1 Jǒn 5 - Bokyi Bible

Eringe nyí byidaman ekpógê Ejíí

¹ Nang yeě nké mu o-bángê e ne dyityém emen o/fu, Jisos o-chi i Karâs, onet ámu o-chi i wǎn mú Osówo. Nang yeě to nké bonchí mu o-jê ng ǎ, wǎn mú bonchí ámu to o-jê ng ǎ.

² Nkyí nké nang nkéré orá nké be byimu byi-tông ng Osówo kyijé, ne byimu byi-chi i ńkyí nyǐ o/fu, be byichi, ányi byimu byi-tông ng to kyijé ne bwǎn emen.

³ Ké ebóng, kyijé ńkyí byimu byi-tông ng Osówo, ányi kyi/byí, be byimu byi-chi i byěm ḿbyí nyǐ o/fu, byichi. Ne byěm ḿbyí nyǐ o/fu, be byikûchi, byi*fí byi-jang ng bě esóng*

⁴ ké nǎ, wǎn mú Osówo nang orá o-man n ekpógê ejíí. Dyityém eten ńdyí byi/fé ne Osówo nké byi/chi byi-cen ne byi-kpógê ejíí.

⁵ Yeě odaman ekpógê ejíí. Kyi*da/shwôm onet mú mu o-bángê e ne dyityém emen o/fu, Jisos o-chi i Wǎn-Osówo*.

Ntûesé kyi-kim ne Jisos Karâs

⁶ Jisos Karâs nké mu onet mú o/bê. Nyǐ o/bê ne omu mú osoo mú Osówo emen, ne o/bê to ne baróng ḿbé bukyû emen. Nyǐ o*da/bê ne omu nké nke* nké o/bê to ne omu cibicibi ne baróng. Ne Busun-Osówo buyén mbu bu-sét ng bu/fu, ńkyín nkyi ntûntû, ké nǎ, Busun-Osówo bu-sét ng ntûntû.

⁷ Bantûesé mbe ashí achât,

⁸ Busun-Osówo ne omu ne baróng, ne mbé ashí amúmú achât mbe ejá ebónge.

⁹ Be byimu byi-bángê e byěm ḿbyí banet mbe ba-sét ng. Byěm ḿbyí Osówo mu o-sét ng byi/rêe byi-shwôm, ne ńkyín něen nké Osówo oo/sét kyi-kim ne Wǎn emen.

¹⁰ Ké bubwô ámbu, nang yeě nké mu o-bángê e ne dyityém emen ké Wǎn-Osówo, onet ámu mu ne ńkyí Osówo o/sét ké kafâ-dyityém emen. Nké nang yeě mú o*fí o-bángê e ké Osówo ne dyityém emen* onet ámu oo/kúng Osówo wǎ nsêt kyisédéng, ké ebóng, onet ámu o*da/bángê ne ké ńkyí Osówo o/sét wǎ ntûesé kyi-kim ne Wǎn emen*.

¹¹ Ńkyín kâng nké Osówo o/sét. Osówo o/fu, nyǐ oo/kye bě dyikpen ńdyí ne banyá, ne o/kye bě dyikpen ńdyín ké bubwô-Wǎn emen.

¹² Nang yeě nké mu ne Wǎn-Osówo, onet ámu mu ne dyikpen ńdyín. Nang yeě nké o*fí ne Wǎn-Osówo* onet ámu to o*fí ne dyikpen*.

Dyikpen ńdyí ne Banyá

¹³ Me mu n-sáng ng běn ńkyín, eringe nyí ben badanyît ba/fu, ben bamu ne dyikpen ńdyí ne banyá. Ben mú bamu ba-bángê e ne atyém enen ké dyizîn ńdyí Wǎn-Osówo.

¹⁴ Be byimu ne dyityém ecíp ké bushú ḿbú Osówo, ké ebóng, be byimu byi-nyît ng byi/fu, nyǐ mu o-tî ng atông o-jwo bě, â be byi/bí ǎ nang ebóng chwǒm ńkyí kyi/kwárê ńkyí nyǐ oda bě ekye.

¹⁵ Nang ebóng ńkyí be byimu byi-bí ng ǎ, nyǐ mu o-tî ng atông o-jwo bě. Ké be byimu byi-nyît ng byi/fu, ńkyín nkyi ntûntû, byi-kú byi-nyît ng to byi/fu, nyǐ mu o-kyâ bě ńkyí be byimu byi-bí ng ǎ.

¹⁶ Â onet nang orá o/ri wǎn-boné emen o/chi kyibî ńkyí kii*ju busun* onet ámu ofé nshwam o-kye Osówo mú o/chi o-kye wǎn-boné emen ámu dyikpen. Ńkyín kyi/kim ne banet ḿbé byibî ebe byi*fí ḿbyí byidaju busun*. Nké kyibî nkyi kô ńkyí kyidaju busun. Me n*fí n-raa ng n/fu, ben fé n̂g nshwam ba-kye Osówo kyi-kim ne nkyí*.

¹⁷ Kángkáng byěm echi ḿbyí bii*nwa* ányi kyibî. Nké kyibî nkyi kô ńkyí kii*ju busun*.

¹⁸ Be byimu byi-nyît ng byi/fu, wǎn mú Osówo nang obónge o*fí mú odawaa ké byibî echi o-ca kashú* ké nǎ, Wǎn-Osówo mu o-tî ng ǎ kanong, ne Otu-Byibî-Barím oo*man ǎ enémê*.

¹⁹ Be byimu byi-nyît ng byi/fu, Osówo nké o/já bě, nang ké ejíí emúmú nyi ké bubwô ḿbú Otu-Byibî-Barím.

²⁰ Be byimu byi-nyît ng byi/fu, Wǎn-Osówo oo/bê, ne oo/kye bě bubong ḿbú chwǒm enyît, eringe nyí be byidakûnyît Osówo mú ntûntû. Akpen eten nyi ké Osówo mú ntûntû wǎ eringe nyi to ké Wǎn emen Jisos Karâs. Nyǐ nké mu Osówo mú ntûntû, ne mu o-kyâ dyikpen ńdyí ne banyá.

²¹ Bwǎn ejí, bám m̂ byiko enen kyi-kim ne bakye esháng.