1 Kyîng 12 - Bokyi Bible

Banet-Ézerel ḿbé Kyicê ńkyí Bushûyû ba/bírî Bunwa

¹ Otu Ryíhobâm o/dim o-ca Shékem, ké kyikit ńkyí kángkáng banet-Ézerel ḿbé kyicê ńkyí bushûyû ba/bacibi ba/fu, ba-kúng ng ǎ butu.

² Nkéré mú Jérobâm mú wǎn-Nébat, mú o/mû o/chêe Otu Sólómon o-jâ Éjip, o/jwo kiǐshwô ńkyín, nyǐ [o/fím Éjip o-fyi.]

³ Banet-Ézerel ḿbé ba/fím ké kyicê ńkyí bushûyû ba-twóm ba-da-kpî ǎ, ne mbé ashí amúmú ba-dim ba-kâm Otu Ryíhobâm ba-raa ne nyǐ ba/fu,

⁴ bonchí eyên Otu Sólómon o/mû mu o-chi i bě byěm ké busa, ne o/tû bě biimbâng-atû ké dyishí. Â wo a/jwâa bě atû ńnyín, a-chi dyikpen dii*sóng bě to* be byi/chi byi-kyú bǎmgbán eyên ḿbé byida ǒ ekûkye ofê.

⁵ Nyǐ o-faa kámbé o/fu, bwa n̂g esim ací achât, ne me n/chi n-faa běn. Mbé ba-dim kâng.

⁶ Otu Ryíhobâm o-pem ne ḿbé bakínkán, ḿbé ba/mû baa/chi bǎmkpóngé ne bonchí emen Otu Sólómon wǎ banet-bacê emen. O-bí kámbé o/fu, ben bamu ba-ryuu ng ba/fu, me nfaa banet ḿbén nǎ.

⁷ Mbé ba-faa ǎ ba/fu, â wo amu a-ryuu ng a/fu, a-tî ng banet ḿbén kanong, faa kámbé kanong ké ńkyí mbé ba/bí ǒ, ne mbé ba/chi ba-kûchi bǎmkpóngé ne ofê ba-kyâ ǒ kángkáng nkéré.

⁸ Nké nyǐ o/né bacê ḿbé ḿbé bakínkán-banet, o-dim kâng o-kâm ḿbé byisat, ḿbé mbé ba/kán nkéré obónge ne mbé, ḿbé ba/firi banet-bacê emen.

⁹ O-bí kámbé o/fu, ebóng bacê ḿbé ben bada mě eman ekye. Banet ḿbé mbe ba-bí ng mě ba/fu, me nchi atû ebe a-jwâa, me nfaa kámbé nǎ.

¹⁰ Mbé ba-faa ǎ ba/fu, sét kámbé něen a/fu, kafwa-dyígul ejí ka/cîp ka-shwôm osín mú bonchí ejí.

¹¹ A-sét kámbé to a/fu, bonchí ejí o/tû běn biimbâng-atû, me n/chi n-chi atû ányi a-ró běn a-shwôm. Nyǐ o/mín běn ké kachí, nké me n/chi m-mín běn ké ochí-byiwong.

¹² Ké ací achât, Jérobâm ne kángkáng banet ba/bwa esim ba-kâm Otu Ryíhobâm wǎ eringe nyí nyǐ o/mû o/sét kámbé.

¹³ Otu Ryíhobâm o/né bacê ḿbé bakínkán ba/cêe ǎ, o-raa kakânkakân ne banet ámbe,

¹⁴ wǎ eringe nyí ḿbé byisat ba/cêe ǎ. O-raa o/fu, bonchí ejí o/tû běn biimbâng-atû, me n/chi n-chi atû ányi a-ró běn a-shwôm éné. Nyǐ o/mín běn ké kachí, nké me n/chi m-mín běn ké ochí-byiwong.

¹⁵ Ńkyín kyi/chi eringe nyí ńkyí Óburúkpâbí o/mû o/sét mkpábé emen mú odabángê Ahíja, mú o/fím Shílo, o/fu, osét Jérobâm mú wǎn-Nébat, kyidakyú ntûntû. Nkyí nké Otu Ryíhobâm o*da/fwôo atông ké ńkyí banet ámbe ba/bí*.

¹⁶ Nkéré mú banet ámbe ba/ri ba/fu, Otu Ryíhobâm o*fí o-jwo ng kámbé* ba-wonge ba/fu, né n̂g Otu Dívit ne kyikû-banet emen. Mbé baa/chi ebóng ba-kye bě. Banet-Ézerel, byidim m̂ dyijê. Mîng n̂g Otu Ryíhobâm o-bám o-ri. Banet-Ézerel ba-bírî kâng bunwa ne nyǐ,

¹⁷ ba-mîng ǎ wǎ otu mú banet ḿbé mbe ba-kyú u ké esí nyí Júda nké nke.

¹⁸ Otu Ryíhobâm o-twóm kâng Adonyíram mú o/mû onet-dyishí-básóng o/fu, oca kyikit-banet ámbe, nké mbé ba/tím ǎ aká tete o-kpú. Nkéré mú ńkyín kyi/chi, Otu Ryíhobâm o/zóngê o-nung ké mútu emen mú bubyî-orá budatut, o-chêe o-jâ Jerúsélem.

¹⁹ Kyi-fím ké nkéré ámu, banet ḿbé ba/fím ké kyicê-bushûyû-Ézerel ba/bírî bunwa ne kyikû-banet-Otu Dívit.

²⁰ Nkéré mú banet-Ézerel ámbe ba/jwo ba/fu, Jérobâm oo/fím Éjip o-fyi, mbé ba/kó ǎ ba/fu, oca ocibi ebe, ba-kúng ǎ butu. Kyi*da/shwôm banet ḿbé ba/fím ké kyikû-Júda nké ba/waa mbe ba-kyâ banet ḿbé ba/fím ké kyikû-Otu Dívit ofê*.

Shemáya o/sét wǎ Mkpábé mú odasét Byiraa-Osówo

²¹ Nkéré mú Otu Ryíhobâm o/ribi ké Jerúsélem, o/kó égot-batyép-basúja emen etánge etánge ké bajam-byikit kátángekányi ba-ba-cibi kyikit kyibónge, ké byikû-banet ḿbyí Júda ne Běnjámin. Nyǐ o/mû o/tî okabe o/fu, nyǐ o-da ng enwa byití, eringe byikû-banet-Ézerel ḿbyí kyicê-bushûyû byidawaa to ké bubwô emen.

²² Nké Osówo o/sét Shemáya mú mkpábé mú odasét byiraa emen o/fu,

²³ oda-sét Otu Ryíhobâm kyitwóm ńkyín, o-sét to banet ḿbé kyikû-Júda ne ńkyí Běnjámin, o/fu,

²⁴ *da n̂g echi ba-kye bwǎn-bané enen ḿbé banet-Ézerel bunwa*. Ca n̂g dyijê ashí amúmú. Me nké n/fu, ńkyín kyichi. Mbé ashí amúmú ba/jwo ńkyí Óburúkpâbí o/sét kámbé, ba-bwa dyijê.

Otu Jérobâm o/bírî Óburúkpâbí Esim

²⁵ Otu Jérobâm mú otu-Ézerel o/bi ekpe nyí shwanshwan o-wáp oshê-Shékem, mú mu ké esí nyí eku éku, nyí Éferem, o-fé ké kafâ, o-kyú ányi ké kyikim-nkéré. O-dim kâng o-da-bi ekpe nyí shwanshwan o-wáp oshê-Pénwel o-fé ké kafâ.

^26-27 O-raa kâng ne dyityém emen o/fu, wǎ eringe byěm mbyi něen kántîk, â banet ejí ba/ce Jerúsélem ba-da-chi byifen áku ké kiǐtí-kyise-kyifen-Osówo echi ba-kye Óburúkpâbí, ba/chi ba-kpet Otu Ryíhobâm mú o/fím Júda ofê ekye, ne ba/chi ba-ju mě.

²⁸ Nkéré mú oo/chîkabe kyi-kim ne nkyí, o/yip gûl o-mee batyép-bampong bafee, o-raa ne banet emen o/fu, ben baa/cen kampén chwóó ba-ca Jerúsélem ba-da-fé Óburúkpâbí. Banet-Ézerel, nyín něen erím-bakye enen nyí e/fîm běn ne ba-byí ké Éjip.

²⁹ O-yip mpong-gûl ámu obónge o-tî ké Bétel, o-yip mú obónge o-tî ké Dǎn.

³⁰ Kyi-fím ányi kâng banet-Ézerel ba-chi kyibî, ké ofê mú mbe ba-kyâ bampong-gûl ámbe [ké Bétel ne ké Dǎn.]

³¹ Otu Jérobâm o/bi byise-byifen echi to kyíbóng-eku, o-cá banchi byifen o-tî ḿbé ba*da/fím ké kyikû-banet ńkyí Lyíva*.

Ba/shú Kyikit-Kyifen echi ńkyí ké Bétel

³² Otu Jérobâm o/kpet to dyijî-kyifen echi ké ací onyiryiká, ké etukáku nyíryinyi nyí dyije, wǎ dyijî-kyifen ńkyí mbe ba-chi i ké Júda. Nyǐ o/chi byifen o-kye bampong-gûl ámbe ké byise-byifen echi ḿbyí ké Bétel, ḿbyí nyǐ o/chi, o-tî to banchi byifen ké Bétel ḿbé mbe ba-chi i byifen ké byise-byifen echi ḿbyí nyǐ o/bi.

³³ Ne ké ací onyiryiká, ké etukáku nyíryinyi nyí dyije, dyicí ńdyí nyǐ oyén oo/tî, nyǐ o/dim o-ca Bétel o-chi kyifen ké kyikit-kyifen echi, ké dyijî-kyifen echi ńkyí nyǐ oo/tî banet-Ézerel.