1 Koríntyan 5 - Bokyi Bible

Byibî-Byěm ḿbyí mbyi ké Burwám-Banet-Ékwâbashi nyí Karâs

¹ Banet mbe ba-sét ng ké ntûntû ba/fu, ben bamu ba-chi i byibî-byěm kyi-kim ne banet erí, ḿbyí byi/bên kanong kanong, ḿbyí nang banet ḿbé ba/bángê ké bakye esháng ba*fí ba-chi i*. Ba/sét mě ba/fu, onyinchéng obónge mu o-rí i ne onyi mú bonchí emen.

² Ben ba-cen n nǎ kâng ne ba-kûtông byiko. Kyi*fí ńkyí ben badatông byiko* nké nkyi ńkyí ben badakyú ké kiǐtí-bafip. Ne onyinchéng mú o/chi dyizong-chwǒm ándyi mu mú bada ǎ efîm ké burwám enen.

³ Ké kakim ńké ejí, nang ké me n*fí běn jwángjwáng ké enyam-byiko* dyityém ejí ndyi ne ben. Ne ké busa ḿbú dyizîn ńdyí Jisos, Otu Kyítá eten, me nn/két mpan o-bên onyinchéng ámu mú o/chi kiǐtí-kyibî ńkyín wǎ me mu áku ne ben.

⁴ Â ba/cibi kyikit kyibónge, wǎ eringe nyí me mu n-cibi ng ne ben ké dyityém ejí, ké busa ḿbú Jisos, Otu Kyítá eten, ḿbú mbu ne be,

⁵ yip n̂g onyinchéng ámu ba-kye Sátan o-bên ǎ enyam-byiko. Eringe nyí Osówo o/chi o-nyii ǎ busun ké Dyicí ńdyí Otu Kyítá.

⁶ Kyi*fí kanong ńkyí ben badakûtông byiko*. Ben bamu ba-nyît ng ńkyí ba/sét ba/fu, kaǎnyín-bukye ńké badafé ké berêt ne o-mut nke ka-chi i kyirim-berêt kyimúmú kyi-mut.

⁷ Ben ba-man ba-fîm bukye ḿbún ḿbú badachi berêt o-mut, ḿbú kyibî, ḿbú boo/bên, ba-twóp, eringe nyí ben badawaa kpárádádát nang kyikit kii*waa*. Ne ben ba/chi ba-firi kâng wǎ kyirim-berêt ńkyí kyifyîfî, ńkyí kyi*fí ne bukye ḿbú budachi kánkyí kyi-mut* wǎ eringe nyí ké ntûntû me mu n-nyît ng n/fu, ben bamu. Ké ebóng, dyijî-kyifen ńkyí Shwôm, ńkyí eten kii/fyi kántîk, mú Osówo oo/yip Karâs mú mu Wǎn-Etám-Ebû, mú dyijî ándyi echi, o-chi kyifen.

⁸ Bâ n̂g byi-chi dyijî-kyifen eten kâng ne berêt mú o*fí ne bukye ḿbú budachi kámú o-mut* berêt mú ntûntû ne mú mu kpárám. *Chí ne berêt mú mu ne bukye ḿbú budachi kámú o-mut* ḿbú boo/bên* bukye ḿbú kyibî ne dyityém ebên.

⁹ Ké léta mú me n/sáng běn, me n/sét běn n/fu, *da n̂g echi ba-cibi byiko enen ne banet ḿbé mbe ba-chi i byibî-byěm kyi-kim ne banet erí*.

¹⁰ Me m/mû n*fí n-raa ng kyi-kim ne banet ḿbé ba*fí ba-fâ Osówo* ḿbé mbe ba-chi i byibî-byěm kyi-kim ne banet erí* ba-shwam m banshwam* ba-jii ng bujii* ba-sháng ng bakye*. Â ba/fu, ba-ciring ng kámbé, ba-byí i ba-mîng ejíí emúmú.

¹¹ Ńkyí me n/raa kyi/mû něen, n/fu, ben ba*dachi ba-cibi byiko enen ne onet mú mu o-kó ng byiko emen o/fu, nyǐ o-chi i orî-onet mú o/bángê ké Karâs* nké mu o-chi i byibî-byěm kyi-kim ne banet erí, o-shwam m banshwam, o-sháng ng bakye, o-shú u banet, o-bwóm m bato, o-jii ng kajii. *Da n̂g echi ba-kyú me ba-ryí nang byiryíng ne dyizong-onet ándyi*.

^12-13 Â a/bwa a-kabe dííng, kyi*fí bǎmkpóngé ejí ḿbé ndapan banet ḿbé ba*fí ké burwám eten mpan*. Osówo o/chi o-pan kámbé mpan. Nké ben baa*man epan banet ḿbé mbe ké ncibi mú enen mpan dí. Wǎ eringe nyí ejá-Osówo nyí ba/sáng kyísí e/sét e/fu, fîm m̂ kyibî-onet kyi-byí ké burwám enen.