1 Kyîng 11 - Bokyi Bible

Otu Sólómon o/bírî Osówo Esim

¹ Banyinyi ḿbé ba/fím eshê ekíri ba/mû ba-jê ng Otu Sólómon. Â a/fîm onyi emen mú wǎn-otu-Éjip, nyǐ o/bé to banyinyi-Hyítat ne ḿbé ba/fím Mówep ne Ámon ne Édom ne Sádon.

² Nyǐ o/bé kámbé nang ké Óburúkpâbí o/mû o/sét banet-Ézerel o/fu, ba*dachi ba-bé barî ne banet ámbe* ké nǎ, mbé ba/chi ba-chi banet-Ézerel ba-kûkye erím-bakye ofê.

³ Otu Sólómon o/bé égot-bwǎn-batu echât ne kyicê, ne o/mû to ne égot-banyi ebónge ne kyicê ḿbé bwǎsíng. Mbé ba/chi ǎ o-bírî Osówo esim,

⁴ ne ké nkéré mú nyǐ oo/kâa, mbé ba/chi ǎ o-kpet ekye erím-bakye ofê. Nyǐ o/mû o*fí to o-fâ dyityém ne Óburúkpâbí mú Osówo emen* wǎ eringe nyí Otu Dívit mú bonchí emen o/mû mu o-fâ*.

⁵ Nyǐ o/mû mu o-fâ orím-bukye-onyinyi mú odabángê Asatáte, mú banet ḿbé Sádon, o-fâ to Myíkom, mú mu onunut-orím-bukye-banet-Ámon.

⁶ Nyǐ o/chi kyibî ké bushú ḿbú Óburúkpâbí, ne nyǐ o/mû o*fí dángdáng ké bushú ḿbú Óburúkpâbí* wǎ eringe nyí Otu Dívit mú bonchí emen o/mû*.

⁷ Nyǐ o/bi kyikit kyíbóng-kaku, ké kyicê ńkyí esû edabyí ké Jerúsélem, ńkyí odafé Kémoshi, mú mu onunut-orím-bukye-banet-Mówep, ne kyikit to ńkyí odafé Myíkom, mú mu onunut-orím-bukye-banet-Ámon.

⁸ Nyǐ o/bi to byikit-erím-bakye efé byikíri, ḿbyí banyi emen ḿbé ba/fím eshê ekíri badashí burwan ba-chi i byifen ba-kyâ kányí.

^9-10 Nang ké Óburúkpâbí mú Osówo-Ézerel o/mû oo/byí o-kâm Otu Sólómon kampén kafee, o-sét ǎ o/fu, o*dachi o-kye erím-bakye ofê* Otu Sólómon o*da/jwo ńkyí Óburúkpâbí o/sét ǎ* nké o/bírî ǎ esim. Kafâ ka-sa kâng Óburúkpâbí ne Otu Sólómon,

¹¹ ne o-raa ne nyǐ o/fu, ké nǎ, wo aa/tigi a-bên ocím eyên mú a/ryí ne me a-sem dyizîn ejí, ne aa/né ńkyí me n/sét ǒ, me n/ryí ocím n/fu, me n/chi n-koo butu ne wo n-kye onet-dyishí-bǎmkpóngé eyên obónge.

¹² Nké ké bubwô ḿbú Otu Dívit mú bonchí eyên, me mm*ba/chi n-chi ńkyín ké nkéré wo a/tôong okpó* nké ké nkéré wǎn eyên odafiri otu.

¹³ Ne me mm*ba/chi n-koo ǎ butu bumúmú* nké n/chi m-mîng ǎ ne kyikû-banet kyibónge, ké bubwô ḿbú Otu Dívit mú ḿgbán ejí, ne ké ḿbú oshê-Jerúsélem, oshê mú me nn/cá n/fu, o/já mě me.

Banet-Bushwôn-Otu Sólómon

¹⁴ Óburúkpâbí o-chi kâng Otu Hádat mú o/fím ké kyikû-butu ńkyí banet-Édom o-bírî byití ne Otu Sólómon.

^15-16 Ne kyi-ribi bankéré ḿbén, ńdyí Otu Dívit o/mû o/kpógê banet-Édom ké byití, Jówap mú onet-dyishí-basúja emen o/mû o/ce áku banet edaryii. Nyǐ ne banet emen ba/rí áku etukáku nyâchât, ne ké nkéré ámu, mbé ba/ju kángkáng banyinchéng ḿbé ba/mû ké Édom.

¹⁷ Kyi*da/shwôm Otu Hádat ne kyicê-bǎmgbán-bonchí emen ḿbé ba/fím Édom nké ba/chêe ba-jâ Éjip*. Ké nkéré ámu, Hádat o/mû o/tôong fyěet.

¹⁸ Ba-dim ké Médyan ba-jâ Páran, kyikit ńkyí banet batô ba/kâm kámbé. Ba-cen kâng ba-ribi Éjip, ba-dim ba-kâm otu-Éjip, otu ámu o-kye Otu Hádat esí ne kyise ne byiryíng ḿbyí badakûryí.

¹⁹ Otu Hádat o-firi ocín-otu ámu, otu ámu o-yip wǎn-boné-onyi emen mú wǎn-boné-otu-onyinyi mú odabángê Tápenes o-kye Otu Hádat o-bé.

²⁰ Onyinyi ámu o-fwon ǎ wǎn-onyinchéng, wǎn ámu o/mû o-bángê e Genúbat, mú otu-onyinyi mú odabángê Tápenes o/nen ǎ ké kyibám-butu emen, kyikit ńkyí nyǐ o/kyú ne bwǎn-batu.

²¹ Nkéré mú Otu Hádat o/jwo ké Éjip ba/fu, Otu Dívit oo/kpú, o-jwo to ba/fu, Jówap mú onet-dyishí-basúja to oo/kpú, Otu Hádat o-raa ne otu-Éjip o/fu, mîng mě m-bwa esim dyijê ké oshê ejí.

²² Otu o-bí ǎ o/fu, ebóng. Me nn/né ǒ chwǒm ekye dí. Nkyí nké amu a-ryuu ng a-bwa esim dyijê dí. Otu Hádat o-faa ǎ o/fu, mîng mě omíng m-bwa dyijê. [Ne o-bwa esim dyijê kâng.] [Wǎ otu mú banet-Édom, Otu Hádat o/mû kyibî-onet-bushwôn mú banet-Ézerel.]

²³ Osówo o-chi to Rézon mú wǎn-Élyada o-bírî byití ne Otu Sólómon. Rézon o/mû oo/chêe bonchí emen Otu Hadadéze, mú otu-Zóba,

²⁴ ne nyǐ o/mû o/firi onet-dyishí mú banet-kajii. Ńkyín kyi/chi ké nkéré mú Otu Dívit oo/kpógê Otu Hadadéze, ne nyǐ oo/ju to basúja-Syírya ḿbé ba/mû ba/cibi ne nyǐ. Rézon ne banet emen ba/dim ba-kûkyú ké Damásákus, ányi nké banet emen ba/kúng ǎ butu, o-firi otu mú Syírya.

²⁵ Nyǐ o/mû onet-bushwôn-banet-Ézerel ńdyí Otu Sólómon o/tôong okpó.

Osówo o/ryí Jérobâm Ocím

²⁶ Onet okíri mú o/bírî byití ne Otu Sólómon o/mû onet-dyishí-bǎmkpóngé emen mú odabángê Jérobâm, mú wǎn-Nébat, mú o/fím oshê mú badakó Zeréda, ké esí nyí Éferem. Boné emen o/mû onyǐnkú. O/mû o-bángê e Zérwa.

²⁷ Nyín něen eringe byití byi/kpet. Otu Sólómon o/mû mu o-sû ng ecing ké kyicê-Jerúsélem ńkyí esû nyi e-byí i, ne o/mû mu o-bwât ng to ekpe nyí oshê-Jerúsélem.

²⁸ Jérobâm o/mû oshunshwan-kyisu-wǎsíng-onyinchéng. Ne ńdyí Otu Sólómon o/ri eringe mú ámu mu o-chi i bǎmkpóngé, o/yip ǎ o-tî onet-dyishí mú kángkáng básóng ḿbé esí nyí Manáse ne nyí Éferem.

²⁹ Dyicí dyibónge, nkéré mú Jérobâm o/dim kǎnchí ké Jerúsélem mu o-cen n o-câ, mkpábé mú odasét byiraa-Osówo mú odabángê Ahíja, mú o/fím Shílo, o/kwárê ne nyǐ ké bukwóp.

³⁰ Ahíja o-pii ágbádá nyí afyîfî, nyí o/mû o/fé ké byiko, o-ját kányí byicê diǐkpú ne byifee,

³¹ o-raa ne Jérobâm o/fu, wo yip byicê diǐkpú, ké nǎ, Óburúkpâbí mú Osówo-Ézerel mu o-raa ng ne wo o/fu, nyǐ o/chi o-koo butu ne Otu Sólómon, ne nyǐ o/chi o-kye ǒ wo byikû-banet-Ézerel diǐkpú.

³² Otu Sólómon o/chi o-waa ne kyibónge, ké bubwô-Otu Dívit mú ḿgbán ejí, ne ké bubwô-Jerúsélem to, oshê mú me nn/cá n/fu, o/já mě me, ké esí-banet-Ézerel emúmú.

³³ Me n/chi n-chi ńkyín, ké nǎ, Otu Sólómon [oo/né mě, ne nyǐ oo/kye to] erím-bakye ofê. Ányi kyi/byí, Asatáte mú orím-bukye-onyinyi, mú banet-Sádon, ne Kémos mú orím-bukye mú banet-Mówep, ne Myíkom mú orím-bukye mú banet-Ámon. Otu Sólómon [o*da/chi] ńkyí me n/sét ǎ* nyǐ oo/chi kyibî, ne nyǐ o*da/tî byije ejí* wǎ eringe bonchí emen Otu Dívit o/mû o/tî*.

³⁴ Nké me mm*ba/chi n-koo Otu Sólómon butu bumúmú* ne me n/chi n-chi ǎ o-waa ne busa wǎ otu ké dyikpen emen dyimúmú. Me n/chi n-chi ńkyín ké bubwô-Otu Dívit mú ḿgbán ejí, mú me n/cá ǎ, mú o/tî byije ejí.

³⁵ Me n/chi n-koo butu ne wǎn-Otu Sólómon, ne n/chi n-kye ǒ byikû-banet-Ézerel diǐkpú,

³⁶ nké me n/chi m-mîng wǎn-Otu Sólómon ámu ne kyikû kyibónge, eringe nyí me ndakyú ne onet mú o/fím ké kyikû-banet ńkyí Otu Dívit mú ḿgbán ejí kángkáng nkéré, mú odakyú otu ké Jerúsélem, oshê mú me nn/cá wǎ kyikit ńkyí bada mě ekûkye ofê.

³⁷ Jérobâm, me n/chi n-chi ǒ a-firi otu mú Ézerel, ne wo a/chi a-kyú otu ké kángkáng esí nyí e/nyîn ǒ.

³⁸ Â wo amu a-chi i ńkyí me n/sét ǒ ne dyityém eyên dyibónge, a-tî to byije ejí, a-chi to ńkyí kyi/kwárê ké bushú ejí, wǎ eringe nyí Otu Dívit mú ḿgbán ejí o/mû o-chi i, me n/chi n-kyú ne wo kángkáng nkéré. Me n/chi n-chi ǒ a-firi otu mú Ézerel, ne n/chi n-ri n/fu, banet ḿbé ba/fím ké kyikû eyên ba/chi ba-ryí to butu â wo a/kpú, wǎ eringe nyí me nn/chi Otu Dívit.

³⁹ Ké bubwô-kyibî ńkyí Otu Sólómon o/chi, me n/chi n-kye banet ḿbé ba/fím ké kyikû-Otu Dívit busông, nké nn*kye kámbé kámbú kángkáng nkéré*.

⁴⁰ Otu Sólómon o-kan kâng o/fu, nyǐ o-ju ng Jérobâm, nké Jérobâm o/chêe o-jâ kyikit-Otu Shíshak mú o/fím Éjip, o-waa áku tete Otu Sólómon o-kpú.

Otu Sólómon o/kpú

⁴¹ Kángkáng byěm byikíri ḿbyí Otu Sólómon o/chi, bǎmkpóngé emen ne byinyídíng emen, ba/sáng kámbyí kyísí ké Nwet-Dyikpen emen.

⁴² Nyǐ o/kyú otu ké Jerúsélem, mú kángkáng banet-Ézerel, ké bajam-aje bafee.

⁴³ O/kpú ba-ryii ǎ ké oshê-Otu Dívit, ne wǎn emen Ryíhobâm o-koo kakyúng-butu emen.