1 Koríntyan 1 - Bokyi Bible

¹ Me Pôl mú Osówo o/kó mě ké okabe mú emen o/fu, me nkyú onet-kyitwóm mú Jisos Karâs, ne wǎn-boné eten mú odabángê Sóténes nké byimu byi-sáng ng léta mún

² byi-kye banet-ncibi mú Osówo ḿbé mbe ké Kórin, kángkáng banet ḿbé Osówo o/kó kámbé o/fu, bakyú banet emen, ḿbé mbe ḿbé emen ké ocibi ne Jisos Karâs, cibicibi ne kángkáng banet ḿbé mbe nang nyá nang nyá, ḿbé mbe ba-kó ng dyizîn ńdyí Jisos Karâs, Otu Kyítá eten, mú mu Otu Kyítá ebe ne mú eten to.

³ Kyi/bát Osówo Bonchí eten ne Jisos Karâs, Otu Kyítá bakye běn ochwâp ne bunyîn-dyityém.

Banjware ḿbé ba/fím ké Bubwô ḿbú Karâs

⁴ Me mu n-kó ng Osówo ejí asǎma kángkáng nkéré ké bubwô enen, ké bubwô-ochwâp mú nyǐ oo/kye běn ké bubwô ḿbú Jisos Karâs.

⁵ Ké ebóng, ké bubwô-ocibi ne Karâs, ben baa/fang ké kángkáng byěm, cibicibi ne kángkáng byiraa esét ne kángkáng byinyídíng.

⁶ Bǎmpém kyi-kim ne Karâs baa/nung běn ké dyityém kanong kanong

⁷ ḿbé ben ba*da/mîng ne ekoo banjware nang bará* ké eringe nyí bamu ba-bám m ba/fu, Osówo ochi Jisos Karâs, Otu Kyítá eten o-byí kyíjí gbúúl*.

⁸ Nyǐ o/chi o-chi běn to ba-kyú shwaneshwane tete kyi-ribi ké nkuli kyikû, eringe nyí ben baa*ba/chi ba-kyú ne ébîn ké Dyicí ńdyí Jisos Karâs, Otu Kyítá eten o/chi o-bâ*.

⁹ Osówo o-tî ng ocím emen mú o/ryí. Osówo mú o/kó běn o/fu, ben bakyú ké ncibi obónge ne Wǎn emen Jisos Karâs, Otu Kyítá eten.

Okyii mú mu ké Burwám-Banet-Ékwâbashi nyí Karâs

¹⁰ Me mu n-tîm m běn arông, ǎ bwǎn-bané ejí, n/fu, ké busa ḿbú Jisos Karâs, Otu Kyítá eten, ben kángkáng kyú n̂g ejá ebónge ké ńkyí bamu ba-raa ng, eringe nyí ben baa*ba/chi ba-kyii ne barî*. Cibi n̂g ne barî kanong kanong ne dyityém dyibónge ne okabe to obónge.

¹¹ Ké ebóng, banet bakíri ḿbé ba/fím ké kyikû-banet ńkyí Kólówe baa/sét mě wááng, ǎ bwǎn-bané ejí, ba/fu, ben bamu ba-shwôn n ne barî.

¹² Ńkyí mu n-raa ng nkyi něen. Ben ashí amúmú ba*fí ejá ebónge*. Mún mu o-raa ng o/fu, me mu ké kyicê ńkyí Pôl, okíri o-raa ng o/fu, me mu ké kyicê ńkyí Apólos, okíri o/fu, me mu ké kyicê ńkyí Pyíta, okíri o-raa ng o/fu, me mu ké ńkyí Karâs.

¹³ Ben baa/kyii Karâs ké byikim ké byikim dí. Pôl nké o/kye kyitông emen ké dyishí enen, ké kyikwap ńkyí badashwân onet dí. Ben ba/kye běn osoo mú Osówo wǎ bǎmgbán-Pôl dí.

¹⁴ Me mu n-kó ng Osówo asǎma, ké ebóng, me n*da/kye onet nang obónge ké burwám enen osoo mú Osówo* kyi-cibi ne Kyirísípus ne Gáyus*.

¹⁵ Onet o*fí mú odaman esét kâng o/fu, me n/kye běn osoo mú Osówo wǎ bǎmgbán ejí*.

¹⁶ Nké me n/kye Setefánas ne kyikû-banet emen osoo mú Osówo, ne mm*man to ezîim* â n/chîkye onet okíri*.

¹⁷ Ké ebóng, Karâs o*da mě etwóm o/fu, me mba-kye banet osoo mú Osówo*. Nké o/twóm mě o/fu, me mba-sét banet Bǎmpém ḿbé Banong, ne n*da/sét kámbé n-fé ejá nyí byinyídíng ḿbyí banet* eringe nyí busa ḿbú bukyû ḿbú Karâs o/kpú ké kyikwap ńkyí badashwân onet boo*man*.

Karâs nké mu Busa ne Byinyídíng ḿbyí Osówo

¹⁸ Ké ebóng, bǎmpém kyi-kim ne bukyû ḿbú Karâs o/kpú ké kyikwap ńkyí badashwân onet ba*da/byí chwǒm ké bushú-banet ḿbé mbe ba-tánê e ba-câ* nké be mú Osówo mu o-nyii ng bě, bukyû emen mbu busa ḿbú Osówo.

¹⁹ Ké ebóng, ejá-Osówo nyí ba/sáng kyísí e/sét e/fu, me n/chi m-bên byinyídíng ḿbyí banet ḿbé mbe ne bubong, n-tín byěm ḿbyí bannyît nwet mbe ba-nyît ng n-tî ké bukô.

²⁰ Ńkyín kâng kyi/byí nǎ kyi-kim ne bubong ne bannyît nwet ne bamman ekán okân ké dyishí ḿbé ké ejíí ńnyín. Osówo oo/tông o/fu, byinyídíng ḿbyí ké ejíí ńnyín, ányi enyam eróng.

²¹ Ké ebóng, ké byinyídíng emen, nyǐ o/chi o/fu, banet baa*ba/chi ba-man eyip byinyídíng ebe ba-nyît ǎ nyǐ*. Nké Osówo o/tî okabe o/fu, nyǐ o-nyii ng banet ḿbé ba/bángê ne nyǐ ne atyém ebe ké bubwô ḿbú bǎmpém ḿbé banet mbe ba-kúng ng kámbé wǎ ba*da/byí chwǒm* ḿbé be byimu byi-sét ng banet.

²² Banet-Jûs mbe ba-ryuu ng biǐtí-akat ne ba-bángê, ḿbé banet-Girîs mbe ba-kyé ng byinyídíng.

²³ Kyi-kim ne be kâng, be byimu byi-sét ng kyi-kim ne Karâs mú o/kpú ké kyikwap ńkyí badashwân onet bǎmpém ḿbé mbe ba-sa ng banet-Jûs dyityém ejwo, ne ba*da/byí chwǒm ké burwám-banet ḿbé ba*fí banet-Jûs*.

²⁴ Nké ké dyityém ńdyí banet ḿbé Osówo oo/kó kámbé, banet-Jûs ne ḿbé ba*fí banet-Jûs* cibicibi, bǎmpém ḿbén ba-tông ng Karâs mú mu busa ḿbú Osówo ne byinyídíng ḿbyí Osówo.

²⁵ Ké ebóng, chwǒm ńkyí nkyi wǎ enyam-chwǒm ńkyí Osówo odachi nkyi ne bubong kyi-shwôm byinyídíng ḿbyí banet, ne ńkyí nkyi wǎ chwǒm-bukyeekyee ḿbú Osówo kyi-shwane e kyi-shwôm busa ḿbú banet.

²⁶ Zîim m̂ kâng azong-banet nyí ben ba/mû, ǎ bwǎn-bané ejí, ké nkéré Osówo o/kó běn. Ké bushú ḿbú barî-banet, *chí ben ashí chwóó nké ba/mû ne byinyídíng* *chí ben ashí chwóó nké ba/mû ne busa* *chí ben ashí chwóó nké ba/mû biǐtí-banet*.

²⁷ Nké Osówo o/tigi ne dyityém emen, ne o-cá banet ḿbé ejíí nyi e-kabe ng e/fu, mbe enyam, eringe nyí odafé banet-byinyídíng éshwân. Ne o/cá to banet ḿbé ejíí nyi e-kabe ng e/fu, ba*fí ne busa* eringe nyí odafé banet ḿbé mbe ne busa éshwân.

²⁸ Nyǐ o/cá ḿbé ejíí nyi e-kyâ kámbé edángé, e-ciring ng kámbé e/fu, ba*da/byí chwǒm* eringe nyí odabên ńkyí ejíí e/kabe e/fu, nkyi kiǐtí-chwǒm.

²⁹ Eringe nyí kyidatông kyi/fu, onet o*fí nang obónge mú odatông byiko ké bushú ḿbú Osówo*.

³⁰ Nké Osówo oo/tut běn o-fé ké ncibi ne Jisos Karâs, ne nyǐ oo/chi Karâs o/fu, okyú byinyídíng ḿbyí eten. Ké bubwô ḿbú Karâs nké Osówo o/két mpan o-nwa bě, o-chi bě byi-firi banet emen ḿbé banong, ne o-chi bě byi-fem.

³¹ Ké bubwô ámbu kâng, wǎ eringe nyí ejá-Osówo nyí ba/sáng kyísí e/sét e/fu, nang yeě nké o/fu, nyǐ o-yip ng esim, o-man o-yip kányí ké byěm ḿbyí Otu Kyítá oo/chi.