1 Kyîng 10 - Bokyi Bible

Otu Shéba o/bari Otu Sólómon

¹ Otu Shéba mú onyinyi o/jwo kyi-kim ne [dyizîn-Otu Sólómon] ńdyí dii/káng, ne o-dim o-wâa Jerúsélem o/fu, nyǐ o-da ng ekan Otu Sólómon ne biǐbímbán-bǎmbím.

² O-kpî bujê-banet ba-ca ne nyǐ ké kyikû ne atû-byidóng-kasu ne aká nyí anong anong ne bujê-gûl, ḿbyí boonyam-atû bu/kúng. Nkéré mú mbé ba/kâm barî ne Otu Sólómon, nyǐ o/bí ǎ kángkáng bǎmbím ḿbé ba/mû ǎ ké dyityém.

³ Otu Sólómon o-faa ǎ kámbé kángkáng. Chwǒm kyi/mû kyi*fí nang kyibónge ńkyí kyi/sóng ǎ kyikû esét*.

⁴ Onyinyi ámu o/jwo byinyídíng ḿbyí Otu Sólómon, o-ri to kyibám-butu ńkyí Otu Sólómon o/bi.

⁵ O/ri byiryíng ḿbyí ba/mû mbe ba-tî ng ké ókpákpúrúk emen, ne byise ḿbyí banet-ashí-bǎmkpóngé emen ba/mû ba-kyú u, ne eringe bǎmgbán ḿbé ké kyibám-butu emen ba/mû ba-chi i bǎmkpóngé ebe, ne azong-byidóng nyí ba/mû mbe ba-fâ, ne bǎmgbán emen ḿbé badachi bǎmkpóngé ké ajî, ne byifen ḿbyí o/mû mu o-chi i ké kiǐtí-kyise-kyifen-Osówo echi. Busa bu-man ǎ, o-waa ocím ké dyishí fúú.

⁶ O-raa ne Otu Sólómon o/fu, ńkyí me n/jwo ké oshê ejí kyi-kim ne [wo] ne byinyídíng eyên nkyi ntûntû.

⁷ Nké me m/mû n*da/man ebángê* tete mm/bê m-ba-ri kángkáng me oyén. Nké me m/mû n*da/jwo nang kyicê*. Byinyídíng eyên ne efang eyên byi/jê kanong kanong byi-shwôm ńkyí ba/mû ba/sét mě.

⁸ Dyishí dyi/nwa [banyi] eyên kanong kanong. Ne dyishí dyi/nwa to bǎmgbán eyên kanong kanong, ḿbé mbe ba-kyú u ne wo kángkáng nkéré ba-já ng bukwóp ḿbú badajwo byiraa-byinyídíng eyên.

⁹ Akpee akyú ne Óburúkpâbí mú Osówo eyên. Nyǐ oo/tông eringe kafâ nke ka-nyîn n ǎ ne wo, ké ochi mú o/chi ǒ a-kyú otu mú Ézerel. Ké nǎ, kyijé emen ne Ézerel kyi-waa ng ne banyá, nyǐ oo/chi ǒ wo otu eringe adatî byije a-két to mpan mú acît a*fí*.

¹⁰ O-yip eyáré nyí o/bê ne nyǐ o-kye Otu Sólómon. Eyáré ányi e-shwôm m égot-bakyílogaram-gûl bujam ne bujê-byidóng-kasu ne byibwáng ḿbyí byinong byinong. Bujê-byidóng-kasu ḿbyí o/kye ǎ byi/jê kanong kanong byi-shwôm ḿbyí ba/mû baa/kye ǎ ké nkéré nang orá.

¹¹ Bǎnsukyíkang-Otu Hyíram, ḿbé ba/kúng gûl ké Ófyi ba-bâ ne mǔ, ba/tû to bujê-byichí ḿbyí badakó júnipe, ne byibwáng ḿbyí byinong byinong.

¹² Otu Sólómon o/yip byichí ámbyi o-bi ero-kyibám ké kiǐtí-kyise-kyifen-Osówo echi ne ké kyibám-butu, o-sím to ácîng nyí bankim ane. Byichí-júnipe ámbyi byi/nwa byi-shwôm kángkáng byichí ḿbyí ba/mû baa/twóm byi-bâ ké esí-Ézerel, ba*da/chîri ne dyizong ándyi*.

¹³ Otu Sólómon o-kye mú onyinyi ámu kángkáng byěm ḿbyí o/mû mu o-ryuu ng, cibicibi ne kángkáng eyáré nyí o/kye ǎ ké kanong ńké emen. Nyǐ kâng ne banet emen ḿbé ba/mû ba/ce ne nyǐ ké kyikû ba-bwa esim dyijê ké esí-Shéba.

Efang nyí Otu Sólómon

¹⁴ Dyije nang dyirá Otu Sólómon mu o-koo ng nang égot-bakyílogaram-gûl etánge etánge ké byikit bujam esim byichât,

¹⁵ cibicibi ne [akpuga-dyishí] nyí bancen busî mbe ba-kyâ, ne mpún mú kasî ecen, ne akpuga-dyishí nyí batu-Arébya mbe ba-kyâ, ne nyí banet-ashí-banet-Ézerel ké esí ké esí mbe ba-kyâ.

¹⁶ Otu Sólómon o/chi égot-édem ebónge nyí eryên eryên, ne édem ányi nang erá ba/mwane kányí bakyílogaram-gûl nang káchâtkányi.

¹⁷ Nyǐ o/chi to égot-édem ebónge ne kyicê nyí boǒníng, ne nang erá to ba/mwane kányí ne bakyílogaram-gûl nang bafee. O/fu, batî kányí kángkáng ké Ócâm mú Kyizinge ńkyí Lebánon.

¹⁸ O-fu to ba-chi ǎ kakyúng-butu ńké karyên. Kyicê-kakyúng-butu ánke ba/fé asháng-éshwa ké nkyí, ńkyí áku ba-mwane ne gûl mú onong onong.

^19-20 A-yú u abe nyâchât ne a-ribi kyíbóng-kakyúng ánke. Ba/mee byěm wǎ ekpang efee efee ké dyishí-dyibe nang dyirá, ányi kyi/byí, ekpang diǐkpú ne efee. Ké esim-kakyúng-butu ba/mee chwǒm wǎ dyishí-otyép-mpong, ne ké byitông-abwô-kakyúng ba/mee to chwǒm wǎ ekpang. Kakyúng-butu ka*fí nang kabónge wǎ ńkén* ké butu bukíri*.

²¹ Kángkáng bankôp ḿbé Otu Sólómon ba/chi ké gûl, ne kángkáng byiféng to ḿbyí ké Ócâm mú Kyizinge ńkyí Lebánon ba/chi kámbyí ké gûl mú onong onong. Ba*da/chi kámbyí ké syílyíba* ké nǎ, mǔ o/mû o*fí wǎ chwǒm ké ací nyí Otu Sólómon*.

²² Nyǐ o/mû ne bǎnsukyíkang ḿbé ba/mû ba-cen n ké baya ḿbé baryên, ḿbé ba/mû ba-cen n ne bǎnsukyíkang ḿbú Otu Hyíram. Aje achât nang ará bǎnsukyíkang ámbe ba-bwa esim dyijê, ba-tû gûl ne syílyíba ne asháng-eshwa ne [efwo] ba-fyi ne mbyí.

²³ Otu Sólómon o/mû o/fang efang o-kyú to ne byinyídíng o-shwôm kángkáng batu.

²⁴ Ne ejíí emúmú ba/mû mbe ba-ryuu ng ebajwo kyi-kim ne byinyídíng ḿbyí Osówo o/kye ǎ.

²⁵ Nang yeě mú o/ce ǎ edari o-bâ ǎ ne eyáré nyí byěm wǎ syílyíba ne gûl ne byídí ne byiyám-byití ne byidóng-kasu ne bubyî-orá. Ńkyín kyi/wâa éné ké dyije ké dyije.

²⁶ Otu Sólómon o/ré égot-bamútu káchâtkányi, ḿbé bubyî-orá budatut, ne égot-bubyî-orá bajam bachât, ḿbú badakúng ba-kûnwa byití. Bukíri o/tî kámbú ké Jerúsélem, ḿbú áku o-tî ké eshê ké eshê.

²⁷ Nkéré mú nyǐ o/mû otu, syílyíba o/mû ké Jerúsélem wǎ aká, ne byichí-séda ḿbyí byi/mû byi*fí ké Ézerel* o/bê ne mbyí chwóó.

²⁸ Bancen busî-Otu Sólómon ba/mû ba-ré ng kángkáng bubyî-orá ḿbú mbu bu-fím m [Músiryi] ne Silyísha

²⁹ ne kángkáng bamútu to ḿbé bubyî-orá budatut, ḿbé ba/mû ba-fím m Éjip. Mbé ba/mû mbe ba-shee ng batu-Hyítat ne batu-Syírya bubyî-orá ne bamútu ḿbé bubyî-orá budatut, ba-shee ng bamútu ámbe ké égot-byikim-syílyíba echât echât ké obónge, ne bajam-byikim-syílyíba káchâtkányi esim diǐkpú ké kabyî-orá nang kará.