1 Korónyíkil 9 - Bokyi Bible

Banet ḿbé ba/fyi Bábyílon

¹ Ba/sáng kángkáng banet-Ézerel azîn kyísí wǎ eringe nyí ba/mû ké byikû-banet ebe, ne ba/sáng kányí ké Nwet-Batu mú Ézerel. Ba/kám banet-Júda ba-dim ne mbé ké Bábyílon wǎ básóng, ké bubwô-byibî ebe.

² Bambwôp kashú-banet ḿbé ba/fyi ké byise ebe, ké kafâ-eshê ebe ba/mû banet-Ézerel ḿbé kwán ne banchi kyifen-Osówo ne bǎmgbán ebe ne banet-bǎmkpóngé-kiǐtí-kyise-kyifen-Osówo echi.

³ Banet ḿbé ba/fím byikû-banet ḿbyí Júda ne Běnjámin ne Éferem ne Manáse ba/dakyú ké Jerúsélem.

^4-6 Égot-byikû-banet echât ne bajam-byikû-banet byinyii esim diǐkpú ḿbyí kyikû-banet ńkyí Júda byi/mû byi-kyú u ké Jerúsélem. Bwǎn ḿbé Pérez mú wǎn-Júda ba/mû ne Otyâ mú wǎn-Amyíhut ne mú wǎn-wǎn-Ómiryi wǎ onet-dyishí ebe. Banchí emen bakíri ḿbé kpákpá ba/mû Ḿmyíryi ne Bányi. Bwǎn ḿbé Shíla mú wǎn-Júda ba/mû ne Asáya mú o/mû bonchí mú kpákpá, mú kyikû emen wǎ onet-dyishí ebe. Bwǎn ḿbé Zéra mú wǎn-Júda ba/mû ne Jwêl wǎ onet-dyishí ebe.

^7-8 Banet-Běnjámin ḿbé ba/mû ba-kyú u ké Jerúsélem ba/mû Sálu mú wǎn-Meshúlam, mú o/mû wǎn-Hodába, ne Hodába o/mû wǎn-Hasénwa, ne Ebenáya mú wǎn-Jeróham, ne Éla mú wǎn-Óze, mú wǎn-wǎn-Myíkyiryi, ne Meshúlam mú wǎn-Shefátya, mú o/mû wǎn-Rúwel, ne Rúwel o/mû wǎn-Ebenyíja.

⁹ Égot-byikû-banet enyii ne bajam-byikû-banet káchâtkányi esim onyiryiká ne din ḿbyí kyikû-banet ńkyí Běnjámin byi/mû byi-kyú u ányi. Kángkáng azîn-banyinchéng ḿbé ba/kó něen ba/mû banchí ḿbé kpákpá, ḿbé byikû-banet.

Banchi Kyifen-Osówo ḿbé ba/mû ba-kyú u ké Jerúsélem

^10-12 Banchi kyifen-Osówo ḿbé ba/mû ba-kyú u ké Jerúsélem ba/mû ba-bángê e Jedáya, ne Jehóyárip, ne Jákin, ne Azaryâ mú wǎn-Hyíkya, mú onet-dyishí-bǎmkpóngé ké kiǐtí-kyise-kyifen-Osówo echi, mú banchí emen ḿbé kpákpá ba/mû ba-bángê e Meshúlam ne Zádok ne Méreyot ne Ahítup ne Adyâ mú wǎn-Jeróham, mú banchí emen ḿbé kpákpá ba/mû ba-bángê e Páshu ne Makyíja ne Mása mú wǎn-Ádyel, mú banchí emen ḿbé kpákpá ba/mû ba-bángê e Jázera ne Meshúlam ne Meshílemit ne Éma.

¹³ Banchi kyifen-Osówo ḿbé ba/mû banchí ḿbé kpákpá, ḿbé byikû-banet ba/mû égot nyíryinyi ne bajam-banet nyíryinyi. Mbé ba/mû ba-nyît ng kángkáng bǎmkpóngé ḿbé ké kiǐtí-kyise-kyifen-Osówo echi kanong kanong.

Bǎmgbán-Nchi Kyifen-Osówo ḿbé ba/mû ba-kyú u ké Jerúsélem

^14-16 Bǎmgbán-nchi kyifen-Osówo ḿbé ba/mû ba-kyú u ké Jerúsélem ba/mû Shemáya mú wǎn-Háshup, mú banchí emen ḿbé kpákpá ba/mû Azaryíkam ne Hashabyâ, ḿbé kyikim-banet ńkyí Merári, ne Bákabáka, ne Héreshi, ne Gálal, Matanyâ mú wǎn-Máka, mú banchí emen ḿbé kpákpá ba/mû Zíkiri ne Ásap, ne Obadyâ mú wǎn-Shemáya, mú banchí emen ḿbé kpákpá ba/mû Gálal ne Jédutun, ne Berekyâ mú wǎn-Ása, mú wǎn-wǎn-Ekána, mú o/mû o-kyú u ké kyikim-esí ńkyí kyi/já oshê mú Netófa.

Bambâm Kiǐtí-Kyise-Kyifen-Osówo echi ḿbé ba/mû ba-kyú u ké Jerúsélem

¹⁷ Bambâm kiǐtí-kyise-kyifen-Osówo echi ḿbé ba/mû ba-kyú u ké Jerúsélem ba/mû Shálum ne Ákup ne Támon ne Ahíman. Shálum o/mû onet-dyishí ebe.

¹⁸ Tete kyi-byí nkéré ámu, byikim-banet ebe ba/mû ba-bám m dyifyi-otu. Kpákpá, mbé ba/mû ba-bám m ké afyi nyí boompyep ḿbú bǎmgbán-nchi kyifen-Osówo.

¹⁹ Shálum mú wǎn-Kóre, mú wǎn-wǎn-Ebyâsap, cibicibi ne barî-banet-kyikim-banet ńkyí Kóra, o/mû onet-dyishí mú bambâm dyifyi ńdyí mpyep mú Óburúkpâbí odakyú, wǎ eringe nyí banchí ebe ḿbé kpákpá ba/mû ké nkéré ba/mû ba-bám m afyi nyí boompyep-banet-Ézerel.

²⁰ Fyinéhas mú wǎn-Elyǎza o/mû oo/kyú kámbé wǎ onet-dyishí nkéré obónge. Kyi/bát Óburúkpâbí okyú ne nyǐ.

²¹ Zákaryâ mú wǎn-Meshelemyâ o/mû to onet-mbâm ké dyifyi ńdyí mpyep mú Óburúkpâbí odakyú.

²² Banyinchéng kángkáng kangkang ḿbé ba/mû ba/cá kámbé wǎ bambâm afyi ba/mû égot ebónge esim-banyinchéng diǐkpú ne bafee. Ba/mû ba/sáng kámbé azîn wǎ eringe nyí ba/mû ba-kyú u ké eshê ebe. Otu Dívit ne Sámwel mú mkpábé mú odasét byiraa-Osówo nké ba/tî banchí ḿbé kpákpá, ḿbé banet ḿbén ké byikit-bǎmkpóngé ebe ḿbyín.

²³ Mbé ne bwǎn ebe ba/bám afyi-kiǐtí-kyise-kyifen-Osówo echi ba-ca kashú.

²⁴ Dyifyi dyi/mû ńdyí dyi/bírî kashú-kyicê-bushûyû ne ńdyí dyi/bírî ké ńkyí busyísen ne ńdyí dyi/bírî ké ńkyí óbyísû mu o-byí i ne ńdyí dyi/bírî ké ńkyí mu o-ríbî ng o-jâ, ne dyifyi nang dyirá dyi/mû ne onet-dyishí-mbâm.

²⁵ Banet ḿbé ba/mû ba-chwáp ng banet-mbâm ḿbén ba/mû bwǎn-bané ebe ḿbé ba/mû ba-kyú u ké eshê ebe, ne ba-man ba-chi bǎmkpóngé-mbâm ké otáng ké otáng ké ací káchâtkányi káchâtkányi.

²⁶ Banet-ashí-banet-mbâm ashí anyii ba/mû bǎmgbán-nchi kyifen-Osówo, ne nkuli kyikû-busa o/mû ne mbé. Banfût ḿbé ké kiǐtí-kyise-kyifen-Osówo echi ne byěm ḿbyí ba/mû ba-tî ng ké kafâ byi/mû to ké abwô ebe.

²⁷ Mbé ba/mû ba-kyú u ányi fáráng ké kiǐtí-kyise-kyifen-Osówo echi, ké nǎ, kyi/mû bǎmkpóngé ebe ḿbé badabám kánkyí ne ḿbé afyi ebâa kángkáng dyicófóróng.

Bǎmgbán Bakíri ḿbé Nchi Kyifen-Osówo

²⁸ Bǎmkpóngé ḿbé bǎmgbán-nchi kyifen-Osówo bakíri ba/mû byiféng etún ḿbyí ba/mû ba-chi i byifen-Osówo. Mbé ba-pan n kámbyí kampén kafee kángkáng nkéré â ba/kye ba/fu, bachi byěm ké mbyí.

²⁹ Bǎmgbán-nchi kyifen-Osówo bakíri ba/mû bantûn byěm-ociring byikíri ne filáwa mú badachi berêt ne bato ne bakút-ólif ne burwan ne bakút-kyinung.

³⁰ Nké bǎmkpóngé ḿbé bakút-kyinung echwábê ba/já banchi kyifen-Osówo.

³¹ Ḿgbán-nchi kyifen-Osówo obónge, mú o/mû o-bángê e Matyítya, mú wǎn-kashú-Shálum, mú kyikim-banet ńkyí Kóra nké bǎmkpóngé ḿbé bakye erám ba/já ǎ.

³² Bǎmkpóngé ḿbé kyikim-banet ńkyí Kóhat ba/mû berêt-ociring erám mú kiǐtí-kyise-kyifen-Osówo echi kángkáng dyicí-ékwâbashi.

³³ Bǎmkpóngé ḿbé byikû-abóng-bǎmgbán-nchi kyifen-Osówo bakíri ba/mû ane ekim nyí kiǐtí-kyise-kyifen-Osówo echi. Banet-ashí-byikû-abóng ḿbyín ba/mû ba-kyú u ké banfût ḿbé kiǐtí-kyise-kyifen-Osówo echi bakíri, ne ba/mû ba*fí ne bǎmkpóngé bakíri ḿbé badachi* ké nǎ, mbé ba/mû ké bǎmkpóngé, buchú ne esû.

³⁴ Banyinchéng ḿbé ba/sáng kámbé azîn něen ba/mû banchí ḿbé kpákpá, ḿbé byikû-banet-bǎmgbán-nchi kyifen-Osówo, wǎ eringe nyí ba/fwon kámbé. Mbé ba/mû banet-ashí ḿbé ba/mû ba-kyú u ké Jerúsélem.

Banchí ḿbé Kpákpá ne Bwǎn-Otu Sôl

³⁵ Jéyel o/bi oshê mú Gyíbwon o-kyú ké mǔ. Onyi emen o/mû o-bángê e Máka.

³⁶ Wǎn emen mú onyinchéng, mú okínkán o/mû o-bángê e Ábidon, ne bwǎn emen ḿbé banyinchéng ḿbé áku ba/mû Zú ne Kyíshi ne Bâl ne Nêe ne Nádap

³⁷ ne Gédo ne Áho ne Zákaryâ ne Myíkolot,

³⁸ mú bonchí-Shimyâ. Bwǎn ebe ba/mû ba-kyú u ké Jerúsélem, fáráng ne byikû-banet byikíri ḿbyí kyikim-banet ebe.

³⁹ Nêe o/mû bonchí mú Kyíshi, ne Kyíshi o/mû bonchí mú Otu Sôl, ne Otu Sôl o/mû ne bwǎn-banyinchéng ashí anyii, ḿbé ba/mû ba-bángê e Jónátan ne Makyíshwa ne Abyínadap ne Eshibâl.

⁴⁰ Jónátan o/mû bonchí mú Meryibâl, mú o/mû bonchí-Máka.

⁴¹ Máka o/mû ne bwǎn-banyinchéng ashí anyii, ḿbé ba/mû ba-bángê e Pyítin ne Mélek ne Táryâ ne [Éhaz.]

⁴² Éhaz o/mû bonchí mú Jára, mú o/mû bonchí mú bwǎn-banyinchéng ashí achât, Álemet ne Azámábat ne Zímiryi. Zímiryi o/mû bonchí mú Móza,

⁴³ mú o/mû bonchí mú Byinyâ, mú o/mû bonchí mú Refáya, mú o/mû bonchí mú Elyǎsa, mú o/mû bonchí mú Ázel.

⁴⁴ Ázel o/mû ne bwǎn-banyinchéng ashí nyâchât, Azaryíkam ne Búkeru ne Éshimal ne Sharyâ ne Obadyâ ne Hánan.