1 Jǒn 4 - Bokyi Bible

Banet ḿbé mbe ne Busun-Osówo ne ḿbé ba*fí ne mbú*

¹ Bacín-dyityém ejí, *da n̂g ekûbángê ne nang yeě nang yeě mú mu o-sét ng o/fu, nyǐ mu ne Busun-Osówo ké byiko*. Nké kû n̂g ekpúrî kámbé kanong kanong ba-ri â Busun-Osówo nké banet ámbe mbe ne mbú. Ké ebóng, bamkpábé chwóó ḿbé badasét byisédéng éné wǎ mbé mbe ba-sét ng ké bubwô ḿbú Osówo baa/káng ejíí emúmú.

² Ké bukwóp ḿbún nké ben badaman enyît ba/fu, onet mu ne Busun-Osówo. Onet nang orá mú mu o-sét ng o/fu, Jisos Karâs o/bê wǎ onet, onet ámu mu ne Busun ḿbú mbu bu-fím m ké abwô nyí Osówo.

³ Nké nang yeě mú mu o-né ng ńkyín kyi-kim ne Jisos, onet ámu o*fí ne Busun-Osówo ḿbú mbu bu-fím m ké abwô nyí Osówo*. Dyizong-onet ándyi ndyi ne busun ḿbú mbu bu-fím m ké abwô nyí Onet-Bushwôn mú Karâs. Ben baa/jwo ba/fu, busun ámbu bu/chi bu-bâ, ne boo/ribi nyín kántîk ké ejíí.

⁴ Nké ben, ǎ bwǎn ejí, bamu banet ḿbé Osówo, ne ben baa/kpógê bamkpábé ḿbé badasét byisédéng éné wǎ mbé mbe ba-sét ng ké bubwô ḿbú Osówo. Ké ebóng, Busun-Osówo ḿbú mbu běn ké byiko mbu ne busa bu-shwôm busun ḿbú mbu ké byiko-banet ḿbé ba/já ejíí.

⁵ Mbé mbe ba-raa ng kyi-kim ne byěm ḿbyí ké ejíí, ne ejíí nyi e-tî ng atông e-jwo ng kámbé, ké ebóng, mbé ba/já ejíí.

⁶ Nké be byimu banet ḿbé Osówo. Nang yeě nké mu o-nyît ng Osówo, o-tî ng atông o-jwo bě. Nang yeě nké o*fí onet mú Osówo* oo*tî atông o-jwo bě*. Dyizong-bukwóp ḿbún kâng nké byidaman esét byi/fu, banet ḿbé mbe ne Busun-Osówo ba/yángê ne ḿbé ba*fí ne mbú*.

Osówo o-chi i Kángkáng Byěm ne Kyijé

⁷ Bacín-dyityém ejí, byi-man byi-kyú ké kyijé ne barî, ké ebóng, kyijé nkyi kyi-fím m ké abwô nyí Osówo. Nang yeě nké mu o-tông ng kyijé, onet ámu o-chi i wǎn mú Osówo, ne mu o-nyît ng Osówo.

⁸ Nang yeě nké o*fí o-tông ng kyijé* onet ámu o*fí o-nyît ng Osówo* ké ebóng, Osówo o-chi i kángkáng byěm ne kyijé.

⁹ Něen nké Osówo o/tông eringe nyí nyǐ mu ne kyijé ne be. Nyǐ o/twóm ncen-Wǎn emen ké ejíí, eringe nyí be byidakoo dyikpen ké bubwô emen.

¹⁰ Onet o-man n enyît eringe nyí be byimu byi-jê ng Osówo, *chí ké bukwóp ḿbú be bii/bwóp kpá kashú byi-tông byi/fu, Osówo mu o-jê ng bě* nké nkyi ké bubwô ḿbú be byimu byi-jê ng ǎ, ne o/twóm Wǎn emen, eringe nyí nyǐ oda bě epwoo byibî eten.

¹¹ Bacín-dyityém ejí, â něen nké be byimu byi-jê ng Osówo, be kâng byi-man byi-kûtông to kyijé ne barî-banet.

¹² Onet nang obónge o*fí mú oo/ri Osówo*. Osówo o-kyú u ké atyém eten, ne o-chi kyijé emen kyi-kwárê kerededet ké atyém eten, â be byimu byi-tông ng kyijé ne barî.

¹³ Bukwóp ḿbún nké be byimu byi-nyît ng byi/fu, Osówo mu o-kyú u ké atyém eten, ne be to byimu byi-kyú u ké ńdyí emen. Nyǐ oo/kye bě Busun emen.

¹⁴ Ne be bii/ri, ne byimu byi-sét ng banet bakíri to byi/fu, Osówo Bonchí oo/twóm Wǎn emen o/fu, okyú Onet-Onyii mú ejíí.

¹⁵ Nang yeě nké mu o-sét ng o/fu, Jisos o-chi i Wǎn-Osówo, Osówo o-kyú u ne onet ámu, ne onet ámu to o-kyú u ne Osówo.

¹⁶ Ne be bayén byimu byi-nyît ng, ne byimu byi-bángê e ne atyém eten ké kyijé ńkyí Osówo mu ne nkyí ne be. Osówo o-chi i kángkáng byěm ne kyijé, ne nang yeě mú mu o-kyú u ké kyijé, onet ámu o-kyú u ne Osówo, ne Osówo to o-kyú u ne onet ámu.

¹⁷ Osówo o-chi i kyijé emen kyi-kwárê kerededet ké atyém eten, eringe nyí be byidakyú ne dyityém ecíp ké Dyicí ńdyí Osówo o/chi o-pan kángkáng banet mpan. Be byi-kyú u ké kyijé ánkyi, ké ebóng, dyikpen eten ké ejíí ńnyín něen ndyi eringe ebónge ne ńdyí Karâs.

¹⁸ Bushî bu*fí ké kyijé*. Kyijé ńkyí kyi/kwárê kerededet kyi-ró ng kángkáng bushî. Ké bubwô ámbu kâng, Osówo o*da/chi kyijé ńkyí onet mú mu o-shî ng kyi-kwárê kerededet*. Ké ebóng, bushî bu-cen n ne busông eri.

¹⁹ Be byimu byi-tông ng kyijé, ké ebóng, Osówo oo/bwóp kpá kashú o-tông kyijé emen ne be.

²⁰ Â onet o/fu, me Osówo mu o-jê ng mě, nké onet ámu mu o-sa ng kafâ ne wǎn-boné, onet ámu o-chi i onet-kyisédéng. Ké nǎ, nyǐ oo*man etông kyijé ne Osówo mú nyǐ o*da ǎ eri ne* â wǎn-boné mú nyǐ mu o-ri ng ǎ o*fí o-jê ng ǎ*.

²¹ Kyije ńkyí Karâs o/kye bě kâng nkyi něen, o/fu, onet mú Osówo mu o-jê ng ǎ, wǎn-boné emen o-man o-jê ǎ to.