1 Kyîng 13 - Bokyi Bible

¹ Wǎ eringe nyí Óburúkpâbí o/sét, mkpábé mú odasét byiraa-Osówo o/fím ké Júda o-ca Bétel, ne nyǐ o/ribi áku ké ochíchí-nkéré mú Otu Jérobâm o/bwom ké kyikit-kyifen echi mu o-chi i kyifen.

² Wǎ eringe nyí Óburúkpâbí o/sét, mkpábé ámu o/shú kyikit-kyifen echi ánkyi wááng o/fu, ô kyikit-kyifen echi, ô kyikit-kyifen echi. Nyín něen ńkyí Óburúkpâbí mu o-raa ng, o/fu, ba/chi ba-fwon wǎn mú odabángê Josáya, ké kyikû-banet ńkyí Otu Dívit. Nyǐ o/chi o-ju ǒ banchi byifen ḿbé mbe ba-chi i byifen ké byikit-kyifen-bakye echi eyên, ne nyǐ o/chi o-shí ǒ byikúú-banet.

³ Ne mkpábé ámu o-chîraa o-ca kashú o/fu, kyikit-kyifen echi ńkyín kyi/chi kyi-myii, ne atông nyí nyi ké nkyí a/chi a-pwôo jaajaa. Kyi-fím ányi kâng, ben ba/chi ba-nyît ba/fu, Óburúkpâbí nké o/raa ké ocím ejí.

⁴ Nkéré mú Otu Jérobâm o/jwo ńkyín, o-tông ǎ kafwa o-kye busa o/fu, kám m̂ onyinchéng ámu. Bubwô-otu ámu bu-waa ányi bu-kpú, kyi-fím ányi o*fí to o-man n enyîim kámbú*.

⁵ Kyikit-kyifen echi ánkyi kyi-waa ányi kyi-myii, atông a-pwôo jaajaa ké ecing, wǎ eringe nyí mkpábé ámu o/sét ké dyizîn ńdyí Óburúkpâbí.

⁶ Otu Jérobâm o-raa ne mkpábé ámu o/fu, kamgbe, fé nshwam a-kye Óburúkpâbí mú Osówo eyên ké bubwô ejí, a-bí ǎ a/fu, bubwô ejí buchîfiri kanong. Mkpábé ámu o-fé nshwam o-kye Óburúkpâbí, ne bubwô-Otu Jérobâm bu-chîfiri kanong.

⁷ Otu ámu o-raa kâng ne mkpábé ámu o/fu, bâ byi-dim ké kyise ejí a-da-ryí byiryíng. Me n/chi n-kye ǒ eyáré ké ńkyí wo aa/chi.

⁸ Mkpábé ámu o-faa o/fu, nang a-kyii efang eyên nyí a/fang ké jangjang kafee a-kye mě, me mm*ba/chi n-ca ne wo* n-ryí nang byiryíng* n-jwáp nang chwǒm ne wo*.

⁹ Óburúkpâbí oo/sét mě o/fu, me n*dachi n-ryí byiryíng* n-jwáp nang chwǒm* ne n*dachi m-bwa to esim dyijê ké kiǐfáng ńkyí m/mû n/cen*.

¹⁰ Ne nyǐ o*da/bwa esim kâng ké kiǐfáng ńkyí o/mû o/cen* nké o/cen ké kiǐfáng kyikíri.

Mkpábé mú Kánkán, mú mu o-kyú u ké Bétel

¹¹ Ké nkéré ámu, mkpábé mú kánkán obónge o/mû mu o-kyú u ké Bétel. [Bwǎn] emen ḿbé banyinchéng ba/ba ǎ esét ńkyí mkpábé mú o/fím Júda o/bachi ké Bétel dyicí ándyi, ne ńkyí o/raa to ne Otu Jérobâm.

¹² Mkpábé ámu o-bí bwǎn emen ámbe o/fu, nyǐ o/jé kiǐfáng kyirá ńdyí o/dim. [Ba-tông ǎ] kiǐfáng ánkyi,

¹³ o-sét kámbé o/fu, yip n̂g kakyúng ba-twôom kaanyam-atû ejí ké esim. Mbé ba-chi éné, nyǐ o-yú ké nké o-na ḿbú kiǐfáng ánkyi,

¹⁴ o-ró ng mkpábé ámu o-câ ké kyikû mú o/fím Júda, o-da-ri ǎ ké oo/kyú me ké busi-kyichí ńkyí badakó ôok. O-bí ǎ o/fu, wo a-chi i mkpábé mú odasét byiraa-Osówo mú o/fím Júda? Onyinchéng ámu o-faa ǎ o/fu, me n-chi i nyǐ.

¹⁵ Nyǐ o-sét ǎ o/fu, bâ byi-dim ké kyise ejí a-da-ryí byiryíng ne me.

¹⁶ Nké mkpábé mú o/fím Júda o/faa ǎ o/fu, me mm*man edim ké kyise eyên* m-bángê nang dyinen eyên*. Ne me mm*man eryí n-jwáp nang chwǒm nyín ne wo*

¹⁷ ké nǎ, Óburúkpâbí oo/sét mě o/fu, me n*dachi n-ryí* n-jwáp nang chwǒm* ne me n*dachi m-bwa to esim dyijê ké kiǐfáng ńkyí m/mû n/cen*.

¹⁸ Mkpábé mú kánkán, mú o/fím Bétel o-raa ne nyǐ kâng o/fu, me to n-chi i mkpábé mú odasét byiraa-Osówo wǎ wo, ne Óburúkpâbí oo/sét orím mú onong o/fu, osét mě o/fu, me nkúng ǒ byi-dim ké kyise ejí n-da-nen ǒ. Nké mkpábé mú kánkán ámu o/mû mu o-sét ng kyisédéng.

¹⁹ Mkpábé mú o/fím Júda o-dim kâng dyijê ne mkpábé ámu mú kánkán, o-ryí byiryíng ne nyǐ.

²⁰ Ńdyí mbe ányi ké ókpákpúrúk me, ejá nyí Óburúkpâbí e/byí mkpábé mú kánkán ké ocím,

²¹ ne o-wonge o-kó mkpábé mú o/fím Júda o/fu, Óburúkpâbí mu o-raa ng o/fu, wo a*da ǎ ejwo kyiraa* ne wo a*da/chi to ńkyí nyǐ o/sét ǒ*.

²² Nké wo a/bwa esim a-da-ryí byiryíng ké kyikit ńkyí nyǐ o/sét ǒ o/fu, wo a*dachi a-ryí byiryíng ké nkyí*. Ké bubwô ámbu, wo ba/chi ba-ju ǒ, ne baa*ba/chi ba-ryii kyikwóm eyên ké dyikun ńdyí kyikû-banet eyên*.

²³ Nkéré mú baa/ryí byiryíng kpók, mkpábé mú kánkán ámu o-bwât kakyúng o-bwá kaanyam-atû ké esim, ńké mkpábé mú o/fím Júda odakyú ké nké,

²⁴ o-yú o-dim. Ńdyí mu o-cen n o-câ ké bukwóp, ekpang e/kwárê ne nyǐ, e-ju ǎ. Kyikwóm emen kyi-waa ányi ké ndûm, kaanyam-atû ne ekpang ányi byi-bwom ányi ké nkyí.

²⁵ Banet ba-shwôm ányi, ba-ri kyikwóm emen ké ndûm, ne ekpang nyí e/bwom ányi. Ba-shwôm ba-nung Bétel, ba-sét ńkyí mbé ba/ri.

²⁶ Nkéré mú mkpábé mú kánkán ámu o/jwo kyi-kim ne nkyí, o-raa o/fu, mú mǔ o-chi i mkpábé ámu mú o/né echi ńkyí Óburúkpâbí o/sét ǎ. Ne ké bubwô ámbu, Óburúkpâbí o/twóm ekpang o/fu, ekye ǎ bunwa e-ju ǎ, wǎ eringe nyí Óburúkpâbí o/mû o/raa o/fu, nyǐ o-chi i.

²⁷ Ne o-raa kâng ne bwǎn emen o/fu, bwât n̂g kaanyam-atû ejí ba-tî. Ba-chi éné,

²⁸ o-yú kâng o-dim, o-da-ri kyikwóm enen sáre ányi ké ndûm, ne kaanyam-atû ne ekpang byi/tôong ányi cip. Ekpang ányi e*da/ryí kyikwóm emen* e-kye nang kaanyam-atû bunwa*.

²⁹ Mkpábé mú kánkán ámu o-yip kyikwóm emen o-twôom ké kaanyam-atû, o-bwa esim ne nkyí ké Bétel eringe oda ǎ etii, o-ryii ǎ.

³⁰ O/ryii ǎ ké dyikun ńdyí kyikû-banet emen, ne nyǐ ne bwǎn emen ba/tii ǎ ba/fu, ô wǎn-boné eten, ô wǎn-boné eten.

³¹ Ńdyí baa/ryii ǎ, mkpábé mú kánkán ámu o/sét bwǎn emen o/fu, â m/kpú, ryii n̂g mě ké dyikun ńdyín, ne ren n̂ kyikwóm ejí fáráng ne ńkyí emen.

³² Ejá nyí nyǐ o/raa ké ńkyí Óburúkpâbí o/sét ǎ kyi-kim ne kyikit-kyifen-Osówo echi ńkyí ké Bétel ne kyi-kim to ne kángkáng byise-byifen echi ḿbyí ké eshê-Samérya e/chi e-kyú ntûntû.

Otu Jérobâm o/chi Kiǐtí-Kyibî

³³ Otu Jérobâm mú o/fím Ézerel o*fí o-mîng ng byibî-akwóp emen* nké o/tôong o-cá ng banchi byifen-Osówo ḿbé ba*da/fím ké kyikû-banet ńkyí Lyíva* ba-kûchi bǎmkpóngé ké byikit-kyifen-Osówo echi ḿbyí nyǐ o/bi. Nyǐ mu o-chi i nang yeě mú o/nyîn ǎ o-firi nchi kyifen-Osówo.

³⁴ Kyibî ńkyín kyi/bê ǎ ne dyirîm ne dyibên ńdyí kyikû emen kyimúmú.