1 Koríntyan 8 - Bokyi Bible

Ḿbím kyi-kim ne Byiryíng ḿbyí baa/sháng Bakye ké mbyí

¹ Kántîk, kyi-kim ne byiryíng ḿbyí baa/sháng bakye ké mbyí. Nkyi ntûntû ńkyí ba/fu, be ashí eten kángkáng byimu byi-jang ng enyît, wǎ eringe nyí banet mbe ba-fwam m eraa. Dyizong-onyît ámu kâng o-chi i onet o-kpet etông byiko. Nké kyijé kyi-chi i onet o-kán ké dyityém.

² Onet mú mu o-kabe ng o/fu, nyǐ o-nyît ng chwǒm, ké ntûntû onet ámu o*fí o-nyît ng* wǎ eringe nyí o/mû o/chi o-nyît*.

³ Nké onet mú Osówo mu o-jê ng ǎ, Osówo o-nyît ng onet ámu.

⁴ Kyi-kim kâng ne byiryíng ḿbyí baa/sháng bakye ké mbyí. Be byimu byi-nyît ng byi/fu, orím-bukye o/bwom ké chwǒm ńkyí ké ntûntû kyi*fí ké kafâ*. Be byimu byi-nyît ng byi/fu, Osówo mú mu obónge nké nke mu kô.

⁵ Â nang erím-bakye nyí mbe ba-raa ng e/mû ne busa, nang kyíbóng nang ké esí, ne â nang erím-bakye ńnyín ne batu ḿbén ba/mû chwóó,

⁶ be kâng byimu ne Osówo obónge nké nke, mú mu Bonchí eten, mú o/chi kángkáng byěm, ne mú byimu byi-kpen n ké bubwô emen. Ne Otu Kyítá mu obónge nké nke, ányi Jisos Karâs, mú ké bubwô emen nké Osówo o/chi kángkáng byěm, ne mú ké bubwô emen nké byimu byi-kpen n.

⁷ Nké *chí kángkáng banet nké mbe ba-nyît ng ntûntû mún*. Banet bakíri, erím-bakye ee/bárê kámbé, ḿbé tete dyicí ńdyí kurún, nang nkéré orá nké ba/ryí azong-byiryíng ányi, ba-chî ng ekabe ba/fu, byiryíng ámbyi byi/já orím-bukye. Dyityém ebe ndyi kyeekyee, ne ba-kabe ng ba/fu, mbé mbe ba-bên n byiko ebe ké byiryíng ámbyi.

⁸ Byiryíng kâng bii*ba/chi byi-chi bě byi-fárâng Osówo*. Be bii*ba/chi byi-rím chwǒm nang kyibónge* â byi*da/ryí byiryíng* byi-bwa byi-já nang chwǒm* â byi/ryí*.

⁹ Bám m̂ byiko enen kâng, ba*dachi ba-chi busa enen ḿbú badachi nang ebóng ńkyí kyi/nyîn běn* bu-chi banet ḿbé obánge ebe mu kyeekyee ba-róng ké kyibî*.

¹⁰ Â onet mú obánge emen mu kyeekyee ké chwǒm ńkyín o/ri ǒ wo mú amu a-nyît ng kanong kanong ké amu a-ryí i byiryíng ké kiinchéng-bukye, ńkyín kii*fé onet ámu busa ḿbú odakûryí byiryíng ḿbyí baa/sháng bakye ké mbyí dí*.

¹¹ Ne ké bubwô ámbu kâng, onyinchéng mún mú mu kyeekyee, mú mu wǎn-boné eyên, mú Karâs o/kpú ké dyishí emen, o/chi o-kpú ké onyît mú dyityém eyên ndyi dyi-nyît ng.

¹² Ké bukwóp ḿbún, wo a/chi a-kûchi kyibî a-bât ng Karâs ké kyibî ńkyí amu a-chi i a-bât ng bwǎn-bané eyên, a-némê e atyém ebe nyí nyi kyeekyee.

¹³ Ké bubwô ámbu kâng, â byiryíng mbyi byi-chi i wǎn-boné ejí o-róng ké kyibî, me mm*ba/chi n-chîryí enyam* eringe nyí mm*ba/chi n-chi wǎn-boné ejí o-róng ké kyibî*.