1 Koríntyan 3 - Bokyi Bible

Bǎmgbán ḿbé Osówo

¹ Ké ntûntû, ǎ bwǎn-bané ejí, me n*da/man eraa ne ben wǎ eringe nyí mu n-raa ng ne banet ḿbé mbe ne Busun-Osówo ké dyityém*. Me n/raa ne ben wǎ banet ḿbé ké ejíí ńnyín, wǎ bwǎsíng ḿbé ba*da/kán ne ké dyityém efé ne Karâs*.

² Me n/kye běn abî-mpong, *chí byiryíng ḿbyí byidashwane* ké ebóng, ben ba/mû ba*da/kán ne mú badaryí kámbyí*. Nang kántîk, ben ba*da/kán ne mú badaryí kámbyí*.

³ Ké ebóng, ben ba/tôong ba-kyú u wǎ banet ḿbé ké ejíí ńnyín. Â orêm mu o-chi i běn ne barî, ba-shwôn n ne barî, ńkyín kyi*da/tông kyi/fu, ben ba-chi i banet ḿbé ejíí ńnyín*? ḿbé mbe ba-kyú u dyikpen ńdyí édúú nyí ejíí ńnyín*?

⁴ Â onet obónge ké burwám enen mu o-raa ng o/fu, me mu ké kyicê ńkyí Pôl, okíri o-raa ng o/fu, me mu ké ńkyí Apólos, ányi ben ba*fí ba-chi i édúú nyí banet ḿbé ké ejíí ńnyín dí.

⁵ Â ba/kpúrî kâng dííng, yeě odabángê Apólos. Ne yeě odabángê Pôl. Be byi*fí azong-banet akíri* kyi-cibi ne bǎmgbán-Osówo* ḿbé ba/tông běn kiǐfáng ńkyí ben ba/bángê ké Karâs*. Nang yeě nang yeě ké burwám eten mu o-chi i bǎmkpóngé ḿbé Otu Kyítá o/kye ǎ o/fu, ochi.

⁶ Me nké n/kwón osang-kyichí, Apólos o-pwó omu ké kaǎsín emen, nké Osówo nké o/chi kyichí ánkyi ne kyi-kán.

⁷ Kyi*fí ké bubwô ḿbú onet mú mu o-kwón n* ne mú mu o-pwó ng omu*. Osówo nké mu kiǐtí, ké ebóng, nyǐ nké mu o-chi i kyichí ánkyi ne kyi-kán.

⁸ Onet mú mu o-kwón n okwón ne mú mu o-pwó ng omu ba*da/yángê*. Osówo o/chi o-kye nang yeě nang yeě eyáré nyí e/kwárê ne bǎmkpóngé emen ḿbé oo/chi.

⁹ Ké ebóng, be byimu banet ḿbé ba/cibi ne barî mbe ba-chi i bǎmkpóngé kyikit kyibónge ba-kyâ Osówo, ne ben ba-chi i kyifát ńkyí Osówo. Ben ba-chi i to kyise ńkyí Osówo.

¹⁰ Me n/kúng eyáré nyí Osówo o/kye mě n-chi bǎmkpóngé ḿbé onet mú oo/kpí kyise ebi kanong kanong, ne o-sím byikû-ekpe o-fé kyísí, nké onet okíri mu o-bi ng kyise ánkyi ké byikû-ekpe ḿbyí me n/sím n-fé kyísí. Nké nang yeě nang yeě o-man o-nyît kanong kanong eringe nyí mu o-bi ng.

¹¹ Ké ebóng, Osówo oo/kúng Jisos Karâs o-tî wǎ kyikû-ekpe-kyise ńkyí kyikíri kyi*fí to* ne kyikû-ekpe-kyise kyi*fí to ńkyí ba/chi ba-chîsím ba-fé kyísí*.

¹² Banet bakíri ba/chi ba-kúng gûl nang syílyíba nang aká nyí adajang enwa, ba-bi kyise ké kyikû-ekpe-kyise ánkyi. Bakíri ba/chi ba-kúng byichí nang biǐbyâa nang aro nyí aa/jwóm.

¹³ Ne bubwô-bǎmkpóngé ḿbú nang yeě nang yeě o/chi bǎmkpóngé emen ba/chi ba-ri kámbú ké nkéré mú Dyicí ńdyí Karâs dyi/chi dyi-fîm kámbú dyi-tî kyíjí. Ké ebóng, okwâ mú Dyicí ándyi o/chi o-fîm bǎmkpóngé ḿbé nang yeě nang yeě o-tî kyíjí. Okwâ o/chi o-fwôo bǎmkpóngé ámbe, o-tông bubwô-bǎmkpóngé emen kyíjí.

¹⁴ Â ńkyí onet o/bi ké kyikû-ekpe-kyise ánkyi nké okwâ o*da/man eshí kánkyí* onet ámu o/chi o-koo eyáré.

¹⁵ Nké â bǎmkpóngé ḿbé nang yeě nang yeě nké okwâ o/shí kámbé, bǎmkpóngé ámbe ba/chi ba-tánê onet ámu. Nké Osówo o/chi o-nyii oyén-bǎmkpóngé ámbe wǎ onet mú oo/fem ké okwâ mú mu o-mang ng.

¹⁶ Ké ntûntû, ben bamu ba-nyît ng ba/fu, ben ba-chi i kyise-kyifen echi ńkyí Osówo, ne Busun-Osówo mbu běn ké dyityém.

¹⁷ Ké bubwô ámbu kâng, â nang yeě nké o/bên kyise-kyifen echi ńkyí Osówo, Osówo o/chi o-ju onet ámu. Ké ebóng, kyise-kyifen echi ńkyí Osówo kyi/já Osówo, ne ben bayén ba-chi i kyise-kyifen echi ńkyí emen.

¹⁸ Onet nang obónge o*dachi o-nîm byiko emen*. Â nang yeě ké burwám enen mu o-kabe ng o/fu, nyǐ o-chi i onet-byinyídíng ké édúú nyí ké ejíí ńnyín, onet ámu obírî enyam-onet, â mu o-ryuu ng o/fu, nyǐ o-kyú u onet-byinyídíng mú ntûntû.

¹⁹ Ké ebóng, ńkyí ejíí ńnyín nyi e-kabe ng e/fu, nkyi chwǒm-bubong kyi*da/byí chwǒm ké achi nyí Osówo*. Wǎ eringe nyí ejá-Osówo nyí ba/sáng kyísí e/sét e/fu, Osówo mu o-kám m banet-bubong ké byinyídíng ebe.

²⁰ Ne ejá-Osówo ekíri nyí ba/sáng kyísí e/chîsét e/fu, Otu Kyítá mu o-nyît ng o/fu, ekabe nyí banet ḿbé mbe ne bubong e*da/byí chwǒm*.

²¹ Nang yeě kâng o*dachi o-tông byiko ké ńkyí banet badaman echi*. Ké ntûntû, kángkáng byěm byi/já běn ben.

²² Pôl ne Apólos ne Pyíta ba/já běn ben. Ejíí ńnyín ne dyikpen ne bukyû ne nkéré mú kántîk ne mú mu o-bâ ké kashú, kángkáng ḿbyín byi/já běn ben,

²³ ne ben ba-chi i banet ḿbé Karâs, ne Karâs o/já Osówo.