1 Koríntyan 4 - Bokyi Bible

Banet-Kyitwóm ḿbé Karâs

¹ Kû n̂g bě ekúng wǎ bǎmgbán ḿbé Karâs, ḿbé Osówo oo/yip ntûntû mú mu ǎ ké dyityém o-fé bě ké abwô.

² Chwǒm kyibónge ńkyí banet mbe ba-ryuu ng ba/fu, ḿgbán okûchi, ányi kyi/byí, okûfé bonchí emen.

³ Me n*fí n-kérê ng nang kaǎnyín kyi-kim ne mpan mú bamu ba-pan n mě ké byiko* nang kyi-kim ne édúú nyí banet*. Me n*fí m-pan n nang byiko ejí mpan*.

⁴ Dyityém ejí ndyi wááng. Nké ńkyí nkyí kyi*da/tông kyi/fu, me ké ntûntû, me n*fí ne kyibî*. Otu Kyítá nké odakét mpan kyi-kim ne me.

⁵ Ké bubwô ámbu kâng, ben *da n̂g echi ba-pan onet nang obónge mpan ké byiko* ne ochíchí-nkéré o-kûfyi*. Mpan mú nkuli kyikû o-man o-bám tete Otu Kyítá o-bâ. Nyǐ o/chi o-kúng byěm-kadip ḿbyí byi/mû ké kyifip o-byí ne mbyí ké kiinwángé, o-kúng ekabe nyí banet ba/rôo ké atyém ebe o-byí ne nyǐ kyíjí. Ne nang yeě o/chi o-koo akpee nyí a/kwárê ne nyǐ ké abwô nyí Osówo.

⁶ Ké bubwô enen, ǎ bwǎn-bané ejí, me nn/kúng kángkáng byěm ḿbyín n-kan ké byiko ḿbyí Apólos ne ḿbyí ejí. Me nn/kúng byiko eten wǎ chwǒm ńkyí ben badatún ne ba-nyît, eringe nyí ben badanyît kyikû-chwǒm ńkyí ba/raa ba/fu, kû n̂g etî bachíchí-byije. Onet nang obónge ké burwám enen o*dachi o-kûtông byiko ké onet obónge* o-mîng mú áku*.

⁷ Yeě o/chi běn ben ba-rêe ba-shwôm banet ḿbé áku. *Chí Osówo nké o/kye běn kángkáng byěm ḿbyí ben bamu ne mbyí*? Ben ba-cen n nǎ kâng ne ba-kûtông byiko wǎ ńkyí bamu ne nkyí kyi*fí eyáré*.

⁸ Ben baa/firi ne kángkáng byěm ḿbyí bamu ba-ryuu ng. Ben ba/firi ne esang. Ben ba/firi batu, nang ké be byi*fí batu*. Kyi/mû kyi/chi kyi-nyîn mě! â ben ké ntûntû ba/mû batu, eringe nyí be to byi/mû byi/chi byi-kyú batu wǎ ben.

⁹ Ké ebóng, nkyi mě wǎ Osówo oo/yip nkuli kyikû-kyikit o-kye bě be mú banet-kyitwóm-Jisos wǎ banet ḿbé baa/két mpan o-bên kámbé ba/fu, bashwân kámbé ké otyém-oshê wǎ chwǒm ńkyí badatî kyíjí ba/fu, kángkáng barím ne kángkáng banet bari.

¹⁰ Ké dyishí ńdyí Karâs be byi-chi i enyam-banet. Nké ben ba-chi i banet-bubong ké ocibi ne Karâs. Be byimu kyeekyee, nké ben bamu shwaneshwane. Be mbe ba-kyâ bě edángé, nké ben mbe ba-kyâ běn ofê.

¹¹ Tete kyi-ribi ké dyicí ńdyí kurún, be byimu byi-waa ng esong ésong ne kyijé-omu. Be byimu byi-bwá ng bakâa-byídí. Banet mbe ba-mín n bě. Be byimu byi-yêe ng oyêe óyee.

¹² Be byimu byi-chi i bǎmkpóngé ne busa ne byi-nen byiko eten. Â banet ba/shú bě, byi-jware kámbé. Â ba/kye bě busông, byi-ryí ofit.

¹³ Â ba/kye bě edángé, byi-faa kámbé ne ejá nyí enong. Be byi/firi, ne byimu kántîk wǎ byiryíng ḿbyí ejíí ee/pwó e/fu, bii*nwa*. Be byi-chi i babat ḿbé ké ejíí tete dyicí ńdyí kurún.

¹⁴ Me n*fí n-sáng ng ńkyín n-kye běn n/fu, bafiri ne éshwân ké byiko*. Mu n-chi i kánkyí n/fu, n-kyâ běn bacê wǎ bwǎn-dyityém ḿbé ejí me oyén.

¹⁵ Ké ebóng, â nang ben ba/mû ne égot-banet nyí ee*nwa epan* nyí e/firi wǎ banchí enen ké dyikpen enen, ké ocibi ne Karâs, ben bamu ne bonchí obónge nké nke. Ké ebóng, ké dyikpen enen, ké ocibi ne Karâs, me n/firi bonchí enen ké Bǎmpém ḿbé Banong ḿbé m/ba běn esét.

¹⁶ Me mu n-tîm m běn arông kâng n/fu, kúng n̂g kyiká-édúú ńkyí ejí.

¹⁷ Ké dyishí-chwǒm ńdyín, me mu n-twóm m Tyímótyi oshê enen. Nyǐ mu wǎn-dyityém ejí mú mu o-fâ mě ké ocibi ne Otu Kyítá. Nyǐ o/chi o-zîim běn kyi-kim ne édúú nyí me n/kúng ké dyikpen ńdyí dyifyîfî, ké ocibi ne Jisos Karâs, nyí me mu n-tángê e ké kángkáng byise-ékwâbashi nyí Karâs nang nyá nang nyá.

¹⁸ Banet bakíri ké burwám enen ba-kú ba-tông ng byiko, ba-kabe ng ba/fu, me mm*ba/chi m-bâ m-ba-ri běn*.

¹⁹ Nké â kyi/nyîn Otu Kyítá, me n/chi m-ba-ri běn abeabe, ne n/chi n-ri kâng me oyén ńkyí bantông byiko ḿbén badaman echi, kii*waa ké ńkyí mbe ba-man n esét nké nke*.

²⁰ Ké ebóng, Butu ḿbú Osówo bu*fí chwǒm ńkyí ejá* nké mbu chwǒm-busa.

²¹ Kyirá kyida běn enyîn kyi-shwôm. Mbâ ne kachí n-kâm běn aa, aa mbâ ne dyityém ńdyí kyijé ne budegere.