wuri kángkáng byěm ḿbyí byinong byinong, ḿbyí byi/mû ké kiǐtí-kyise-kyifen-Osówo echi, ne ḿbyí ké kyibám-butu, cibicibi ne édem nyí Otu Sólómon o/chi ké gûl.

²⁷ Otu Ryíhobâm o-chi édem ekíri ké biǐré ḿbyí borôn o-kye banet-ashí-basúja ḿbé mbe ba-bám m afyi nyí kyibám-butu.

²⁸ Nang nkéré orá nké Otu Ryíhobâm o/ce ké kiǐtí-kyise-kyifen-Osówo echi, banet ḿbé mbe ba-bám m ǎ ba-kúng ng édem ányi ba-ca ne nyǐ, ne ba-bwa esim ne nyǐ ba-da-tî ké nfût mú mbe ba-bám m.

²⁹ Nang ebóng chwǒm kyikíri ńkyí Otu Ryíhobâm o/chi, ba/sáng kámbyí ké Nwet-Akpen mú Batu-Júda.

³⁰ Ké kángkáng bankéré ámbe, Otu Ryíhobâm ne Otu Jérobâm ba/mû ba-nwa ng byití ne barî.

³¹ Otu Ryíhobâm o-kpú ba-ryii ǎ ké dyikun ńdyí kyikû-butu, ké oshê-Otu Dívit, ne Abyíja mú wǎn emen o-koo kakyúng emen wǎ otu.